#المراهقه_و_الأربعيني

الحلقه5

المراهقة_و_الأربعيني
،،،،،،،، بقلمي زينب ماجد ،،،،،،،،
الحلقه_5

صراع:- بس كلولي ويييييين.. وين وديتو احجو..
-خاله والله منعرف بيه ولا نعرف وينو.. كل القصه اخوك يلاحك بتنا و شهرنا بالمنطقه وخرب سمعتها.
-خرب سمعتها هااا .. لو ما بتكم طالعه وياه .. هسه تشمروها براسو واطلعون منها وتبلون بمصايبكم.
احجو لا بالقران افلش بيوتكم..
-عمو والله اني ما طلعت وياه هو يعاكس كلما فتنا من طريقو.. ما حاجيه وياه ابد والله هو كان يتعرض النا ويمسكني ويتحرش..
-لج بنت النواقيص هسه تبريتي منو دنعل الخلفوكم.. والله لو ما حريم.. بس بسيطع.. انه اعرف شلون اتصرف وياكم...
-تركونا وطلعو.. وقفلت ماما البوب وندارت.. ولج كليلي وتالي شلون وين نروح حتى ابن خالتج بعد ما يريدج وين اوديج.
-ماما اني خايفه حييل... وبجيت..
-ولج وين نولي وين نشرد فهميني ذوله ما راح يتركونا بحالنا وين ننطي وجهنا فهميني.. عزه العزاني ..
وين رحت جرجيس شوف حالي بيا حال.. بتك ما اعرف احميها.. كعدت وماسكه قلادة الصليب بركبتها وتبجي
كعدت يمها وتجيت راسي على ايدها وابجي.. اخذتني وخلتني على رجلها وتمسح على شعري وتدعي ..
.........ابو حرب ........
-ولكم دخت راسي راح ينفجر .. اخخخخخ منك عابد.. تطلع منها سالم بالقران الا اخلص بيك القاضيه. على هلفرفحه الفرفحتنا بيها.
-ابو حرب يمكن عابد صدك متورط بفضح البنيه.. انت سمعت صديقو شكال.. يحب بنيه وراح يشوفها..
-يحبها.. بس ما گال يلاحقها..
-لا گال بس انت طلعت.. كال هو يخبها وهي ما تريده.. وصار يومين ما مرت فراح عليهم..
-هاي شوكت حجه هيج.
-انت ما سمعت كل الحجي.. ورثت جكارتك وطلعت بمجرد ما كالك اللي يحبها اسمها ليليان..
-والله هلعابد كلشي يطلع منه غاسل ايدي منا.. اخخخ يا يابه. كله من الحجي.. كل ما حجينا وكال تركه يابه يتزوج ويعقل
وزوجناه وزيدنا الطين بله.. وهل هاي ضاع وضيعنا وياه. وين نلكاه بس الله يدري..
-نلكاه ان شاءالله .. بس لا تقهر روحك.. ضغطك يابه.
-شنلكاه كلي شنلكاه. هلكلب يحيى.. ايدو بيد الدوله الاسلاميه.. تعرف شنو يعني.. يعني القاعده يعني ارهاب..
وتالي عمري اركض وره الارهاب اجرجر عابد منهم.. الله يطيح حظك يا عابد على هلبلوه هاي..
،،،،،،،،ليليان،،،،،،،،،
- كعدنا الصبح بدلنا اني وامي.. ورحنا للمستشفى.. يحيى كان هناك.. سولفتلو امي على اللي صار بليل وتوسلت بيه ان اذا تعرف مكان الولد تتركه
لا تروح كلنا ضحيه وهم كلش زين يعرفون انت الوره السالفه.. ما حجه بقى بس يهز راسو.. وبقت امي توصي عليه هواي
وتكله احنه نسوان وما النه احد.غيرك استر علينا واتكرهم تره ذول عشاير ما تتواجه لا واحد ولا اثنين واحنه لا عمام ولا عشاير عدنا.
انوب تركتو ورحنا كعدنا ويه باجي خالديه.. ما قبلت تبقى بالمستشفى.. تكول اريد اطلع ما ابقى.. .
راح يحيى كمل اوراق الخروج واجه طلعنا.. و الطريق كلو ساكتين وما نحكي..
