محاولات حواء

" الجزء الأول "

قصة بعنوان "محاولات حواء"         
     باللهجة العراقية
                                 الجزء الأول

حواء بعمرها ماچانت نصف المجتمع....
طول عمرها كل المجتمع، لأن هي من أنجبت النصف الأخر
شگد تحاول، شگد تعاني في سبيل تضمن الها ولعائلتها، بيت ما بيه هموم ومشاكل
حتى لو چان أدم غلطان
بطيبة گلبها، تراضــيه
بحبها اله وحنانها، تعوضه عن كل شي
مو دائماً تنازلاتها تبين كدام المجتمع
بس مو لان اللي جاي تسويه قليل، لااااا
أنما المجتمع يلي هي بيه "ذكوري"
مايقدر تضحياتها
شغلها
تعبها
وكل شي تقدمه مهما چان بسيط
وغالباً بسبب خوفها من  محيطها ، سواء كان عائلتها، ولا رجلها
تكوم تخبي اشياء عنهم
تخاف لا تحجيها وتتورط، لان لسان الناس مايرحم، ومرات تخاف لا تحجيها ويكونون ضدها
ولأنها بهيجي مجتمع، وبمحيط جاهل
تسكت، وتتحمل، وهواية مرات تحاول تصلح اللي صار بنفسها
#بقلمي
مرحبا، أعرفكم عني، اسمي ريم عمري 25 سنة متزوجة من يلي أحبه وعندي منه بنوتة صغيرة عمرها سنتين، صارلنا خمس سنين متزوجين، حياتنا حلوة الصراحة، يعني مااكلكم كل يوم بدولة ههههه بس الحمد لله عايشين أحسن من غيرنا، لحظة نسيت، بالنسبة لشكلي مابيه شي مقبولة شعري طويل بني، عيوني خضراء وبيضه مو سمره طولي ١٥٢ و وزني ٥٠ مو ضعيفه هواية ولاسمينة يعني مقبول ، أحب رجلي هواية، يعني چنا نتمنى نكون نصيب بعض والحمد لله صرنا هو شوية مزاجي وعصبي هواية وأحياناً يحچي ويجفض بكلام مو زين بس دائماً أتحمله ومااكول لأهلي مشاكلنا حتى لا يعصب عليه وهمين مااريد يعرفون هواية أشياء عن حياتي إني ورجلي أحس لازم تضل بيناتنا هالأشياء، خصوصيات النا...
وعندي خيتي الوحيدة اسمها ريهام تداوم بالجامعة سنة اخيرة هي أخر العنقود، وعايشة ويه أمي، ووالدتي تشتغل بالخياطة حتى تأمن عيشه زينه الهم وأبويه متوفي چان دائماً تعبان كلش، وظل هيجي حتى توفى الله يرحمه
ويوم من الأيام چنت كاعدة أنيم بنيتي سمر، حطيتها بالمهد مالتها وچنت أهز بيها، واگللها يمه فدوة لبنيتي يلا يابعد كلبي نامي، چنت دااغنيلها
(اولاااااي، اولاااااي نامي نامي يابنيتي)
ههههههه ادري يمكن تشوفوها غريبة  شوية بس صدك كل طفولتي چنت أسمعها بوكت يلي أمي الله يحفظها تنيمني الظهر، يعني تربينا على هالأشياء، والتوگي  بالشوارع ويه الجهال، وبكل عيد نروح ونچي على مدينه الالعاب كلشي بوكتنا چان هواية حلو، مو مثل هسه الزمن متغير هوايه وحتى ناسه
صارت الناس كل شغلها وعملها الموبايلات وتاركه جهالها على هالأشياء، أغلبهم ماعاشوا طفولتهم زين، المهم بهذاك الوكت اندك الباب، كلت بيني وبين نفسي لان ماهالكد يندك بابنا من زوجي بشغله، اغلب أصدقائه من المنطقه... ويدرون بيه ماموجود لهذا مايجون العصر، كلت منو، سمعت صوت بنيه تكول أني
حسيت هذا صوت خيتي ريهام
گمت لبست حجابي  وفتحت الباب مديت راسي طلعت أختي ريهام، الصراحه ما توقعت تجيني من جامعتها ههههه مو متعوده هي تجي لذلك أستغربت
كلتلها يا هلا بخيتي شلونج يا بعد كلبي
ريهام:هلا خيتي، اني الحمد لله زينة انتي اشلونج يا رويحتي يا بعد امي وابويه انتِ
ريم:حبيبة كلبي يمه فديت ابنيتي، دخلي يمه بيتج هذا
ريهام:زوجج مو موجود صحيح؟
