نصف جن

٢٢

ام محمد الجبوريه

نصف جن

البارت ٢٢

☘️☘️☘️☘️☘️☘️

لم أمنح أحداً حق التجول في تفاصيلي إلا أنتَ

هوازن :مرت أيامنا عاديه
بعد زواج حنين صح اني وباقر نحاول
انسوي حركه بالبيت ونغير جو بس حنين لها ميزه بالبيت حنين الأخت الأكبر والبنت الصديقه الامي وابوي
صعب احد يسد مكانها
قيصر اخوي ورزان مالهم حس هذولي عايشين بعالم وحدهم
لعبهم واكلهم وقرائتهم سوه لان الفرق بينهم قليل
عبالك توأم اني اكثر شي اميل الباقر
ويعرف هواي اشياء عني خاصه لاشياء الي تتعلق بالعالم الثاني اكثر شي احجيها الباقر

بعد اسبوع من زواج حنين عزمناهم
وحتارو اهلي شيخلون بالسفره

ابوي عنده حنين واخوتها ولده حالهم من حالنا لا احيانا احسه يفضلهم علينا لان همه اكبر منا واقرب الاهلي

رغم ابوي بيوم عرسها هدالها اسوارات

بس هم ماقصر وياها اخذلها هدايه
وجدي هم دز فلوس كال الابوي شوف شنو تحتاج شعدها نقص

رفضت كالت مااخذ اجهزه كهربائيه لان البيت بس الحجي والحجيه اهل رغيد وهيه زحمه تجيب اجهزه كهربائيه وتخليهم بغرفتها
محسن طالع بيت بصفهم ونسوانه اثنينهن بي

من كملو الغده ابوي جان ماجر سياره كبيره للكاظم وعزمنا نسوان من جيرانه وخالتي سعاد اجت هيه ويقين وبيبي
يمنه من الصبح

للعصر رحنا للكاظم وهاي وحده من العادات المعروفه البنيه تروح بالسبعه مالتها الامام تكول بيبي تفك وجها

نسوان محسن اثنينهن وعمة حنين وحماتها مزوجه اخو مره محسن الثانيه
جانن وينا ومحسن وابو ورغيد
وصلنا كبال الامام امي خلت رأيه بيضه على رأس حنين غطتها كلها
ودخلنا للحظره وخالتي سعاد وبيبي يطشن جكليت عليها

من كملنا الزياره ابوي وامي اخذو حنين لصايغ اخذت كردان يخبل وخذت محبس بي نفس الشذر مال الكردان

رغيد وأمه بقو يحجون مايصير هلكد ماقصرتو انتم بشي

جاوبتهم امي هذي صبحتها من أعمامها وجدادها وهيه ماتقبل تاخذ شي الغرفتها
فاخذنالها ذهب

يمكن اشوفها مبالغه بس هذي طريقتنا لكل بنيه

مرة محسن جانت قريبه يمي اسمعها تكول شنو مامصدكين ازوجت خابصين نفسهم

باوعت عليها خزرتها بس المشكله البنيه ماحجت بصوت اني شلون سمعتها

بيومها رجعنا للبيت حجيت الباقر
كام ينكز حبابه خلي احطك بالفكس وياي آخذج لجامعه هيج تقرين فكار الاساتذه مالتي ولج غير اعبر القارات