#المراهقه_و_الأربعيني

الحلقه10

المراهقة_و_الأربعيني
،،،،،،، بقلم زينب ماجد ،،،،،،،
الحلقه_10

كمت ويه ام علي اغسل وجهي.. نضفت نفسي ورحت للمطبخ.. صراع نزل وصاح ...:- ام علي ماااي ي
بلا زحمه
كالتله ادلل خويه.. واندارت ضربتني على ايدي خفيف.. صلحي غلطج وكومي وديله ماي
-وهو ليش ما يجي يشرب
-يااا ولج انتي شنو الرجال طلب ماي دتحركي.. مشيت طبت خليصان على كولة هيام.. اني اخذت كلاص ودا اطلع..
صاحت هيام.. لا ولج لا ما هذا كلاصو.. ذاك.. كتلها وشنو الفرق
-اكعد اشرحلج كل شويه واكلج يكش.. دتحركي يا امي..
-بس هذا هيج مهووس وعلميا يتسمى مرض نفسي .. غير الكلاص مغسول
اخلاص:- ياااا عزااااا العزاااااااج ان شاءالله ابو حرب مريض نفسي.. ولج هو اليعكل العالم..تجين انتي الزعطوطه تحجين عليه مو بالحيف والله تخسين
هيام:- اخلاص تره جاهله وبعدها متثمن كلامها لا تكعديلها ع الكلمه تتعلم شويه شويه
اخلاص-وانتي الكاعدتلي على الكلمه حصره حجيت اذا ما دافعتي شكو شبيج.. تعرفيها وهيج كاتله روحج عليها .. دحكي شطولها.. جاهله..
-لا تاخذين طول اخذي عقل هي بعدها عقلها على كدها مو مال عيال ومحايل مثل البعض..
-اني تحجي اندرت منهم اطلع كلاصو.. دخل ابو حرب بعد ما تأخر الماي عليه.. اجه بنفسو يشرب ..
دحك حجي بين هيام وخليصان..حجه شكو يول شصاير ..
ومشى للثلاجه يطلع بطل مي مقطر وكال ناوشيني البيدج... انطيتو وهيام رادت تحجي حجت اخلاص
-والله يا خويه ما حجيت شي گلنا لهاي ابو حرب يكش اخذيلو كلاصو شو تكول عليك هذا مريض نفسي.
هيام:- خافي ربج البنيه ما كالت هيج
-عجل انه اجذب وروح المرحوم بالقران يا خويه تالي هلعمر هلجاهله تخوط براحتها..
-هو منطيهم ضهرو شرب مي واني واكفه يمو يدحك عليه صفح بعيونو من حجت.. ترك الماي وطلع بيبسي..
حجيت.. عمو اني ما كلت هيج بس جنت دا اكول........ قاطعني..
-ام علي ترحين.. انه طالع حتى اوصلج لبيتج...
-اي والله خويه.. يا ريت شياخذني بهليل بالشارع انه وجهالي
-عجل استعجلي حتى اخذكم.. حجاها ورفع البيبسي يشرب .. كالتو شلون صرت بس لا تأذيت من الجاي..
-لا عدت ما صار شي.. بس استعجلي خويه انه بره..
ادحك عليه.. ما اهتم ما اعرف غلس بس فشل هاي الحيه.. ركضت هيام تلم بغراضها وتصيح على بناتها
اني مشيت وراها اندارتلي :- غبي لا تصيرين وثمني حجايتج التطلع لا تبقين تهذين بكيفج تره هلمره كبر عقله ومشاها بمزاجه مره ثانيه متعرفي شيتصرف..
-بس اني ما جان قصدي
-الا قصدج والا مو قصدج انتي عايشه وي حيايه اي تصرف اي كلمه محسوبه عليج لا تبقين على فطاريتج اللي بيت اهلج هذوله عيال فتحي عينج والحجي الما ينفعج لا تكولي واسكتي احسن
-هزيت راسي.. اجه علي.. وكاللها يلا ماما تره خالو يصيح بره..
-اي يا يمه اي بس غير كون يفضنها خواتك وينزلن ولج سااااااره..
اخذت جهالها وطلعت.. اني طبيت بغرفة الحجيه..
صراع:- لك ما صحت امك شطلعت هاي .
