قسمة وحب

الجزء الاول

مصباح يوم جديد
أشرقت الشمس بنورها ونورت دارنا
حضرت ملابسي وذهبتُ الى المدرسة مثل كل يوم.
اجواء الدراسة حلوة واني احبها ، شفت صديقاتي وكالعادة لازم بالفرصة نكعد ونسولف لبعض الي صارويانه قبل يوم.
طبعاً صديقاتي من نفس المجمتع مالتي ، مجتمع مؤمن ماعدنه سوالف الحب والشباب جان الي يهمنه دراستنه ومستقبلنه، وبالفرصة نسولف ونلعب ونأكل ، خلص اليوم الدراسي ورجعنا للبيت. وصلت البيت واني كلش تعبانه وجوعانه ، سلمت على بيبي وبستها وسولفتلها عن يومي بالمدرسة.
بيبي: روحي يمه بدلي وصلي وراح تلگيني صابه الغده
اتغدينه وتفرجنا تلفزيون ومثل كل يوم اجواء هادئة ماكو خطار بيبي لازم تنام الظهر
اني مرات انام ومرات لا ..حسب التعب .
اني عمري 12 سنة بالاول متوسط عايشة ويه بيبي صارلي 6 اشهر ، لان مدرستي قريبه وبيبي وحدها عايشة خوالي وخالاتي متزوجين وكل واحد ملتهي بعائلته. امي عايشة ويه اخواني وخواتي ، والدي شهيد الطائفية صارله سنة وعايشين في بيت أيجار واني كل فترة اروحلهم ايام العطل والمناسبات. اني كلش متعلقه ببيبي ، لذلك اختاريت اعيش وياها وكلش مرتاحة نكعد سوه ننام سوه نطلع حتى من ادرس تساعدني جانت كلش قريبه عليه تهتم بيه والاحفاد كلهم يغارون مني لان تحبني هواية.

العصر كاعدين ودنشرب چاي اني وبيبي ونسولف وجان تندك الباب ، رحت فتحتها واشوف ماما كلش فرحت بيهم صارلي اسبوع مشايفتهم ومشتاقتلهم  ،(بقلبي اكول همزين جوي ) جان عدي امتحانات ومرحتلهم بعطلة الاسبوع ، جوي ماما وزينه اختي اكبر مني بسنة ونص واخوية الزغير عمره اربع سنوات.
طبوا سلموا على بيبي وكعدنا نسولف ، وشربنا چاي سوه، واخوية يكمز فوك رأسي ومتونسة وياهم ،
بس متفاجئة بماما اشوفها فرحانه وتباوعلي وتتضحك وبنيتي كبرت وحتصير عروسة ، واني اضحك اكولها ماما ويني وين الزواج خليني كالت الاحياء وحجت الفيزياء.
حجيت هذا الحجي ورحت للغرفة وصافنه بحجي امي شعجب هيج كالت ، وامي من يوم الي بابا استشهد ماشفتها هيج فرحانه وتضحك صح مو ضحك قوي بس هي بحالتها الضوجة والحزن الي بي ابتسامة بالگوه تبتسم ، شعجب هيج كالت وعروسة وشنو تقصد الف سؤال اجه ببالي كلت احسن هيج خلي اسأل زينه صحتها كتلها تعالي شوفي هذا الدفتر وشلون مرتبته اجتي زينه وبدينه نسولف عن اخبار مدارسنا لان ممتشاوفين صارلنه اكثر من اسبوع وبعدين سألتها زينو حبيبتي شنو تقصد ماما بهذا الحجي الي حجته قبل شوية ؟ وليش هيج فرحانه ؟
زينه: اني اعرف شنو الموضوع بس مااكدر اكولج ، ماما هي كالت تحجيلج بس تكولج الموضوع صدكيني احجيلج بالتفصيل بس اكدوا عليه هي واحمد مااحجيلج اني ولازم تسمعين منهم. زينه تحجي واني صافنة شنو الموضوع! وليش مو هي تكولي ، هي كلشي تحجيلي متضم عليه شي ليش هسه متقبل اني صافنه وحايرة وجان تطب امي.
الوالدة : ها بنات شنو دتحجون عفيه سوالف متخلص.
أني : يمه صارلنه اسبوع ممتشاوفين ودنسولف اخبارنه واخبار الدراسة .
صح هيج جاوبت بس اشوف امي وزينه شلون يتهامزون بينهم ،عرفت صاير شي وبس لا الي بالي،
الوالدة: خوش يمه يلا زينه روحي يم بيبي عيب تبقى وحدها عدي موضوع ويه اختج بس ديري  بالج على احمد ليضوج بيبي.
شطوله الوقت صار عليه بين مطلعت زينه وامي كعدت .. قلبي كام يدك سريع وحسيت بشعور غريب.
كتلها ماما شنو الي صاير ؟خوفتيني ليش محجيتي كدام بيبي وزينه؟
الوالدة :  لا يمه لتخافين ان شاءالله خير بس حبيت نسولف وحدنه وبعدين نكولهم
وبدت ماما تحجيلي طبعا مترددة ومبتسمه صح فرحانه بس اشوف الحزن بعيونها.
الوالدة: ماما انتي بنيتي وحبيبتي وتعرفين شنو معزتج عدي،  واني فرحانه داشوف بنيتي كبرت والناس بدوا يخطبوها
اني سمعت هيج واحس جسمي يرجف معناها مخلصنه من الموضوع ، وهم خطبوني هاي مو اول مرة، صار شكم مرة يخطبوني، حتى بفاتحة بابا ، شلون جان حالي وعمري 11سنة وهم خطبوني من بيبي .
الوالدة : وين صافنة يمه خلي بالج ويايه ، اول البارحة خابرونه بيت ابو حسام وطلبوا ايدج لحسام ، طبعا مخابرين وحاجين ويه جدج وعلى خالج هم بس لان بالحج محصلوه وراح ينتظروا يرجع ويخابروه حجوا ويايه و ويه امير واحنه تفاجنه بطلبهم لان بعدج صغيرة طبعاً امي تحجي واني كلش متفاجئة بحجيها ، شنوحسام ؟ شنو زواج ؟ مصدومه على متفاجئة على خجلانه .. مشاعر غريبة.
دنكت عيوني بالكاع واسمع، مااعرف شنو صاير ويايه شنو هل المشاعرالمتناقضة ، منا خجل ومستحه منا متفاجئة ومااريد زواج