قسمة وحب

الجزء السابع

النتيجة مالتج ناجحه الحمدلله وبمعدل 85 مبروك يالشاطرة
-الف الحمدلله والشكر ياربي. مجنت متوقعه اليوم تتطلع النتائج هذا الخبر يجنن الف الحمدلله يلا وين هديتي ؟
- ههههه لا والله ؟ كافي اني خابرتج وانطيتج هيج خبر ماكو بعد هدية.
-لا انتظر الهدية مالتي تجيني لهنا يلا خلي اروح اخابر اهلي افرحهم وادز مسج لحسام بارحة سألني خطية.
- بعد ياابراهيم تريد تروح تلحگ تكتب للحب ، روحي عيني روحي واني هم اروح اشوف ابن خالنه واصدقائنا شنو النتائج مالتهم..
-تمام عاشت ايدك عالاخبار الحلوة يارب يوم الي نطلع هيج نتائج بالسادس واحسن معدلات يارب..
-اوكي نتواصل ان شاءالله ديري بالج على روحج وراح اشتاقلج لحد مااشوفج.
-كافي تحجي هيج حجي مو حجينا بالموضوع انساني ماافيدك ان شاءالله تلگه بنت الحلال الي تستاهلك سلمنا على خاله الله وياك باي..
-الله يسلمج انتي هم سلميلي على الكل مع السلامة.
لك الحمد والشكر يا ارحم الراحمين بيبي بيبي اني نجحت الحمدلله وبمعدل زين.
حبيبتي يممه الف الحمدلله فرحتيني ومضاع تعبج بلاش الف الحمدلله يارب يديم الضحكة على وجهج الحلوو..
-الله يخليج اليه ياأحن بيبي بالدنيا احبج كلش هواية خلي اخابر امي افرحها خطية.
خابرت امي وكلش فرحتلي وكالت لازم نجي اني وامير وحسن واحمد نشوفج كتلها لاماما اني اجيكم ان شاءالله
بعدين اخذت التلفون ودزيت رسالة لحسام وكتله انتظرك تخابرني اليوم لان هواية مشتاقتلك..
ماكو اقل من ساعة جنت كاعدة اني وبيبي ودنتفرج تلفزيون جان التلفون يدك مال بيبي فشفت رقم غريب كلت اكيد هذا حسام
بيبي ظلت تسألني منو الي يدك كتلها بيبي صديقتي هاي وطبيت للغرفه فتحت التلفون وجان اسمع صوته يكول الو مااعرف شصار بيه مشتاقتله من زمان مسامعه صوته اريد اشوفه بعيوني مو بس بالتلفون مشتاقه اشبگه واحجي وياه وجهاً لوجه.
-سلام عليكم يا اهلاً وسهلاً بالسيد شلونك ؟ عيني مشتاقين
اهلا بيج عيوني الحمدلله بخير انتي شلونج ؟ مبروك النجاح ان شاء الله تجين هنا وتاخذين دكتورا.
-الحمدلله بخيرالله يبارك بيك عيوني تسلم بوجودك ويايه ، شخبارك احوالك شلون جان يومك؟
اني الحمدلله زين ويومي هم الحمدلله مابي شي خاص اليوم عدنا  خطار عالغده لذلك مااكدر اطول
بس حبيت اباركلج الو انتي ويايه شو ماكو صنطه؟؟
- اي اي حبيبي وياك بس جنت داحاول اخزن صوتك مشتاقتلك هواية لتطول عليه خابرني.
ماشي عيوني ان شاءالله ديري بالج وان شاءالله نتواصل بالخير سلامي وتحياتي للجميع..
-الله وياك حبيبي ان شاءالله  وانته هم ديربالك على روحك وسلملي عالجميع في أمان الله.
سد التلفون واني قلبي وعقلي بقه وياه ظل بالي عليه واحبه ومشتاقتله ومااعرف شوكت اشوفه ظليت لازم اصبعي الي بي الحلقة لحد مااسمع بيبي تصحيني هاي وين يمه صارلي شكد اصيح شنو متسمعيني ؟
-عذريني بيبي ما سمعتج شنو أمريني ؟
يلا سويلنه العشا جعت اني وبعد شوية تبدي المسلسلة علمود نكمل قبلها .
-حاضر بيبي من عيوني هسه ثواني ويكون العشا يمج ، رحت عالسريع للمطبخ وللضحكه تارسه وجهي وادنن اغاني ، مال اليسا على حبك فتحت عيوني جانت هاي الاغنية رفيقتي لان صدك احس على حسام فتحت عيوني للدنيا وللحب ولكلشي حلو احبه مااعرف ليش احب كل تفاصيله معلگه صوره بباب الكنتور وحاطه وحده جوه مخدتي قبل لا انام اتفرج عليه واسولف وياه واشبگها وانام.
مرت الايام رحت لأهلي وحجيت ويه حسام شكم مرة بالايميل ، ونطلع ونتونس اني وامي ونروح زينه وهي هم تجي ، فد يوم كاعدين ودتنعشه اني وماما والولد جان أمير يكولي زنوبه كومي جيبي هذا الجهاز الي على البوفيه ، الرف الي قبل الاخير.
تعالي بصفي هنا تفضل هذا الجهاز الج اني وعدتج من تنجحين انطيج تلفون هذا الج والله يمكني واخذلج الاحسن.
صفنت بوجه معقوله وفى بالوعد مالته وانطاني التلفون كلش فرحت شبگته..
- حبيبي الله يخليك اليه ويحفظك يارب شكراً جزيلاً فرحتني كلش يارب يرزقك ونفرح بزواجك ويارب كل التوفيق.
حبيبتي انتي تستاهلين كلشي حلو مثلج ويخليكم اليه انتوا اهلي وناسي ماعدي غيركم الله يقدرني افرحكم دائماً والله يرحم ابوية وبأعلى الجنان ان شاءلله.
اني دمعت عيوني لان ذكرنه ابوية ، كملنه عشه غسلت الأطباق
طبعا اني منمت رحت للفراش دزيت رسالة لحسام.
مساء الخير حبيبي شلونك مشتاقتلك كلش هواية اني يم اهلي صارلي يومين وهذا رقمي صار عدي تلفوني الخاص امير انطانيا هدية نجاحي☺️شوكت متريدني تلكاني هنا😆 دير بالك على روحك ونتواصل بالخير يارب ❤️😘
بعدين ظليت افكر بي لحد مانمت واسمع اغاني بتلفوني لحد مانمت..
كعدت الصبح بوجهي على التلفون  اشوف شكو ماكو وجان اتفاجئ بشي كلش حلو
الثواني صارت عليه شطولها اريد بس افتح التلفون  واشوف شنو دازلي

