#المراهقه_و_الأربعيني

الحلقه16

المراهقة_و_الأربعيني
،،،،،،،، بقلم زينب ماجد ،،،،،،،،،
الحلقة_16

دحكت صراع واكف على باب غرفة الجهال ويتسمع.. تقربت منو.. دا اريد اكلو حظرتلك الحمام..
بعدني ما ناطقه.. و هو خزرني وحط اصبعو على فمو ويكول هشششششششش...
خفت.. سكتت بساع.. وتقربت منو اتسمع.. حرب وحلا يتكاونون وحرب يهدد اختو و يكولها والله اكول لبابا عليج شسويتي الليليان..
تكله اذا كدها كول وشوف شسوي بيك..
-عجل قريني باجر عندي املاء ما قاري..
-ما اقريك ويطبك طوب مدام تهدد.
ليليان- دحكت بوجه صراع وكتلو اني ممسويه شي والله..
-خزر وكال هشششش.. امشي ثوله.. دفعني و مشينا من الباب طلع حرب.. صاح صراع عليه.. حدر بابا.
اتقرب منو..
صراع- شبيك
-حلا بس كاعده ع الموبايل وما تقبل تقريني..
-ادخل بغرفتي هسه انه اقريك..
ليليان:- مشيت حرب وايدي على راسو.. كتلو امتحان شنو..
-املاء والمعلمه تضربني عوده اذا ما جاوبت
-اقريك اني
-تعرفين تقرين ؟
-اي طبعا.. روح جيب جنطتك وخل نكعد نقره اني وياك.. راح يركض يجيب جنطتو واني رحت لغرفة صراع..
فرشت فراش بالكاع الي و لحرب لان غرفة الحجيه هوسه ومفتوح الضوه ما ينطفي لان اطفال صغار يكولون نا يصير ينامون بالظلمه..
جاب حرب جنطتو.. وكعدت اردلو املاء. وهو يكتب.. واصححلو... دخل صراع بس بالمنشفه.. دنكت راسي عنو..
هو فتح الكنتور.. وكف وراه بدل .. واجه كعد ويانا على الفراش.. حرب مدنك يكتب واني كاضبه القراءه مالته..
بس صراع متضايق حيل.. صرت اعرفو اكثر من نفسو من عندو شي ويريد يحجي وتختنك الكلمه بفمو .. يضل بس يتنهد. ويفرك بوجهو ويمسح على شواربو..
درتلو..شبيك..
-اخذ نفس عميق وهز راسو وكال كملي..
-بقيت ارد لحرب.. دخلت حلا.. كالتلو بابا اني اريد انام هين جوه الضوه معلوگ.. وبعرفتنا بارده وماكو صوبه
صراع:-طلعي برا
حلا:- ليش بابا شسويت
-كلللللللت طلعي برا ما اريد ادحك وجهك..
ليليان:- استغربت تصرفو وي بنتو بهلطريقه هو يحبها ابد.ميغثها..
كملت القراءه لحرب.. كتلو حفظت كال اي.. حظرتلو الجنطه وقطيت اقلامو ورتبتها ونزلت جبت ملابس المدرسه مالته واجيت ..
لكيت حرب يبجي وصراع عصبي وباقي مخوزر عليه .. بقيت واكفه .. اريد اعرف شنو الموضوع..
دحكلي.. وكام.. فرشي ونامي انتي وياه بسرعه
-عجل مو فارشه
-لا تناقشييين
-فزيت.. وسكتت بسرعه اخذت حرب ونومتو بفراشو ونمت يمو.. دحكتو يشرب جكاير بكثره وحده وره اللخ وينافخ ..
اختنكنا والبردات نازله وتدفئه ماكو .. بس هيتر.. بقيت اكح.. عاد.طفى الجماير وفتح الشباك وكال تغطي زين وغطي حرب وياج على ما يطلع الدخان..
