محاولات حواء

" الجزء الثامن "

"محاولات حواء"
                                 "الجزء الثامن"

ريهام:يمه ياريت يرجع الزمن من عمري على عمرها
وينها سمر وينهاا
مها:يمه سمر بالغرفه مانريد تشوف وضعنا احچي واني دموعي تنزل مثل المطر وگلبي محترگ على بنتي
ريهام:گمت من يم أمي رحت عالغرفة شفت سمر نايمة، لزمتها وحطيتها بحضني چنت لابسة عباية وحجاب اسود ضليت ابچي واباوع على سمر، اخخخ حبيبتي راحت امچ وانني بعدچ صغيرة اخ يمه اخ ياريت اني يلي متت ابچي واباوع على سمر وعالسماء فدوة ربي شسويت بهالبنية ضلت وحدها وأخذت امها، شصار لو أخذتني ابدالها اخخخ

_مكتوب عليچ الفراگ
من صغرچ هذا حظچ
تبچين وماتلگين
حضن أمج يسندچ
اباوعلج بقهر
وگلبي نار
شلون تعيش هالعمر بدون
گلب أمچ يسندچ
       #بقلمي
شيفيد البچي؟...
هو الراح هم يرجع!!!، ومرت الأيام وضلينا بهالحالة گلبنا محروگ حرگ على اختي ريم، هي عمري وحياتي وتقبُل فكرة  موتها جداً صعبة
بس ضليت أردد الله يرحمها وادعيلها يكون مكانها الجنة لأنها طيبة كلش
وبنفس الوگت أجا عباس واخذني على الغرفة مالتها يلي ماتت بيها بعد ماضليت ألح عليه، خطيه چان سندي بمعنى الكلمة، تركته بأول يوم عرسنا وبقيت ويه أمي بس دائماً چان وياي ويسندني ويسند أمي ماراد اروح على هالغرفة يعرف راح أبچي وماگلت لامي راح اروح خفت تريد تجي وتمرض من كثرة البچي والحزن يلي عاشته.....
وبأيام عزاها چانت الشرطة محاوطة البيت وتدور دليل ويدورون عليه حتى خارج البلد وبالمطارات وهذا السبب الثاني يلي عباس ماچان مقتنع نروح على بيتها مع ذلك انقهر عليه اشگد ما لحيت وگمت أبچي
وصلنا على بيتها، شفت البيت مليان شرطة وسياراتهم وهمينه  حاطين الشريط الاصفر يلي يخلوه،  چنت أشوفه بالمسلسلات، گلت أمتعيني عليچ خيتي شوفي شصار بيج، الله ياخذه اذا  هو السبب
نزلت من السيارة
عباس:حبي عتغشعين مستحيل يقبلون نفوت لان هالشي راح يأثر عالتحقيق
ريهام:بس اريد افوت شوية والله بس شويه
واسوي كلشي يريدوه
عباس:مااوعدكي، لكن دغوح أطلب منم لخاطر عيونكي
راح عباس چنت واكفة وعيوني مدمعة وانتطره يجي شفته دايحچي ويأشر عليه ماادري حسيت دايگللهم انو اريد ادخل عالبيت وهيچي يعني وبعدها اجا عباس
گللي تعالي راح نفوت لكن بشروط وناخذ احتياطاتنا
سوينا يلي طلبوه مشيت بالبيت ولا إرادياً دموعي تنزل عباس تركني على راحتي هو ضل بالحديقة كل زاوية بالبيت اتذكر أختي
واتذكر لما چنا گاعدين بالديوانية وشربنا چاي وحبشكلات وحچيتلها على عباس واني واتذكر هالشي أدخل عالمكان اشوفه واطلع إلا ان وصلت غرفتها
الغرفه السوداء... الغرفة يلي كلتنا نكرهها
لما فتت حسيت روحي رادت تطلع من مكانها واني أنوح وابچي، والطم واگول
شبيه هالموت
                يأخذ الأعزاز
شلون اعيش بدونچ يخيتي
المن أشكي؟، المن أحچي؟
حرگتي گلبي يااختي يابنت ابويه وامي
ليش رحتي بهالعمر
بعدچ وردة، بعدچ صغيرة، بعدچ كلشي حلو بهالدنيا رحتي وعفتيني وعفتي بنتچ وامچ اخخخخخ يااختي واني اصيح مالگيت الا عباس ورايه ومنقهر
عباس:كنتو بالحديقة عدنتظر ريهام تطلع لَكن شكله مطولي كثيغ، سمعتو صوت صياحها وبكيها ركضتو عالغرفة مسكتوها قتوله يلا ريهام مايصيغ نضل اكثغ، حيل كانت مقهوغة وضيجي، وضعها يقهر، مالحقت تهنت ولا تهنينا بعرسنا، لان هي فعلاً قلبه طيب وماتستيهل يلي صاغ
