قسمة وحب

الجزء الخامس عشر

" حبيبي اني كلش اسفه خلص شحن التلفون وانطفه
جنت كلش مشتاقتلك وعبالي نسولف اكثر بس يله مو مشكله
نتخابر ان شاءالله بأقرب وقت اني بعدني يم اهلي بعد اربعة ايام يبدي الدوام
وتخلص عطلتنه وماما بعد يومين تجي
هاي اخباري حبيبي اذا عدك مجال نتحاجه اليوم بليل لان اني هسه راح انام
احبك وتصبح على الف خير"

شكد ما اني اراويه حبي واشتاقي اله هو كلش عكسي ماعرف
لان بعيدة عليه لو لان ميحبني لو ميعرفني لو لان عنده صديقات اكيد ..
ظليت افكر وطبعا رفيقة دربي دموعي لازم تنزل لان كلما اريده يبادلني الشعور ماكو
فبس وسيلتي البجي وهاهيه واني ودموعي والتفكير نمت.

خلصن اليومين وهسه بانتظار امي تجي رحنه نستقبلها بالمطار
واني زينت البيت بالنفاخات حظرنالها هدوم الوان بلكي تقبل تنزع الاسود
صارلها ٧سنوات لابسه علمود بابا الله يرحمه.
الحمدلله وصلت ماما بالسلامة وتلگيناها بالهلاهل والجكليت
وخطية هي كلش فرحانه هواية غيرت من نفسيتها هاي السفرة
واجتي لبيتها نورته وتعجبت شلون كلها مرتبة الشقة
اجوي خالاتي وبيت خالي وكلنه ملمومين داير مدايرها وهي كاعده وتسولفنه شلون تونست بالروحة
وشلون حلوة الاجواء وصدفة تلاگة ويه كرايبنا هناك وظلت وياها بنفس الغرفة
وبعدين رحنه للغرفه بس النسوان وفتحت الجنط وبدت بتوزيع الصوغات خطية جايبه هواية شغلات
الكل حاسبته وتنطي منا ومنا ..
اما في ما يخص صوغتي تختلف عن الكل لان عروسة جابتلي ساري (زي هندي للعرايس)
كلش حلو لونه اخضر والثاني ماروني فاني اختاريت الاخضر وكالت الماورني راح اضمه ويه جهاز.
وسيتين نوم ستن لونه  ماورني  والثاني بنفسجي يجنن وعبايه اسلاميه  وسجاده وبجامة للبيت وفستان
كلش فرحت بالاشياء لان حلوات وخاصة اشياء النوم والساري