تغطيت بفراشي بدون حجي .. وهو واكف يدحك ع الكراج بعصبيه.. شويه واجت الوطنيه اشتغل المكيف..
انتبهلو وسد الشباك وراح لفراشو.. بعد ما اتذكر الصار لأن غفيت.. كعدت على صوت الكنتور وهو يفتحو يبدل
وحرب نازل يبدل.. ردت اكوم.. كال منعا باتا تنزلين جوه.. الدينا اكلبها بالقران.
-ليش ..
-اخذ اجازه واجي ساعه ما اطول هين تبقين لو الف واحد يدك الباب ويكلج نزلي ما تنزلين لحد ما ارجع مفهوووم
-بس خطيه المره جايبه وبس نوا....
-دفتهمين شدا احجي لو اعييييد ليليااان..
-لا افتهمت..
-اشوف..
طبك الكنتور حيل.. وطلع..
-بقيت بغرفتو.. رجعت نمت. صعدتلي ام سعد وتصيح يمحنايه شرايده بالله نخدمج بغرفتج
-خاله والله ردت انزل بس صراع يكول ساعه وارجع لو دحكتج نازله الدنيا اكلبها فوك روسكم
-وشبي هذا انوبه
-ما اعرف من البارحه يصارخ على حلا وطردها ولكيت حرب يبجي
-تغير لونها.. وهي كعدت كبالي .. ليش يبجي ما كالج شي .. عرف شي
-يعرف شنو مثلا
-يعني كصدي ما سمعتي شي
-لا ما حجه كبالي. بس دحكتو يصرخ على..... دخل صراع.. اتفاجأ بام سعد كاعده على فراشي وتحجي وياي..
رفع حاجبو وكاللها خير ام سعد..
-كل خير وليدي جيت ادحك ليليان لان ما نزلت كالت انته ما تقبل كتلها براحتو..
-رفع حاجبو ويكلها هااا .. بالله من رخصتج اريد ابدل..
-اي ان شاءالله..
-طلعت.. وتقرب مني كال شرادت منج..
-سألتني ليش انته عصبي
- لج يولي جايه تثوليها عليه انه ما دحكتها من البارحه لليوم منين عرفت انه عصبي من البارحه لو ما جافصه كبالها
-اي كتلها عمو ما قبل ينزل كالت ليش كلتلها ما اعرف هو عصبي
-وكلتيلها طرد حلا وتعارك وي حرب مووووو
-اي .. اني حجيتها وهو صكعني على راسي حيل ويكلي غبيييييه وكام بساع.. فتح الباب وطلع..
هذا شبي ليش يضربني .. شسويت الاحترمتهم ضربوني والعاندتهم ضربوني عجل اشنو اسوي اني
كمت وطلعت وراه.. دحكتو دخل غرفة حلا.. ما لكاها.. نزل بساع.. نزلت وراه ما اعرف شبيه متخبل
صاح حلااااااا.. هو صرخ وهي طلعت حلا تركض من المخزن و ام سعد طلعت وراها..
تقرب منها ويكلها شاي تسوون
ام سعد:- اريدها تشيل الكونيه وياي انه ما بيه حيل وحدي اشيلها
زكح بحلا ببكل علو حسو ويكلها .. شجنتيييييي تسووووين..
-بابا والله جنت اطلع الكونيه ويه حبوبه.. كلها طلعت على صريخو
امو .. وخلوص قائد الميدان هم بايته الغبره و نوال وابوه وام نور مرت المرحوم..
راح للهول.. وكعد.. وحلا ميته خوف والدموع تراري بعيونها... اني واكفه كدامو.. نزع السلاح من خصرو وحطو كبالو ..
وحلا تعصر ايد بأيد والعيون دم .. وتدحك بوجه ابوها.. فرك وجهو.. كالتلو الحجيه شصاير صراع..
-ماااااااااريد صووووت.. ولا نفسسسسس.. جيله جيله احطهن بروسكم وانعل والديكم وااااااالله..
