-كنت طول عمرى بالنسبالي شهر ديسمبر شهر مميز أوى لأنه نهاية السنة و من أكبر أسباب حبي ليه إن الشتا فيه بيكون شديد و انا من محبي الشتا و برده أوى ، كنت فاكرة إن الشتا بيجي معاه مشاعر لطيفة و سعادة وحب لأن دا دايما إللي كنت بحس به فيه بس السنة دى كانت مختلفة أكتشفت أنه ممكن يكون شهر سعيد و ممكن يكون شهر حزين و أكتشفت إن في الأغلب مع الشهور الأخيرة و خاصةً شهر ديسمبر بتلاقي ناس طلعت من حياتك كنت فاكرهم هيكملوا ف يسبوك مع جرح و قلق من الناس إللي هتيجي تدخل بعد كدة حياتك و تتعرف عليك و في نفس الوقت بيسيبلك فرصة أنك تبدأ بداية جديدة مع تفكير جديد و ناس عرفت مع تجارب كتير معاهم في خلال السنة دى إنهم يستحقوا يكونوا معاك ، يستحقوا تتعب عشانهم ، و مع صعوبة إن حد يطلع من حياتك بس بسببهم بتكتشف الناس الصح إللي في حياتك و دا أهم إنتصار ممكن يحصل للإنسان .
بصلي بابتسامة لطيفة و مسك إيدى الباردة بإيده الدافية =و أنتِ أهم انتصاراتي علي مدار الخمس السنين دول و هتكوني أهم انتصاراتي علي مدار حياتي كلها.
شديت علي إيده الدافية زى حبه إللي مدفي حياتي.
هيفضل شهر ديسمبر بالنسبالي شهر جميل بغض النظر عن انتهائه بحزن او بسعادة.
أنت تقرأ
عشوائيات مترتبة
Short Storyمجرد مكان بطلع فيه مشاهد من وحي خيالي مش هيكون في قصة فيها تسلسل هو مجرد مشاهد كتبتها اتمني تحبوها معايا.