مرت الايام ورجعت للدوام وبين ركضت الدوام والتحضير للمهر مابقى شي بداية السادس يجون
واحنه هسه نص الرابع وبعد اسبوعين للأمتحانات مالتي
كلش قلقله من ناحية الامتحانات وعلمود جية حسومي..
دادرس كاعدة بالهول وخابرت ماما كالت باجر خميس من تخلصين دوام
راح يأمر امير عليج تجين يمنه لكيت مره تعرف تسوي اشياء مال مهر
عن طريق ام زمان صديقتي نروحلها باجر العصر نتفق وياها كتلها اوكي تمام.
رحت للدوام ومثل كل يوم مزدحم بالدروس والامتحانات اليوميه
وراها اجاني امير ورحت يمهم ظهرية تغديت ونمت ساعتين كلش تعبانه
كعدتني امي بالخمسة كالت لازم نروح هسه بدلت وطلعنه اني وماما..
طبعا اني خايفة خاف يطلع شغلها محلو وميعجبني وصلنه يمها
كعدنا بالصالة ماشاءالله بيتهم حلو
راوتنه نماذج عن الاشياء الي مسويتها وراوتني صور هم
خوش اشياء تسوي وحلوات صح اسعارها غاليه بس مو مشكله المهم شي حلو و مرتب
وهيه كلش حبابه وكالت تخصلهن عالوقت وظلت تطمن بيه كلش حيطلع حلو لان انتي حلوة وجميلة.
اختارينه 3 سلات احجام مختلفه وطبگين وصينيه جبيرة واشياء
والطقم الي يوضع عادتاً بالصينية
اختارينه الون فضي ووردي ان شاءالله تتطلع الاشياء حلوة
كالت عشرة ايام ويخلصن ان شاءالله..
رجعنا للبيت وظليت بايته يم اهلي لان جمعة باجر ماعدي دوام
ظليت الليل كله اكتب بالرسائل ويه حسام مجان يكدر يخابر فسولفنه بالرسائل
ودزيتله صور وهو هم دزلي صور ماشاءلله شلون شاب جميل كلما اتمعن بتفاصيله قلبي يذوب
اكثر ماعرف شنو احس ويوميه يكبره حبه بقلبي و
كلش متلهفه لشوفته بنفس الوقت خايفه من اللقاء يعني اني تعودت عليه بالتلفون مشايفته ابد من جنه صغار
ماعرف شلون حيكون رد فعلي وماعرف هو تصرفه ويايه شلونها عقلي مشتت كلش و طبعا امتحاناتي
بعد يومين واي تركيز ماكو تفكيري كله شلون حيكون اللقاء وبعدين قررت انو لازم انجح علمود ما انسگم
بالعطله واتونس ويه حسومي لان همه حيبقون شهرين ..
اجه اول الامتحان كعدت ويه بيبي لصلاة الصبح قريت قرأن وراها تريكت
وشوية راجعت المادة وصارت بالسبعة طلعت من للبيت وواخذتني اقدامي الى اجمل مكان صدك واحد يشعر براحة
نفسية بي احس من اطب كل هموم الدنيا تروح .
ظليت اتمشى لحد ما شفت القبة كدامي سلمت على الامام ووصلت للحضرة وطبيت للصحن
اتمعن بجمال المنظر وبالحمام الي يحوم هناك ويطير منا وينزل هنا ويتجمعون بمكان واحد
صدك واحد ينسر قلبه من يشوف حضرة الامام علي عليه السلام
طبيت للضريح واشتميت الرائحة الزكية الي اموت عليها اخذت نفس عميق
ووصلت للشباك فارغ واحد يزور على راحته ظليت واكفه واحجي ويه الامام ودموعي تجري
اخر شي انتبهت الساعة صارت ثمانية الا ربع لازم ارجع الحك على الامتحان
طلعت ركض من الحضرة خفت يروح عليه الامتحان وشلون هيج اخذني الوقت
وصار عليه الدرب شطوله امشي سريع وبعدني وين ياله اوصل
واخيرا وصلت للشارع الي بي المدرسة .. اخذت نفس
ورحت لقاعة الامتحان على كيفي والحمدلله متأخرت وصار الوقت بدوا بتوزيع
الدفاتر وكالوا الاسئلة بعد خمس دقايق طبعا كل صديقاتي موجودات بس كل وحدة بصفحة
لان الابجدية الي تخص تسلسل كعده الطالبات مختلفه واجتي الاسئلة والحمدلله جانت سهله حليت وره ساعتين سلمت الدفتر وطلعت..
يوم جر يوم وامتحان وره امتحان ويوميه اروح ازور ياله اروح امتحن وبيوم الاخير اتفقنه اني وصديقاتي
نكمل الامتحان ونروح سوه للسوك وراها نأكل ونرجع للبيت رحت لبيبي طلبت منها الموافقة
وهيه تعرف صديقاتي فعاد قبلت بس كلتلي لتتعطلين..
يله بنات نروح اني اجيت وبيبي قبلت
طلعنه احنه ٦ بنات زرنه وراها رحنه افترينه بالسوك واشترينه شكم حاجه
وبعدين اشترينه لفات فلافل مشكل ورجعنه نأكل بيتنه لان اني اقرب وحدة..