دخلت هيام.. حتى ما سلمت نزعت عبايتها وكالت يا ستار شبي ابو حرب ..
ام سعد واكفه و اخلاص رادت تتقرب لحلا.. زكح بيها صراع بعدي عنها.. ما سگطها غيرج بعديييي
صراع:- حدري حلا
- بابا بس اسمعني
-لج انه ما خلصت من العار امج طلعتيلي انتي .. خلفتج على كلبي وانطمت عساها بالحرك وهي بكبرها
لج يولي اروح اطمج بصفها واخلص من وجدان وساس الحقاره بحياتييييييي..
محد رد ولا احد جاوبو.. بس ابوه راد يحجي وزكح بيه وهم سكت.. بقى كاعد.. والكل كاعد بالهول والعيون تداور..
كام يفرك براسو ووجهو صار احمر.. خفت صعد عندو الضغط.. رحت ركضت جبتلو مي..
واجيت.. وهو مدنك.. ولا واحد يحجي.. اريد احجي واخاف انكتل واخاف عليه من العصبيه.. عاد هيام كالت انطي مي ليليان الله لا ينطيهن يردن يموتنه..
رفع راسو.. واني كدامو وماسكه كلاص المي...
صراع:- انه وين اضم وجهي من الله.. وشكلو .. كتلتها تهمتها زور .. قهرت اليتيم الوصيتني بيه كليلي انه وين اروح من ذنبج..
-هو حجه هيج ودموعي نزلت وحده وره اللخ.. اخذ الكلاص مني.. شرب وكال كعدي.. واندار الحلا..
-احجي
-هي ادحك بيه وبس تبجي..
صراع:- احجيلكم سالفه... كبل شهر او اكثر هاي المره صاحت انباك ذهبي.. وانه غبي ابن سطعش غبي وطرن اول ما فكرت وتهمت..
تهمت مرتي كل ضني الغريبه تبوك بيتي والتبين البايكني والبايك بيتي مني وبيه وانه ما ادري
عجل شكد كديش..
صفك ايدو بعصبيه وصرخ... مو حلااااااا
-لا بابا بس اسمعني
-دحكي بت العار.. امج اطلعها من كبرها واحركها واحركج لو ما حجيتي هسه اريد اسمع الصار كلو وكدام هلعالم حتى يعرفون منو الباطل ومنو الحق..
-بابا اعترف اني بس غلطت الله يخليك سامحني.. وكامت نزلت يم رجليه تريد تبوسهم.. ضربها برجلو وهو لابس الحذاء على وجها خلا الدم يجري..
كامت اخلاص .. رفع ايده ووكفها ويكلها انعل والديج لو ادخلتي.. مكانج.. الله يخلصني منكم ومن زمرتكم يا كلاب..
رجع دحك على حلا وكال الها بالقران لو ما حجيتي انهي بيج القاضيه..
-هي بس تبجي والدم يجري من خشمها.. وتتوسل بيخ بس تكلو بابا فدوه بابا.. اني ابجي وياها انقهرت عليها خطيه كلها دم..
صراع:- لج بتي وطالعه من ضهري.. واعرفج هلشغل ما ادبرينو وحدج.. منو الساعدج.
-هي تبجي وما تجاوب ..
-دحكي قسم بالله لو حجيتي منو الساعدج وصفط كل هشغل.. ما اكضبج ولا اذيج.. ف احجي احسلج
-محد بس اني..
-احجي حلا..
تبجي وادحك بيهم وهو دفرها ويصيح عينج يميييي..
-بابا محد ساعدني بس اني ..
-منين جبتي الموبايل.. منين جبتي رقم الارهابي وشلون دخلتي الغرفه شلون تخذتي الفلوس ..
هذا مو شغلج حلا احجيييييي..
-الموبايل مال عمو عابد قديم بغرفتو والرقم اخذتو من موبايل جدو والله بابا متندمه ما جان قصدي شي بس ما ردتها تاخذك من عدنا..
