فصلية وكسرت خشوم

البارت -1

چر تگضي واتذكر مواقفكم
واجي والگه الفشل كل حيلة تارسكم
باچر روسکم بالملگه ماتنشال
تدنگ والحچي الينگال يوجعكم.!

**

هبة : خليت أهلي ينامون وطلعت أمشي على كيف حتى ما يسمعون
باوعت لصرايفهم كلها مسددة شديت عباتي على وسطي آخذت فانوس وركضت للنهر ..
باوعت بكل مكان وما شفته وجانت الدنيا باردة وحسيت جسمي راح يتجمد ..خليت آيدي يم حلكي وصحت عليه بلكي يسمعني : ماجد ...ماجد ..مجيد

ما سمعتله صوت ضجت حيل على حالي وخذيت فانوسي ورجعت اتمشى على كيف هو واعدني اليوم نكعد عالنهر وينه ؟؟
تمشيت واسمع صوته من ورايه ..انداريت بسرعة وعاينت عليه ..اجالي بسرعة وحضني

كتله : ماجد وين جنت دورت عليك هواي وانته ماكو

ماجد : حبيبتي انه جنت احجي ويه أهلي وكتلهم يخطبونج اليه بس ما رضوا وكلهم معترضين وانه ما اكدر اعوفج لازم نسوي شيء ونخلي حل

هبة : وشلون ماجد ..اذا اهلك ما راضين واهلي نفس الشيء جا شنهي الحل ؟؟

ماجد : انه لكيتلي حل وفكرت بيه من البارحة بس ما ادري اذا انته راح ترضين لو لا له

هبة : وشنهي هو الحل هذا ماجد ؟

ماجد : نشرد ..انه وياج لازم نطلع من الديرة ونتزوج وغصبآ عنهم كلهم

هبة : شلووون ؟؟ ..لا ماجد انه خايفة ..خواني وولد عمامي يذبحوني لو عرفو

شد على ايدي وكال : لا هباوي محد يكدر يدنالج لأن ما راح يلكونه انه راح اخذج ونطلع مكان كلش بعيد عنهم عسى ما طلعنه من الكفص كله

هبة : وشلون نسوي هيج

ماجد : سهلة هباوي انتي جهزي اغراضج باجر وتعاي بليل نفس هالوكت هذا ومن يطلع الصبح احنة طالعين من الديرة كلها انتي بس خليلج ثقة بيه

هبة : خوش انه وراك لأن مااكدر اتزوج غيرك وأهلي أكيد راح يزوجوني لولد عمي لو بقيت أخذني ماجد اخذني وياك ولا تخليني عدهم

حضني وكال : اكيد اخذج يروحي ليش هو انه اكدر بلياج ولج انه غير اعشكج واعشك كلشي بيج

كعدنه بعدها على راك النهر (جرف النهر ) نتسامر للفجر هو يتغازل بيه وانه كلبي مو عندي طاير وياه ماجد هو روحي من الدنيا وأول ما شفته عشكته بس أهلي وأهله محد يحب الثاني ويردون يحرمونه وهالشيء خلاني آخذ هيج ختيار واشرد وياه
اي انه مستعدة اعوفن هلي كلهم ولا اعوفه هو لأن بلياه دنياي مالها طعم

**

كعدت الفجر ولكيت اهلي كلهم كاعدين يتريكون علمود يرحون للكاع ويسرحون بالهوش ويحشون ، كعدت يمهم وانه كلبي يدك بقوه وانه بعد ساعات مارح ابقى يمهم شنو راح يسوون والله خايفة يذبحوني ويذبوني بالنهر