ديني حياتي🤍👑

اللهم قرب المحبين.. اللهم قرب المحبين!

انا عارفه اننا نفسنا نبقا من الناس اللي بتصلي ثلث الليل، أو نصف، أو حتي كله،
ولما نسمع عن الناس اللي بتصلي ب100 ركعة في اليوم، قلوبنا بتتخلع، وتلاقي قلبك هيموت من الغيرة، هيموت من الشوق انه يقف المدة دي كلها بين يدي الله...
أنا وانتم نفسنا نبقا من الناس اللي القرءان بيسهرهم الليل سواء في القيام، أو في الحفظ
نفسنا ندوق السهر علي متن من متون العلم، نعيد ونزيد فيه، نفسنا نفرح بحفظنا عدد كبير من أحاديث النبي..

نفسنا نسمع أذان الفجر كل ليلة واحنا علي المصلية قاعدين نستغفر في الأسحار..

الناس اللي بتعمل ده كله.. مش زايده ايد ولا رجل ولا عقل عننا يا جماعة..
الناس دي زايدة علينا جهاد وعزيمة..

جاهدوا نفسهم وشهواتهم..لأن سلعة الله غاليه.. ولأننا لازم نؤدي حق الله علينا..!

بس للاسف بقينا مبنصليش قيام مثلا غير علشان حاجة معينه عاوزينها..ندعي في ركعتين وخلاص..

طب جربت تقف تصلي وتقول يارب اهديني ليك!
يارب اجعلني ممن تحبهم وترضي عنهم!
يارب قلبي يشتاق لقائك!

جرب تختلي بربنا خلوة محب بحبيبه..

احنا بنسهر معظم الليل دلوقتي.. جاهد نفسك وقول هقف اصلي ساعه.. والعب ساعه يا سيدي.. مش هقولك اعتكف..

جاهد نفسك... كل يوم زود ساعه... ابدأو من النهاردة..متأجلوش!

اللهم قرب المحبين.. اللهم قرب المحبين!

_سوسن رضا