غرام العاشق (روايات ليبيه)

الحلقه 23

#غــرأم_الـعـاشـق

#الـحـلـقـه_23

الــكــاتــبـه مـــيـــروووو احـــمـــد

🌺"«قــــراءة مــمــتــعــة»"🌺

طلعت الممرضة تجري جيهة استعلامات ومصطفى وريهام وراها يسالو فيها 

الممرضه: بسرعه اطلبي من البنك الدم دم A+ نبو 4 شكاير دم بسرعه و ايوتو غرفة العمليات التانيه  

ريهام: انا فصيلة دمي A+

الممرضه: تمام ياخدو عينه منك ايحلولها بعدها يسحبو منك
وانتي بلغي البنك بسرعه

مصطفى: كيف حال ولدي 

الممرضه: توا يحكيلك الدكتور ادعوله بس 
ومشت 

ريهام فقدت توازنها وطاحت تبكي مسكها مصطفى 💔 وخايف يقفدو هيثم ماسك روحه ايقوي في روحه  عشان ريهام

طلعو الممرضه وامعا ممرض بسرير فيه هيثم 💔 يجرو جيهة الاصانصير كان الممرضه ماسكه راس هيثم واحطه شاش ايوقفو في النزيف والممرض ايجر في السرير  والدكتور يجري وراهم 

مصطفى شاف منضر هيثم قريب انجلط تمنه نفسه في مكانه ولا هوا ايصيرله شي مسك الدكتور 

مصطفى بخوف واعيونه ع هيثم: ولدي يادكتور شن صار وين واخدينه 

الدكتور مستعجل: اهدء خوي رافعينه ع العمليات لانه لازم انوقفو النزيف لانه النبض ضعيف وفاقد دم واجد وعنده كسر في انفه حاليا انحاولو انوقفو النزيف وانديروله صوره ع جسمه  

جت امتاع الاستعلامات:  يادكتور اتصلت بي بنك الدم وحصلت كسين دم حاليا متوفر 10 دقائق ويصلو في العمليات

الدكتور مشاء شور الاصانصير: لازم اتوفرو دم ع السريع عشان نبدو العمليه حاليا نستخدمو الي عندنا ضروري ماتلحقو مافيش وقت 

ريهام من بعد كلام الدكتور فشلت وطاحت ع الارض تبكي 😭😭😭:خودو دمي كله كان تبو المهم ايعيش ولدي 😭😭😭

الدكتور مشاء بسرعه لي الاصانصير قبل ما ايسكر وخلا ادموع ريهام وراء ومصطفى الي واقف مصدوم وايديه ورجليه مربوطات مش عارف شن ايدير عشان ينقد هيثم 

البنت الاستعلامات: حضرتك انتي يا اختي الي بتبرعي بالدم

ريهام وقفت بحيل مهزوز و دموعها ع خدها وهزت راسها

مصطفى: قوي روحك يا ريهام نعرفك اقوى من هك وباذن الله هيثم ايطيب ويرجعلنا زي قبل اينور حياتنا 

ريهام هزت راسها تبكي 

مصطفى تنهد بحزن ومسك يدها: خلاص امسحي ادموعك امشي امع البنت يسحبو منك عينه وانا اندير اتصالاتي عشان انحصل متبرع امعاك