لِـقلبك🌚🦋

بارت4(الوقوع في الحب)

انا اسفه مقدماً على التأخير عشان الامتحانات وكده والبارت ده طلب +البارت ده هيكون طويل سيكا عشان اعرف اشرح الموضوع براحتى وافصصه حته حته +ملحوظه قلبوظه فى المعلومات النفسيه زى لغه الجسد او لغه العيون دى بتبقى معلومات فأنا بكتبها بالفصحى أما لو هشرح حاجه زى البارت ده وبارت الاكتئاب فأنا بكتب بالعاميه عشان دى اللى اغلبنا بنتكلم بيها واسهل فى الفهم +البنوته كانت كتبالى اكتب عن الحب الالكتروني واضراره وما إلى ذلك وانا عشان اتكلم عن الحب الالكتروني لازم الأول اعرف ايه هو الحب وايه هو الاعجاب وايه هو الوقوع في الحب ونأخد الموضوع من طقطق للسلام عليكم + انا هتكلم كلام مثبت علميا مع الادله العلميه مش كلام شعر وخواطر

امييييييين يا بنى ادميييين
حاسه اني بقيت رغايه سيكا
نبدأ بقى

هسأل فى الاول سؤال ممكن اغلبنا سألناه لنفسنا انا ليه حبيت فلان البعض هيقول انا حبيته عشان شعره حلو عينه جميله اسمر ابيض شخصيته قويه ضعيفه بيهزر مش بيهزر ممتاز في دراسته فاشل في دراسته طويل قصير بيروح الجيم مش بيروح الجيم والخ ويجى فى يوم وانت بتقرا خواطر بتقلب فى الفيس يلفت انتباهك مقوله (اصدق حب عندما تحب شخصا ولا تعرف لماذا أحببته) فتقعد تعند وتقول أنا مكنتش اعرف انا حبيته ليه بس انا قولت احط احتمالات وخلاص بس انا برضو بحبه حتى لو كان اقرع

والبعض التانى هيقول انا معرفش حبيته ليه تيجى فى يوم وانت بتقرا خواطر بتقلب فى الفيس يلفت انتباهه مقوله (اصدق حب عندما تحب شخصا ولا تعرف لماذا أحببته ) تقراها من هنا وفجاه تلاقى عندك جناحات وبطيرى وبتبقى مبسوطه بقى واخر انبساط وتقعدى  تتنططى وتقولى انا حبى صادق انا حبى صادق

السؤال بقى اللى مفروض اساله لنفسى انا ليه بحب اصلا مش انا ليه حبيت فلان
دورى كده السؤال فى دماغك ولو لقيتى اجابه اكتبى فى الكومنتات

الاجابه بقى

الإنسان زى ما لازم يأكل ويشرب عشان يعيش لازم برضو يحب ويتحب من اهله(وحطى تحت من اهله الف خط احمر) عشان برضو يعيش
مشاعر الإنسان زى بالظبط بنزين العربيه لازم العربيه تتملى بنزين عشان تمشى ولو العربيه ملاقتش بنزين يا هتقف ومش هتمشى         يا هتتملى بسولار بس مش هتمشى زى ما كانت مليانه بالبنزين
الإنسان بقى هو العربيه والخزان ده المشاعر الإنسان مولود وخزانه مليان بنزين اللى هو حب اهلك واليوم اللى هينقص فيه الخزان ومش هتلاقي بنزين هتلجىء للسولار اللى هو زباله العلاقات الفاشله علشان كده لازم يبقى خزانك مليان بالبنزين اللى هو حب اهلك و حب ربك

كده عرفنا أن لكل إنسان خزان وخزانه لازم يبقى مليان بالبنزين عشان ميلجأش للسولار

الوقوع في الحب(الهوس العاطفى)

