#المراهقه_و_الأربعيني

الحلقه17

المراهقة_و_الأربعيني
،،،،،،،، بقلم زينب ماجد ،،،،،،،،،
الحلقه_17

اني امشي منا ومنا من الخوف والرعب والهوسه ما اعرف اشنو اسوي بس ابجي وادحك بيه راح يموت الوجه احمر حيل ..
وخر هيام من عندو وراد يكوم.. مشى للباب وصل
. حط ايدو على الحايط وجسمو يطوطح ..
صرخت هيام وج يمممممه راح اخوي راااح.. هي كضبتو وهو وكع... كلنا صرخنا وكضبنا وهو ما يحس على شي..
طلعت الحجيه تصرخ تريد واحد يجي .. نائل ما كان بالبيت بس محمد ابن سعد.. صعد يركض كالتلو الحك عمك وكع..
راد يشيلو ما ينشال .. صراع خشن وضخم .. صعب ينشال.. عاد هيام خلت راسو بحظني وكامت بساع جابت بطانيه وفرشتها.
وشلناه خليناه ع البطانيه وكلنا تكابلنا عليه نشيلو.. واني ادحك بوجهو وابجي .. نزلناه.. طب نائل يصرخ شكوو شبي ابو حرب
واجه بسرعه شال صراع على كتافو وركض بيه للسياره الحجيه وهيام لبسو عبيهم وطلعو وي نائل واني واكفه ادحك عليهم وابجي..
يا مريم العذرا يا امنا انقذيه يا يسوع ارجوك ارحمنا.. ما الي غيرو رب احفظو واحمي ارجوووك..
بقيت بالكراج نص ساعه ابجي.. دخلت ردت اصعد.. محد بالبيت اخلاص والحجي و سعد راحو وي حلا
وهيام والحجيه ونائل راحو وي صراع بقت بس ام سعد و اهل نور.. ونوال ما اعرف بيها وين يمكن بغرفتها..
دا اصعد.. صاحت ام سعد.. هااا بر......ك ارتاحيتي.. هجمتي للبيت ..
-اني ما هجمت شي كل القصه الرب ما ظالم وطلع برائتي.. بس كل الصار منج والرب لو صار شي لصراع ما يصير خير..
-تعاي هين تهادديين انتي اشو ارد اضربج واشوف منو اليطلع وراج.. اجت وتريد تضربني تلاويت وياها ودفعتها لوره.
وهي صرحت ولج ******* ادفعينيييي .. انه الج وكامت تريد.تركض وراي صعدت اجت ام نور وراها وكضبتها وهي تفشر وتغلط..
اني رحت لغرفة صراع كعدت.. ابجي.. قميصو كان بالكاع شلتو بيه دم.. حظنتو وكمت ابجي..
دخلت عليه ام سعد.. وتكلي وج ساقطه عبالج انساها الج. واجت تريد تكتلني.. كمزت ع السرير هي تروح منا واجي منا
اخر شي صعدتلي على السرير لزمتني من شعري تريد تجرني اني هم لزمتها من شعرها .. وهي تصارخ يمه تكتليني.
وتضرب واني اجر بشعرها حيل من حركة كلبي على صراع حتى الضرب ما اهتميتلو..كطعت شعرها بديه
طب علي ابن هيام جرها مني. وهي تصرخ بكل صوتها تكتلوني اليوم اطلعون بره..
علي:- ما كاعد ابيتج افتهمتي البيت بيت خالي وهو اليقرر نبقى لو لا..
ام سعد:- ولك عليوي تتجاوز عليه انه الك.. الا اخليهم يصلخون جلدك اليوم والله.. راظت تتقرب منه بس علاوي شوي طويل وبيه قوه دفعها حيل من عدنا ..
وكال نروح اني وياج للمستشفى..
-وين خاف صراع ميقبل
-عجل شلون نظل اناطرهم هسه بتكسي نلحكهم..
-لا علاوي فدوه خلينا شويه بس خابر امك شوف وين صارو شصار بصراع .
-انه خابرتني كالت روح لبيت جدك .. خل اخابرها. رفع الموبايل واتصل ..
كالولو هسه جاايين صراع زين وانطو علاج وما قبل يبقى راح نجيبو ..
هو كال هيج اني كل الحيل صار بيه بساع خرطت الغراش وبدلته وشلت الزوليه شمرتها بالترك و مسحت ولمعت الغرفه وعطرتها وفرشت..
ونزلت اركض للحمام اركض اني دخلت وهم طبو بس شمرت مي وطلعت للغرفه اركض..