"صباح الخير بتوقيتج عيوني ، اني الحمدلله زين
انتي شلونج اخبارج ان شاءلله بخير ؟
كلش زين  الف مبروك التلفون الجديد
وان شاءلله تسمعين الاخبار الحلوة بي
نتواصل بالخير ديري بالج على روحج تحياتي.."

فرحت هواية لان مجاوبني بس بنفس الوقت حسسني الرسالة رسمية هو حقه مشايفني وهناك يمه اشكال بنات واكيد حلوات ومعتنيات بنفسهن ، بس اني احبه من يجي ويشوفني اكيد يغير رأيه واسلوبه اكيد يحبني من يعرفني عن قريب مو بالتلفون بعدين لعنت الشيطان من هاي الافكار ، ورجعت لفرحتي.

في يوم من الايام جنت جالسة على المرجوحة ويمي اسراء بت جيراننا وجان يجون بيت اختها لأسراء اني بعد راساً سلمت وطلعت منهم احنه باب بصف باب جان اشوف ابن جيران الي مقابيلنه واگف بصف الباب مالتنه ومن شافني جان يكول صارلي كومه منتظرج ليش اتأخرتي مشتاقلج
تفاجئت بالحجي مالته هو صح صارله فترة انتبه من اجي يم اهلي احسه يراقبني كلما اطلع واطب بس معبالي راح يتجرأ وهيج يحجي ويوكف عفت كل الافكار واستجمعت قوتي وجاوبته ..
-انته شخص ماعندك اخلاق شلون تحط عينك على جيرانك، موعيب عليك هذا الحجي تقبل امير يتحرش بأختك؟بس حقك لو تعرف العيب متسوي هيج اليوم اگلب الدنيا واحجي امير واخلي يعرف يجاوبك..
- كافي نصي صوتج اني معجب بيج وماعدي غير نية اريد بس احجي وياج هذا رقمي راسليني.
اخذت الرقم مزقت الورقة وشمرته بوجه وطبيت للبيت ، رحت اركض لامي حجيتله وهيه ظلت خايفه عليه وكالت اذا تحجين لامير خاف تصير مشكله تعرفي عصبي عوفي يمه اني باجر اروح لامه واكولها وانتي خوش جاوبتي عوفي الباقي يمي..
طبيت للغرفه ابجي جان اسمع تلفوني يدك فتحت لگيت رقم غريب شلته وجان اسمع صوت زينه فرحت كلش داسولف وياها وجان يجي اشعار رسالة مكتوب نتخابر بليل؟؟؟