كنت نايمة علي سريرى بعيط و بحط ايدى علي بوقي عشان صوتي ميطلعش و حد يسمعني فيجي و يشوفني و تبدأ أسئلة بتعيطي ليه الي بعدها بيجي اتهامات كتير اني انا الي مقصرة و انا الي غلطانة و ادخل نفسي فمناقشة عقيمة ، بدأت شهقاتي تعلي و انا اضغط اكتر اتهز و السرير يتهز معايا.
ايد اتمدت و شغلت النور لفيت اشوف مين الي صاحي الوقت دا لقتها بتبصلي و ملامحها قلقانة جاية و هي بتمد ايدها ليا حضنتني و قالتلي بنبرة مليانة حب و قلق
- ايه الي مزعل حبيبة قلبي و مخليها تعيط كدة
شديت علي حضنها و عيطت اكتر وسبت صوت شقهاتي يعلي فضلت تمسح علي شعرى بالراحة و تطبطب عليا
- انا تعبت يا أمي تعبت من كل حاجة و مش قادرة اكمل
فصلت الحضن و رفعت راسي مسحت دموعي بايديها و ابتسمتلي
- بنتي كبرت و بقت انسة جميلة شايلة مسؤولية وبيت و شيلاه علي كتافها تعرفي اني بقعد اقولهم دى بنتي بصوا بتعمل ايه و كبرت ازاي و بقت شبهي
ضحكت علي كلامها
- طيب تعرفي اني بحب ضحكتك دى اكتر كمان اضحكي علي طول و افتكرى ان الدنيا في ابتلاءات كتير و كل دا اختبارات من ربنا و إن الله لا يكلف نفسا إلا وسعها و انتِ طاقة تحملك كبيرة
نفيت براسي
- افتكرى كدة المشاكل الي حصلت زمان هتلاقيها كبيرة و كتيرة و انتي عديتي من كل دا و لسة هتعدى من المشكلة دى طول مفهي ضيقة لازم يجي بعدها فرج و الفرج جايلك يعني جايلك
- اتأخر اوى يا أمي
- كل تأخيره و فيها خيره
باستني فخدى و عدلت شعرى
- حبيبة قلب ماما محدش يزعلها ابدا دانا اكله ، قومي كدة روقي و متنسيش تصلي الفجر.
صحيت و الفجر بيأذن قومت اتوضيت و صليت و عيطت وانا بصلي و دعيتلها كتير فصلاتي بعد مخلصت صلاه لقيت رسالة جايلي عالفون
" وَيَشْفِ صُدُورَ قَوْمٍ مُؤْمِنِينَ"
ابتسمت و حسيت اني بقيت افضل.
أنت تقرأ
عشوائيات مترتبة
Short Storyمجرد مكان بطلع فيه مشاهد من وحي خيالي مش هيكون في قصة فيها تسلسل هو مجرد مشاهد كتبتها اتمني تحبوها معايا.
