#حياة و ذكرى 💚🍃
جات داخلة زي كل صباح وهي مبتسمة
:صباح الخير ي حلو🌸
:امي انتي كدا كيف؟
قعدت جنبي وباست جبيني
:انا مالي؟
ضحكت وهزيت راسي بﻷ
غمزت لي بضحكة وقالت
:اعترف جميلة ومزة صح؟ هاا!
ضحكت ومسكت يدها
:اكيد وبدون شك
مسحت على شعري وقالت
:لازم نفضل قويين ولا كلامي غلط؟
هزيت راسي قامت شالت دفتر ملاحظات الدكتور قرته وقالت
:طيب ي حلو حالتك مستقرة امم تحب نطلع الجنينة؟
الباب دق مشت تفتح سمعت شوية اصوات
جات داخلة ومعاها خالي وعمي
سلموا علي وسألو عني وجوا داخلين وراهم محمد وابوي
ابتسمت وانا بعاين ليهم بتكلموا وكأنو انا اتحسنت وكلوا طلع كابوس ومبسوطين وبحاولوا يطلعوني من الجوء دا
محمد:الدكتور سمح ليك تطلع الجنينة رايك شنو ي تميم؟
قلت
:الدكتور عارف انو مافي داعي لوجودي هنا ي محمد وانتوا المصرين وم عايزني اطلع البيت ،، ي جماعة انا فاهم انكم خايفين علي وعارف انكم عايزني ابقى كويس وتتطمنوا علي لكن كلنا عارفين انو بعد كدا انا ايامي معدودة..
امي قاطعتني وقالت
:تميم اا.قاطعتها
:امي خليني اتم لو سمحتي ،، انا عايز اكون بينكم ووسطكم يعني انا في اخر ايامي خلوني احس بكل واحد فيكم واودعه بطريقتي انا م عايزكم تنسوني عايز اخلي ذكرى طيبة في كل واحد فيكم ي اهلي البحبهم ،، ممكن لو سمحتوا تسمعوا كلمي؟
ابوي قال بحزم
:محمد امشي شوف الاجراءات ،، سهام انتي ارجعي البيت قدامنا جهزي غرفته
*تميم الشعراوي الابن الاكبر لحسين الشعراوي 31 سنة
امي متوفية من عمري 6 سنة م كان عندي اخوان منها وربنا عوضني بماما سهام الفعلا ربتني كأني قطعة منها هي واخواني محمد 23 سنة وطيف 20 سنة
كنت عايش حياتي بطريقة طبيعية جدا
م عندي علاقات او زوجة زي الفي عمري
كنت مكتفي بإني وسط عيلتي ومبسوطين
لحد م اتصدمت بإني مصاب بورم وفي اخر مراحل الكانسر ورم في الراس او الدماغ تحديدا
موقعه م كان خطير زي م قالوا الاطباء بس م كان في علاج يعني اخر مرحلة وخلاص
عن نفسي كنت دايما برضى بالكتبه لي ربنا
بس عيلتي واسرتي ﻷ
م خلوا دكتور وم جابوه ولحد اللحظة دي م قادرين يثبتوا ويصدقوا الحاصل لدرجة حبسوني في المستشفى
انا كنت رافض رفض قاطع اخد كيماوي
يعني انا ليه اتعذب وهو كدا كدا ح اموت!!
انا كدا ح اهلك نفسي وم ح اشبع منهم قبل م اموت
ففضلوا انهم يحبسوني وخلاص
ما باقي لي كتير شديد يعني لو خلاص كدا يمكن اسبوع وكم يوم طالما الورم حاليا مستقر وفي كذا دكتور بحاول يدرس حالتي لعملية استئصال ويقال اذا قدر يفهم الوضوع ح تنجح ويكون خير غير كدا الدوام لله*
المهم
طلعت البيت ولقيت ناس كتيرة مستنين يتطمنوا علي ناس حتى انا م بعرفهم
سلمت عليهم وبدون اي نقاش امي طلعتني غرفتي وساعدت الدكتور والممرضة يوصلوا الاجهزة على جسمي عاينت لغرفتي البحبها امي قلبتها مستشفى عديل
:اخخخ ي امي غرفتي كنت بحبها
ضحكت وقالت
:م تخاف حولتها المخزن اول م تبقى كويس ح ارجعها ليك كدا تمام؟
:تمام ي حلوة❤
ضحكت وباستني
:ح اجيب ليك عصيرك واجي
جابته وجات شربتني ليه وانا بعاين ليها
كانت عايزة تقول حاجة وهي مترددة
:امي قولي كلامك
عاينت لي بتوتر وقالت
:م ح تزعل؟
هزيت راسي ورديت
:م ح ازعل اها عايزة تقولي شنو؟
:ممكن تتزوج عشاني؟
:اتزوج؟
:ايوا
:امي ابوي شربك شنو الليلة؟
:تميم انا جادة ياخ
دموعها نزلت وقالت
:على الاقل لما تمشي يكون عندنان ريحة وقطعة منك ،،
انا انا م بقدر افقدك انت العوض الرحيم من ربنا لي ي تميم قبل 25 سنة لما وافقت على زواجي ف كان السبب انت
يمكن انت م عارف الحصل شنو
انا كنت انسانة وحيدة شديد من قمت لا ام ولا اب ولا عم ولا اي زول فضلت اتذل واتهان من اليسوى والما يسوى رغم اني كنت لسة صغيرة 19 سنة ي تميم لحد م لقيتك في يوم ضايع فضلت م عارفة معاي قدر شنو شهر شهرين لحد م لقينا ابوك بالصدفة
انت في الفترة القعدتها معاي رغم انك طفل كنت بتديني دروس علمتني كيف اعيش واصد البزعلني وانت بنفسك الاتعلقت علي وجبرت ابوك يتزوجني ي تميم
انت م كنت ولدي وبس كنت صحبي وابوي واخوي واي حاجة ي تميم ليه عايزني افقدك ليه بس؟
:اانا اول مرة اعرف بالكلام دا
مسحت دموعها وقالت
:ﻷنك كنت صغير
مسحت ليها دموعها النزلت وضميتها علي
:خلاص خلاص ممكن م تبكي؟
:اذا ح تعمل القلته ليك
:ي امي حرام والله اتزوج وحدة عشان اخليها ارملة بعد كم يوم
:على الاقل تخلي لينا ولدك ي تميم
:امي وقفي بكا اول عليك الله ياخ