لكيتو واكف ويكلها طلعيلي ملابس اسبح.. بس الحواجب معقودات والغضب باين بوجهو..
تقربت .. ما اعرف اشنو اكلو.. دحكلي نزلت دموعي..
-ليش تبجين
-خفت يصير بيك شي..
-ما بيه بويه بخير بس طلعيلي ملابس خل اسبح حتى انام راسي ذبحني
-رحت اطلعلو .. وهيام تكلو اي يا خويه دنام الا تسبح.. ارتاح وبعدها براحتك اسبح.
ما رد عليها.. طلعتلو منشفه وملابس داخليه.. اخذهم وراح.. شغلت التدفئه و وحظرت ملابسو وكعدت..
هيام كالت ضلي يمو تره حيل تعبان انه انزل ادحك السعلوه شبيها
-جت ضربتني واني هم ضربتها وملختها
-عزا العزاج ليييش.. خرب بيومج هسه ناقصيين يا ليليان ..
-هي تغلط وما تحترم شيباتها شسويلها وحتى على علي راد تضربو ودفعها
-علي تكاون وياااااها..
-لا بس طردتو وكاللها ما بكيفج البيت بيت خالي وهو يقرر..
-عزا بعينو ان شاءالله .. انزل ادحك وينو لا يسويلي مصيبه ما كافي العلى راسي.. رادت تطلع. طب صراع كاللها هيام خابري سعد دحكي وين.
كالتلو اي هسه.. خابرتو.. رد سعد وكال ساعه ونجي البنيه عدها جروح انطوها مغذي وراح تطلع
هز راسو وبدل.. وفتح بطانيتو ونام.. اني طفيت الضوه. كال الباب قفلي..
-ما ينقفل القفل مكسور
-ردي وحطي وراه شي المكيف مشتغل..
-رديتو وحطيت وراه مخده.. واخذت مشط زمشطت شعري هو شال راسو دحكني ورجع خلى ايده على وجهو ..
وادور طفر..
-هااا شكو
-صلاتي نسيتها اروح اتوضى ..
-راح توضى واجه فتح السجاده وصلا اني كعدت ع السرير.. كمل.. وبقى يسبح ويصفن.. واحس يحجي وي نفسو وحيل متأذي على بنتو هو يحبها واذاها ادمر..
كمل صفط واجه.. تمدد.. وهو يفرك بكصتو..
-ادلكلك راسك..
-رفع ايدو.. دحكلي. وقرب على المخده مالتي .. اني عدلت المخده لحظني وكمت ادلكلو.. وهو مغمض عيونو .. كتلو عمو الله عليك بعد لتصير عصبي
فتح عيونو ودحك بوجهي...:- ليش ؟
-بقيت ابجي..
-تخافين علي
-هزيت راسي .. مد.ايدو جر ايدي .. وباسها براحتها .. ويكلي لا تختمين باباتي بخير انه كلشي مابيه شوية اعصاب ومرت..
-متت من دحكتك وكعت خفت اخسرك. عمو الله عليك لتعوفني.. كعد من حظني واستند على ايدو
-ليش متردين اعوفج
-ما الي احد غيرك.. ابويه ميت واخويه ما يريدني وامي ما سئلت عني ابد.. واذا صار بيك شي والله يذبحوني محد يرحمني.
-هششش لتحجين هشكل باباتي.. انتي بنيتي .. وجرني لحظنو وتمدد وحط راسي على صدرو.. ويمسح على ضهري ..
طلعتلو ايدي مجروحه من ام سعد.. اخذ ايدي.. هاي شنو
-ام سعد بس طلعتو ضربتني..
-هم راد يكوم ويكول انه اعرف شصرف وياها هاي.. كتلو لا تخاف كتلتها.
كعد وابتعد ويعقد بحاجبو.. كتلتيها.. شلون هو انتي عصفور هلكدج.
-صعدت تريد تضربني ولزمتني من شعري اني هم لزمتها من شيلتها وكعتها وجلبت بشعرها جان محترك دمي عليك.. كطعتو بيدي.. وعضيتها.
-ابتسم ويهز ايدو والله متكعدين راحه انتي. رجع للمخده. نام وخلى ايدو على راسو..
عاد تمددت يمو ونمت يمكن قبلو ما حسيت بعد بس حسيتو يغطيني لما طفت الكهرباء وبردت الغرفه..
ونزل.. ف كعدت.. ونزلت وراه.. وكفت ع الدرج بس الحجيه بالهول هو كعد يمها..
