قـاتلة أَم ضحيـة؟

جميلة انتِ

١٠ اكتوبر ٢٠١٨
داخل سجن النساء منطقة الشالجية/بغداد
..
مُنذ ان كُنت طفلا كان حُلمي ان اصبح محامياً فُكلما سُئلت اجيب (اريد اصير محامي حتى انشر العدل) وها انا اليوم اتخبط بين مفهوم العدل ومصلحتي الشخصية ! افكار تسير بي ذهاباً واياباً .. فكرتُ مئة مرة ان اترك هذه القضية ومع ذلك ها انا الان اجلس في انتظار موكلتي ان تظهر من خلف هذا الباب .. العدل ،ماهو العدل الان ؟ اليس من العادل ان اترك هذهِ القضية الخاسرة حتى لا تفشل مسيرتي المهنية ؟ اليس من العدل ان افكر بمستقبلي كُله ؟ ام العدل هو ان احاول انقاذ موكلتي من حبل المشنقة؟ ان اجاهد في محاولة انقاذ روح لربما تكون بريئة  ! ماهو ثمن العدل الذي سأدفعهُ هنا ! هل تخليي عن مصالحي الشخصية لاجل اخلاقيات المهنة تعد فضيلة ؟ ولاي درجة من الفضيلة سأصل اليها بعد ذلك ؟ تنهدت بحسرة قبل ان اسمع صوت فتح الباب لتظهر خلفهُ شرطية وخلفها موكلتي الشابة ، ثم غادرت الشرطية لتتركنا وحدنا
..

(مرحبا) قُلت لترفع برأسها نحوي
..

(تعاي هبة تفضلي هنا) واشرت على الكرسي المقابل لي لتتقدم وتجلس امامي امعنت النظر ، هبة شابة جميلة وناعمة جداً اتساءل عن سبب دخولها الحقيقي لهذا المكان الرديء .
..

(شلونج؟) سألت
(راسي يوجعني) ردت بتعب
(بسم الله عليچ ليش ) قلت بحذر
(شنو تاريخ اليوم؟) سألتْ
(١٠/١٠) قلت
(هه صايرلي يومين بالانفرادي) قالت
(يومين؟ )
(اي)
(زين اكلتي شي؟ قدمولج اكل مي ؟)
(لا )
(لااا؟)
..

شعرت بالغضب ! الى اي درجة من الحقارة يمكن ان تصل اليها تلك الشرطيات ! كيف تُترك ليومين بدون اي طعام او شراب ! اليست انساناً؟ نفضت الافكار من رأسي لانظر اليها .. تبدو متعبة جداً ، تحتاج الى طعام حالاً !!
..

(لازم هسة تاكلين ) قلت لتنظر نحوي
(بس انتَ جاي حتى نحجي بموضوع القضية!) ردت بقلة حيلة
( صحتج اهم)
( صحتي؟ ) سألت
( اي صحتج مهمة )

( والله يا استاذ ايهاب معرف شنو ارد عليك ! صحتي مهمة؟ يجوز الله اعلم ما ادري ، تدري من بعد ذاك اليوم المشؤوم واني أُعامل مثل الحشرات ! اندفع ، انهان .. لا نومة ولا كعدة مثل البني ادم ..حتى ما يحق الي اقرة بالقرآن الي جبتة الي تخيل ! الكل تخلى عني حتى انتَ استاذ ايهاب ! ادري بيك فكرت تترك القضية ..)قالت لاجفل ! كيف عَرفت ذلك ؟

(يمكن تسأل بينك وبين نفسك شلون عرفت بس صدكني واضح ! تأخرك بالزيارة اسبوع وضحت كلشي كدامي ،اني قضيتي فاشلة وخاسرة وانتَ مبين عليك محامي جديد ومن حقك تخاف من الفشل ! تدري استاذ ايهاب ماراح ازعل اذا تركت القضية ! وراح اتفهمك لان مو من العدل بحق نفسك تخسر مستقبلك المهني علمود قضية خاسرة )

(انتِ دكتورة ؟)
(المفروض اي اتخرج السنة) قالت بضيق
(شنو تخصصج؟)
( جراحة )

(زين .. فرضاً اجاچ شخص يحتاج عملية وهذا الشخص رفضو كل الاطباء وانتِ املة الوحيد تتخلين عنة؟)
(ما اريد أأذيك )

(ليش تأذيني؟ اني محامي واريد اكون مسؤول عن قضيتج) قلت لاستغرب من نفسي ، كيف تغيرت افكاري كلياً واصبحت مصمماً على ان ادافع عنها

(واذا خسرت ؟)
( فال الله ولا فالچ) قلتها بصدمة مُفتعلة لتضحك هي بخفة وتنظر الي من جديد ، جذبتني عيناها .. نظراتها اختلفت .. فخلف كل التعب الموجود داخل عينيها توجد لمعة ..لمعة ساحرة اكاد لا اتوقف عن النظر اليها .. جميلة انتِ يا هبة جميلةٌ حقا .

سَعلتْ هي بإفتعال لاتوقف عن التحديق ثم اقول
( يلا هسة لازم تاكلين )
(صار .. بـسـ )
(شنو بس ؟)
( وين الاكل ) قالت بخجل
( اها اي هسة اطلب من ادارة السجن لو تحبين اطلب من مطعم؟)
(ما ادري ) قالت بخجل
( ديلا انطيني لحظة )
..

١٠ اكتوبر ٢٠١٨
داخل سجن النساء في منطقة الشالجية/بغداد
..
نظرت الى الطعام الذي احظره ايهاب من اجلي لابتسم .. ايهاب رجل نبيل حقاً ليباركه الله .. لم يسمح لي ان نتحدث عن القضية قبل ان اتناول وجبة طعام .. وحقاً ذهب الى ادارة السجن وطلب منهم اذناً ان يحضر لي طعاماً جاهزاً .. ومن ثم جاء وهو يحمل بيديه اكياس الطعام .. ليتقدم بابتسامة ويضع الطعام على الطاولة الصغيرة ويطلب مني البدء بالاكل ..
..

( ش شكراً استاذ ايهاب )
( رجائاً بدون استاذ .. ايهاب وبس)
..

(بالعافية) قال لي بعدما اكملت وجبتي ، نضرت اليه لاشيح بوجهي واضحك بخجل ( الله يعافيك )
(بس هبة متوقعت وحدة ناعمة مثلج تاكل هلگد يعني على شوية چان اكلتيني ) قال لانزل رأسي بحرج .. هل كنت شرهة؟
( اشاقة وياج لا تزعلين )
( م.. ما زعلت ) ازعل؟ كيف؟ ومنكَ انت؟
( يلا هسة تمام .. هسة اريدچ تحجيلي على كلشي صار وياج ذاك اليوم )
قال ومن ثم أَخرج الة تسجيل صوت صغيرة ودفتر وقلم من حقيبته
(هسة راح اسألچ كم سؤال واريدچ تجاوبيني عليهم تمام؟)
(تمام )
( هل قتلتي المدعو سراج زياد صبار)
(نعم )
(بشنو قتلتيه؟)
( طعنتة بصدرة بمشرط تشريح)
(شنو السبب)
(حاول يـ يغتـ..ـصبني)

———————————————————————
ولهنا نهاية هذا الفصل 💗
شلونة؟ حبيتو؟ انطوني ارآئكم💗
اكتبولي شنو رأيكم بهبة وايهاب؟
شتشوفون هبة؟ مظلومة؟
ايهاب؟ خوش رجال؟😂
لاتنسون تحطون فوت⭐️ حتى تصعد القصة وشكراً للجميع 💗

Happy Eid&love you all💗