-جيت خويه جيت.. صعدت وياه وصعدت البنات.. ومشى... حجيت.. اكلك خويه ارد احجي وياك واحلفك..
-شكو
-تره اخلاص مكونه على هلجاهله وهاي ما تعرف صول جعابها والكلمه تشمرها ما تعرف معناها والله بعدها صغيره لا تاخذ عليها فدوه اروحلك..
-ام علي انتي هم علميها ما يصير تتجاوز
-والله علمتها وحجيت وياها بس كتلك هي جاهله ما عايشه گبل وي ناس وعيال وتعرف تثمن كلمتها تحجي جنها عايشه ابيت اهلها
وهاي اخلاص وام سعد يتمنللها الزله لا يحركنك عليها تراها يتيمه وانشمرت غريبه بنصنه.. وانت الجبير العاقل اعتبرها حالها حلا بنتك وعبرلها...
-ان شاءالله .. الله كريم..
ليليان:- طلعت الفراشات جاي افرش.. حلا اجت اخذت فراشها حيل من ايدي.. كتلها شبيج
-وجبت بيج لا تحجين لج.. صوتج ما اسمعو
-لا تتجاوزين اني شحجيت
-هاي ويامن تراددين..
-وكفت ويايه طول بطول.. كتلها وياج.. لزمتني من شعري وتريد توكعني للكاع عادي هم جلبت بشعرها وهي كامت تعطيط وتصيح..
وتلازمنه اني وياها ونتكاون دخلت الحجيه وام سعد وصرخت يا يا شجاجن عزه العزاجن..
طبت اخلاص .. يااا تكتلين حليوه والله اليوم شيخلصج مني.. لزمتني ضربه بعضمة ايدها على وجهي ..
فرت من الوجع وكمت ابجي واحجي رطن مصلاوي واغلط عليها بغير لهجه.
طلعت اغسل وكعدت بالحمام ابجي.. اندكت الباب .. صحت وووو وين اروح يا الله اطير ويين.. طلعت من الحمام طب الحجي..
لكيتهم طالعين و حلا رايحه وي خالتها. عود باجيه وكالبه البيت لان اني ضاربتها.. بقت الحجيه تحجي ولا تحجين وياها ومالج غرض باحد ...
وحجي واني ابجي وامشي بالغرفه. فرشت فراش.. كالت فرشي لحرب يمج .. فرشتلو وكعدت ابجي بفراشي..
لهناك ودخل صراع.. ها يما كواج الله..
-هلا يمه هلا بيك
-عجل وين حلا
حرب:- راحت لخوالي بابا
-ليش انه مو كلت بعد كل اسبوع ومصارلها 3 ايام من اجت
-يمه خلها تولي نخلص من صياحها ومكاونها هي وهاي ..
-هي وهاي.. ليش ليليان شبيها وي حلا.
-حجه هيج وكمزت من فراشي جنت دايره وجهي وابجي.. كتلو عمو والله ما حجيت شي .. ردت افرش سحبت الفراش مني ودفعتني
كلتلها شبيج نزلت عليه غلط وصياح وخالتها ضربتني ..
-خالتها مني ؟
-هاي الاسمها خليصان اااااو اخلاص
-ههه يهز بيده خليصان !!.. حدري دا اشوف وجهج..
-قربت عليه.. اخذ وجهي بايدو.. يكلب بيه.. تركني وهز راسو يصير خير..
-يمه انه رايح اجيب حلا واجي
-اتركها يا يمه خلينا خلصانين..
-نخلص منين حجيه اذا بتي ما اضبها ويمشوها خوالها اقري على تربيتها السلام.
-راح .. شويه وجا وجابها وياها.. ووجه عصبي وصاح ليليان كومي.. كعدت من نومتي ادحك بوجهو..
-كومن كبالي تصالحن دا اشوف شلون بعد تتعاركن..
-كمت وكفت بس شسوي.. بقيت متصنمه ابمكاني..
-كاللها حلا اكفي باوسيها دا اشوف
-بس بابا..
-حلا لا تخليني اطلع عن طوري كومي..
-كامت اني رحت سلمت عليه باوسنا من الخد وكعدت..
