لِـقلبك🌚🦋

بارت 6 (أنا )

هسأل سؤال لو انا دلوقتى عندى عدو و عاوزه اتغلب عليه .. هتغلب عليه أزاى ؟
جاوب فى دماغك او فى التعليقات
اقولك انا تتغلب عليه ازاى
مش لازم عشان اتغلب على حاجه ابقي عارفها .. هل ينفع احارب عدو انا مش عارفه؟ لا طبعا لازم اكون عارفه فبالتالى عشان اتغلب على عدوى

"لازم ابقي عارف عدوى كويس جدا "

تانى حاجه بعد ما عرفت عدوى هأخدله صورتين 2×3 ولا هحاربه
همممم لا هحاربه اكييد بس السؤال هنا هحاربه ازاى ... اكيد مش بساطور عمو الجزار اللى جنبنا .. مش انا عرفت العدو و بالتالى نقاط ضعفه و قوته فهستغلهم و على حسب العدو و ازاى ههزمه و بكده تانى خطوه عشان اتغلب على عدوى هى

"اشوف السلاح المناسب لعدوى عشان اعرف اتغلب عليه "

مين بقي عدوى ده ؟

- أنا

هتقولى أنت عبيط يعم ازاى انا عدو نفسي
هديلك كوبايه لمون تهدى اعصابك و هقولك
أولاا  لما بتتعرض لكلام سلبي ... ايه اللى بيحصللك ؟؟

1- بتزعل و تكتئب و تشوف أنك فعلا كده و انك شخص مش كويس و عيوبك كتيره و مفكش حاجه عدله توحد ربنا و تكره نفسك

2- على عكس شخص تانى مش بيحط الكلام فى دماغه على أنه حاجه وحشه بالعكس بياخده بصدر رحب و بيشتغل بذكاء على عيوبه دى عشان تبقي أقل ضرر و يحولها كمان لمميزات و بيبقي عارف أنه كلامهم ده عشان عاوزين يوقعوه لكنه بيبقي فاهم و بيثبت أنه قوى

التفكير (1)ده واحد فكر بغباء و خد الكلام بسلبيه شديده و كره نفسه و اللى حواليه و بقي بيشوف الدنيا سوده

التفكير (2) ده شخص ذكى اهم حاجه عنده راحه باله و بيحب نفسه كحاجه طبيعيه و بدرجه معتدله و ليست بنرجسيه و مش عاوز يأذيها لانه عارف ان نفسه هى اللى هتفضل معاه للنهايه و عاوز يريحها

و من الطريقتين دول اوصل لحاجه مهمه جدا و هى

" كلنا بنتعرض لكلام سلبي و انتقادات حادة لأن البشر كده فمتلومش الناس لوم نفسك صح و أنتقدها صح و ليس جلد قاسي يكرهك فى عيشتك لا نقد يخليك تتغير للاحسن و تبقي أفضل لأن أنت اللى مسئول عن حزنك أو سعادتك مشش النااس "

ثانياً ليه بتشوف انك أقل من اللى حواليك و مش حلو ؟؟
هو أنت متعرفش أن ربنا خلقنا على صورته و مثاله ؟؟
هل ربنا صنع يديه مش حلو ؟؟
لكل واحد جمال بيميزه عن التانى جوهرا كان أم مظهراً
فيه الابيض
القمحى
الاسمر
الزنجى
اختلافنا تميز و ليس دليل على أن ده احلى من ده و لاب لاب لااا

طب يا ساره أنا وشي مليان حبوب
مالها الحبوب هل دى حاجه بتعيبك هل بتقلل من شأنك .. الناس لما تشوفك هتقول لاا ابعدوا عن دى وشها مليان حبوب

انا اتعرضت لحروق و لون جلدى بقي مختلف عن التانى
طب بلاش الناس لما نقف قدام ربنا ... ربنا هيحاسبك على شكلك ولا اعمالك ؟

عارفه لما تحبي نفسك هتجبرى الناس تحبك
حبي عيوبك و حوليها لمميزات عشان تحبيها اكتر
الناس لو لقت حد مش بيحب نفسه هيدوسوا على الجرح و هيحطوا ملح و خل و شطه كمان و احتمال يطبخوا مسقعه عليك
و كمان أنت .. أنت هتبقي تعيس و كاره العيشه باللى عايشينها
الشكل .. الجنس .. العيله .. الدين .. حالتك الاجتماعيه .. عمرهم ... عمرهم ما يعيبوك
أفتخر بنفسك .. حب نفسك ... متستناش من حد يحبك مادام مش بتحب نفسك
متستناش من حد يهتم بيك مادام مش بتهتم بنفسك ... عامل نفسك زى ما تحب الناس يعاملوك .... متجلدش ذاتك .. عاملها بلطف و وعيها و ثقفها ... و اهم من ده كله قرب من ربنا و أقرأ كلامه .. كل ما تشوف و تحس و تقدر النعم و حب ربنا ليك تلقائي هتحب نفسك ... أنت مميز فى عين خالقك
متسمحش لحد يقلل من حبك لذاتك

من فتره قرأت حاجه ضايقتنى جداا فوق مما تتصورا بتقول ايه

" انا مشوفتش علاقه توكسيك اكتر من علاقتى مع نفسى"

**توكسيك Toxic يعنى سامه

ليه أخلى علاقتى مع نفسي سامه
ليه اكره نفسي فى نفسي .. أنت غاوى هم يجدع أنت ... ليه مقفش فى المرايه و اشجع نفسي و ادعمها و احفزها .. أنتو مرايات بيتكم مخيمه ولا ايه ... خدى عهد على نفسك انك كل يوم خمس دقايق تقف قدام المرايا و تشجع نفسك و تواجه نفسك بعيوبك و تحسنها للأفضل

هات ورقه و قلم و اكتب الحاجات اللى أنت شايف انها مش حلوه فيك و ورقه تانى اكتب العكس زى

فى الورقه الاولى .. أنا عصبي
فى الورقه التانيه .. بس هحاول اتحكم فى عصبيتى و ابقي أهدى

ف الورقه الاولى ..انا حاسس ان شكلى وحش
ف الورقه التانيه.. هو ربنا بيخلق حد وحش ؟

و بعدين ولع أو قطع ورقه العيوب و بص للمميزات و اعمل عليهم عشان تصنع نسخه افضل من نفسك

فى النهااايه
قولولى استفدتوا ولا

# ساره شريف