محاولات حواء

"الجزء الرابع"

"محاولات حواء"
                        "الجزء الرابع"
چنت كلش مشغولة بهذيچ الفترة بدراستي
يعني روتيني عبارة عن أساعد امي بشغل البيت ولو خطيه چانت مترضى فدوه اروحلها وبعدها الوقت كله لدراستي وهذيچ الفتره تعرفت على عباس اكثر وحبيته اكثر وتعلمت كلمات مصلاوي منه بس مو هواية لان ماچان اكو وقت يعني اغلب الأيام چان بس سلام وبالنسبه لأمي مشغوله بالخياطة
اما ريم مع زوجها وبنوتتها
ريم:بأيام امتحانات اختي، چنت كل يوم ادعيلها بالنجاح والتوفيق وتتوفق بزواجها وماتتندم ولا لحظه لان الصراحه بلشت اتندم، رغم كل حبي اله
چان كل يوم بمزاج يوم يضرب ويجفص ويوم يرضيني واني اووف مني اني لااشكي ولااگول لخاطر هالبنية
اما عن عباس
عباس:كانت ايام حلوي بالنسبه اللي لان كنتو اغيد بس تخلص دخطب ريهام ونعيش بنفس البيت وكنتو كثيغ ادرس (نصائح زوجتي اش اعمل هههههه) حتى امي تتعجب طبعاً لان صح كنتو ادرس بس هسه غيرررر!!!
وكنتو كل يوم اتعرف على شي جديد بريهام واتعلق بيها
بالاخص انو كنا بنفس القسم فبالتالي نفس العمل ف كان شي يخبل، يوم كانت تطلع خيفي لا اجوبته غلط واحاول اهديها ويوم تطلع مجاوبي وفغحاني يعني الحمدلله
في بعض الكلمات المصلاويه.. تقلب الراء الى غ
مثلا كثير=كثيغ
او مثال اخر
قبانكي=فدوة
غشعتوكي=رأيتك، شفتج
(تقريباً ترجمتي صح ههههه)
ومر هالشهر بهالوضع ومحد كان فغحان غيري انو عيخلص بقت
طلعت ريهام من اخر أمتحان
قتوله ها بشري يمعود!
ريهام:الحمد لله چان كلش سهل وانت؟
عباس :كثيغ سهل يعيوني، اش رايكي نمر عالكافتيريا شوية نسولف؟
ريهام:گلتله لا والله مااگدر لازم ارجع عالبيت
عباس :اوكي لكن انا أوصلكِ
ريهام :لا يمعودا شدااتحچي بعد ماصرت خطيبي حتى شراح يحچون علينا الناس
عباس : لكن اغيد أجي اخطبكي هالاسبوع
ريهام:ليش مستعجل هواية هههههه
عباس :اش بيكي معاي، ليش كلما افتح هذا الموضوع تاجلين، اذا ماتغيديني ماعندي أي مشكله
ريهام:استحيت من كلامه، گلتله ماقصدي بس شويه خايفة
عباس:ليش تخافين
ريهام: اااا....
اوكي لعد ننتظرك اني وأمي
عباس:اي الحمد لله
ريهام :يلا اني لازم ارجع، مع السلامة
عباس:ديري بالكي على نفسكي، مع السلامة حب
رجعت عالبيت دگيت الباب امي اجت فتحته
مها:ها يمه شلون جاوبتي؟
ريهام:الحمد لله يمه كلش چان زين، فتت عالديوانية گعدنا اني وامي
يمه اريد أگلج شغله بخصوص عباس
مها:گولي يمه، خير
ريهام:چنت مستحيه، گلتلها راح يجي هالاسبوع يخطبني مع أمه واليوم راح يبعثلي مسج حتى يگللي يا يوم
مها:يي يمه ياهلا، الله يقدم يلي بيه الخير
ريهام:اريد خيتي ام سمر هم تكون موجودة يمه
مها:خابريها حبيبتي من يحدد يوم وگوليلها
ريهام :يي يمه، راح اروح اغير لبسي وارتاح وأخيراً خلصت من الدراسه بس بقى تطلع النتائج
مها:يي يمه تعبتي وان شاء الله راح تنالين، روحي ارتاحي حبيبتي
ريهام : رحت فرحانه علي غرفتي هم راح ابلش حياة جديده ويه عباس وسبب الثاني خلصت جامعتي شعور كلش حلو، بدلت هدومي وعدلت غرفتي مر كم ساعة وعباس دزلي رسالة
مرحبا حبي
كتبت هلا عيني
لا حبي احسن لا عيني اني اگول لا خلي امسحهم اثنينهم(بيني وبين نفسي)، وبعدها بعثتله هلا
عباس:اريد رقم عمتي أمي تريد تخابرها حتى بعد باچر على قولتكم نكون عدكم وايموجي "غمزه"
ريهام:كلش فرحت بهالخبر وتوترت،، گلتله أمي مره چبيره ماعدها رقم  هي تخابر من موبايلي، من تحب تخبر دزلي خبر واني انطيها اياه
عباس:ديلا غوحي يمها هسه
ريهام:گمت اركض واصيح يمه يمه
مها:ها يمه شبيج
ريهام:ام عباس تريد تحچي وياج
مها:يي يمه جيبي اشو مستعجل!!
