العروس في الثوب الاسود

البارت العاشر

البارت العاشر
أنه المكتفي بحزنة وشجن نوحه..
عوفوني وي حالي وروحو عني بعييد
انه الراسم حزن ما كاتب أغنية
أنه مربي دمع توقيته نص الليل
مايعبر فجر الأ ويمر بية
أنه العايش حياتة وعارف جروحة
أنه المكتفي بحزنة وشجن نوحة
أنه المايدري شيسوي
أنة الضايع مثل تعبي
أنه الحاير بروحة شلون
أنه الماحيرت ربعي
أنه المحروك بية الدم
أنه الماينفكد لو غاب
أنه الطارية ما ينجاب
أنه الشدت الدنيا وياه
أنه الناقش أثر مبجاه
أنه الشوغاتة ماتصفن
أنه المالة عزيز يحن
أنه الخلكة خلك مسجون
أنه الكلشي بية يون
لسان حال صادق
____________
رسيل
مشينه بابا وحسام ليكدام واني وريناد وراهم اسمع بابا يحجي وياه على الجكاير شلون تأذي الواحد وتدمرة وحسام اي عمو وصار ميحجي غير شي .وصلنه لمحل الي يبيع ايس كريم...
صادق : ها رسوله شنو اجيبلج ..
رسيل: بكيفك بابا شنو تطلب مثلك ..
صادق: زين وانتي رنوده ..
ريناد: اريد ازبري ..
صادق : صار يا روح ابوكم ..
التفت لحسام وكله
صادق :يلا حسام تعال ويايه ..
حسام : لا اني اضل يم البنات وانت جيب وتعال
صادق : اي هم صدك شلون يضلن وحدهن ،،شنو اجيبلك .
حسام: اي شي بكيفك ...
صادق : كله بكيفك بس رنود متحيرني .. حجاها بضحكة وراح...
لزمت عربانة اران قوي خاف تفلت مني اخاف عليه كلش. وحسام وريناد يمي واكفين..التفتلي حسام..
حسام: تعالو نكعد هناك..
عقجت حاجبي وكتله ..
رسيل: ليش
حسام : مكاعد تشوفين الهوسة ...
رسيل: وشبيك ضايج وتنتر بالحجي...
حسام : مضايج كوه تضوجيني ..
رسيل: لا ابد عيونك راح تطلع من مكانها على كيفك...
حسام: امشي دا اكلج لتتخيلين شي مصاير ..
رسيل :امشي ريناد قبل لا يطلعها سم من خشمنة ..
باوعلي صفح وكال
حسام : امشو كدامي لا صدك اسممج هسه..
مشينه رحنه كعدنه على مصطبه مغطيتها الاشجار يعني منبين وحسام واكف كبالنه ويخزر هذا وذاك شفت بابا يتلفت منا ومنا يدور علينه كتله..
رسيل : ذاك عمك روح صيحه ديدور علينه متكلي وين شمرتنه ميشوفنه لو يضل يدور سنه ...
حسام: لو لابسه لبس بيه حظ جان مجبتج هنا وكعدتج جان ضلينه بمكانه حتى ابوج ليضل يدور لو بس ادري شلون خلاج هيج تطلعين جان ارتاحيت.
باوعتله وكمت رحت باتجاه بابا لان خطيه يدور علينه وخاف يخترع عباله شو شنو صار وفعلا اول مشافني صاح ...
صادق : هاي وينكم صدك جذب ..
رسيل : والله بابا اكو واحد تخبل علينه وصار ساعه ياكل بكلبي ....
صادق : ليش شنو الصار ؟
باوعت على حسام  صاير نار،،، كلت بيني وبين نفسي اكول  لبابا ويرزله حتى يتوب بعد يحاسبني ،،، لحد الان مناسيتله سالفه الباب من طلعت اصيحه ورزلني ...
رسيل: يكلي ليش طالعه بالتراكسود وشلون ابوج خلاج هيج تطلعين.
عكد حاجبه وباوع على حسام وحجة..
صادق: ليش شبيه لبسها .
حسام: لاعمي مابيه هاي تتخيل.
رسيل: لعد اذا اتخيل ليش خليتنه نكعد هناك...
حسام : غير اخاف عليكم مدشوفين شلون هوسه صارت ..
صادق: يلا كافي جبتكم تتعاركون لو تغيرون جو ..
رسيل: والله بابا لو مجايه احسن ..
صادق: كعدو اكلو حتى الموطا ماعت يلا شربوها شرب..
ريناد : بابا اريد اغسل ..
صادق: ياملعونه شبسرعه خلصتيها ..
ريناد :  قابل انتظركم ..
صادق: والله تفتهمين شوفو شلون ماعت الموطا كلها راح اجيب غيرها ..
رسيل : اني ما اريد ..
حسام : ولا اني عمو ..
صادق: اني هم ما اريد امشو نجيب عشا ونرجع للبيت ..
رحنة لمحل يبيع مشويات اخذنه سفري صينيتين كبار ..
رجعنة كبل لبيت بيبي دخلنه للمطبخ جانت عمة زهرة دتسوي عشا نواشف..
صادق: عوفي اللي بأيدج وامشي نتعشا..
زهرة : ياا هاي شجايب ليش مكلف نفسك وهذا اكل كومه كليت كلت اكمل وادز عليكم .
صادق: لا تكلفة ولا شي والاكل ضميه لباجر نحميه على الغده .
