قسمة وحب

الجزء الثاني

وكلت ماريد زواج رحموني بعدني صغيرة ، اريد اعيش حياتي ، ماريد اربط نفسي بشخص ماعرفه ، كلش تأذيت ورأسي كام يوجعني من الكلات والبچي وماحسيت بعدها بشي.
فتحت عيني شفت الكل يمي واني نايمة على السرير وكلهم داير مدايري امي تبجي وخايفة واسمع خالتي تكولها لتخافين
هي اليوم مماكله واتأذت وبچت لذلك داخت وماعت روحها هسه تكعد ولازم تأكل.
شافوني فتحت عيني، فرحوا هواية وظلوا يكولون لتخافين حبيبتي مابيج شي اني مجاوبت بس اباوع عليهم  شفتهم كاعدين يمي واختي لازمة بيديها عصير برتقال وماما بيدها نستلة  يلا أكلي لان صار عدج هبوط بالسكر اجتي امي بصفي وكعدت توكلني.
أكلت وبعدها بديت اتحسن شوية شوية كلهم طلعوا من الغرفة وبقيت وحدي ارتاح وافكر بالي صار ويايه ليش هيج وكعت وماحسيت ظليت افكار تجيبني وتوديني ومادري وغفيت ونمت نومة عميقه صارلي ايام منايمة هيج .

اليوم جمعة وعطلة كعدت الصبح   لكيت بيبي كاعدة ،صباح الخير والسرورعلى احلى بيبي بالدنيا.
بيبي : صباح النور يمه بالي يمج شلون صرتي ليش تخلين بالي يمج .
أني : الحمدلله زينه  ببركة دعائج يالغالية، تريكتي لوبعدج؟
بيبي: لايمه بعدني قبل شوية كعدت  مصارلي هواية.
أني: هسه اغسل واروح احضر الريوك ونأكل سوه اني كلش جوعانه.
مااعرف ليش احس اليوم يختلف عن باقي الايام كعدت مرتاحة ولا عبالك جان اكو شي البارحة ، رتبت غرفتي طلعت لگيت بيبي كاعدة واني فرحانه واسولف وطبيت للمطبخ وبديت بتحضير الريوك  و اني اندندن بهاي الفترة جنت قاطعة الاغاني فجنت اقره اناشيد  وكملت الريوك واخذته للهول كعدنه اني وبيبي نأكل.
بيبي: يمه خابرت والدتج وكالت راح يأمر امير يأخذج ترحين يمهم وتباتين اليوم هناك لان يردون باجر تطلعون تروحون للحلة.
أني: لعد وانتي حبيبتي تعالي ويانه شوية تغيرين جو واحسن مما تبقين وحدج.
بيبي: لا يمه شيوديني اني مالي خلك تتدرين بيه مااحب اطلع هيج لو زيارة جان جيت وياكم روحوا واتونسوا واني لتخافين ماعليه شي وهسه اخابر على بيت خالتج ادز واحد من اولادها يبات يمي .
صدك گمت وعزلت ونظفت البيت وغسلت الهدوم وسبحت سبح يوم الجمعة ، ومن طلعت  من الحمام خابر امير كال نص ساعة ويمكم اني .
على السريع رحت بدلت وحضرت نفسي واخذت ملابس ويايه لان راح ابات يمهم بعدني داحضر و سمعت الباب  اندگت رحت فتحته اجه امير اخذني بحضنه وكلي ليش هيج متسألين على اخوج مشتاقلج ومشيت اني وبحضنه لبيبي بأس رأسها وايدها  وسلم عليها وهم گلها ليش بيبي تبقين وحدج ليش متجين ويانه والله نتونس وياج عيوني .
طبعاً بيبي جاوبته نفس الجواب
قطعت حجايتهم وصحت اني مكملة يلا نروح بيبي ضحكت عليه لان تدري بيه احب اطلع واتونس
امير : يلا خلي نروح ، بيبي من رخصتج حبيبتي عندج العافية وديري بالج على صحتج.
أني: بيبي حبيبتي ديري بالج على صحتج ولتظلين تكومين وتكعدين واني اخابرج أطمن عليج.
بيبي: لتشيلين هم يمه روحي واتونسوا الله وياكم .
طلعنه وصعدت بالسيارة وامير جان مشغل اغاني واني اسوي روحي مااسمع لان صارلي شكم شهر عايفة الاغاني .
صافنه بالجامة وجان ينصي امير الاغنية وكال خلي نسولف اني وياج محجينه بموضوع حسام
اني خجلت منه شكد ما اني قريبه عليه وصديقته بس خجلت منه كلش
گلي لتخجلين واحجي ويايه ليش متقبلين بي شنو ببالج شنو دتفكرين ؟
شوف اموري اني ماعدي مشكله بالولد صح مااعرفه بس  مشكلتي بالزواج اني بعدني صغيرة واريد اعيش حياتي واكمل دراستي
بعدني مامستعدة للزواج ما مستعدة للمسؤولية هذا كل الي ابالي .
امير: شوفي حبيبتي اني مااجبرج على شي بس الولد حباب واهله كلش زينين وعلاقتنه حلوة وياهم ، وهم عايشين  بالسويد  يعني ترحين يمهم شوفي الوضع بالعراق موزين ومابي مستقبل ، هناك مستقبلج احسن حبيبتي . اني بالنسبة اليه شتقررين وياج بس اني اشوف  هذا النصيب زين  لان نعرفهم ونعرف العائلة ونفس عائلتنا اني ما امن انطيج لاحد غريب تعرفين معزتج لذلك فرحان بس بقى الخيار يمج شنو تردين اني حاضر ووياج حبيبتي.
أني: حبيبي الله يخليك اليه ماقصرت ويايه ابد،  ان شاءالله خير افكر والله يسوي الصالح.
محسينه غير احنه بباب البيت نزلت وطبيت للبيت اتونس من اجي يم اهلي لان بيتهم حلو (دبل فاليوم) يسموا عدنه اول منطب طرمة صغيرة و بعدين نطب عالمطبخ حلو مربع وبعدين نطب هي صاله هو هول جبير وبعدين غرفة ماما والي هي كل  كعدتنا بيها وحمام جوه والطابق الثاني غرفتين  وحدة  لزينه ومن اروح اني انام وياها وغرفة  للولد وغرفة مخزن وسطح صغير وطابق الثالث سطح چبير.