صراع:- دحكو دا اشوف بالله العظيم اسمع صايره مشكله بيناتجن لو وحده حاجيه ثنينجن ما ارحمجن افتهمتن..
سمعتي حلاااا.. ؟
-ان شاءالله بابا..
-حدري ... كامت وكفت يمو.. اخذ خدها وباسها.. كاللها بابا تعرفيني جثير تعبان فوك مصايب الشغل والبيت انتو.. ما ترديلي الراحه
كالتلو لا بابا بعد متنعاد.. اسفه..
-عفيه.. كعدو يلا جبت الكم حلويات تلكوها يم الحجيه اكلو وصعدو يمي نامو
-لا بابا انام هنا مو تصالحنا اني وليليان..
-بالله مو خاطر ليليان. بس تردين تسهرين ع الموبايل..
-دنكت منو.. صاح حرب بابا اكل حلوياتك واصعد يمي ..
ردلو تأمر يابه.. .. ضحكله وصعد.. كان جايب علاكه سوده شكبرها حلويات العرفتو يوميا يتسوك حلويات ب5 الاف قبل لا يدخل بليل ينطي للحجيه توزعه علينا.
.. الحجيه فرشتهم كدامنا وتكول اخذو بس 4 حاجات واتركو الباقي..
اخذ حرب و حلا حلوياتهم.. اني الشغله غريبه عليه استحيت اتقرب .. كالت حدري اختاري.. اخذت عصير وجبس وحب وكيكه..
كتلها والباقي المن.. لمته وتكول لجهال هيام خطيه من تجي انطي الها.. لفتهم بعلاكه وضمتهم يم راسها..
كالت تردين بعد.. كتلها لاا لاا .. بس فرحت بهلشغله حيل حلوه وطيبه اني احب هيج اكل حلويات بليل..
حلا راسها بموبايلها والتفزيون منصي .. والحجيه دارت وجهه.. كتلها حجيه يصير ادحك ع التلفزيون..
كالت من كاصبج يمه بس نصي لان اريد انام وراي صلاة اكعد بليل.. كتلها تمام.. كعدت ادحك ع التفزيون لحد ما نمت..
لليل حسيت حركه.. شلت راسي.. كلهم كاعدين والحجيه طلعت.. كلت يمكن هم هيج وقت يكعدون.. ولو بعدني نعسانه والضوه ما طالع..
كعدت شفتهم كلهم ع المغسله واحد وره اللاخ يغسلون حتى حلا.. ادور صلو.. اني منعسه وواكفه
شو شويه وكلهم اختفو.. ادحك حلا رجعت نامت.. البيت كلهم صعدو ودخلو غرفهم.. بقيت وحدي.. اجالي صوت من وره
-شعندج كاعده بابا..
-اندرت.. لكيتو صراع.. كتلو دحكت كعدتو بس شو نمتو.. ابتسم وكال كعدنا نصلي الفجر.. ليش اخوج الشفيه ما كان يصلي الفجر.
-ما منتبهتلو وهو اخر سنتين بدا يصلي ف ما اعرف..
- اقترب وكال هم جنتي ادحكين اصدقائو
-ما كان عندو اضدقاء مقربين بس صارو يجيون ما اعرف شلونهم..
-شلونهم يعني.. كعد ع الدرج وهو يحجي..
-لحاياهم طويله ودشاديشهم كصار عرب جول يلعبون النفس..
-متعرفيهم
-لا بس واحد منهم.. اجه يخطبني وبقيت ابجي ما اريدو.. وكان يحيى يريد يجبرني عليه.. بس اخوك لما عمل عملتو تفلشت الخطبه والتهى بغير بالجيران لما كان يحجون عليا..
-اجه يخطبج ؟؟؟
-اي .. اسمو خالد وماما كالت هذا بالدوله الاسلاميه كان يحجي فصحى.. وتبجي ما تريد تعطيني لواحد مثلو ..
-اتعرفين الدوله الاسلاميه منو همه
-ما اتذكر ماما شنو كالت عنهم نسيت ..
-ارهاب منتمين للقاعده. دحكي يابه انتي السانج فطير وتشمرين اسرارج بساع.. كل معلومه عن حياتج السابقه لا تحجينها فهمتي
-يعني شنو
-يعني الكلتي هذا وخطبني واحد ارهابي كل هذا تنسي وما تكولي..