دخلنا ع البيت.. صاحت باجي على يحيى.. كالتلو اذا عندي يمك كدر.. تترك ابنهم.. والله ما الي احد غيرك لا تفجعني بيك خله يولي..
ان كتلته ما تستفاد شي.. شمره واتبره من خطفه وحاسبهم على فضيحته لاختك واتصرف بعقل يمه الطيش ما ينفع احد..
كاللها ان شاءالله يمه بس ارتاحي.. امي راحت سوت الها شوربه واني كاعده يمها..
،،،،،،،،،،،ابو حرب،،،،،،،،،
- ما تركنا درب والا طريناه ندور على هلعابد.. ترصدنا للي اسمو يحيى.. عسى نكدر نكضبو ونعرف مكان عابد..
.. بقينا نراقب بيتهم بسياره وحده خليناها بالساحه ونبقى نراوح بالفرع..يا رايحين يا جايين.. حتى ما ينتبه النا
دحكنا علي لما جاب امه و اهله جانو وياه بالسياره.. رادو يتعرضون اله...كتلهم انطو صبر .. يطلع ونكضبو.. خله يدخل اهلو..
كعدنا ننطر للعصر وما طلع الناقص..
-ابو حرب راح نبقى اناطره ليما يطلع .. خل ندخل بيته وناخذو..
-اذا ما طلع.. ناخذو بليل.. هسه ما نكدر.. الناس كلها موجوده ما نريد نجيب العين ونلفت نظر..
خلنا ننتظر..
للساعه 8 بليل.. دك موبايلي.. دحگت الاسم.. عابد.. فزيت من مكاني .. صرخت بيهم هذا عابد اسكتو ..
فتحت خط.. وصحت الوووو .. كوه يحجي وكال ابو حرب الحكيتي..
-وينك انته يول عكول ما ضلت براسنه من وراك.. وين انته .. كوه حجه ودلانه على مكانه.
كتلهم امشو.. تراكضنا لسياراتنا وطلعنا.. وصلنا للمكان الهوه بيه.. دحكتو وهو كاعد بالكاع..
زكحت بمسلم.. اكف هذا اكف.. نزلنا كلنا كن سياراتنا.. هو دحكنا وكام.. سطرته براشدي.. وكعتو للكاع..
انته ما تستحي على روحك.. ليمتى تضل اعوج.. صارنا ايام احنه وعمامك ما تركنا ديره ما طريناه خاطر حظرتك وانته ماكو..
متكف سرسره انته.. جيله احطها براسك واخلص منك.. اصايح وياه وولد عمي كاضبيني عنو..
-ابو حرب اهدء يابه خل نفهم شبي وين جان.. حول يا الله..
-اتصارخ وياه وهو مدك راسو ما رفع عينه.. بقيت امسح بوجي من العصبيه وامشي منا واجي هنا.. ولد عمي يسألو بيه..
شلونك وشسوولك و وين جنت.. شفته ما يجاوب .. حسيت بي متأذي.. صحت بيهم.. اصعدو.. امه طك كلبها علي..
خل ناخذه للرمادي وهناك نتفاهم.. صعدنا سياراتنا.. وهو ويانا ما حجه ولا كلمه..
وصلنا لديرتنا.. نزلنا الباب.. ولد.عمي رفعو اسلحتهم ورمو بالجو فرحانين برجوعه...
اخذتو ودخلنا جوه.. تلكنه الحريم امه والبنات خواتنا.. يبوسن بي ويبجن والحجي حظنه وسلم عليه..
انه تركتهم وصحت.. بابا حلا صعدي حظريلي الحمام بساااع ميت.. اجاني صوت من وراي..
-هلا بابو حرب كرة عينك برجعت اخوك
التفتت.. اخلاص.. هلا اخلاص .. هلا بيج .. يسلمج الله..
- والله ضل بالي يمك كلت اكيد فرفح كلبك عليه لحد.ما لكيته.
-الحمدلله المهم هو بخير الباقي يهون..
حلا:- بابا جهزت الحمام.. اصعد..
-اي بابا.. اخوج وين.. ما هوه..
اخلاص:- يمنا ابو حرب لا يضل بالك اخذتو صار يومين امتحانات عده وهنا هوسه كلت اخلي يمي..
-ممنون منج اتسوين زين.. انه هم ما دريت عنهم بالي جان بعابد.. اترخص انه اخذي راحتج..
