قسمة وحب

الجزء السابع عشر

راحت جوان واني وخاله سهير ظلينه حايرين شلون نحجيلها لبيبي
تغدينه وكملنه بيبي بس تسأل عليهم للظهر خاله سهير دمعت عيونها وبچت ماعرف ويه منو دتحجي اني قلبي نار خاف تتطلع بيبي من الغرفة وتشوفها
لو تسمع شي ظليت اراقب بس اني دموعي تجري اسرع واخذتني الصفنة لليوم الي اجانه خبر بابا وشلون حالي بيومها وما اشوف غير بيبي تكول ها مات ابو صادق وتضمون عليه اني جنت حاسه اكو شي لان اثنينكم غريبات والدمعة بعيونجن وظلت تصيح وتبجي يمه انكسر قلب بنيتي يمه بعدها حديثه يمه شلون بيها وحدها واحنه نهدي بيها وميفيد رأسن كالت اريد
اروحلهم بدلنه وطلعنه رأسن والطريق كوله مسكتوا على فد بجيه هيه وخاله سهير واني الوحيدة ملابسه بوشيه لذلك كلما تنزل دموعي امسحهم..

وصلنه للبيت ونشوف الباب مفتوحه والبيت هوسه والصياح والبجي دخلت اول شي بيبي وشافت خاله وحده تشبگ بالثانية والبجي يقوى والصوت يعلى اني شحالني وادور على جوان مشفتها رحتلها للغرفه وظلينه نبجي اثنينه لان ظلينه يتامى وماعدنه ابو..
بدوا الناس تزيد ناس ملتهيه تتطبخ وناس تجامل وكل مكان بالبيت متروس
وهوسة صار المغرب كالوا راح يجيبون الجنازة قبل الدفن وكلهن تحضرن بالطرمه بناته لابو صادق وجناينه وخاله وجوان والگرايب سمعنه صوت السيارات والركض صار للشارع و بالگوه رجعنه النسوان و دخلوا
التابوت للطرمه وظلوا يبحون وينعون عليه وجوان تصيح ليش عفتني بابا ليش عفتني وحدي ليش ليش وتبجي وتناشگ ..

اذكرت من جابوا تابوت ابوية ومقبلوا نفتحه ونشوف وجهه لاخر مرة ..

عده اسبوع على وفاة عمو ناس ملتهيه تروح يم خاله وفاتحة وناس التهت بالخطار الي اجوي يعزون واني كل الترتيب والتحضير موكفته لان ملتهيه وهم استحي من خالتي شتكول عليه واني ماعدي اي واهس لان عمو كلش عزيز عليه  وعلى الكل
بقيت ايام الفاتحة يمهم ومن خلصت رحت يم اهلي...

اليوم صار ٢٨ بشهر الخامس سنة ٢٠١٣ كاعدة صافنة بالبيت وحدي ماما جانت طالعة خابرت المغرب على زينه
- هلاو زينه شلونج حبيبتي ؟
- هلاوو بيج حبييتي الحمدلله انتي شلونج شنو دتسوين؟
- الحمدلله بخير محتاجتج وماعرف شنو اسوي
- كولي بشنو ؟
- الجماعة مابقى بس عشر ايام ويوصلون واني التهيت بفاتحة عمو ومكملة تحضيراتي وماعرف شيسوي هسه كومه نواقص ما مشتريتها  وكومه تنظيف وماعرف حايرة شسوي امي كلش حزنانه وما الها واهس بكلشي ساعديني
- على كيفج حبيبتي ميخالف تلحكين ان شاءلله شوفي اول شي جيبي ورقة وقلم وكتبي كلشي تردين تسوين
ويوميه سوي شغله شغلتين لحد متكملين وبالنسبة لامي اني احجي وياها لتشيلين هم شنسوي بعد هاي هم حضج اله نتنغص صارلنه شكد منتظرين نفرح بيج تالي صارت ويه موت عمو الحظ هسه همزين الحفلة يوم ٢٧ يعني طالع اربعينه بعد الله يسر.
- يارب اندعيلي والله خايفه
- هههههه لتخافين قابل يوم زواجج صدك وتخافين شو هيه كلها تمثيله وراح تلبسين بدله بيضه وتتونسين تالي كل واحد ينام بجهه هههههههه..
- عليج الله كافي تعرفين بيه اخجل واستحي ماحب هذا الموضوع لا اني خايفه من عنده هواية هواية
خاف ميعجبني او اني ما اعجبه اخاف يطلع كلش صعب ونحس اخاف عنده اشياء اني ماحبه
مادري ! شكد احبه ومن صرت بأسمه بس احسن غير شكل شلون راح يشوفني بدون حجاب مادري والله
- لتخافين وعوفيه على الله وهو الولد كلش حباب
راح يجي وتشوفي وتتعلقين بس اكثر كولي زينه كالت.
هسه لازم تحاولين تخلصين كل شغلج البيت يلمع لازم وتبدين تعتينين بروحج وجهج تعب كلش بايام الفاتحة لان بجي وماكو نوم كافي فشوية سوي خلطات وحطي.
- ان شاءالله حبيبتي والله كلش ارتاحيت من سولفت وياج الله يخليج الي ويفرحج بأولادج حبيبتي وان شاءلله اجي واصير قريبه عليج ونطلع ونطب سوه ونتونس..
- ان شاءالله حبيبتي يله اني بعد اروح هذوله خبصوا اهلي على فد صياح وعرك
- يله خطية براحتج حبيبتي نتواصل مع السلامة
- مع السلامة حبيبتي زنوبه