ريهام:عباس لزمني وگلّي يلا مايصيغ نضل اكثغ
رحت معاه ركبت السيارة واني گلبي محروگ
كلش چانت صعبة هالأيام...
و مــر ٧ أيام
أجانا هواية ناس وجيران يعزونا بهذاك اليوم سمعنا انو زوجها الحقير أنمسك من قبل الشرطة وچنا ننتظر اصدار الحكم بحقه
مها:الله ياخذه، ان شاء الله لايشوف الخير، مثل ماگتل بنتي، شحچي وشگول
ريهام:شفت امي  تصيح وتبچي بعد ماعرفت واني من كثر الحزن احس عيوني نشفت واحاول اهدي أمي
شوية واجا اتصال للعباس
گلب وجهه أصفر وگام يركض على سيارته خفت گلش هواي
عباس:الشرطه مسكت زوج ريم، ولما عغفت عمتي بهالخبر قامت تبكي وتصيح ومااحس الأ أندق موبايلي رقم غريب فتحتونو
بلغوني أنو اخوي راكان عمل حادث كثيغ خطير وهسه هو بالمستشفى كنتو بموقف وشعور لا أحسد عليه الصراحة لدرجة قمتو اركض عالسيارة بدون مااحكي لأي شخص اش صاغ 
ريهام:گمت أدگ عليه، ضليت ألح الا جاوب
عباس:ها ريهام خير خير بعصبية
ريهام:شصار وياك ليش هيچي گلب لونك
عباس:راكان عمل حادث خطير يمعود بعدين نحكي لا تحكين قدام امي هسه
ريهام:اتفاجئت وگلتله يمه شنو مامكتوبلنا نعيش براحة وسديته، حسيت اني لازم أردله يلي سواه وياي مااريد اكون ناكرة الجميل واضل ويه اهلي واعوفه بمصيبته
مها:يمه شكو، خير
شبيه رجلج، رد عليج؟
ريهام:لما خابرته طلعت من المكان يلي بيه امي وبعدها رجعت وچانت تسألني عنه
يمه فدوه اعذروني مااگدر ابقى اكثر، خطيه سوده عليه راكان مسوي حادث خطير لازم اروح عند عمتي وماأحسسها بشي الا يرجعون بخير وسلامه عباس وراكان
مها :اووف شهالمصايب؟!، يي يمه اني ربيتج عالأصول مايصير تعوفين رجلج اني ابقى اهنا واستقبل الناس وادير بالي على سمر، يمه مانشفت دموعي واحترگ گلبي هاي اسبوع وشيفيد رجعت بنتي لا والله ما رجعت، راحت شيرجعها احچي واضرب بأيديه على راسي ورجلي
ريهام:يمه لا تسوين بروحچ هيچي ترى ابقى مااروح
مها الأم:لا يمه روحي روحي، ماعليچ مني يمه
اني ام وخسرانة واحد من جهالها راح اضل بهالوضع طول عمري
ريهام :دمعت عيني من جهة اريد اكون سند للعباس ومن جهة شلون راح أعوف امي، ركبت بتاكسي ورحت چنت لابسة عباية وحجاب اسود ضليت بهاللبس وراح ابقى بيه على اختي
دگيت الباب فتحته عمتي
هلا بكنتي الحلوي، وينكي يمه اشتقنالكي والله
ريهام:گلت بگلبي معناها بعد ماعرفت بشي، يي عمتي واني هم كلش هواية
فتت عالبيت شفت جهال راكان ورقية گاعدة يمهم وداايلعبون وفرحانين حسيت بغصة
رقية:هلا بعمري، نور البيت بيكي
ريهام:اباوعلهم وبداخلي اتمنى ماصار يلي صار خطيه مايستاهلون
شوية ومانحس الا عباس أتصل فتحته عمتي
وانهارت من البچي
عباس:فتو عالمستشفى، سالتو على غرفة اخوي، علموني عليها طلع الدكتور مقهوغ كثيغ
خفتوا من الكلام يلي غاح يحكينو، خفتوا وحسيتوا بالفقد
الدكتور: انت من أقرباء راكان!؟
عباس:اي نعم دكتور، اشنو وضعو؟ ان شاء الله مابينو شي......
نهاية الجزء الثامن ♥️
الأحداث يلي دتصير لها غاية راح تعرفوها بالبارتات الأربعة الأخيرة 🤍🔥
كل بارتات القصة متساوية بالطول ألا هالبارت حبيت يكون أقصر بارت بالقصة وتتحمسون اكثر!
شنو توقعاتكم للبارت التاسع؟؟؟
وشنو رايكم بهالبارت؟
لاتنسون تدعموني برايكم وجماعة الواتباد بالتصويت أحبكم كلش هواية
وأتمنالكم قراءة ممتعة ♥️♥️.
#بقلمي #رُبى_جمال #محاولات_حواء