-ليش
-الا انتي صدك جاهله. لج بويه من الصبح صرعتيني دا اكلج لا تحجين وبس افتهمتي..
-تمام .. يصير احجي بس يم هيام مو الباقين كلهم مو زينين.. حجيت وهو ديدور يريد يصعد.. التفت بسرعه.
-هز ايدو.. اي بس يم هيام احجي .. الباقين كلهم ما زينين.
-صعد.. واني افكر بكلامو.. يعرفهم ما زينين شعندو كاعد وياهم.. الا هذا صدك مريض نفسي.. يلا المهم ما يريد يتزوجني يكلي بابا احسن حتى شويه ويتركني ارجع واكمل دراستي السنه الجايه..
رجعت لفراشي نمت.. يمكن ساعه وهم سمعتهم كعدو.. شنو القصه هم صلاة الاعرفه هنه 5 شو عدهم 10.. شكد يصلون..
كمت.. شفتهم ميصلون وانما كاعدين الساعه 7 و نص.. غسلت وجهي ورحت كلتلهم صباح الخير بس الحجي والحجيه جاوبو.. تركتهم ورحت للمطبخ ..
نوال كاعد تسوي الريوك.. وكفت.. كالت حركي ايدج لا تتصنمين .. اشتغلت وياها حسب اوامرها شسوي تكولي لان ما اعرف شنو اسوي.
نزل صراع.. كال هاا.. اني ممنتبه دايره اغسل.. عاد صاحت مكصوفة الركبه يحجي وياج..
اندرت منو.. دحكتو .. كتلو ها عمو.. ما عارلي اهتمام.. تركتي وطلع.. دحكتو من شباك يصير بصف السنك.. حرك سيارتو وطلع..
من هذا اليوم بديت شغل بهذا البيت.. بس ما مثل شغلنا هناك ابيت اهلي.. هناك احنه قليلين ومناكل هواي..
هنا ليل نهار يجرشون عصريات ضحى .. ما يخلصون.. وما مثل الشغل المتعوده عليه.. البيت امشيته ام سعد..
الكاونتر لازم كله ينغسل من فوك لجوه وي المواعين الصبح وترجعين عليه بوصله.. تكول حتى يضل يلمع وما يتعب..
والبيت غرفة الحجيه والهول و الاستقبال والكليدور والفوك.. كلو تنضيف.. وخلوها براسي .. كانو لكولهم خدامه.
ومو بس هاي.. ام سعد وراي وراي.. وين ما اروح.. رجعي نضفي هاي سو هاي لحي بالتنضيف على هاي.. شبتني..
خلصت وكلت اييي راح ارتاح.. كالت بقالج الكراج يلا طلعي.. اهووو.. طلعت ما حجيت.. اني لما اغسل كراج بيت اهلي
ارشو مي وامسحو.. هنا لا اول شي بالمكناسه والصونده وبعدها ارد عليه بالماسحه وانشفه بوصله وهو شكبره يوسع 3 سيارات..
طك ضهري والله.. خلصت الشغل.. شمرت روحي مثل الميته ع النوم.. لحد ما كعدتني هيام على الغدا ..
كمت.. اكلت وياهم وغسلت ورجعت كعدنا بغرفة الحجيه اني وهيام ..
سولفتلها ع الشغل ضلت تضحك.. كالت ما معوده ايدج ع الشغل.. كتله هذا مو شغل اوادم هذا حتى البنكلاديشي هم يفطس..
كالت عجل شلون غير تنضيف.. لشويه.. اجه صراع.. سلم.. وكعد.. كاللها بابا حلا روحي حظريلي الملابس وصبيلي غدا جثير تعبان..
حلا كامت.. كرصتني هيام.. كالت انتي كومي..
-بس هو صخر بنتو اني شكو..
-عوبه لتصيرين وسمعي مني وكومي.. تحجي همس وهي تكرص.. كمت منها بس ما راضيه. اجت ورايا للمطبخ
-لج يولي انتي شنو من بشر.. لا تخلين احد يخدم رجلج غيرج.
-ليش
-خلي يتعود عليج وعلى مداراتج الو..
-بس انا ما اريدو..
-يمااااي ذبحتني العوبه بغباءها.. دحكي صعدي جهزيلو الملابس بسرعه ونزلي اني راح احظر الاكل بمكانج.
