غلطة مدفوعة التمن

الفصل الرابع

4

غلطة مدفوعة التمن

الفصل الرابع

تانى يوم الفرح حسن اخد ليلى وسافروا على خليج نعمة عشان يقضوا شهر العسل اللى كان حاجزهالهم الجد احمد من قبل وفاته وسط دعوات الجميع ليهم وامتعاض نوال الشديد اللى كانت كل ما سهام تشوفه قلبها ينقبض وتخاف على بنتها منها ، بس ماكانتش بتتكلم ، كان كبيرها تدعى لبنتها بالستر وان ربنا يحفظها من نوال وشرها 

وتانى يوم سفرهم حسام قبل ماينزل على شغله بلغ جدته انه هيتغدى برة عشان ماتقلقش عليه 

هداية : وهتتغدى فين ياحبيبى 

حسام : خالتى وفاتن عازمنى على الغدا

هداية هزت راسها من سكات وكان باين على وشها انها مش مبسوطة

حسام قعد جنبها وسالها : زعلانة ليه ، لو مش عاوزانى اتغدى برة واسيبك قوليلى وانا مش هروح

هداية : لا يابنى ، مش دى القصة

حسام : اومال ايه هى القصة 

هداية سكتت شوية وبعدين بصتله وقالتله : خايفة يقلبوك على اخوك ومراته

حسام باستغراب : وايه اللى هيخليهم يعملوا كده بس ياجدتى

هداية : خد بالك ياحسام ، اوعى ياحبيبى حد يبعدك عن اخوك او يقسيك على بنت عمك حتى ولو مين ، انت عاهدت جدك على كده ، اياك تنسى العهد يابنى

حسام : طب ماتفهمينى بس ياجدتى ، ايه لزوم الكلام ده دلوقتى

هداية : انت عارف امك كان نفسها فى ايه هى وخالتك ، اوعى تفكرنى عبيطة

حسام بصلها وبعدين ابتسم وهو بيقوللها : يعنى هو انا اللى عبيط ياهدهد ، طب مانا عارف كل حاجة 

هداية : المهم انك تاخد بالك برضة

حسام قام باس راس جدته وقاللها : ماتقلقيش عليا ياحبيبتى

خلص شغله وراح على بيت خالته ولما رن الجرس فتحتله فاتن وهى متشيكة ومتزوقة على الاخر ، فاتن كانت جميلة بس بتكلف ، غاوية مكياج ومظاهر بتحب دايما تبقى ظاهرة ومتميزة وسط اللى حواليها حتى لو تميزها ده بانها تبقى اوفر فى شكلها 

فاتن بابتسامة واسعة : حسام ابن خالتى عندنا يامرحبا يامرحبا ، برافو عليك انك صدقت وجيت 

حسام وهو بيضحك : عيب عليكى وانا من امتى بقول كلمة واخلفها

فاتن : الحقيقة عمرك ، اتفضل ادخل

دخل حسام وسألها : اومال خالتى وناهد فين

جت ابتسام من جوة وهى بتنشف ايدها فى فوطة المطبخ وبتقول : انا اهوه ياحبيبى موجودة ، ازيك ياحسام

حسام سلم عليها وباسها وقاللها : ازيك ياخالتى ايه الروايح الحلوة دى ، شكلك تعبتى نفسك جامد