قسمة وحب

الجزء الثاني عشر

تعودت بأخر فترة اشوف امي يوميه هي وزهراء ، كلش اشتاقيتلهم خاصة زهراء من سافرت هواية اتأذت ماما لان كلش تونست وياهم وصادف اول عشرة محرم موجودة بحيث كله سوه المجالس والمواكب والزيارات بس شنسوي لازم نتعود على فركتها مرة ثانية..

ليل و وقت متأخر وكاعدة ادرس و الجو بارد واني ماحب البرد مكابله الصوبه النفطية وعليها الجاي وكل شوية اصب واشرب وأكل وياه كعك ابو الدهن لو كليجة جبتها ويايه من المجلس علمود ابقى صاحية.
لازم اكمل اليوم الدراسة علمود باجر اكون مسيطرة من اروح للمجلس العصر ويه بيبي وماما وبليل نروح للزيارة ونشوف المواكب لان ليلة جمعة. رحنه اني وماما وطريق كلش حلو كله صوت القصايد وناس تصيح "چاي ابو علي " ماشاء الله المواكب الحسينية في كل مكان وهاي عود اليوم عشرين بمحرم. اخذت صور من ارجع للبيت ادزهم لحسام خطية احسه يفرح من ادزله صور يم الحضرة.
دنتمشه اني وماما وجان نشوف عمو ميثم وخطية اله جلب بينه نروح يمهم للبيت وخطية ماما كالت خلي نروح فد نص ساعة
طبينه يمهم وكلش فرحوا بينه اني كيفت عدهم نت رأساً كتبت لحسومي
"سلام حبيبي شلونك ؟عظم الله اجوركم ، مشتاقتلك هواية شلونها المجالس يمكم؟
اني اليوم اجيت للحضرة اندعيتلك كومه واخذت صور هسه ادزلكياهن
مكانك جداً خالي يارب يوم الي تجي ونروح نتمشه سوه للزيارة
اعتذر دوختك بس لان اجيت لبيت عمو ميثم فكلت اكتبلك ، احبك هواية
دير بالك على روحك"
كتبت لحسام بس ماعنده نت ماعرف اكيد مشغول بالمجالس اكيد من يشوف المسجات يجاوبني.
رجعت للبيت بوجهي على دراستي اليوم كله مجالس لازم اقره هسه قبل لا انام مادري شلون راح اقاوم نعسانه كلش وتعبانه.
صارت بالوحدة ونص بعد استسلمت حضرت جنطتي وطبيت انام جان الكه حسام تاركلي رسالة
"يا هلا علويتنا الغالية اجوركم اعظم واحسن الله لكم العزاء.
اني اعتذر منج اعرف مقصر وياج وملتهي عنج وما اتصل بهل الفترة
بس والله كلش ملتهي بالمجالس والهيئات والمواكب عذريني
هسه ادزلج صور ومن يصير عدج نت شوفيهن.
دزيتلج هنا على المباشر علمود ليظل بالج علييه وهم لان شفتج ماعندج نت
ديري بالج على روحج
واهتمي بدراستج زين ونتخابر بأقرب وقت.."
اقره الرسالة وابتسامتي شطولها ، معقوله هيج مهتم بيه ويتعذر لان ممخابرني صارله فترة الحمدلله والشكر احس مشاعره بدت تتغير ياربي وكلت أمري لك اني يتيمه وعلى نياتي اريد بس اعيش سعيدة ويه زوجي احبه ويحبني ماريد علاقة زوجية عادية لو حب من طرف واحد. صارت الساعة الثالثة فجراً واني ماكدر انام اتوسل اريد انام ماكو لحد ما اذكرت صور حسام الجديدة اخذت التلفون وفتحت نت على الرصيد وصلن الصور وجان اشوفه لاول مرة بزي العزاء (الدشداشة السودة والغتره الخضرة) ماشاء الله ، تبارك المصور الجميل يخبل طالع ظليت ابوس بالصور واصفن بجماله وجمال عيونه وشفايفه يربي شوكت التقي بهل العيون الحلوة ولكيت كاتبلي على الصور مالتي.
"منورة علويتي الجميلة الله يحرسج حبيبي"
عزه  بعيني معقوله هذا الي  قريته لو خاف اني نايمة؟!
معقوله هيج كاتب اول مرة يتغزل بيه حسيت قلبي يريد يوكف من الفرح اريد اهدي روحي واضحك بصوت عالي بعدين
صحيت على نفسي شداسوي اذا بيبي كعدت شراح اكولها ليش لهسه سهرانه وليش وليش وليش. طبعاً يامن يجيب الصبح حته اروح للمدرسة واحجي لهاجر ، ماكدر اضم عنها شي احجيلها كلشي
طلع الصبح وبوجهي عليها حضنتها قوي واضحك واغني
- يا ستار ياربي شصاير من صبح الله ؟ اول شي عوفي الاغاني
شنو نسيتي شهر صفر وبعد شكم يوم الاربعين.. يلا هسه كوليلنه شكال احبج لو اجه وشفتيه؟
- لا لا لا منسيت استغفر الله ربي سامحني.. لا مو هل الدرجة حبيبتي شفايتلي سمعي اني مو حجيتلج صارلنه فترة منتحاجه لان اثنينه التهينه مجالس ومواكب واني دراسة فالبارحة رحنه للزيارة اني وماما وبعدين دزيتله صور وكتبتله رسائل وكتله مكانك خالي المهم من هذا كله هو بليل جاوبني هم هو خطية ملتهي وظل يتعذر ويكول مقصر وبعدين دز رسالة من شاف صوري كال " منورة علويتي الجميلة الله يحفظج حبيبي " شنو رأيج؟ هواية تقدم وهواية اكو تحسُن مو؟
- بس هيج كال؟؟ مكال احبج ؟ مكال مشتاقلج؟
- لا
- انتي مخبله ؟؟؟
اذا يكولج احبج شتسوين تموتين من الفرح والله الي يشوفج يتعجب الله يهديج يارب..
- غير احبه تدرين صارلي شكد وياه مسامعه غزل مشايفه اهتمام من قبله يعني هو حس صارله هواية محاجين لذلك اعتذر وكال مقصر
هذا يفرق عدي يعني بده يحس بيه...
- اشاقه وياج حبيبتي ويارب دائما فرحانه والله يهديه عليج واشوفج اسعد انسانه بالدنيا كلها واسعد زوجين بالعالم...