-بس صعدت حلا..
-يبووو راح اشك هدومي واطلع معرايه بس من وراج.. ولج ما صعدت اكلج صعدي..
-اهووو هو شنو اخدمه اني ما اريدو هي كوه .. صعدت.. صدك هي وينها غرفتو ..؟
- طلعت ساره بنت هيام كتلها وين غرفة عمو صراع.. كالت هايه.
-دخلت.. وي غرفتو دااافيه.. ومفروشه واخشابها صاج عراقي وبيها لون .. فتحت الخانه الاولى بالكنتور..
بس بطاطين.. عجل هاي وينهم ملابسو.. دا اريد افتح الباب الثاني.. سمعت الباب انفتح..
اني تصنمت.. دخل صراع وهو ينزع بقميصو.. ما شافني كبل راح للجربايه ودينزع البنطرون.. ضربت بابا الكنتور حيل.. فز واندار بسرعه..
دنكت.. زكح شتسوين هينا انتي..
-دطلعلك ملابس..
-ومنو مكلفج انه ما صخرتج.. صخرت حلا.. سوالفج بطليهن..
-عمو شبيك والله هيام كالتلي انتي طلعيلو ملابسو .. ليش تصيح.
-هاي وي منو ليش تصيح... حدري هين السانج اكصو كص لو راددتي اقتهمتي.. الا صدك مو مال احترام..
-اسفه .. كلتها والعبره اختنكت ابلعومي.. اني صوجي صرت لوكيه واخذت حجي هيام.
اخذ نفس.. وتقرب..
-دام جايه لهين اطلعيلي ملابسي شعندج واكفه ما اطلعين.
-هااا اااا .. اي.. اندرت.. كال الخانه الوسط طلعيلي تراك خفيف..
-فتحت ابكنتور البلوسط.. شفت كومه تراكات الو ..سحبت قميص وكعدت ادور على بجامتها وين مصفطه.. اجه..
-لج بويه يومج بسنه بطني صارت سهال وانه مصلخ صدري.. شو دوخري..
-طلعتلك قميص بس مدا الكه البجامه.. دحكلي.. اخذ القميص وفتحو من صفطتو.. والبجامه بوسطو مسفطه..
كظبهم اثنينهم.. وكعد يدحك بوجهي.. وذول شنو..
- صار لوني بنفسجي من الارتباك.. احس اني اللي صارت بطني سهال بس من الخجل والفشله وهو نازع قميصو كبالي..
نزلت.. منو بسرعه.. لكيت هيام دتصبلو الاكل.. تقربت .. حجت ويايه
:- دحكي اعلمج اذا دجاج الاكل ف صراع ما يحب غير الفخذ.. الفندوه يابس لحمها ما يحبها.
وماي او قوطية عصير او اي شي سائل وي الاكل ما يكدر يبلع الاكل بلياهم.. والخاشوكه مالته هاي
ميزيها بيها بيه خيط ازرك..
-عود ليش اخدموا
-يولي غير رجلج
-بس اني ما اريد يصير رجلي..
-هاج.. وديلو الاكل ونزلي دنحجي بلكت افتح هلعقل المغمض شويه..
صعدت الاكل الو.. اوف هسه شيدك الباب.. وبيدي الصينيه.. دكيت الباب برجلي.. صاح الله اكبر..
-شنو هذا يفجرنا.. رجعت دكيت الباب برجلي غير يكول دخلي.. صاح سمع الله لمن حمده..
-هذا ديحظر ارواح لو شنو .. دخل افوت.. يا الله وشلون افتح والصينيه بيدي.. حرت وين اوديها..
ردت افتح بعكسي .. مالت الصينيه وتبدت شوي من المركه.. اهوو بس لا اترزل انوبه فوك هلتعب..
خليت الصينيه بالكاع وفتحت وشلتها.. ودخلت وسديت الباب برجلي..
لكيتو ديصلي .. يااا واني عبالي ديحظر ارواح.. خليت الصينيه.. حجه هو..
- انتي شلون تسدين الباب برجلج.. حركه مو حلوه هاي..
-مو الصينيه ثكيله بأيدي..
-وانتي منو عاتب عليج تسويلي الغدا..