اخلاص:- مرخوص يلنشمي محفوظ بعين الرحمن ان شاءالله..
حلا:- ها خاله هااا بدينا
-ولج سكتي على حظي المصخم لما حجو بسالفتنا طلعلنا عابد صفح.. يارب تكضي على خير وتصفالنه الامور..
-خاله اتمناج لبابا .. ادحك امي بوجهك وبحنيتج شفايتله بابا ياخذج..
-يا بعد.عمري يا خاله وانتي الله شاهد.حسبة بنيتي .. والله كل همي انتي وحرب اكول شلون مدبرين اموركم هيج..
وعمتج هيام ما داريه عنكم ونور مرت عابد عظمها ينكط سم واخاف عليكم منهم.. ان شاءالله خاله بس تصير شحده اليدنالكم.
-ان شاءالله..
صراع:-سبحت وصليت ونزلت.. عابد ماكو.. حجيت وي امي.. عجل وين عابد ؟
-اخذته حرمته تسبحه وتشوف شناكصه حالته تعبانه..
-ما حجالكم شي ؟
-لا والله ييمه بس كال مجتفيني و متكاونين علي وكاتلي وشامرينه بغرفه ظلمه واليوم هدوه.
كلناله ارتاح واحجيلنا.. خله للصبح يرتاح ويحجي.. هسه تعبان..
-شلصبح هي مال صبح.. هسه يجي يحجي.. ما فارغلو انه.. صارلي ايام تارك دوامي من وره سوالفه السز..
الاب:- بويه انت هم على كيفك وياه.. تراه تعبان.. لا انت والدنيا عليه..
-شسويتله .. كطمت اذاناته.. حطيتله جيله برجله وكعدته .. ما كافي الشفناه من وراه.. دا اشوف هم يجوز لو اتوبه من صدك من سوالف النسوان..
ام عابد:- تراه شاب وطايش يكبر ويعكل .. على كيفك وياه كل الزلم ادور نسوان كادرين بس على هلفقير..
-بالله انتي ياريت اطلعين منها.. اخوي لو ادفنو انه اعرف بيه مالج دخل بيناتنا..
جاي احجي.. ولمحت نور مرت عابد طرت الباب ومشت.. صحت عليها رجعت..
رجلج وينو ؟
-خليتله العشا عمت عيني جوعان..
-مو وكت تعمى عينج.. صيحي كليله صراع يريدك..
-بس يخلص اكله..
-يلحك يتسمم صيحي اريد اصعد انام..
-ادلل خويه..
الحجيه:- ييمه والله خايفه عليك لا يصعد ضغطك.. دير بالك على نفسك ما تفيدك العصبيه..
-هزيت راسي الها.. وبقيت على شواربي.. دخل حرب بصوت عالي فززني .. باااااابا..
هلا ومية هلا.. هلا بسورها ونورها.. شمر روحه علي.. عصرته بحظني اشم بيه.. شلونك بعد ابوك.
-زين.. وين جنت..
- دخل عابد.. بست حرب وكتلو اصعد بغرفتي الليله على ذراعي تنام.. باس راسي وركض..
اندرت لعابد.. اكعد اكعد.. خل نفتهم القصه..
عابد:-ماكو اي قصه ابو حرب همه اخذوني بلا ما اعرف السبب..
-عجل والبنيه الملاحكها منو ؟
-مالها دخل هاي بخطفي
-انته جاي تتغابه لو شلون.. اخوها هو متورط بخطفك..
-منيلك هلحجي ؟
-انت جاوبني الخطفوك دحگتهم.. تعرفهم..
- لا ما اعرفهم ولا دحكت واحد منهم بس سمعتهم..
-يخربطون فصحى ؟
-اي
-تعرف ذوله القاعده.. والله ستر وطلعك مدري شلون.. متعجب اجيتني سالم الا جنت مخلي ابالي زين لو الكه راسك..
-القاعده شلهم بيه.. وشربطهم بالبنيه.
-اخوها عندو علاقه بتنظيم الدوله الاسلاميه..وجان وياهم من سألو عليك بيومها..
هسه اللي اريد افتهمه شسالفة البنيه الاسمها ليليان.. منين هاي وشعدك وياها.. صحيح انته فاضحها بالمنطقه مالتهم..
-شفاضحها ختولي .. كلها خلك ساقطه سوتلها زعله عليه وتتفزع عليه الجيران عود انه اتحرش بيها..
