كرونيك: انثى_في _الجيش

01

الحلقة 1
كانت سارحة في دنيا اخرى لين تهزت و تنفضت مالفجعة وقت تكلم البروف
_ وين سارحة سيادتك عندي ساعة نكلم فيك
_ ديزولي ميسيو
_ وينو كتابك
_ نسيتو في الدار
_ كتابك تنساه أما منقالة الاولاد لي لابستها ديما فيديك عالأقل كي تشري خوذ حاجة تاع بنات
هو قال هكاكة و كلاسها الكل اطرشق ضحك هبطت راسها و حاولت تتحكم في اعصابها و تهدي روحها
_ آخر مرة ندخلك ما غير كتابك
_ لا آنا لي باش نقلك آخر مرة تدخلي هنا تفضل لبرا
لمت دبشها و خرجت دوب ما فاتت الباب دموعها هبطو ملا مجتمع ما يرحمش كيفاش باش تفسرلهم لي ضروف عايلتها ما تسمحش ليها باش تشري كل ما يلزمها تي هي حتى القطايع لي تلبس فيهم معضمهم عاطينهولها بنات عمها و بنات جيرانها كيفاش باش تقلهم لي المنقالة تاع الاولاد لي لابستها ماهيش هي شراتها اما هاكي لأغلى إنسان فارق الدنيا و بقات كان هي تفكرها فيه ياخي شنوة ذنبها تلودة في عيلة فقيرة موش هي حبت أما امها و بوها في الضروف هاذي جابوها كملو صحابها ضحكو عليها و ما حسو بيها ياخي و برا ما عندهاش فلوس موش من حقها تعيش .... نعرفكم على سحر بنت ال18 عام تقرا تروازيام بحكم خسرة عام بسبب برشا حاجات
أما ما سلمتش في قرايتها تحب تنجح و توصل تحقق لي حلمت بيه ستيلها مزيان بصحتها شويا بشرتها سمرا شعرها اكحل و قصير خشمها و فمها كل شي فيها صغير عينيها مارون فاتحين و الضحكة ديما مرسومة على فمها
عرضها إيهاب و هي خارجة مالليسي
_ وا سو وينك مالصباح نلوج عليك
_ هههه هاني هنا
_ ههههه إكسكلي كي العادة آش من عملة عملتها
_ هههه شي جيست نحكي و كاهو قالي كمل كلامك البرة و انا عاقلة و نسمع الكلام هزيت دبشي و خرجت
_ هههه بو زينو حبي العاقل هيا نخرجو نعملو دورة
_ هههه لا ما انجمش لازمني نروح بكري تو مرة أخرى انشالله
_ باهي هيا نوصلك للدار مالا
هاذا صاحبها عرفتو ماللي دخلت تقرا بروميار توا اربعة سنين مع بعضهم يخدم مقابل الليسي كل يوم يشوفها و ما يتهنا كان ما يروح بيها و ساعات يهزها يحوسو مع بعضهم و يبدلو شويا الجو اما رغم هاذا عمرها ما حكاتلو على ضروفها و اللي قاعدة تعيش فيه ديما قوية قدامو و ما نقصها شي