-هيام
-عقج حاجبو والسبحه بيدو يسبح ويحجي.. ويكول هيام شبيها ؟!!!
-تكول انتي لازم تحظريلو الاكل ما غيرج ..
-ليش عود هاي !!
-مدري تكول خلي يتعود عليج..
-الضحكه بوجهو بس ما ضحك هز راسو ودنك.. كمل تسبيح وكام.. شكرا يابه كلفناج.. شوي ورجعي اخذيها والا اكلج لا ترجعين انه ادز الصينيه..
وكليلها الهيام.. جوزي من سوالفج البيضه بعدها نيه.. تفقس واخذها ..
-تمام.. نزلت لهيام.. كتلها ابو حرب يكول جوزي من سوالفج البيضه بعدها نيه تفقس واخذها..
-عزا العزاج شكلتيلو وهيج يكلج.
-ما كتلو شي ..
-عجل ليش هيج يحجي
-مدري حتى ما جبنا طاري البيض.. هذا اخوج مضروب براسو شي.. يحجي بكيفو
-والله ماكو غير راسج المضروب وصاير كلك.. ولج دحكي يولي انتي ما الج احد بهلعالم.. كسبي لرجلج يول وخلي سند الج تره لو وكف بضهرج صراع اكبر واحد ما يكدر يطخج.
ولو صار ضدج او لو ما دره عنج ودورج.. تنوكلين والله
-بس هسه اني ممسويتلو شي..
-وهذا اللي اقصده.. صراع قبل لا يعقد عليج جنه نريدلو مره اداريه.. لو ما لكه المداراة منج. راح ندورله مره غيرج وتشبعين قهر والله..
-خلي يتزوج اني اصلا ما اريدو..
-هم كالت ما اريدو.. ولج شتردين عجل..
-اريد ارجع لبيتنا واكمل دراستي..
-ومنو يخليج ترجعين.. والمن لاخوج الباعج برخص المي
-لا امي موجوده..
-وامج مره وحيده منو يلفيها يولي..
-لا خوالي يحبوها..
-لو يحبوها وتعرف هي تكدر تعيش عدهم جان من زمان طلعت علشت عدهم ما تحملت عيشتها وي اخوج..
وبعدين حدري هينا يولي .. منو خوالج.. ذوله الجو هين يتوسلون بس حتى ناخذج ونستر عليج...
لو بيهم خير ومصدكين انتي بريئه من عملة عابد.. ما جان اخذوج عدهم وداروج.. مو يجون هنا يتوسلون ناخذج ونطم عارج..
-دنكت راسي شجاوبها
-دحكي يولي والله ما اريد اعيرج ولا بقصدي.. بس الله شاهد اعتبرج مثل بنيتي واريد انصحج..
صراع صدك عصبي واطباعو صعبه شوي بس تراه بالف رجال ولله وكلبو طيب ولو داريتي واخذتي بشورو وما خالفتي..
يفرشلج الكاع ورد والله.. انتهزي الفرصه وانتي يتيمه خلي يصيرلج ام واب واهل. وهو كادر عليهن كلهن..
-بس جبير .. ومو هو البالي..
-قصدج تحبين غيرو ؟!!
-لا ما هيج. بس ما هو الاتمنى..
-لج يولي اكو بيت شعري يكول ما كل ما يتمناه المرء يدركه.. وعسى ان تكرهو شيئا وهو خيرا لكم..
شدراج يمكن هذا الجبير التكولين عليه الله باعثلجياه خير الج.. شدراج لو ما صراع ماخذج يحيى المن ينطيج وهو ارهابي..
يولي بعدج صغيره وحقج متفهمين الامور.. بس اخذ نصيحه ما تخسرين والله..
ليليان:- هي تحجي واني اسمع.. كل الحجتو ما حبيتو .. بس ما بيدي حيله. لا اكدر اتقبل هلواقع وهلعيشه.. ولا اكدر اكلهم رجعوني..
كل الاريده مدرستي وحياتي السابقه بس ما اعرف شبون حتضبط الحياة وياي.. وليش مجبوره اتحمل رجال ما اريدو ولا احبو..
ومو بس اتقبلو.. لا لازم اشتغل واسوي كلشي يعجبو حتى لو ما يعجبني.. يعني واجبي اعجب رجال اني ما احبو..