صراع:- اجه سعد
-اي وحلا فوك صعدوها.. ليش يمه هيج تفضح بنيتك
-اخذ نفس.. عجل شتردين يمه .. استر عليها وعلى عمايلها السوده.. لو ما انه سامعها صدفه جان ما اعترفت ولا كالت وحتى ما اعترفت على اللي ساعدها ومتأكد منو..
-اي يا يمه هي غلطت بس ما يصير هيج يا وليدي كدام الكل تهينها جان بينك وبينها علمتها وادبتها
-يمه حلا ما عليها شي.. لو فضحتها محد يعيبها الكل راح تكول بنيه مراهقه وغارت على ابوها من مرت ابوها وما تتلطخ سمعتها
بس ليليان لو لطشت الكلمه بيها ما تروح.. وكلها راح تاخذ عليها البواكه وتعرفين ام سعد ما قصرت..
حلال حرام استر على بنتي وبت العالم افضحها.. الله حطها بركبتي وجابها من الموصل وسببلها الف سلب حتى يخليها بذمتي ويوكلني بيها.
بنيه يتيمه يمه والها حوبه بالقران وكت اللي تهمتها وكتلهتها انشل حالي شل طريقي ما كمت اعرفو ولا اتوفقت
امانة الله تردين اكسر بيها وافضحها.. لو ما حاطها بركبتي جان هسه الله يعلم يحيى ليا ارهابي بايعها..
-اي والله يا يمه انه كلتها ما توفق ودعمت الرجال وكامت على راسك مصيبه كله من حوبتها بيك.. وليليان يمه طينه ما بيها اذيه هل عدها حوبه
-مو بس طينه يمه فطيره وفقيره وكلمتها ما تعرف معنى من تحجيها لا بكلبها حقد ولا ادسس لاحد..
ليليان:- هو حجه هيج رفعت ياختي ولو ما عندي ياخه ونزلت.. كتلهم هلووو
دحك و هز راسو.. فشلني حتى ما رد .. عابت.. دار وجهو على امو
-الا اكلج يمه الحجي مو جاب ذبايح لولد المرحوم شو ما ذبحتو..
-من وراك يا يمه لحكنا. خلاها على باجر وعزم عليها كل عمام..
-هاا
ليليان:- عمه تغديتو
-لا انتانيج. اكلنا ولمينا وشربنا جاي..
-انطيني ربع
الحجيه:- شتردين بي
-ادز اندومي اتغدى بيه
صراع:- بالله هاي شتحجي وياها. ول يابه مو بيج فقر دم اندومي شنو..
-مشتهيتو والله عمه فدوه.. طلع صراع ربع وشمره.
- هاج اخذي بس لا عاد تاكلي تراه ما زين..
-دا اريد اطلع اصيح حرب جان نسمع صريخ نوال من غرفة سعد وهي تطلع من الغرفه..
صاح صراع شكو شصاااير هينا
-نوال ليله ما اكعد.هين والله هسه تاخذوني لاهلي لا بالقران احرك روحي
-يولي صبري نفتهم
-شتفتهم خويه شتفتهم تالي عمري ادري رجلي متزوج علي وعندو 3 جهاااال
صراع:- يهييي استلم والله ما بيه حيل..
طلع سعد ويهددها يكلها لو خطيتي عتبت الباب طلاكج يوصلج وراج..
طلعت ام سعد وام نور .. ويصرخون شكو شكو.. صراع صرخ بسعد.. يول دنفتهم اسكت انته خل اتصرف وياها
نوال:- ابو حرب لا تتصرف ولا ابقى دقيقه هينا والله..
-بعيني والله اخذج بيدي يا خويه بس كعدي تره والله حيل ما بيه وكبل شوي اجيت من المستشفى..
هي تبجي وتصرخ.. وهو يغلط .. صراع صرخ بيه وكالو اطلع برا لا تكعد.تصارخ براسي ..
سعد:- ما تاخذها ابو حرب اطلكها والله بس تروح
-اخذها واكسر راسك لو طلكتها.. واطلع هسه خل احجي وياها..
نوال:- لا تحجي وياي ابو حرب بس اخذني ما ابقى والله.. صارلي 13 سنه كاعده هين ومتحمله ضبم العيال والجهال وماكله **** وساكته تالي ياخذ علي ....
عليش هااا شنو تقصيري وياه خل يفهمني.. دحكني فد يوم وصخه جهالي وصخين امر وما كتله تم خالفتو فد يوم.