يوم ٢٥/٤/٢٠١٣ انتهت الامتحانات وجانت كلش صعبه عليه لان اغصب نفسي على الدراسه ماعرف
شبيه مجنت هيج ابد بس عقلي كله ويه حسام خلصت الامتحات واليوم بديت بتحضير نفسي للمهر وبده مشوار الحفله...
بديت اني وماما بتحضير قائمة المدعويين وبتحضير نوع العشاء الي راح نقدمه وشنو البدلات الي البسهم
اني ممشتريه اي بدله منتظرة البدلات الي يجيبولياها لان بدلة المهر على العريس
وماما كالت لبسي الساري فلازم نخيطه وظليت هواية ادور على خياطه وملكيت وجنت كلش متأذية
لان ضاعوا عليه الخياطات بعدين امراة من اقربائنا كالت اني اخيطه الج لتشيلين هم
وصدك وديته الها وكالت تعالي بعد اسبوع علمود نسوي بروفا..
-هلاوو هاجر اسفه خابرت بهيج وقت بس اني كلش قلقه خاف ما الحگ
خاف يجون واني ممكمله شغلي ؟ شلون بيه ؟
- اف منج انطيني مجال احجي شجاج شبيج تخبلتي بتالي الليل ؟
-ما بيه شي حياتي تدرين ماعدي غيرج ظليت حايرة وصافنه كلت لازم اخابرها
-اي حبيبتي كل الهلا بيج شوكت متخابرين ، لتشيلين هم بعد ٢٥ يوم يارب يجون
اليوم مو ٦ بشهر الخامس كولي احجي ؟
-اي
- بعد شنو ليش هيج خابصتنه وخابصة روحج على كيفج
وراج حفلات كون ترتاحين وتعتنين ببشرتج مو قلقه وهيج وضعج
هسه من القلق  والسهر يصير جوه عينج اسود ديري بالج على صحتج حبيبتي
وان شاءالله كل الي تريديه يصير واحلى.
-الله يسمع منج يارب
-تدرين اليوم طلعت اشتريت فستان للحفله مالتج يخبل هسه من اكمل ادزلج صورته
-بالعافية حياتي تلبسين بس انتي احسن من العروسه بعدني لا ادري بدلاتي حلوات لولا
لا ادري قياسي لولا ماعرف جايبيهن مناك لو منا نشتري على ذوقي والذهب هم ماعرف
اذا يجيبوا وياهم لو نشتري منا على ذوقي.
- انتي شنو تردين؟ تردين على ذوقج؟
- اكيد طبعاً اكثر البنات تأخذ على ذوقها بس اني استحي اذا يكونون مشترين مناك بس كلش يعجبني
يجون هنا ونشتري سوه ماعرف شنو موديلاتهم هناك بس اني من حجيت ويه خالتي
كالت راح تجيب الجهاز وتجي فاكيد مشتريه البدلات هم مناك
- يلا ننتظر ونشوف وانتي جميله وكلشي يلوگلج حياتي لتشيلين هم حتطلعين ملكة جمال صدكيني لو حتى تلبسين دشداشة كودري ههههههه
- ولج شنو قصدج تضحكين عليه مو يجي يوم واشوفج حايرة وقلقله واني اكعد واصنف عليج واضحك عابتلج
هو صوجج لو صوجي اني الي خابرت ومعتبرتج وكاعدة احجيلج
- كافي ضحك والله راح اجيج تره الي بيه كافيني وانتي متونسه وبس تضحكين
- اشاقه وياج هو اني عدي غيرج حبيبتي ردت شوية اغيرلج جو عيني بس اني بعد منفيد
روحي لحسومي حيعرف شلون يخليج تضحكين وتهدئين لان هو ميحتاج يسوي شي يجوز بس يكولج
مشتاقين انتي تموعين
- شنو قصدج اني هيج خوش لعد روحي نامي نامت عليج طابوكه واني بعد ما اخابرج واضيع وقتي وياج
- هههههههههه
- ولج صدكتي داشاقه وياج شبيج تعالي هنا لتسدي كوليلي احبج وانتي احلى صديقة ياله
- اموت منج وساعة السوده الي عرفتج بيها
- ها هيج صارت زنوبه هههههههه ينطيج قلبج اني هجوره الحلوة صديقتج مو خطية هيج تكولين عليه
-لا مو خطية شوفي شلون صارلج ساعة تضحكين عليه شو مكلتي خطية
-اني اكدر ازعلج انتي حبيبتي وصديقتي واختي والله ردت تضحكين وتنسين كلشي عمري
انتي الله يسهل امورج ويارب يجي حسومي وتشوفي وتعيشون احلى الايام حبيبي
-حسومي بعينج ٫ حسومي بس مالتي
- هههه ها اشتغلت رحمة الله؟
- حبيبتي اشاقيج الله يخليج الي ويارب اشوفج احلى عروسه بفستان العرس حبيبتي يله خطية دوختج روحي
نامي ونتخابر عود احبج ديري بالج على روحج
-ان شاءالله حبيبتي انتي هم ، اني اموت عليج تصبحين على خير وسلميلي على بيبي ....