-هي حجت هي وام سعد تنهدت.. هو رفع راسو وكاللها تنهدي على راحتج ارتاحي.. ارتاحي..
دفر الطبله من كدامو.. وكضب حلا من شعرها.. وسحلها وكلها جلبت بيدو والحجيه تصرخ صراع لا يمه بنيه حرام عليك..
وهيام تبوس بيه وتكلو لخاطري فدوه خويه اتركها والله اخاف عليك انته هي ونعالك صحتك خوووووويه..
وهو ما يحجي جار شعرها وهي تصرخ.. واني اجر بيدو وابجي واكلو عمو لا فدوه لا تضربها..
ما رد على واحد.. مشاها جر من شعرها وصعد فوك.. ودخل لغرفتو وقفل الباب.. ما نسمع بس صوت الغلط مالتو والصياح عليها وعلى امها وهي تصرخ وتتوسل بيدو..
واحنه ندك بالباب وسعد يدك والحجي واخلاص كامت تبجي وتكلهم راح يموتها الحكو على البنيه راح تموووت..
تلكتها هيام ودفعتها وتصرخ تموت من وراج ام الرجوووله ساعة السوده الشفناكم بيها ذبحتو اخوي حركتو كلبه دمرتو الله لا ينطيجن ان شاءالله
عساها بحظجن وابختجن.. لو مات اخوي هسه وهو يكتل علساقطه ربحي بيمن بياااااااا عااار بوجدان واهلهاااااااا
حركتن بيوتنااااااا الله لا ينطيجنننن..
فقدت هيام فد مره كامت تصرخ بلا وعي ... وسعد.يدك بالباب والحجي ويصرخون واطفال تبجي..
ودموعي من الخوف تجري عشره عشره.. ام سعد ابد ما صعدت .. سوت نفسها التهت بجهال المرحوم يتباجون..
والحجيه تبجي وتكولها هسه تموت البت ويموت ابني دخيلك الهي بردا وسلاما ربييي ما عني غيرو هلولد لا تفجعني بيومو دخيلك يلستاااار بردها وهونها ...
تحجي وتدعي وكلبها محروك.. اخر شي.. سعد كسر الباب وفات.. صرخ صراع اليطب والله ارمي.
سعد ما سمع.. كالو عود ارميني براحتك.. جر البنيه من ايدو.. وهي تخربطت بيدو وكعت.. هي والميت..
دخلنا احنه الصراع وسعد شال البنيه ونزل بيها اخذها بالسياره للمستشفى..
صراع كعد.الايد ترجف.. والخشم يخر دم من الاعصاب ويمسح ويرجع.. ويفتح بقميصو يريد الهوى..
وهيام تصرخ وتبجيوتفتح بملابسو وعمتي تهفيلو بشيلتها وتنفخ بوجهو وتدعي.. وهو ما استقر يشهك من التعب ويكول يا حيف انه اخلف عار.. ماتت وحده بليتني بالثاني ليش ربي ..
اني بس امشي منا ومنا من الخوف والرعب والهوسه ما اعرف اشنو اسوي بس ابجي وادحك بيه راح يموت الوجه احمر حيل ..
وخر هيام من عندو وراد يكوم.. مشى للباب وصل
. حط ايدو على الحايط وجسمو يطوطح ..
صرخت هيام وج يمممممه راح اخوي راااح.. هي كضبتو وهو وكع.....يتبع

☆☆☆☆☆☆
حلقه هديه وان كانت قليله على قدر المستطاع الكتابة ليلا.. بمناسبة المليون مشاهده .. و وصول القصه 1 عاطفيا.. ووصول حسابي على واتباد الاكثر متابعه عربيا ب50 الف متابع ..ووصول صفحة قصص فتيات عراقيات الاكثر متابعه من بين صفحات القصص على الفيسبوك
.. اشكركم جدا من كل قلبي .. على تواصلكم وحبكم.. احبكم بالله ..
متابعه ممتعه للجميع ❤
#زينب_ماجد