NAGTAKLOB si Sasha ng kumot at hinayaan ang sarili matulog pa. Wala siyang pasok ng araw na iyon at ang balak lang ay ipahinga ang sarili. Alas-nuwebe na ng umaga pero wala pa rin siya ganang bumangon. Sa lalong madaling panahon ay dapat na niyang bayaran si Daniel. Baka masiraan siya ng bait kung palagi na lang siya maglilinis sa pad nito na kung ano-ano naman ang nahahawakan at nakikita niya.
Nang marinig niya ang tunog ng cellphone niya na nakalagay sa kung saan parte nga kama niya. Bumangon siya at hinanap kung saan napunta ang cellphone niya na patuloy sa pagtunog. Tinanggal niya ang kumot at sumilip-silip sa ilalim ng mga unan niya. Hihigitin na sana niya ang bedsheet nang makita niya ang cellphone malapit sa paanan niya. Dinampot niya ang aparato at tinignan kung sino ang tumawag sa kanya.
Napasimangot siya nang makita na unregistered number iyon. Malamang sa malamang ay si Daniel ang caller na iyon. Tumikhim muna siya bago sinagot ang tawag na iyon.
"Hello?"
"Pumunta ka ngayon dito sa Ark's Bar ng nine-thirty. Kapag na-late ka ay dadagdagan ko ang utang mo sa akin." utos nito sa kabilang linya.
Napasinghap siya sa narinig. Wala man lang ito na sinabing "hi-ni-ho" sa kanya. Bigla ay utos na pumunta siya sa Bar na hindi naman niya alam kung saang lupalop niya matatagpuan. Sumilip siya sa malaking bilog na relo sa dingding ng silid niya. Nine-fifteen na; ang ibig sabihin ay may fifteen minutes na lang siya para maligo at magbihis. Magbibiyahe pa kaya siya papunta doon sa kung saan man siya pupunta.
Letse! Ano'ng tingin nito sa akin? Ako si Wonder woman?
She snorted. "Hoy! Ang wagas mo mang-utos sa akin!"
"Bakit hindi? Baka nakakalimutan mo ang utang mo sa akin."
Nakuu! Kung hindi ko lang iniisip ang utang ko sa'yo na baka totohanin mo ang bantang dadagdagan ay baka kanina pa kita binabaan. "Saan 'yang Ark's Bar na 'yan?"
Sinabi naman nito kung saan niya matatagpuan ang Ark's Bar na iyon.
"Okay. Pero hindi mo ba alam na magbibiyahe pa ko. Kagigising ko lang. Maliligo, magsesepilyo at magbibihis pa ako. Magbigay ka naman ng kahit kaunting konsiderasyon-"
"I need you here at nine-thirty." Ani Daniel bago nito binaba ang tawag na iyon. Hindi makapaniwala na tinignan ang screen ng phone niya. Ngayon lang may nagbaba sa kanya ng tawag.
"Ang bastos talaga! Nagsasalita pa kaya ako. Hindi man lang ako nagawa patapusin sa sasabihin ko."
Nang matauhan ay pumasok siya sa loob ng CR at ginawa ng mabilis ang morning routine niya. Ang buong akala pa mandin niya ay makapagpapahinga siya pero hindi rin pala. Alam niya na hindi siya aabot sa binigay na oras ni Daniel gayunman ay pupuntahan pa rin niya ang lalaking iyon. Bahala ito kung dumating siya ng late, ang mahalaga naman ay sumipot siya. Gumayak siya at pumunta sa Ark's Bar na iyon.
"Late ka ng ten minutes." Ani Daniel pagkarating niya sa Ark's Bar na hinanap pa niya kung saan sa Makati. Idagdag pa ang traffic na sinuong niya sa pagpunta doon. Pasalamat pa nga ito at sampung minuto lang siyang late sa usapan. Hindi ba nito alam kung gaano kalala ang traffic sa Pilipinas.
"Hoy! Pasalamat ka nga at dumating pa rin ako. Ang hirap-hirap kaya magbiyahe. Alam mo rin ba na tinatamad ako ngayon at walang balak bumangon. Gusto ko matulog at ipahinga ang sarili ko pero dahil sa kapritso mo ay pumunta ako dito." Inis na litanya niya nang i-abot nito sa kanya ang pang-mop ng sahig at isang timba na puno ng tubig.
"Wala man lang na pahinga?" inis na tanong niya.
"Time is gold, Sasha."
Napaismid na lang siya sa narinig. Kinuha niya ang mga inaabot nito at naglakad na palayo sa lalaking gusto talaga siya alilain.
