Desharow's Merman

အခန်း(၅) အန္တရာယ်ရှိသော ကျူးကျော်မှု

(ဤတွင် လိင်ပိုင်းဆိုင်ရာ အထိအတွေ့အသုံးအနှုန်းများ ပါဝင်ပါမည်။)

Note.

ထိုကဲ့သို့ အရေးအသား၌ အားနည်းနေနိုင်ပါသည်။ 😂

___________________________

အခန်း(၅) အန္တရာယ်ရှိသော ကျူးကျော်မှု

ရေသူထီး၏ စိတ်ငြိမ်ကာ အသက်ရှူသံတွေပြေလျော့သွားမည့် အချိန်ကို ကျွန်တော်စောင့်နေမိခဲ့သည်။ သူ့ရဲ့အခြေအနေက ပုံမှန်အနေအထားအတိုင်း ငြိမ်သက်သွားပြီးမှ ကျွန်တော်လည်း တစ်ဖက်သို့ ပစ်ထုတ်ထားရသည့် ဆေးသတ္တာပုံးကို လက်တစ်ဖက်နဲ့ လှမ်းယူဖို့ရဲတော့သည်။ ထိုဆေးသေတ္တာထဲက ပိုးသတ်ဆေးကိုအရင်ယူပြီး သူ့ရဲ့အနာကို သန့်ဆေးလုပ်ပေးပြီးမှ အနာကို သေချာစစ်ဆေးကြည့်ရတော့သည်။

ရေသူထီး၏ ပုခုံးပေါ်ရှိနေသည့် ဒဏ်ရာက အတော်လေးကိုကြီးပြီး ပြဲထွက်နေသည့်ကြွက်သားစိုင်တွေက အမြှေးပါးအကြည်ရောင်အချွဲတို့ဖြင့် ဖုံးကာနေသည်။ ထိုအမြှေးပါးက ဒဏ်ရာကြောင့် သွေးထွက်လွန်မှာကို ကာကွယ်ပေးထားတာဖြစ်ပြီး သို့ပေမယ့် ကံမကောင်းစွာနဲ့ပဲ ထိုအမြှေးပါးက ဒဏ်ရာပြန်ကောင်းဖို့အတွက်ကိုလည်း အချိန်ကြာမြင့်စေပြန်သည်။ ထိုအရာများထက် အဲ့ဒီအရေပြားအောက်က ထူးဆန်းစွာဖောင်းထွက်နေသည့် အရာလေးကို ကျွန်တော်တွေ့လိုက်ရပြန်သည်။ သူ့အား ဂရုတစိုက်နဲ့ ထုံဆေးထိုးပေးပြီးနောက် ဒဏ်ရာအပေါ်ဖုံးအုပ်နေတဲ့ အချွဲမြှေးကို ညှင်သာစွာဖြတ်တောက်ဖွင့်လိုက်သည်။

ထို့နောက်တွင်တော့ ကျွန်တော်တွေးထင်ထားခဲ့သလိုပဲ ထိုအသားစိုင်ထဲမှ ကျိုးပဲ့နေတဲ့ ငါးမန်ရဲ့သွားတစ်ချောင်းကို ကျွန်တော် ဆွဲထုတ်လိုက်ရသည်။ ထိုသွားက ကျွန်တော့်ရဲ့ လက်မထက်ပင် ကြီးနေပြီး သွားအစွန်းတွေက မညီညာကာ အချွန်အတက်များ ရှိနေသည်။

ဒီသွားက အရွယ်ရောက်ပြီးသား ငါးမန်တစ်ကောင်ရဲ့သွားဖြစ်ပြီး မနေ့က ဒါမှမဟုတ် လွန်ခဲ့တဲ့နှစ်နာရီအကြာတုန်းက ထိုငါးမန်နဲ့ ရေသူထီးကြား ပြင်းထန်တဲ့ တိုက်ခိုက်မှုဖြစ်ခဲ့ပုံရသည်။ ယခုလက်ရှိ ရေသူထီး၏ ကျန်းမာရေးအခြေအနေနှင့် ပြတ်ထွက်ပြီးပါလာတဲ့ ငါးမန်သွားကိုကြည့်ပြီး ခန့်မှန်းရသလောက်ဆိုရင်တော့ ဒီငါးမန်ရဲ့ကံကြမ္မာက ရေသူထီးထက်ပင် ပိုပြီး ဝမ်းနည်းစရာကောင်းနေသည်။