-بس ما هيج الحجي سمعناه. على اساس انت ملاحكها وهي ما منطيتك وجه وفاضحها
-جذابه تريد تكربسها براسي.. كم مره تجيني للسيطره واسأل الولد.. يوميه تمر وتتمضحك..
الاب:- عجل ليش اخذوك يابه
-مو هذا السؤال.. كول ليش تركوه.. سالفتهم ما خاليه.. اخوها ما ارتحتلو .. فد واحد.نكس مهتلف..
لا يلعب وياك ملعوب قذر..
-شيسوي مثلا..
-كلشي يكدر يسوي وما نكدر نحقه.. لا اهل لا عمام عندو .. والوضع هيته.. المن تروح و ويامن تحجي
انطي راتبك هلشهر واكعد.. بلكت اكدر اتوسطلك وانقلك للرمادي حتى لو لغير محافظه المهم الموصل بعد ما تدخلها..
انه اصعد هسه انته اخذ راحتك وجوز من سوالفك.. وهذا اخر انذار.. مرتك حامل اتقي الله واترك النسوان..
،،،،،،،،ليليان،،،،،،،
مرت اسبوع والرجاجيل من يومهم بعد ما دحقناهم.. السالفه دتكبر يوم عن يوم.. والكل يحجي بالفضيحه..
كأن ما صدكو اكو سالفه بسرعه انتشرت.. و يسمعون امي كلام وحجي وهي تجي تتعارك ويايه..
يحيى حط دار للبيع او للايجار.. ومحد مر ولا احد اجه يأجر او يشتري.. وهو يوميه عرك ويايه وصياح وعياط
مدرسه كأمو ايست ارجع.. من كد اعصاب يحيى ما يتحاجى..
يحيى يحب يحجي بالدين ووهوايه ديتعمق بيه.. ف وهو يحجي واحد معيره كايله تحجي بالله واختك بايعتها بالمنطقه..
عاد هو ما ضال عقل براسه.. ومتعارك وصايره هوسه.... اجه للبيت نار كبره.. لزمني ضرب وامي تحيله عني وصياح وعرك..
رايح للي اسمه خالد يريد ينطيني اله.. ذاك رافض ويكله.. سمعت اخابر لا تسر عن اختك.. وهي كافره وفاجره..
عاد متخبل بالزايد.. وحاير وين يطمني ويخلص مني بوده يشرب دم من عندي..
اجو خوالي حجو وياه يروح لاهل الولد اللي تسبب بفضيحتي ويحجون وياهم.. ويتحملون مسؤلية الفضيحه..
كايللهم هذا ضامله ضمه بس الله يدري بيها.. كايليله جوز من سوالفك واستر السالفه.. البنيه انفضحت.. لا تزيدها وشوف شنو حجيهم..
عاد راح خالو و جيرانه ابو ساره.. اخذو عنوان بيتهم بالرمادي من السيطره.. وراحولهم..
،،،،،،،،،،ابو حرب،،،،،،،،،
جيت من الدوام.. لكيت ناس بالاستقبال.. صفيت سيارتي بالكراج ورحت للمطبخ.. كتلها ام علي منو موجود..
كالتلي ناس من الموصل.. يمكن اهل البنيه المتورط وياهم عابد..
هزيت راسي.. وانطيتها السويج والسلاح تضمهم.. ورحت سلمت وكعدت..
عمامي كاعدين والحجي.. والولد.. كعدت.. سكتو.. كتلو ها يابه.. خير خو ماكو شي..
-يابه الجماعه من الموصل.. ويكولون ابنكم فاضح البنيه واهلها مبطليها من المدرسه والمنطقه معيرتهم ومتأذين..
-ابنه ما فاضحها.. هي عدها علاقه وياه.. ومفزعه اهل منطقتها عليه .. بعد شنو جااين يحطوها براسنا..
حجه خالها..
-ابني الحجي هذا مو صحيح.. ابنكم كم مره متعدي للبنيه.. و صديقتها بت هذا الرجال وياها تمشي..
وهم حجت.. يوميه يتعرضلهم ويمسك ليليان و يعاكسها.. وغيرو الطريق في سبيل ما يمرن من السيطره و يعاكسوهن..