ياخذ علي مره عليييش.. ما ابقى دقيقه وخل يطلك الهانت عليه العشره ما اريدو بعد..
-هسه دبدلي يا خويه وبدلي جهالج وانه اخذج ارتاحي 4 ايام ونجيج انه والحجي والحجيه واللي اطلبي تأمرؤن بي بس بدلي
-جهالي ما اخذهم ولا واحد اخذو والله
الحجيه:- عوفيهم انعل والديهم. بس لا تهتمين يمه ولا تقهرين نفسج بنيتي
ام سعد:- شني اول واحد يتزوج لو عجيبه. رجال هو وبكيفو ياخذ وحده ياخذ اربع.. الله محللو بعد انتي شنو..
الحجيه:- يا ام سعد وكتج انتي.. دسكتي يا خيه احنه نريد.نهدي الانفس وانتي تشعليها.
-اي عجل قابل مسوي مكسوره ابني بالحلال ومتزوج شبيها.. نسوان هلوكت ما ينحملن حكو من تزوج ما تنحملين عشرتج مره تنكين اعله راسو
زكح بيها صراع..:- انتي بس كرمينا بسكوتج احنه بخير.. لا تسمعيني صوتج ..روحي منج واصله لهين..
دارت وجها عنو ودحكلو بطرف عينها ما عاجبها الحجي.. صراع اخذ مرت سعد وبس بتها الصغيره راحت وياها البقيه كلهم بقو..
اني صعدت ارتب الغرفه. سمعت صوت اخلاص بغرفة حلا.. هاي بعدها هين شكد ما عدها كرامه..
طلعت ارتب.. ونزلت على العشا اسوي وي ام سعد وهي كل كلمه تسمعنياها تسمم البدن.. سكتت لحد ما خلصت العشا والمواعين وفضيناها..
بليل كعدت وي عمتي بقت تحجي وياي على ابو شلون هيج مسويه وي ام سعد ورايده تخبصها لو ما صراع عصبي وخافت منو.
دنحجي و دخل سعد وياه مرتو الثانيه ويكلها دخلي اتعرفي على اهلي.. تعجبت شكد حقير هذا.. وام سعد تلكتها بالاحضان ..
اجت سلمت عليه باوستني وباوست عمتي وكعدت بالهول واني وعمتي وحده ادحك بوجه اللخ..
ومرت سعد ماخذه ع الجو وتضحك وتسولف وياه وهو مرتاح كلش واحنه كاعدين شنحجي .. لليل ب10 ونص تقريبا طب صراع.
طب كال السلام عليكم.. وعقد حاجبو لما دحك مره غريبه طب للمطبخ وصاح ليلياااان..
الحجيه:- كومي يمه دحكي رجلج شيريد ..
-اي.. رحتلو واكف ايد مستند بيها ع الطبله وايد مخصرها.. كتلو ها صحتني عمو
-منو هينا شنو الموضوع..
-مرت سعد الجديده جابها واجه قبل ساعتين
-رفع حواجبو متعجب.. شكد.واحد سز هذا بالله شتصرف وياه رجال مشورب شحجي
-ما حبيت مرتو ابد..
-ههه روحي بابا جاي وراج..
-تمام.. مشيت وهو اجه وراي..
-سعد شنو الموضوع.. يحجي ويأشر بسبحتو..
-خويه مرتي شنو اكو اعتراض..
-تتزوج ما تتزوج ماكو اعتراض عكلك براسك وتعرف خلاصك.. بس تجيبها للبيت ممنوع..
خذها ودبر امرك بيها
-بس صراع انه نوال ما اريدها
-ما على كيفك.. طلاك ما اطلك وغصب عنك تجي نوال لهين وانته تشوفلك صرفه وي مرتك
- هي ما بالغصب يخوي
-سعد .. اخر جلمتين اخذهن واكف.. لا تخليني اعيد وتطلع اعصابي بهلساعه وابتلي بيكم بالقران..
حجه وصعد عاد سعد ما كال اخذ مرتو وطلع من البيت وكف هو وياها بالكراج وهي تحجي وادردم..
واني واكفه اتسمع عليه.. تكلو حظ نويله ام السحوره ساحرتهم كلهم حتى اخوك ..
وهو يكلها دطلعي انه اشوف بيت كريب وناخذو شنسوي ما اكدر اتركج بغير منطقه بعد..
دا اسمع.. ومركزه حسيت شي على جتفي يدغدغ..نشيتو وبقيت مركزه.. وهم حسيت دكة اصابع خفيفه على جتفي..