مر خمس دقائق وخبر عباس واني فتحته وحطيت الموبايل على إذن امي
چانوا عيسلمون على بعضهم ومن هالحچي وبعدها گالوا لامي راح نجي نطلب ايد بنتج طبعاً ماچنت دااسمع بس من كلام امي هيجي أستنتجت
عباس:كانت امي عتخبر عمتي كنتو حيل فغحان بهالشي وبس اريد تكمل فغحتي بزواجي منها
وشويه وسدونوا
ام عباس:حبيبي ان شاء الله بعد غدا نحن عندم بس اغيد تشتغي=تشتري
باقة ورد مع شوكلت واشياء نازوكي ناخده معانا عيب نغوح وايدينا فارغة
عباس:اي اي اكيد، غدا اكمل كلشي
ام عباس :الله يحفظك ابني ويصيغ يلي ببالك مبين عليك فغحان
عباس:يي يوم، كثيغ،ان شاء الله خير
ام عباس:ان شاء الله
ريهام:ها يمه شصار؟، شگالت؟
مها الام: حبيبتي گالتلي راح يجون يخطبوج ونحدد موعد الخطبة شنو أنتي گلتي ال عباس انج موافقه اشو لا حچيتي گدامي ولآ شي
ريهام:استحيت من حچي امي كان المفروض أگوللها بالبداية، المهم گلتلها يي يمه اسفه ماگتلچ
مها:يلا بنيتي مو مشكله چنتي مخبوصه بالامتحانات
يي اريد أگلج باجر كله تنظيف وعناية بيشرتج حبيبتي هاي اول مره راح يشوفوج
ريهام:يي يمه ان شاء الله، بس اريد خيتي تكون موجوده بعد باجر خلي اگوللها من اليوم وتسأل رجلها  مو أحسن؟
مها:بكيفج حبيبتي، عاد ماادري اذا رجلها يوافق او لا تدرين هو زين بس يجوز يتناحس
ريهام :رايحة اتصل بيها، رحت على غرفتي فتحت شعري وباوعت على شكلي بالمراية وچنت مبتسمه وسعيدة هواية لعبت بشعري، گلت يارب العالمين يكون عباس يطلع زين وياي ومااندم على موافقتي، لزمت موبايلي اتصلت بخيتي ريم
ريم:چنت تعبانه كلش من ضرب رجلي إليه البارحه مااجا لي نص الليل ومن وصل عالبيت چان دايخ ومكبسل متت من الخوف، ف قررت اواجه هالشيء مو معقول يبلش يشرب مخدرات، گلت بلكي مرة ومايعيدها 
ولما واجهته ضربني وگللي اذا ماعاجبج ازتج ببيت اهلج واني ضليت بالبيت ماگدرت اروح بنص الليل وبنفس الوگت تحملته لخاطر بنيتي وبعدها نخمد قصدي نام ان شاء الله نومه مابعدها گعدة وصار الصبح، سويت شغلي الاعتيادي وغسلت لبنيتي وبدلتها أتمددت ماحسيت الأ صار المغرب چنت راح اگوم اسوي عشه واتصلت ريهام، قبل ماافتحه گلت أمتعيني عليج خيتي خلصتي امتحاناتج واني مامخابرتج انتي وامي غير مرة بيا سواد وجه ارد عليج واني اختج الچبيرة!!