طفت عمة الطباخ وكعدنه كلنه سوه بغرفه بيبي عمة سوت لفه لخاله سهاد هيه تاكل وبيبي لازم واحد يوكلها عمة خلت بالماعون وراحت يم بيبي علمود توكلها، كام بابا واخذه منها كللها ..
صادق : روحي اكلي واني اوكل الحجية .
البيبي: رحم الله البطن الشالتك والله انت اصيل وابن اصيله .
صادق: رحم الله والديج ربي يحفظج النه ويخليج خيمه على راسنه ..
خلصنه العشا ورجعنه للبيت ،،نمنة ثاني يوم رحنه للدوام ورجعنه لبيت جدو وتغدينه ونمنة اني وريناد بغرفه خالو للعصر كعدنه ،،،اجه بابا مبدل وكاشخ طالع يخبل ..شافه عمو محمد وضحك..
محمد: ها وين ويغمز لبابا ...
صادق: والله عازم شلون بنات ثنين اله يموتن ..
محمد: عليك الله اجي وياك..
زهرة : هاي شبيك اثكل يمعود راح يطلع ويه بناته مو كدامك البارحه كال ..
محمد: لو بس ادري الله مسلطج عليه منين تطلعيلي انتي .
زهرة : اني مثل ضلك تكدر تتنفس محمد: لا والله ما اكدر خانكتني خنك ..
بابا خربان ضحك على مناكرهم التفت علينه وكال..
صادق : يلا بنات بدلو تاخرنه .
زهرة : تغديت لو اصبلك..
صادق: لا والله ممتغدي عازم بناتي على عشا واكل وياهم ..
زهرة : الف عافية عيني ..
صادق: الله يعافيج يلا اترخص ..
زهرة: الله وياكم..
رحنه للبيت وكبل صعدنه فوك بدلنه وطلعنه لكينة بابا كاعد بالسيارة ...
صعدت اني ليكدام وريناد ليوره ..
وصلنه للمطعم..
صادق: نزلو هنا اطبك السيارة بهذا الكراج واجي ..
رسيل: اي بابا..
نزلنه وهو فر السياره وراح طبكها بالكراج ،،،ورة شويه اجه يمشي اباوع عليه عبالك اول مرة اشوفه شون طالع حلو متعجبه بيه هو من قبل انيق واللبس مالته كله تنسيقات والعطور ماركة بس من توفت ماما همل نفسه وطولت لحيتة هوواي وشكله تعب بس هسه لا رجع مثل قبل وصل يمنه ضحك...
صادق: شبيج كاعد ترسميني و هيج صافنه عليه حتى مترمشين ...
رسيل: والله بابا لو بيدي اخليك بنص عيوني واغمض هلكد ما اخاف عليك واحبك..
صادق: لتخافين ابويه انتي اني يمكم وين رايح..
رسيل : الله يخليك النه ويطول بعمرك ..
صادق : امين ويخليكم اليه يا احلا البنات ...
لزم ايدنا وحده منا وحده منا نمشي ورافعات راسنه عدنه هيج اب حنين علينة ويحبنه ومدللنة غمضت عيني جريت نفس وكلت بداخلي الحمدلله على هذه النعمة .
طبينه للمطعم صاح بابا على النادل اجه ونطانه المنيو مال الاكل ...
اختارينه كل وحده اكله وبابا كالعاده لو كباب لو مشاوي وصه على نفر مشكل .
اجه الاكل اكلنه ورحنه غسلنه ورجعنه للميز لكينه بابا جايب الي ولريناد عصائر واله جاي .
لزمت الكلاص وبديت اشرب بالعصير حجه بابا وتركت الكلاص وانتبه لكلامه ...
صادق: اريد اخذ رأييكم بشغلة تخصنة كلنا ...
رسيل : شنو الشغله ؟
اني اعرف على موضوع الزواج بس سويت نفسي ما ادري ..
صادق: تعرفون اخر فترة شلون وضعنه بلبيت تعب وبيت جدج ماعدهم احد وعمتج زهرة تعبت وحدها .
بابا يحجي واني لزمني مغص بطني عبالك رايحة استلم النتائج فاتحه كل عيوني ومركزة بكل كلمة يكولها واتمنى يكول فكرت بالموضوع ورفضته بس اللي صار العكس بابا دياخذ رأينة حتى يخطب .
صادق : اريد تعرفون شغلة وحده يمكن هسه انتو صغار ومتفتهمون كلامي بس من تكبرون اريدكم تتذكرون هذا الكلام كلمة كلمة حتى لتلوموني.
اني لو علية سنين اضل بلا زواج عندي عادي
واي وحده هسه متحله بعيني من عكب امكم بس اللي صار اقوة مني ومابيدي غير هذا الحل جبتها منا وديتها منا مكاعد ترهم وهذا الحل الوحيد وشفتو ملحه بيت جدكم علية ومتأكد ما راح يعوفوني بحالي اله يشوفوني متزوج ...
شهكت ريناد ضلت تكح حيل ،،كمز بابا عليها طبطب على ضهرها وشربها مي صفنت على بابا وكالت بصوت مخنوك...
ريناد : شنو بابا راح تتزوج ..
صادق : اذا انتو توافقون اتزوج واذا وحده منكم رفضت اني ارفض هذا الموضوع تماما .
رسيل: بابا اذا هذا الموضوع بيه راحتك أني موافقة
ريناد : واني مموافقه ...
عافتنه وكامت ..........
يتبع...
https://www.youtube.com/watch?v=df0DBk6UPTg