شلون هيج يارب والله صعبه..
كملت حجي ويه هيام.. صعدت لصراع.. لكيتو .. كاعد على كعدتو يم الصينيه بس امدد رجليه ومنتجي ع الجربايه.. وعينو بموبايلو..
-دا اشي الصينيه.. كال كبل لا تشيلين بس انطيني بطانيه من الكنتور و طفي الضوه..
-صار.. طلعتلو بطانيه.. وخليتها ع السرير وطفيت الضوه.. وشلت الصينيه وطلعت .. خليتها بالباب.. سديتو ورايه ونزلت...
دا اغسل بالمواعين مال الغدا.. واسمع صوت.. دحكت من الشباك..علي ابن هيام.. و ابن سعد ديتكاونون..
واحد يضرب اللاخ.. بقيت ادحك عليهم واخاف اطلع.. ابن سعد يكلو امشي ابن الفكر لو ما احنه انتو مشمرين بالشارع..
وهذا يهد ويكله لعلمك ابن الفكر ياهو.. وذاك يعيره ويكله عايشين بجدنا وانته هيج وانته هيج ويفشر عليه..
عاد طلع الحجي.. وضل يزكح بيهم وذوله مستمرين يضاربون.. طلعت هيام تفاكك بيهم اتجر بأبنها وذاك يغلط وهذا يفور ويريد يهد..
نزل صراح.. وزكح بيا.. شديصير شنو هلصوووت..
-ما انتضر ردي.. بساع فتح الباب وطلعلهم.. زكح بيهم صوت .. من يمي ضربت الشباك من الخوف وسديتو...
رجعت فتحتو شوي.. لزم ابن سعد راشديات..وابن هيام بس حجه.. وضربه راشدي ولزمهم اثنينهم من اركابهم..
وكال حرام بالحرم.. اكصو لراسكم كص لو طلع حسكم.. كو......يد حسكم بنص الكراج شهرتونا ما تستحون.
علي حيل ضاج.. دفع امو وراد يطلع.. صاح علي.. كاله خالو ما اريد ابقى.. صاح لو تحركت متلوم الا نفسك والله..
وكف غلي.. زكح بابن سعد يدخل جوه وهو يغلط ويسب بيه. مشى العلي.. وكاله امشي طب جوه بسرعه..
هيام:- لا خويه خليه يروح للبيت الف مره كايلتلو لا تجي وراي لوكي لازك الا يجي هين..
-بلا صووووت هيااام.. مالج شغل ودخلي جوه .. فاتت وللدموع بعينها..
بقيت بنص .. اريد افوت وره هيام.. وعيني على صراع.. كظبو ودخلو جوه..
رحت فتت بغرفة الحجيه.. هيام كاعده وتحجي بحركة گلب.. طب صراع.. وطب الحجي وراه.
كاللها انتي من شنو ضايجه.. لان ضربت ابنج..
-لا والله مو هيج صراع بس اني اعرفو هو ومحمد ابن سعد ما يتوالمو واكلو ماما لا تجي لهنا تعبت من الحيجي وياه والله وما يسمع.
-وشنو تمنعي يجي لهين. خاطر هلصعلوك .. البيت بيتو واكص راسو وراسج لو منعتي..
-خويه مدحك شلون يتكاتلون..
-ام علي مراهقين.. ويتعدلون انتي كاسره خاطرج عليهم..
-لا صراع ما عليهم بس ابن سعد يكوم يكعد يعيرو بعيشتنا.. وعيشتكم علينا و احنه نچد عليكم وابن الفكر وووو ليش امنعو..
الحجي:- لا بويه ما كال هلكلام الولد صدك تعاركو بس ما حجه هيج ابن اخيج هذا هدي شوي لا تكبريها..
-بويه والله يعيره كلما يكوم يعيرو..
صراع:- اني ما سامعو.. ولو سامعو والله لكص راسو كص..
ليليان:- لا اني سمعته صدك هيج كاله.. اني حجيت هيج لو صراع اندارلي يخزر كنو واحد يريد ياكلني..
طلع وضرب الباب وراه و صاح ليليااااااااااان....يتبع

☆☆☆☆☆☆

#زينب_ماجد