بعدين گلت لا خلي افتحه لا صايرلهم شي بعيد الشر عنهم
ريهام:مرحبا خيتي شلونج وشلون سمر
ريم:الحمدلله حبيبتي بخير وانتي وامي شلونج گمت أبچي بلا وعاتي من گلتلها بخير حطيت ايدي على ثمي حتى لاتحس
ريهام:الحمدلله بخير اشو مختفيه؟
ريم:والله حبيبتي اعذريني ومبروك خلصتي امتحانانج بس شسوي غير الدنيا تلاهي
ريهام:الله يبارك بيج، عقبال سمر، خابرتج اريد بعد باجر تمرّين عدنا ، اذا ماعنده مشكله رجلج
ريم:مااادري شگللها ياربي (بيني وبين نفسي)، والله حبيبتي أحاول بس خطيه رجلي شوية مريض ف زحمه أتركه، ليش ماأناجلها كم يوم؟
ريهام:مااگدر حبيبتي مو بكيفكي لان السالفة اني حابه تجين لان جايين يخطبوني عباس وامه گلت لان بس اني وامي
فــ خابرتج
ريم:ياعمري إنتِ مبروك حبيبتي مقدماً
ريهام:الله يبارك بيج
ريم:حبيبتي عادي ارجع اخابرج بعدين دسوي عشه
ريهام:استغربت منها بس گلت يلا لان رجلها مريض، يي حبيبتي مع السلامه
ريم:مع السلامه سلميلي، ع امي
ريهام:الله يسلمج
ريم:گمت اسوي عشه، خفت يرجع وماصاير الأكل وهم يجفص ويمد ايده، لازم أسايره هالكم يوم على أقل احضر خطوبة اختي واروح وياها عالسوگ
مرت كم ساعة، خلصت تحضير العشه وطعمت بنتي وگعدت تلعب بألعابها
فتح الباب رجلي لان عنده مفتاح البيت وفات هم حسيته مكبسل، گلت ياربي شسوي مع هالرجال! شلون قهر  وعلّه على گلبي
هما الرجال ماينحملون هالمره مكبسل اووف اووف
فات عالغرفه چنت كاعده اني وسمر صيح مثل الثور جيبي أكل چان دايخ ويمشي رحت رأساً عالمطبخ لعبت نفسي منه، صبيتله اكل وكل صحن اصبه، اكول سم بگلبك ان شاء الله
وديتله الاكل وأخذت سمر ورحنا كطيعه مااضل يمه
گعدت أبچي واندم على كل لحظة تمنيته إليه وبنفس الوقت ادعي لأختي ماتتندم بزواجها
ريهام :ومر اليوم وچان يوم حلو هم خلصت أمتحانات وهمين راح أنخطب من شخص خلوق مثل عباس چنت متمدده وغفيت
وصار الصبح، گمت من وگت تريگت مع امي الفتره يلي بين الصبح والظهر كله تنظيف والعصريات سوينا حلويات وجهزت فستان بسيط حتى ألبسه ورتبت كلشي وكلاشي ههههه ماخليت شي ماسويته
مها:يمه بنيتي اليوم صايرة شاطرة وتعزل
ريهام:يي يمه لعد شنو غير عليج طالعة، بس يمه شلون راح اعوفج والله صعبة، مااريد أگلج هالشي بس صدگ كلما نحچي بهالموضوع تجين على بالي، حتى واني فرحانه اتذكرج، تعودت عليج يمه
مها:دمعت عيني، گلتلها يمه مثل ماتعودتي عليه راح تتعودين على عباس، الله كريم
ريهام:شفتها دمعت عيونها، كلش أنقهرت لو أبالي ماچان حچيتلها بس غير من التوتر وقلقي عليها، رحت لحضنها حطيت راسي عليه گامت تلعب بشعري بعدين حضنتها وبچيت، بس ماردت أحسسها
راساً گمت على غرفتي ماردت تحس مسحت دموعي، چنت فرحانه ومقهوره بنفس الوگت، وبعدها بشوية لمن هديت، حطيت ماسكات وسويت عنايه لبشرتي  واهتميت بشعري
عباس:بهذاك اليوم مابعثتو ولا رسالة للريهام قلتو حتى دشتاقله ههههه غسلتو السيارة، جهزتو احواسي يلي دلبسم بالبدايه طلعتو قميص بس قلتو لا دبين كبيغ مايشكلّي تذكرتو مرة ريهام قلتلي احب لبس السبورت عليك، طلعتو بدي ابيض وبنطرون اسود وبوتين أبيض مع قليدي زنجيله أسود وبيها قلب احمر كثيغ كن سمعتوا انو ريهام تحب هذا النوع من اللبس واشتغيتو باقة ورد كبيغة وشوية شغلات ناخذه حتى الحلقة كنتو دشتغيها من حماسي ههههههه بعدين غحتو على غرفه امي
ام عباس:هلا يوم، تغيد شي؟
عباس:يي أغيد، جدي صاغلوا اشقد وجعان، وقيعد ببيت عمي، أبوي مات وهو بعدو هسه على حظي الخزي يموت
ام عباس:اشبيك ابني لاتصير مامغبه
مامغبه=مامربه، بلا تربية (اتمنى وصلت الفكره ههههه)
نهاية الجزء الرابع♥️
حبيت بهالقصة أتكلم عن كل التفاصيل حتى لو كانت صغيرة، هدفي تندمجون بالأحداث ....
وشنو توقعاتكم للبارت الجاي؟ +لاتبخلون عليه بدعمكم، فديتكم نفر نفر.
قراءة ممتعة.