ما قبل النوم ✨

جلسة -بالعامية-

(دوشة كتير وفوضى مزعجة، تتقدم رئيسة المجلس إلى كرسيها، الكل بيقعد علشان يسمعوا)

=أهلًا بيكم في اجتماع جديد، الوضع سيء المرة دي. حصل إيه يا سكرتارية؟

_في ضيف رخم انضم لأعضاء المجلس وفرض هيمنته على قطاع محترم من الدماغ، وغالبًا بقى عضو دائم.

=قصدك على الوحدة؟ دي هنا من قبلي إيه الغريب!

_لا مش الوحدة، سبق وناقشنا مشكلتها قبل كدا المرة دي ضيف تاني.

=اكتئاب؟

_ناقشناه برضو.

=الصداع؟

_بالظبط.

=بس احنا ناقشناه قبل كدا على ما أذكر ومالقيناش حل زي كل المرات.

_أيوة، بس هو كبر شويه و.... بقى صداع نصفي.
=أفندم؟ بقى إيه يا عنيا؟

_صداع نصفي.

=أحيه!

(بيرحب الاكتئاب والوحدة بصديقهم الصداع النصفي وبيقعدوا جنب بعض)

_أنا عندي حل، أحنا نشيل النص الشمال.

(الصداع النصفي بيأخد كرسيه ويروح الناحية اليمين)

_نشيل الرأس كلها؟

=أنا موافقة.

_حد يبعد العدوانية دي من قدامي، هي و السوداوية اللي جنبها.

=حضرتك، هم بيجوا كدا سوا مع الصداع النصفي كل مرة.

_ناقصة أنا!

=طب ما نسيبهم يا جماعة هم كدا كدا مش عاملين حاجة.

_وهنتأقلم عادي على الضيف الجديد زي القدام.

(رئيسة المجلس بتراجع الورق بتاعها)

=نوبات من الهلع، حالة من الإرهاق الشديد، وظائف الجسم كلها بتنهار بسببهم. هنتأقلم اه. مين العبيط اللي سمح للانكار والكسل بالحضور؟

(سكرتارية بتوطي على رئيسة المجلس)

_حضرتك اللي سمحتي لهم من حوالي سنتين، علشان قدروا يقنعوكي وقتها أن كل حاجة تمام.

=تمام.

_دلوقتي يا فندم، وبعدين؟

=كلنا عارفين الحل. دكتور نفسي شاطر.

_جدًا.

=أو mr. Right

(الكل بيبص للجانب اللي طلع منه الاقتراح باستحقار)

_عدوانية.

=نعم.

_هديك تصريح للقتل لأول مرة.

=بجد! مين؟

_الهبلة اللي قالت mr. right دي.

=رومانسية؟

_بالظبط.

=من عنيا.

(صوت صراخ أنثى رقيقة)

_ناقصة عبط هي.

(رئيسة المجلس بترجع لتركيزها على الورق اللي قدامها)

=فين حب الذات والسعادة؟

_لسه رافضين الحضور، شايفين إننا غير مستحقين.

=نعم؟

_يا فندم دول ماخدوش مرتبات من سنين!

=وأنا أجيب لهم منين؟ دول عايزين جرعات حب يومية! ودعم full board!

_أحنا ممكن نجرب نطلب—

=نطلب مساعدات خارجية؟ تاني؟ أحنا حاولنا بما فيه الكفاية. مفيش استجابات، أحنا لوحدنا.

_فشل فشل فشل.

(الكل بيبص لها)

_مجرد فشلة. أفكار واحدة ساقطة لا عرفت تدافع عن حلمها ولا تنجح في حياتها الجامعية، ولا أي جانب. مجرد فشل.

=جلد الذات.

_عايزة إيه؟

=أقسم بالله لو ما سكتي لأكون سايبة عليكي العدوانية.

(الكل بيبص لعدوانية وهي بتلحس أثار دم رومانسية اللي على صوابعها)

_أنتِ عارفة أن كلكم على بعض ضدي ماتقدروش عليا.

=أنتي بتتحديني؟

_تحبي اثبت لك، يا ساقطة؟

(بتحاول رئيسة المجلس التماسك بعد ما اتجرحت جامد من الهجوم وتبدأ الدموع تتجمع في عيون كل الحضور)

=ابوس أيديكم ارحموني.

(بتنهار رئيسة المجلس في العياط وبيلفوا كلهم حواليها في عياط جماعي)