وهم لاحكها للبيت ولازمها.. ومن رافضته ورايده تمشي ابنكم مجرجرها للسياره عاد هي ضاله تصيح عليه وتبجي..
من طالعين الجيران الها كالب عليها ويكلهم صاحبتي واريد اصالحها.. والجيران تشهد على هذا الكلام.
حجه ابو ساره....:- ابني تره البنيه طفله واحنه جيرانهم صار همر من قبل لا تصير وهي رابيه وي بنتي الله شاهد ما فد يوم سمعنا صوتها
بينيه خلوقه تروح وتجي ويه بنتي يوميه.. وجيب اخوك وخل نحلفهم على هلكلام.. حرام سمعة العالم مو لعبه..
والا الشرف والبنيه انطعنت بشرفها وما اظن عشايركم تقبل الفضيحه لبنات الناس..
الحجي:- لا والله ما نقبل واذا ابنه صوج نكص راسو ان شاءالله يومين ونجي للموصل نتفاهم وما يصير خاطركم الا طيب..
صراع:- بعد الكلام.. ودعناهم ودخلنا.. حجه وياي الحجي ..
-يابه شرايك وين الصح..
-والله يا يابه هذا ابنك اكبر ساقط.. واتوقعها منه .. من باجر اطلع للسيطره الجان بيها واتواجه وي صديقو.. واعرف الصح من الخطأ..
حجينه وي عابد بليل وكناله اذا غلطان وياها وفاضحها استر على البنيه واخذها..
كام يتخبل ويصيح ويكول شنو اتزوجلي ساقطه تتبله عليه.. هيج منها وهيج من اهلها..
ثاني يوم رحت للسيطره لصديقو.. وحلفته بالقران يكول الصدك.. كال عابد هو لاحكها وما شفتها فد.يوم وكفت لو حجت وياه.
كل الجنت اشوفه عابد يريدها ويتوعدلها لان رافضته.. كتله جوز منها .. كال دخلت عقلي بعد..
تخبلت من سمعت هلحجي.. يعني فاضح بت العالم و يكول ما اتزوجها.. رجعت اتكاونت وياه وذاك الصياح والعياط..
وهو يكول اني ما فاضحها هي عدها علاقه وياي.. وهي اكبر ساقطه.. وما اتزوج ساقطه.. شنو تردون تكربسوها براسي..
عاد خليت القران وكتله حط ايدك واقسم وكول هي العدها علاقه وياك مو انته الفضحتها..
حط ايده وقسم بالقران.. تخبلنا يعني صادك.... زين هسه وين الصدك نصدكهم لو نصدكه ؟؟؟
عاد اخذت الحجي و عمي وسعد.. ورحنا للموصل كعدنا وياهم.. وكلنالهم.. شتريدون احنه حاظرين..
فلوس اي شي تردون ننطي.. بس البنيه ما ناخذها.. وابنه قسم على القران ان هي عدها علاقه وياه.. وما يردها
واحنه فضا للنزاع شكد ما تأمرون احنه حاظرين.. بس زواج ما نكدر..
عاد رفضو اي مبلغ.. وكالو حوبة البنيه بحظ وابخت ابنكم.. توسلنا ياخذون فلوس رفضو..
زين الحل شلون.. ما وصلنا الحل هم يحجون واحنه نحجي .. يردون نستر عليها ميقبلون بالفلوس..
عاد كلنا نرجع نجرب وي عابد بلكت يستر عليها ويلم السالفه لا اطول.. رجعنا لثاني يوم حجينا وياه هم رافض..
تكاونه وياه.. ومصايح وما يقبل بيها.. عاد لزمتو ابوكس فلشت وجهو.. كام يصيح ويكسر وتركنا وطلع..
درتلهم .. حجه الحجي.. والحل يابه..
-ننطيهم فلوس ونفتك.. شنسوي
-يابه ما دحكت بعينك ما يردون الفلوس..
-والله عاد يابه ما بيدنا شي.. ومنو كال بتهم صادكه ابنه حلف وبتهم ما نعرفها تطلع مو خوش ويردون يبيتوها بروسنا
واخوها نكس.. عاد اختو شلونها.. اكيد انكس منه....
اخذت سويجي جاي اطلع جان يجيني حاتم ابن جيرانه ويكول ابو حرب الحك.. اخوك اندعم ع الشارع......يتبع
☆☆☆☆☆

#زينب_ماجد