نشيت وصحت هييي دوخريييي.. واندرت لكيتو صراع.. اااااا اني ما ما .. مما ما اتصنت
-هسه دبشري سمعتيلج جلمتين تلاثه .. ان شاءالله ارتاحيتي..
-بقيت فشلانه وما ارد..
-دصعدي نامي بساع يلا السهر ما زين على الحشورات يقلل السمع عدهم
-يوووه ربي شنو هلفشله هسه اني محد.لكفني بس هذا..
-ردت اصعد.. كال كبل لا تصعدين جاي..
-حطيت الجاي ع النار وهو راح.. حظرتلو كلاصو.. اجه وجايبلي بيدو حلويات من الحجيه ووياها اندومي..
ويكول الحصفور على حظو من راد اندومي انخبصت الدنيا وما اكل.. ضحكت.. وفرحت حيل.. رحت صبيتلو شكر وجاي وخليتو كبالو
واندرت احط جدر صغير هو عيشرب وتفل ويصيح هيييييييع اشتعلو اهلج شمخليه ولج لمندوزي مو شكر.
-لا شكر.
- يا شكررررر وبتفل ويغسل بلسانو متت ضحك ... دحك وهو يغسل ضحكي يلفطيره ضحكي لشعل اهلج.. مشربتني تيزاب.
-لا والله عبالي شكر هسه اصبلك ثاني
-لاااا ما اريد ساعة السوده الوصيتج بيها .. ولج بويه ما وصيتج على حاجه لا ما شلعتي كلبي وسممتيني وتالي وياج انتي
-عمو والله ما ادري..
-دصعدي نامي لخاطر الله صعدي..
-بس اسوي الاندومي واصعد.. يمسح بفمو ويهز بيدو وصعد.. اني كملت الاندومي خليتو بكاسه وصعدت..
هو كاعد على موبايلو واني فارشه بالكاع وفاتحه التلفزيون واكل اندومي وانوبه حب كرزت..
مندمجه بالتلفزيون.. اندكت الباب.. هو جان حاط جنطة حرب ورى الباب .. وحرب نايم يمو ..
صاح ادخل اني درت وجهي ادحك منو.. طبت اخلاص وحلا وكالتلها اعتذري من ابوج
صراع:- طلعو برا
اخلاص:- ابو حرب انته ابو گلب الجبير والبنيه ما الها غيرك وغلطت وهي طايشه وجت تعتذر منها بدين محمد عليك لا اطوخها وياها عليك القران..
بعدها ممخلصه راد يصيح.. وحلا حظنتو .. وكامت تبجي بصوت عالي ووجهه مشوه هو ما حرك ساكن ابد..
بقى كاعد والاعصاب بانت على وجهو.. وهي تكلو سامحني بابا فدوه والله بعد ما اعيدها. وشكد.توسلت بيه وتبوس بوجهو وبأيدو ولا اهتز..
اني من يمي كامت دموعي تجري لما دحكتها تبجي وتتوسل بيه وهو تكول كلبو حجر..
لما كعدت كبالو وتنتظر جوابو وتبجي.. كاللها كملتي..
-بابا فدوه
-اخلاص اخذيها وطلعو اريد انام تعبان.
-بابا والله حتى ليليان ابوسها ما اعيدها بعد والله ..
ولا دحك ولا شويه.. جت عليه واني ابجي حظنتني اني هم حظنتخا وكمت ابجي وتبوس بيه وتكلي كوليلو يسامحني والله بعد ما اعيدها والله
كمت وياها.. كتلو عمو الله يخليك بس هلمره سامحها بعد متعيدها والله
-انتي وياها طلعو براااااا وبلا صوت.
-بقينه واكفين ندحك بيه واخلاص تحجي وياه.. هو كام من فراشو اخذ باكيت جكايرو و موبايلو وطلع
وهن طلعن وراه. تركهن ونزل. شكد كلبو قاسي.. ولا اهتز ابد..
رجعت للفراش.. بقيت كاعده ادحك ع التفزيون وافكر باللي صار شويه ودخل.
عمو ليش ما سامحتها والله خطيه.
-انتي اطلعي منها ..
-بس
-ليليااان.. اذا ما تنامين نزلي جوه..
-سكتت.. دفنت راسي بالمخده وتغطيت وكمت ابجي.. هو طفى التلفزيون و الضوه وراح نام.
الصبح وهو عيبدل سمعت الموبايل دك.. ويكول ما اعرف .. حاليا ما الي جيه لبغداد.. محتاجه فلوس ازتلج بس لا عاد ادكين وكت اليعجبج...
