عشوائيات مترتبة

~6~

عزيزتي < م >

انا تايهة من غيرك ..
عارفة إنها بداية غريبة في إنِ ابدأ محادثة معاكي بس دى أكتر حاجة حاسة بيها من غيرك ، حاولت أوصلّك كتير بس معرفتش فقلت اكتبلك يمكن لما تحسي بيا و تعرفي إنِ تعبانة من غيرك فتحني عليا و تظهرى. 

فاكرة لما قررتي إنِ أكون نجمة فالسما و اختارتيلي نجمة بعيدة فالسما بتلمع أكتر من اللي حواليها ، متتصوريش حبيت فكرة إنِ أكون نجمة قد ايه كنت كل يوم بتأمل النجمة و أفتكر كلماتك و أحس إنِ فخورة بنفسي إن حد شايفني نجمة بتلمع بالشكل الجميل ده ، كنت لما ألاقي النجمة مش موجودة فأخاف من إنِ أختفي معاها و اقعد ادور عليها لغاية ما ألاقيها فيسكن خوفي و تبدأ البهجة ترجعلي و أطمن إنِ لسة موجودة ، لسة بلمع ، لسة جميلة و إن نظرتك ليا هي نفسها بس كبرت و أهملت نجمتي قعدت كتير مش بشوفها و مش بستني الليل يجي عشان اتأملها و احكيلها عن يومي الحياة أخدتني زى مبيقولوا ، بس مش أخدتني بس دى اخدت مني كمان و أولهم كان انتِ ، طلعت النهاردة البلكونة اشوفها بس لقيت نجوم تانية بقت بتلمع أكتر و باينة أكتر و هي لمعانها خف كتير عن زمان نجمتي بتنطفي زى مروحي بتنطفي دلوقتي مبقتش موجودة ، بقيت باهتة ، بقيت حزينة .

مفتقده مشاعر الدفيء اللي كنتِ بتحسسيني بيها دايماً و الحب اللي كنتِ بتغرقيني به ، مفتقده جداً تهوينك عليا مشاكلي و إنك كنتِ مستحملاني و بتحاولي تجملي الواقع المؤلم فعيوني عشان اعرف اكمل ، مفتقده وجودك .

انا اسفة كنت بحبطك و بقابلك بسوداويتي كل مانتِ تقابليني بالأمل ، كنت بقفلها فوشك و اقولك فوقي الواقع مش وردى زى مانتِ متخيلاه بس انتِ كنتِ بتقابليني بابتسامة و بتقوليلي إن العالم الوردى مهم عشان نعرف نحقق احلامنا ، عشان نعرف نكمل كان معاكي حق فكل كلمة انا دلوقتي فأمس الحاجة لعالمك الوردى ، فأمس الحاجة انك تحضُنيني و تدفي برودة جسمي الأزرق .

انا أسفة..
انا وحيدة من غيرك..
انا حزينة من غيرك..
انا مفقتداكي..