لِـقلبك🌚🦋

بارت 8 ( المرض النفسي مش..)

عوده من جديد حبيت ارجع مع المدارس و الجامعات 😌😂
نبدأ الحفله بقي

انك تمر "بازمه نفسيه" و تبقي "تعبان نفسيا" مريت بحاجه صعبه أثرت على مشاعرك بطريقه سلبيه فردود افعالك سواء كانت بالكلام او بالحركه بقت سلبيه
ده مــش عـــيـــب
لما تعتذر عن عمل حاجه لان "نفسيتك تعباك" ده مــش عـــيــــب
مجرد ادراكك بأن مشاعرك اتجرحت بطريقه بشعه و ده مسببلك ألم دى حاجه كويسه جدا
لان الألم النفسي رده فعل طبيعيه تدل على انك انسان له مشاعر بيشعر بيها
زى بالظبط لما تقرب من النار فتتلسع
دى رده فعل طبيعيه ان مراكز الاستشعار فى الجسم بخير و شغاله كويس
"التعب النفسي" مــش عـــيـــب
لما تتعرض لحدث مؤلم و تتجرح مشاعرك شوف حد ثقه، قوى عاطفيا .. قادر يفهمك و روح قوله هيقف جنبك فى ازمتك .. فى أوقات تعبك النفسي متسبش نفسك لافكارك لأنها اغلبها افكار انتحاريه بشعه
لما تطلب المساعده ده مش هيقلل من كاريزمتك و جمدانك حاجه
و ده ان دل على شئ فبيدل على انك شخص ناضج و واعي
لما بتتعب جسديا بتطلب مساعده دكتور مختص هل ده بيدل على انك شخص ضعيف يا حرام مش قادر يساعد نفسه؟
لا  طبعا بيدل على انك مدرك بوجود مشكله فى جسمك
- لما فيه حاجه غير طبيعيه او الم مكنش موجود بقي موجود و بصوره مزعجه فكده فيه تغير سلبي حصل ف الجسم -
فـ تلقائي فكرت ازاى تعالج المشكله دى
- بانك اخدت قرار زياره دكتور-
و بعدين نفذت الفكره
- بانك روحت للدكتور-
و فهمت عندك ايه و مشيت على علاج فتره مهما كانت مدتها بانتظام و بعدين خفيت و رجعت عادى جداا لحياتك العاديه بعد رحله علاج
و فكره المرض النفسي هكذا و هو مش ااقل من المرض الجسدى بل يكاد يكون فى بعض الاوقات و مع بعض الأمراض اخطر و لازم تدخل طبيب فوراً
لو انت اخدت دور برد و طنشت و ماخدتش علاج حالتك هتزداد سوء و لما بعدين ربنا يفتحها فى وشك و تروح للدكتور هتاخد وقت اكتر فى انك تتعالج عن ما انك مكنتش عاندت و كنت روحت فى الاول فبدل ما كنت هتتعالج فى أسبوع هتتعالج فى شهر "على حسب ما انت عاندت و طنشت"
و المرض النفسي برضو هكذا كل ما تعاند و تتأخر كل ما هتاخد وقت و حالتك هتدهور

بالنسبه لكلام الناس
اولا الناس حتى لو خرسه هتلاقيها بتكتب و بتجيب فى سيره ده و ده فالناس ما هى الا حجه واهيه
ثانيا فلنفترض بانك مشيت ورا الناس و حالتك ادهورت و مثلا انت مصاب بمرض ذهانى (مصطلح يُطلق على بعض الامراض النفسيه أو الجسديه و هو أن المريض بيتخيل اشياء غير موجوده و بيسمع اصوات غير موجوده ) تخيلوا بس شخص مصاب بمرض زى ده و اتساب بدون رقابه طبيه ... يبقي هاتلى الناس اللى هتنفعك ... ده أن مقالوش مجنون!

نقطه حابه اوضحها اغلب الأمراض النفسيه عواملها الرئيسيه يا سببها جينات وراثية و لو من الجد العشروميه يا ادمان يا تغيرات فى كيميا المخ و على حسب كل مرض عن التانى بيبقي ليه هرمون معين لما مش بيادى وظيفته بالشكل الصح بيحصل خلل و بيسبب المرض النفسي ... التلات اسباب دول بعيدا عن اى اسباب تانيه و دخول ف تفاصيل كتيره جدا و باختلاف كل مرض و اسبابه عن المرض التانى
هل تغير فى كيميا المخ ده يتقال عليه جنون ؟ او العوامل الوراثيه اللى بينتج عنها تشوهات ف الجسد بعيدا عن الامراض النفسيه هل ده جنون ؟
او المدمن ده مجنون ؟
اكيد لا طبعا
و اخيرا المرض النفسي مش عيب و لما تلاقي نفسك تعبان نفسيا كلم حد ثقه مش شرط تكونوا قريبين كلم حد قوى عاطفيا مش هيعيط جنبك على اللبن المسكوب و يشيلك الهم اكتر ما انت شايله اصلا ... اللجوء لربنا مهم طبعا و لكن ربنا خلقنا فى حياه بعض عشان نساعد بعض .. و انك تقرا أو تشوف ملخصات كتب بتتكلم عن انك ازاى تواجه مشاعرك السلبيه و يلقي عندك وعى عاطفي دى حاجه مهمه جدااا
#ساره شريف