ريم:اي كلبي، هو بشغله
ريهام:شكد مشتاكتلج ألج، وللسمر، شبيج ليش ماجاي   تجين عدنا 
ريم:شسوي كلبي، غير ملتهيه بهالدنيا، وبرجلي وبنيتي، ادري مقصره بحقكم انتي وامي من فدوه اروح لصوتها شكد مشتاقتلها أني
ريهام:يلا حبيبتي مو مشكله، أهم شي انتي بخير، هذا يكفيها لأمي، أييي صحيح وعلى سيرتها لنبع الحنان، سلمت عليج هواية، والصراحة چانت تريد تجي وياي بس خابرتني اني وبالجامعه كالتلي أجاني زبونه تريد أفصللها فستان بعد كم يوم خطوبتها فكالتلي روحي انتي من الجامعه لان چنت خابصتها بس اريد اشوفج هههه
ريم:حبيبتي والله واني هم
ريهام:بنيتج بالغرفه، اشو ماشفتها
ريم:اي والله حبيبتي چنت انيمها بس تكعد أجيبلج اياها من عيوني، شلون جامعتج معاج، ان شاء الله زينة
ريهام:الحمد لله خيتي، داحاول ادرس هواية بس اريد اتخرج، شسوي هي هاي اخر سنه اليه واتخرج بعد كل هالسنين والتعب بس هواية ضغط عليه، لهذا كلت أجيج اليوم اغير جو وبلكي يصيرلي وهس اكثر
ريم:يا هلا بجيتج،،يا فرحتي بيج بيوم تخرجج بنيتي
ريهام:عمري والله، عقبال بنيتج
ريم:تسلمين حبيبتي، اكوم اسويلنا جاي ونتعصر كليجة مع حب شمس يونسنا ونكعد نحجي على خلك الله
ريهام:هههه ماتجوزين من سوالفج
كامت أختي تسوي جاي وكالت دجيب كليجه وحب شمس بهذاك الوكت يلي راحت بيه چنت داافكر باللي صارلي اليوم بالجامعة
خلينا نرجع شوية بالزمان كم ساعة
چنت داامشي ويه صديقاتي، ماحسيت إلا اجت وحده منهن سلمت عليه وعلى يلي معايه وشويه  وكالتلي  تعالي نگعد وحدنا نحچي كم شغلة ، گلتلها تمام هسه أجي ودعت صديقاتي ورحتلها بس حسيت أكو شي مهم تعابير وجهها غريبة
ها حبي أكو شي؟
هند:يي اكو، عريس بالطريق وغمزتلي
ريهام :يا عريس يمعوده
هند:دااحجي صدگ والله
حبيبتي ريهام اكو واحد شاب يريد يتقدملج هو مصلاوي عرفته عن طريق حبيبي ، بس يلي سمعته  منه أنو هو هواية خوش ولد وزين وخلوق إسمه عباس ،  كلت اريد أكلج لان هو يستحي ويخجل مايكدر يكلج بس كال للحبيبي حتى نحن نصير واسطة بينكم ، بعدها أجا عليه وكلي عنه ف أجيتلج  ترى عباس يلي كاعد بصفج عرفتيه لو لا؟؟  چنت هواية متوترة كلتلها بعدين نحجي، كالتلي ييي حبيبتي براحتج
دقيقه دقيقه، اعرفكم عني اسمي هند صديقة ريهام بالجامعه حبيبي اسمه مرتضى مرتبطه بيه من زمان يعني علاقه قديمه اداوم مع ريهام بنفس القسم بيوم من الايام أجا عليه مرتضى گلي عن عباس يلي بقسمنا
مرتضى:هلو حبيبتي شلونج اليوم
هند:الحمد لله اني بخير، بس عندي سؤال، شبيه اليوم عباس لازك بيك
مرتضى:حبيبتي مو أني ليش جايچ علمود عندي حچايه بخصوص عباس
هند:گول شكو  والله خوفتني
مرتضى:لاتخافين يمعوده لايصيرلج شي، بس أجاني يريد يخطب ريهام بس تدرين ريهام ماتحجي هواية مع شباب القسم ف يستحي يكللها هو، فيريد مني ومنج نوصللها هالحجايه، ها حبيبتي راح تكوليلها صحيح؟
هند:اي اكيد هسه اروح اكوللها، بعدين اجيت على ريهام وكلتلها يلي اعرفه ويلي سمعته بس هي كالتلي بعدين نحجي وحسيتها توترت ف تركتها تفكر على راحتها
كلتلها ماشي حبيبتي براحتج اني رايحة
ريهام:مع السلامه، بعدها امي اتصلت بيه هلا يمه
الام مها:هلا حبيبتي، اتصلت بيج اريد اكلج مااكدر اجي وياج ع بيت خيتج ريم اجاني شغل لخطوبه وحده بنيه من محلتنا
