دفتر تدوين ليومياتي مرئي للجميع

استرجاع ذكريات

الصوره اني بس بوريكم اني بصير هيلثي
اليوم وانا جالس جنب اخوي اللي بالمتوسط وافطر
الا اشوفه بالمنصه
طلع اخوي للمطبخ يجيب له كذا حاجه ويرجع
وقفل ايباده
واذا قفل الايباد يطلعه من المنصه
المهم رجع اخوي ودخل المنصه
قام اكبر حروش بالفصل قال "استود فلان الفلاني توه جاء للحصه متاخر عطه تاخير"
واخوي جلس يهاوش ويقول قبل شوي مشارك عنده بس قفل ايبادي لاني كنت اكتب ملاحظه بالكتاب وكذا
بعدين الاستاذ كان متفهم وقال اوكي
لفيت على اخوي وقلت مين هذا الحروش وعلامه عليك
قال هذا اكبر زق وحروش بالمدرسه
مره كنت اببرد حرتي بواحد وجالس ادقه يوم شافني يركض للمدير
ويقول فلان الفلاني يضرب فلان
المشكله الحروش هذا اسمه حسام
وحافظ كل المدرسه الاسم الثلاثي عشان لما يحرش يذكر الاسم الكامل
بما ان فيه كثير تشابه اسماء المدرسه
اخوي يقول انه مره لقاه بالطلعه بالساحه يلعب بحبل واخوي مسكه وربطه بالعامود فيه على اساس يمزحون ويلعبون واخوي راح وتركه هناك
قلت وزعلان انه حاقد عليك؟ وانت بنظرك بس هذا شيء بسيط؟ ومايستحق يزعل عليه؟ ما الومه لو يحقد عليك
جلس اخوي يقول هو من يومه كذا وانا بصير معاه نذل
بعدين جلست انصحه ان غلط الاستقواء على الاخرين وهذي صفات المتنمرين
قال وهو صفات الحروشين بعدين أنا ما اتنمر بدون سبب وهذا مو تنمر هذي هوشه بيني وبينه وما استقويت جايه بنفسي ما جبت معي شله
وناسي ماضيك أنت
قلت اي ماضي !
وجو خواتي على الفطور وجلسوا يذكروني فيه

يقولون كنت شاري ايسكريم فانيليا ابو عامود وكانت حوالي ١٠ حبات  وحطيتهم بالثلاجه
وبنفس اليوم صارت عزيمه
وجتك اختي اللي اصغر مني بسنه وكم شهر
قالت ابي
قلت أنا لا
بعدين اختي رواسي هذي اول مره تستقوي !
هذي عادتها امام الضيوف الجديدين بالذات الاطفال تبي تفرض قوتها
وجت معها ايسكريمي وقالت شوفني اخذته وش بتسوي وكانت تلحسه
أنا على غير عادتي سكتت
بعدها بدقيقه
الا واخذت الايسكريم من يدها وحشيته فوق راسها
وخبصته بشعرها كله
يوم قالوا السالفه حسيت فيها كذب!
قالوا مو بس كذا
جت خالتي ضربتك عشانك غلطت على اختك
عصبت أنت
ويوم جاء وقت العشاء ماتعشيت من حر القهر وتبغى تنتقم
جلست تنتظر عند مغاسل الضيوف
لانك تدري ان رواسي اول وحده تغسل يديها وتشبع بسرعه
فجاه رواسي راحت تغسل
وكان الجوء هدوء والمعازيم ساكتين
الا ويسمعون صوت كف وصياح رواسي
وبعدها كذا كان انتقامي
بس احس هذا مو أنا ولا قادر اتذكر هذي الاشياء احسهم يألفون علي!
الشيء الوحيد اللي اتذكره
كان عيدنا فالكويت عشان خوالي هناك
وانا وولد عمي اتفقنا اللي يجيب اكثر عيديه هو الفايز والطرف الخسران يعطي الفايز عيدياته كلها
وانا كنت موسوس انه يفوز علي
بذاك العيد اطلب من كل شخص كل خمس دقايق عيديه
لدرجه خالي كل ماصعد الدرج اكون أنا جالس فيه واقول ابي دينار
اخر شي قال يالغثيث ماتشبع
قلت له
"على كثر راتبك يالحسود ماتبي تعطي؟!"
أنا فوق اني طرار اتشرط!