Please Don't See Me [Mm Transl. || Completed]

CHAPTER-7

UNICODE

အပိုင်း(၇)
ရှန့်ရှင်းဟယ်ရဲ့မျက်လုံးတစ်ဖက်ကို ဖျက်ဆီးခဲ့တာက ကျွန်တော်ပဲ

ရုတ်ခြည်းဆိုသလို နွေးထွေးလှသည့် ခန္ဓာကိုယ်တစ်ခုက ရှုကျင်းနောက်ကျောကို လာမှီ၏။

အတွေးကမ္ဘာထဲ တဝဲလည်လည်ရောက်ရှိနေသည့် ရှုကျင်းခမျာ လန့်ဖျပ်၍ လက်ထဲ၌ ကိုင်ထားသည့် ဖုန်းက ဆိုဖာထက် ဘုတ်ခနဲ ပြုတ်ကျလေသည်။

ရှန့်ရှင်းဟယ်မှာ ခုနလေးတင်မှ ရေမိုးချိုးပြီးစီးသွားခြင်းဖြစ်၏။ ဆံနွယ်မှ တဒေါက်ဒေါက်စီးကျနေသည့် ရေစက်ရေပေါက်များက ရှုကျင်း၏လည်ပင်းအစပ်သို့ ခိုနားသည်။ ထို့နောက် ရှုကျင်းနားရွက်အနီးသို့ ကပ်၍ မေးလိုက်၏။

"ဘယ်သူနဲ့ မက်ဆေ့ချ်တွေ ပို့နေတာလဲ?"

မျက်နှာအနားပို၍ပိုကာ နီးကပ်လာသည်ကို သတိပြုမိသော် ရှုကျင်းက မိမိလက်မိမိ ပြန်ဆုပ်ထားရသည်။

"ကျွန်တော့်လုပ်ဖော်ကိုင်ဖက်ပါ"

ရှုကျင်းက ပေါ့ပေါ့ပါးပါး ပြန်ဖြေလိုက်ရာ ရှန့်ရှင်းဟယ်က ရှုကျင်း၏ပါးအား ညင်သာစွာ ညှစ်၍ တဘက်ဖြင့် ခေါင်းသုတ်ရန် ထထွက်သွားလေ၏။

နောက်ဆုံးအကြိမ်က ဖြစ်ပွားခဲ့သည့် ရှုကျင်း၏အဖျားနုကြောင့် လွန်ခဲ့သည့်နှစ်ရက်အတွင်း ရှန့်ရှင်းဟယ်က ရှုကျင်းအား ပေါင်ထက်၌ ထိုင်စေခြင်း၊ နှစ်ကြိမ်နှစ်ခါ နမ်းရှိုက်ခြင်းတို့ဖြင့်သာ ဖြေဖျောက်ခဲ့ရသည်။

သို့သည့်တိုင် ရှုကျင်း၏ခန္ဓာကိုယ်က အမြဲပူလောင်မြဲ။

ဘောက်မဲ့ကြောင့် ထိုကဲ့သို့ ဖြစ်နေသည်မှန်းလည်း ပြောပြမတတ်ပါချေ။ ရှန့်ရှင်းဟယ်၏အထိအတွေ့များအား လက်ခံလိုက်ပြီးသည်နှင့် မိမိဘာသာမိမိ ထိန်းချုပ်ထားမနိုင်တော့။

နှစ်ရက်ဟူသော အချိန်ကား မျက်တောင်တစ်ဖျတ်အခတ်တွင် ကုန်လွန်ချေပြီ။

ရှန့်ရှင်းဟယ်နှင့် သူ၏အတွင်းရေးမှူးတို့ နောက်ခရီးစဥ်အတွက် စီစဥ်နေသည်ကို ရှုကျင်း ကြားလိုက်ရပြီးဖြစ်သည်။ ဤနေရာရှိအလုပ်ပြီးမြောက်သည်နှင့် တန်းပြန်ကြမည်မဟုတ်သော်လည်း နောက်ရက်အနည်းငယ်အတွင်း အခြားမြို့တစ်မြို့သို့ သွားကြတော့မည်သာ။