قسمة وحب

الجزء الرابع عشر

الحمدلله طلعت الشقة لأهلي.
باركت لأمي ولأمير وخابرنه اني وبيبي على محمد زوج زينه واتشكرنه منه لان مقصر خطية تعب هواية صارله شهرين يركض بيها.
كاعدين نسولف وجان يكول اموري بس نستلم المفتاح ننتقل ان شاءالله.
كلش فرحت لماما لان خطية جانت كلما نمر من يم الشقق تكول شفايتلنه نحصل وحده بيها خطية شفت بعيونها الفرحة.
رحت حضرت العشه وماما وبيبي ويايه بالمطبخ.
-يمه زنوبه باجر نروح لبابا للمقبرة تجين؟
- اي والله يمه كلش مشتاقتله ياريت بس حبابه ماكدر اغيب انتي كوليله لأمير يجي عليه من اكمل دوام حبابه..
- صار حبيبتي اني احجي وياه ، احجيلي شنو سويتي على المره حصلتي وحده تسوي شغلات المهر؟
- لا والله بعدني وشايله هم هسه بنهاية شهر الثاني وبعدني ممحضرة شي شلون بيه مادري؟
- كولي يالله يمه شعدج انتي قابل؟ هنه بعد شكم طلعه للسوك نكمل شغلاتج ونجهز جنطة حسام ، والقاعة خابرنه عليهم وانطونه حجايه
لان يعرفون امير بس كالوا قبل شهر حددوا اليوم بالضبط وباقي الشغلات قريب جيتهم نكملهم ان شاءالله لتشيلين هم بنيتي كلشي يكمل ويصير مثل متردين واحسن.
رحت شبكتها وكتلها الله يخليج اليه ياست الحبايب.
- اي عيني قشمريني بهذا الحجي الحلو..
يلا خلي نكمل العشه خطية بيبي تضوج هسه.
كعدنه نتعشه وخالو فاضل هم اجه سوالف وحجي اشكال واحمد يكمز منا ومنا ويحط روحه بكلشي..
صارت ساعة 12 اترخصوا كالوا باجر دوام نروح ننام شكم ساعة.
خلص الدوام ثاني يوم لكيت امير جاي وكاعد ينتظرني على السريع بدلت وبوست بيبي وطلعت وياه
وصلنه للمقبرة
يابه حبيبي تسمعني بنيتك راح تصير عروسه تمنيت انته موجود وتسلمني
لزوجي بيدك تمنيت اكشخ بيك كدام الدنيا واكولهم هذا ابويه!
- وج كافي كومي راحت عيونج من البچي
اسمع صوت امير يحجي ويايه بس ماريد اكوم اريد ابقه احجيله اريد ابقى واشهك وابجي بوية ليش يتمتني ليش بويه مو بعدني صغيرة محتاجه حنانك تذكر بابا شلون جنت من اروح للمدرسة وانته تسويلي اللفه وتنطيني المصروف وتوكف بالباب لحد ما اعبر الشارع.. جان بيوم اجتماع الاباء يجي فرحان لان اني شاطرة وحبابه.
انقهرت اكثر من سمعت امي تنعي وتبجي بحركة اذا يجي واحد غريب يكول هستوه ميت
بعدين اسمعها تكوله اندعي لبنيتك يسهل امورها ٬ عيالها حيجون ويعقدون عليها تمنيت انته حاضر وانته تنطيها بيدك لعلي ولحبيبتك افنان شلون جنت تحبها وكله تصيحلها افنونه وافنونه هسه بنيتك حتصير جنتها تمنيت تحضر وبيدك تزفهم لا فرحت بشوفة حفيد هيج نمت هنا وعفتنه ليش يا حبيبي ما اشتاقيتلي ؟ ماشتاقيت لحبيبتك ؟ شلون انطاك قلبك هلكد تعوفني؟
سمعت امير يكول يله خلي انظف القبر ونعلگ الشموع وصدك نظفوا هو واحمد واني وماما رحنه قرينه فاتحة لجدو لان بصفه ولكرايبنا
اجينه شفنه القبر شلون نظفه كعدنه نفتح الشموع وبعدين ودعناه وعفناه وحده ورجعنا لحياتنه.

الايام احسها متمشي صارت بالرغم بعدني ممكمله بس اريد بسرعة يجي الوقت واشوفه صح كثرت التلفونات بيناتنه والرسائل بالرغم من هذا واني كلي اشتياق ولهفه اله.