Please Don't See Me [Mm Transl. || Completed]

CHAPTER-5

UNICODE

အပိုင်း (၅)
အဖျား

နံနက်ရောက်သော် ရှုကျင်း အိပ်ရာမှ နိုးထလာချိန်၌ ရှုကျုံးယွမ် အိမ်မှထွက်သွားနှင့်ပြီဖြစ်သည်။

ရှုကျင်းအတွက်တော့ ဤဘဝမျိုးကို ငယ်ရွယ်စဥ်ကတည်းက နေသားကျနှင့်ပြီးဖြစ်၏။ အိမ်တော်ထိန်းအဒေါ်သုံးဦးကသာလျှင် ရှုကျင်းအား ဂရုစိုက်ပေးနေခြင်းပင်။ ဤရက်ပိုင်းအတွင်း၌ အဒေါ်သုံးယောက်စလုံးက ခွင့်ယူထားလေရာ အိမ်၌ ရှုကျင်းတစ်ဦးတည်းသာ ရှိနေတော့၏။ ထို့ကြောင့် အိပ်ရာမှနိုးစဥ် အောက်ထက်၌ ဂလုံးဂလွမ်းအသံများ ကြားခိုက် သူ၏ပထမဆုံးအတွေးက ခွေးလေး ပတ်ဖ် လျှောက်မွှေနေပြီဟူ၍။

"ပတ်ဖ်ရေ...."

ညအိပ်ဝတ်စုံဝတ်ဆင်ထားဆဲဖြစ်သည့် ရှုကျင်းလည်း အိပ်မှုန်စုတ်ဖွားဖြင့် အောက်ထပ်သို့ဆင်းလာရာ ဧည့်ခန်းထဲရှိ အခြေအနေကို မြင်လိုက်ရချိန်၌ ကြက်သေသေသွားတော့သည်။

ရှန့်ရှင်းဟယ်က ရှုကျင်းအား ကျောပေးကာ ကော်ဇောထက်၌ ထိုင်ရင်း ခွေးလေးနှင့် ဆော့ကစားနေခြင်းသာ။

ရှုကျင်းက နံနက်မိုးသောက်အရုဏ်တက်ချိန်မှသာ အိပ်ပျော်သွားခြင်းဖြစ်၏။ ထို့ကြောင့် နိုးလာချိန်၌လည်း အိမ်၌ အခြားလူတစ်ဦး ရှိနေသေးသည်ကို လုံးလုံးလျားလျား မေ့လျော့သွားခဲ့သည်။ ရှုကျင်းလည်း မျက်နှာထားကို ချက်ချင်းတည်လိုက်ကာ မျက်နှာသေဖြင့် မီးဖိုချောင်ဆီ တည့်တည့်လျှောက်သွား၏။

ရှန့်ရှင်းဟယ်နံဘေးမှ ဖြတ်လျှောက်သွားသည်နှင့် တစ်ဖက်လူက ခေါင်းစောင်းလာကာ ရှုကျင်းအား စကားဆိုလိုက်သည်။

"မောနင်း"

ရှုကျင်းကတော့ လျစ်လျူရှုဆဲ။ 'ပတ်ဖ်'ဟု တစ်ခွန်းခေါ်လိုက်ပြီးနောက် မီးဖိုခန်းဆီ ဆက်လျှောက်သွား၏။

ရှုကျင်းလည်း ရေခဲသေတ္တာထဲမှ နွားနို့ဘူးကိုယူထုတ်ပြီးနောက် တမင်တကာရည်ရွယ်၍ ရေခဲသေတ္တာတံခါးကို ဗုန်းခနဲ အကြမ်းပတမ်း ပိတ်ပစ်လိုက်သည်။ အပြင်လူက ရှင်းလင်းပြတ်သားစွာ ကြားနိုင်စေရန်အတွက်။ ထို့နောက် ခွက်တစ်ခွက်ရှာကာ နွားနို့လောင်းထည့်လိုက်သည်။