ناس كتير فاكرة إن المسيح الدجال كائن غريب و عنده عين واحدة في نص راسه و شكله مرعب ، والحقيقة إنه مش كده خالص هو حد عادي جدا زينا ، بني آدم طبيعي ..
بس الرسول عليه السلام استفاض في ذكر وصفه اكتر من أي رسول تاني وبالمناسبة كل الرسل نبهوا أقوامهم من المسيح الدجال عشان فتنته هي أكبر فتنة هتحصل على الأرض وهنعرف ليه ..
أول حاجه اسمه المسيح عشان حاجتين ، انه عنده عين ممسوحة بمعنى انها مغمضة كده شوية الرسول وصفها أكنها عنبة طافية يعني زي الزبيبة بسبب ان المية اللي فيها مش موجودة
وتاني حاجه عشانه هيمسح الأرض كلها في ٤٠ يوم ،
اليوم الأول فيه أكنه سنة في الطول ، واليوم التاني أكنه شهر واليوم التالت أكنه أسبوع ، و بقية الأيام زي أيامنا العادية ، هيوصل لكل حتة في الأرض ، هيكون راكب دابة الرسول قال إنه حمار بس شكله غريب جدا عمر ما حد شافه ما بين ودانه بس ٤٠ ذراع ، حاجه ضخمة جدا يعني ..
شاب مش عجوز ، لون بشرته بيضا مايلة للأحمر ، شعره كثيف جدا و خشن جدا جدا ، قصير بس جسمه عظيم بمعنى انه عريض جدا و مليان ، و في تباعد بين رجليه واضح .
وأهم نقطة هيبقى مكتوب بين عينيه كافر ( ك ف ر ) و من حكمة ربنا هيقرأها كل مؤمن سواء بيعرف يقرأ او جاهل .
ليه بقى هو فتنة عظيمة كده ؟ عشان هيقول إنه هو ربنا و هيعمل حاجات فعلا مايقدرش يعملها إلا ربنا ، بس احنا مؤمنين طبعا ان ده كله تحت مشيئته سبحانه
هيمشي معاه نهرين واحد أكنه جنة مية جميلة جدا ، و واحد نار ملتهبة جدا ، الرسول قال انهم العكس جنته نار و ناره جنة ، ووصانا لو اتعرضنا ليه وقالنا نختار نغمض عنينا و ننزل راسنا ونشرب من النار هنلاقيها مية باردة و حلوة جدا .
و دي وصية مهمة جدا .
هيجي للراجل يقوله لو انا أحييت ليك مامتك و باباك هتؤمن بيا ؟ لو الراجل ايمانه ضعيف هيقوله أيوة طبعا ، فا يطلعله جن من تحت الأرض زي شكل باباه فا يقوله آمن بيه هو على حق ، فا الراجل يؤمن فعلا
انت متخيل باباك ومامتك يطلعولك يقولولك انه صح ؟ متخيل الفتنة ؟
هيروح لمدن اللي يؤمن بيه ينزلهم مطر من السما و يطلع زرع الأرض و ثماره ، و اللي يكفر بيه المطر هيقف عندهم والأرض تبقى بور ، و أصلا الدجال هيجي بعد ٣ سنين هتحصل فيهم مجاعة و قلة مطر فا بالتالي هتبقى فتنة شديدة جدا ..
في شاب من خيار وأصلح أهل الأرض يومها هيطلعله من المدينة ويقول لكل الناس ده كداب ماتصدقهوش ماتؤمنوش بيه ، فا الدجال هيقوم شاقه نصين و مموته ويقول للناس لو أحييته تاني هتؤمنوا ؟ فا يرجعه تاني و يحييه فا الشاب عشان عنده علم وعارف هيقوله والله انا دلوقتي صدقت أكتر انك الدجال ، يا ناس مش هيقدر يعمل كده الا فيا أنا ماتصدقهوش ، فا الدجال هيموته وهيكون أحسن شهيد على وجه الأرض عند الله ♥️.
في مدينتين مايقدرش الدجال يدخلهم هم مكة والمدينة هيبقى عليهم ملائكة تحاربه لو فكر يدخلهم ، ولا يقدر يدخل المسجد الأقصى ولا الطور
فا نصيحة الرسول إننا مانعرضش نفسنا لفتنته و نحاول اول ما يظهر اننا نروح نقعد في الاماكن دي عشان في ناس مؤمنة هتبقى عارفه انه الدجال و يروحوله يقاتلوه و من شدة الحاجات اللي هيشوفوها هيكفروا برضو ويقعوا في الفتنة
وقال لو ماعرفناش نهرب وهنواجهه خلاص نقرأ عليه فواتح سورة الكهف لما نشوفه ( اول عشر آيات من سورة الكهف ) دي هتقينا فتنته ، عشان كده واجب على كل واحد فينا من النهاردة يحفظهم .
و ماتنسوش تدعوا دايما " اللهم إني أعوذ بك من فتنة المحيا و الممات و من شر فتنة المسيح الدجال "
منقول