من اسمه كده يبقى ايه الوقوع في الحب يبقى بقع فى حب حد ولما انا بقع بقوم وبتعلم من وقوعى وزى ما وقعت فى حب حد هقوم
يبقى كده الوقوع دى حاجه مؤقته لما يبقى خزانى فاضى وفى الحاله دى انا بكون معميه عن عيوب الشخص اللى واقعه فى حبه
مثلا ماما تقولى يابنتى ده كان مدمن وقعد خمس سنين بيتعالج واحتمال الأعراض الجانبية تظهر تانى فتردى انتى يا ماما الكلام ده كان من سنتين(المقصود من الكلام ده مش انى  اقلل من شأن حد ده مثال اقصد بيه أن الواقع في الحب بيبقى معمى عن عيوب المحبوب) والدكتوره "دوروثى تينوف" وهى عالمه نفسيه عملت أبحاث كتيره عن الوقوع في الحب واستقرت أن متوسط عمر الهوس العاطفى ده سنتين أما لو الحب متجدد ممكن يستمر لاكتر وفى اخر المرحله دى هتوصلى لاقصى مراحل السعاده وتنتهى الحاله دى وتنزل لسابع ارض بعد ما كنت فى سابع سما هتكتشفى وقتها أن فى حاجات فى شخصيته حاجات فى تصرفاته حاجات انا مش بطيقها ومن هنا بتبدأ المشاكل و اوقات بتوصل للطلاق وتقولى لا ده مش معقول انت اللى حبيته انت مبقتش زى الاول انتى مبقتش تخرجنى مبقتش ومبقتش وكالعادة لما تقعد تزنى النتيجه ايه هو جاى من الشغل هلكان وتعبان وقرفان فيرد يوووه انتى كل يوم زن زن ومبقتش ومبتنيلش اهو ده اللي عندى يا بنت الناس مش عاجبك لمى هدومك وامشى.
انا قدرت اوصل نفسى لكل ده واقدر برضو احمى نفسي من كل ده قرار واحد بس قرار واحد + شويه قراءه فى معلومات مفيده
حساكم مش مقتنعين وناس بتقول طب اعرف منين انى وقعت في الحب         
قومى هاتى ورقه وقلم وجاوبى على الاسئله يا ايوه يا لا
اول ما بتصحى من النوم بتفكرى فيه؟
قبل ما يتنامى بتفكرى فيه؟
طول اليوم بتفكرى فيه؟
مبيروحش من بالك نهائياً؟
حتى وانتى نايمه بتفكرى فيه؟
مش بتعرفى تركزى فى شغلك أو مذاكرتك بسببه؟
لو بعد عنك دقايق بتكونى هتموتى وتشوفيه؟
لو سمحتوا خليكوا صراح فى الاجابه واتعودى تكونى صريحه مع نفسك
طبعا اغلبنا أن مكنش كلنا جاوبنا بأيوه ده معناه انى واقعه فى الحب
فى جزء شك في الكلام عشان بقى تطلعوا مقتنعين 100%
دلوقتى انا قولت انك لما تبقى واقعه فى الحب مش بتشوفى اى عيوب فى الشخص اللى واقعه فى حبه والحب الحقيقي انك بتبذلى مجهود عشان تخلى اللى بتحبيه يكون احسن شخص فى العالم (مش المقصود هنا انى اغيره عشان أحبه لا انا بحبه بعيوبه وعارفه انو مثلا بيكدب فأنا عشان بحبه وعايزاه احسن حد فهحاول معاه عشان يبطل كدب) ولما تحبى حد ده بيكون باراتك وعقلك(الجزء المسئول عن الحب هو العقل مش القلب زى ما هو شائع)
مقتنع تماما بأن هو ده اللي بحبه
اما بقى فى الوقوع في الحب ده بيبقى شعور لا إرادى
وانتى بتبقى شايفه اللى واقعه فى حبه ده مثالى بالتالى مش هتبذلى مجهود عشان تخليه احسن من اللى هو فيه
وكمان حاجه زى مانا قولت فى الاسئله فوق انو لو بعد عنى بيوحشنى ومش بعرف أركز فى فى شغلى أو مذاكرتى تخيلوا معايا كده لو ده بقى حال العالم محدش بيبعد عن اللى واقع فى حبه ومحدش بيركز لما بيبعد عنه هل ياترى هيبقى فيه مخترعين علماء المجتمع كده هيقع اكتر ما هو واقع
اهم حاجه تكونى مقتنعه بكل كلمه اتكتبت

الحب الالكتروني

غريب دخل على صفحتى علق رديت على التعليق عجبه اسلوبى فى الرد بقى يتابعنى وكومنت يجر كومنت و تحت عنوان الصداقه بقينا نتكلم خاص ومعلومات عنى على معلومات عنه بقينا عارفين
مميزات بعض بس  اصل انا لو هكلم حد على النت مش هروح اقوله انا عصبيه يا فلان انا لسانى أطول منى يا علان انا غيرتى سودا يا بتنجان لا طبعا اتكلمنا خاص فهقوله انا طيبه جدا انا بسامح انا لسانى بينقط عسل واهم حاجه حاسب برطمان السعاده اللى بينقط منى ليزحلقك وانا اساسا كائن مكتئب احم احم احنا خرجنا عن الموضوع
بعديها انا حاسه بحاجه بتشدنى للشخص ده ومن غير ما حد يسمى عليا وقعت فى حبه بعديها انتى ساكنه فين انا ساكنه في............. ايه ده وانا كمان ساكن في.......... طب اوكى هنتقابل بكره فى **** الساعه ******  وغدا القاكى يا سعديه ونتقابل فعلا وممكن تحصل مع مرور الزمن تجاوزات تحت عنوان انا هطلبك من اهلك وهاجى اخبط بابك اطلب الحلال وطبعا كل ده كلام روايات وافلام
اصلا انا كشاب مصرى دمى شرقى مش هقبل أن مراتى تكون بتكلم شباب ويا عالم كلمت قبلى ولا لا
انا عايز واحدة تصونى مش اطلع من البيت وانا حاطط ايدى على قلبى لتكلم شباب غيرى ارجع ادور فى موبايلها ومفيش ثقه بينا اللى هى اللى بتبنى البيت مش الحب وطالما مفيش ثقه يبقى مفيش بيت واحده خانت ثقه أهلها وكلمتنى وخانت ثقه ربنا هتوقع منها ايه مش هتخون ثقتى
انا عايز واحده تربى ولادى على الصح وتعرفهم الفرق من الصح والغلط مش واحده كل حياتها غلط فى غلط

فى الختام بقى احب اقولك كلمه
احرس دائما أن يكون خزان الحب الخاص بك ممتلئا حتى لا تتعرض لكل تلك المواقف حتى لا يجذبني الشيطان لخيانه ثقه اهلى حتى لا يزين لى الخطيئه وافعلها كل الخطايا دى بتيجى من فراغى العاطفى وبعدى عن ربنا وبعدى عن اهلى

يا بنات الكتاب ده فيه حاجات كتيره مفيده اعملوا شير للكتاب عشان ناس تانيه تستفيد ممكن حد يكون عنده مشكله ويقرا الكتاب ده ويلاقى بأذن الله حلول لمشاكله

لو سمحتوا يا بنات انا بكتب فى فتره كبيره جدا عشان اقدر اطلع لكم البارت كده
انا بتمنى انى اشوف منكم دعم تقديرا لجهوده
واى حاجه عايزينى اكتب عنها قولولى فى التعليقات عن اسئلتكم

ايه رأيك في الكتاب بكل صراحه؟؟؟؟؟

# بقلمى ساره شريف