ما عرفت هو عيخابر منو بس عرفت بنيه... كعدت دحكتو عيطلع خاولي
-ما عندك دوام
-صباح النور
-شلون فشلني كتلو صباح الخير اسفه نسيت اكولها
-اليوم جمعه ما اداوم..
-هااا .. بقت ابراسي منو هاي ؟ ويدزلها فلوس ويروحلها وابغداد.. بس لا متزوج مثل سعد..
يمه غير اموت والرب.. يتزوج وتجي غيري تصير بحظنو .. الا انجن والله.. عجل اني شنو ماخذني خدامه..
هو راح للحمام واني. غسلت ورحت للمطبخ. جانو كلهم كاعدين. وبس اني لازم اسوي الريوك.
حطيت الجاي بالاول وخبطتلهم 8 بيضات.. وجبن حظرتو بمواعين وكيمر عرب ابو ثرب مشتهي ورايح جايب..
حظرتهم كلهم ع الميز ومسطوره منا ومنا وسالفة البنيه الخابرتو دوختني ولا نسيتها كل فكري يمها..
. دخل صراع.. نصه الجاي وكال على كيفج ما طايري بويه ..
دحك الاكل.. كال بس انه سويلي على صفحه 3 بيضات عين..
- اي.. رحت طلعت الطاوه والموعين كلها جرت من الكاونتر وكعت..
صاح- هدي هدي يابه شجاج ..
اشغل بالطباخ والجداحه بس جدها وام الجرخ كوه تجرخ .. تقرب مني وهو سابح معطر ادري غير من تخلي تحط عطر..
لابس بس فانيله تعلاكه بهلبرد.. وجسمو قريب مني انثولت واني منا شلون نادره.. وهو يعلمني
-دام مابيها غاز مو من بعيد تجدحين.. قربي حيل وجدحي... جدح اشتغلت.. دحكي اشتغلت ما تحرك لا تخافين..
اجيت اخلي الطاوه طفاها وكال شغلي انتي.. بالله هذا وكت تعلوم..اجدح واجر ايدي بساع.. 3 مرات 4
كضب ايدي وقربها وكال جدحي..
-عمو والله احترك دعوفني
-لا تظلين ثوله رحمه لجدج شغلي
-عمو والله راح يصيحون
-انعل والديهم جاي اكلج شغلي..
-يحجي وكاضب ايدي ومخليها يم النار.. اجيت اشغل طفا الغاز..
-عمو انته تلعب عليه والله ما عندي وكت
-لج يولي الغاز انتشر يحركج.. وما بيه ابتلي بيج بعد..
-فتح الغاز وهم قرب ايدي .. كال جدحي.. جدحت بستع اشتغلت النار شمرت الجداحه ليفوك وكعت فوك راسو
-لج يابويه راح تجلطيني بالقران ولج ثولج كامو يدرسونه باليابان شسالفتج.
-ما اهتميتلو .. طكيت البيضات ونقلت الريوك الهم..
كعدو يتريكون واني كاعده يم الحجيه وصراع يمها. تكلو مو جت وطلبت السماح منك وليدي ليش ما سامحتها بنيتك هاي
وهو يجاوبها.. لازم يصيرلها درس وما تستر على اليسوون المصايب ويخلوها براسها واذا ما جت كالتلي منو الساعدها مالها كلمه وياي..
بقت تحجي واني افكر بالمره وعيني على موبايلو.. ابوكه واروح اخذو اشوف منو هاي..
لا انوبه يكضبني واكع بيها.. كملو لميت الصينيه وهو كام يغسل وترك موبايلو.. بقى بنفسي ما كدرت ما اخذو..
سحبتو وخليتو بالكاونتر.. وكملت لم السفره.. كملت حطيتو بصدري وكلت لام سعد بس اروح ازت الزباله لان بعد ماكو مكان..
اخذت الزباله شمرتها بالحاويه ولفيت وره البيت.. فتحت جهازو ماكو مكالمه بالسجل.. دخلت للفيسبوك ما اندل بي ..
طلعت.. دخلت ابرنامج اسمو واتساب.. اول اسم دخلتلو.. حجي بس صوتيات .. فتحت صوتيه دا اريد اشوف بنيه لو رجال..
حطيتو على اذني.. واسمع الصوت اجه من وراي بعصبيه وهو يزكح وي منو جاي تحجين... يتبع

☆☆☆☆☆☆
#زينب_ماجد