ريهام:يمه أجليه، هوايه حابه اروحلها لان بعد فترة راح يزيد الضغط عليه هواية
الام:روحي الها بنيتي ماعليج مني شبيج، لاتزعلين
ريهام:يمه مااكدر شلون اعوفج بروحج
الام:شبيج بنيتي، اشايفتني صغيرة كدام عينج دروحي عاد لا تلحين، وسلميلي على خيتج وبوسي بنيتها
ريهام:يي يمه  تدللين، راح اروح بس ديري بالج على نفسج
وبعدين اجيت لبيت خيتي وصار يلي حچيناه الكم
ف چنت هواية متوترة، ومترددة بس بنفس الوكت ردت أكللها هي خيتي اريد نصيحتها، شسوي المن اروح امي مره چبيرة بالعمر مو مال أحچيلها هيچي سوالف الا يتقدم رسمي، ف كلت اكول لخيتي ام سمر
اشو شويه وجت
ريم:اعذريني عن القصور حبيبتي، چنت بوكتها مسوية چاي وكليجه وحب شمس وحبشكلات فتت شفت ريهام كاعده وحسيتها داتفكر بشغله
ريهام:دخلت اختي وشايله صينيه مليانه شغلات تخبل كلتلها عاشت ايدج يمعوده هاي يا قصور، ليش انتي مخليه شي ماجايبته ههههههه
ريم:حبيبتي شعندي غيرج، بس دااحس مو على بعضج لو اني متوهمه؟، شكو؟، اكو شي مخبيته عليه
ريهام:هو يعني الصراحه اكو بس ماادري عقلي مو يمي
ريم:احجي بعد خيتج، لا تخافين
ريهام:لا والله هي مو قصة خوف بس انصدمت شسوي مامتوقعه هالشيء
ريم:اللي هو؟
ريهام:چنت أتمشى بحديقه الجامعه اجت عليه صديقتي هند اعتقد تعرفيها لانها كلش قريبه مني
ريم:اي اعرفها
ريهام:كالتلي أنو اكو  ولد يريد يجي يتقدملج هو مصلاوي وحچيتلها السالفة.....
ريم:وانتي شرديتي؟
ريهام:شبيج خيتي شمدريني كلتلها بعدين غير اشوفه اكثر ونكعد ونحچي شوية واكول للأمي لو شنو
ريم:حبيبتي ادري فكري براحتج وأگعدوا واحچوا سويه
ريهام:ماادري كلش خايفة، وامتحاناتي قربت ودراستي هاي اخر سنه
ريم:ليش خايفة حبيبتي، شبيهم المصلاويين يخبلون، ينگطون عسل وكلامهم ولهجتهم تخبل تتعلميها منهم، اذا الولد خوش ولد يمكن تكون قسمتج وبالنسبه لدراستج هي ضلج اخر سنه وواصلين نهايتها....
ريهام:يي ادري خيتي، دراستي هو ولد مثقف ماراح يعارض بس أقصد...
ريم:ماقصدج شي ادري دلع بنات، باجر اكيد راح يجي ويحجي وياج اذا ناوي عالخطبة مادام اليوم انطاج الخبر حضري نفسج گلبي
ريهام:يي أني هم گلت هيچي الصراحة، بس تدرين أذا صار حجي راح اكوله اخطبني بعد شهر، عالأقل انتبه عليه وعلى تصرفاته وأسلوبه بالجامعه أكثر وهم راح امتحن واخلص واتخرج مو أحسن؟
ريم:يي طبعاً هيجي كلش زين سوي اللي يعجبج وفكري زين خيتي ترى هذا زواج مو لعبة
ريهام:أدري خيتي، غير ادري، ماداتشوفين حالي من دريت بهالسالفة، انكلب راسي على اساسي بس داافكر بس كلت امرلج اشوف رايج
ريم:والله ياخيتي إذا تريدين اكول لرجلي  يسأل عليه تدللين عيوني، بس رايي مالج شغل بيه، بهالحچايه المطلوب والمهم هو رايج انتي، اسالي عنه، شوفيه، شوفي تصرفاته واسلوبه وانتي سوي بوكتها صلاة الاستخارة حتى ربج يساعدج والله يسهلج كلبي ويريح بالج شعندي غيرج انتي وامي وبنيتي ورجلي غير انتو كل حياتي
ريهام:عمري انتي، ونحن هم شعدنا غيرج، دااتسمعين اللي جاي اسمعه
ريم:يي هايه سمر يمه بنيتي، گعدت من نومتها
نهاية الجزء الأول ♥️
انشالله يعجبكم، ولاتنسون التصويت للبارت وادعموني من خلال الكومنت
احبكم كلش هواية..❤️
#بقلمي
#رُبى_جمال