رنين

ch.1

بسم الله الرحمن الرحيم

رنين... كلمة لما بتتقال بيبقى ليها معاني كتير رنين الهاتف رنين الجرس او اسمي.... ولكن انا اقصد رنين الكلمات...

قفلت الدفتر اول ما دخل عليها شادي بصت له

رنين: نعم؟

شادي: بتعملي ايه؟

رنين: بذاكر

شادي بسخرية: بتذاكري ...اه طبعا

رنين : شادي لو انت فايق للهزار ف ابعد عني ولفت وادته ضهرها

شادي: طيب يا احمد زويل هسيبك تذاكري اما نشوف كم ملحق السنة دي وخرج من الاوضه وهو بيضحك

رنين قاعده باصه قدامها على المكتب دموعها بتنزل بصمت عدت 5 دقايق وهي على الحاله دي مسحت دموعها بسرعه ومسكت القلم وفتحت الدفتر وكتبت انا رنين عندي 17 سنة في 3 ثانوي... انا معرفش بكتب ده ليه بس يمكن تفريغ جزء من غضبي المكبوت جوايا.... بصت للورقه شويه...وقفلت الدفتر وخبته بين كتبها وكملت مذاكره

تاني يوم الصبح رنين صحيت على صوت مامتها وهي بتزعق كالعادة مفيش جديد لسه بترفع الغطا عنها اتفتح الباب

-قومي يختي قومي يا اميره

رنين: صباح الخير يا ماما

-خير؟ خير ايه وانتوا موجودين انجزي يلا علشان دروسك يلا بطلي مرقعه

رنين: حاضر يا ماما ..."مليش خلق اتجادل مع أي شخص أيا كان الصمت حل حلو بس اسمع وطلع من الجهه الثانيه وتجاهل الي اتقال ببساطه"

طلعت رنين من اوضتها وهي بتلبس جزمتها : انا نازله يا ماما

شادي: رايحه فين؟

رنين: اكيد مش رايحه اتفسح 8 الصبح يا شادي شغل دماغك ارجوك

شادي ضربها على راسها: اتكلمي عدل

رنين: ايدك تقيله!

شادي: بس يا دلوعه

-بس انت وهي بطلوا مناقره!!

رنين: ماما يعني هو انا كنت عايزه فلوس

-نعم ! فلوس تاني انت مش لسه واخده 200 جنيه امبارح ؟

رنين: اعمل ايه يعني هو بمزاجي؟

-اما نشوف اخرتها يا ست رنين وادتها 100 جنيه

رنين:انا نازله

شادي:9 بليل تبقي هنا

رنين: ان شاء الله خرجت وقفلت الباب وراها وخدت نفس عميق "مرقعه مرقعه مرقعه!! على أساس انهم ميعرفوش 3 ثانوي يعني ...عايشين في عالم موازي للعالم بتاعي ؟؟انا مش بتمرقع" مشيت لحد ما وصلت لمكان الدرس ودخلت قعدت بهدوء شويه وجت ميرنا صاحبتها