The Apocalypse (Completed)

-4-

Unicode

zombieကပ်ဘေးကြီး စတင်ပြီးနောက် ၅နာရီအကြာ၌ droneများမှတစ်ဆင့် ရိုက်ကူးထားသည့် မြို့တွင်းအခြေအနေတို့သည် လူမှုကွန်ရက်တွင် အထိုက်အလျောက် ပျံ့နှံ့လာ၏။

virusနှင့်ပတ်သက်သည့် ဓာတ်ခွဲစစ်ဆေးမှုတို့အား အနည်းအကျဥ်းမျှပင် မပြုလုပ်ရသေးသည့်အလျောက် မြို့တွင်းရှိ zombieအရေအတွက်သည် ရာချီမှ ထောင်ချီအထိရှိလာပြီး ဆက်လက်တိုးပွားဆဲဖြစ်ကြောင်း droneမှ ရရှိသည့် video clipများမှတစ်ဆင့် သိရှိလိုက်ရတော့သည်။

ရုပ်မြင်သံကြားတွင်မူ ပြည်တွင်းပြည်ပလေကြောင်းခရီးစဥ်များအား အကန့်အသတ်မရှိ ပိတ်ပင်ရွှေ့ဆိုင်းကြောင်းနှင့် ၊ ကယ်ဆယ်ရေးအစီအစဥ်တို့ စတင်ရန် အနည်းငယ်မျှကြန့်ကြာနိုင်သည့်အတွက် ပြည်သူလူထုအနေဖြင့် ဘေးကင်းရာနေရာတို့တွင် သတိဖြင့် ပုန်းအောင်းနေထိုင်ပါရန် ၊ နေအိမ်တွင် ရှိနေပြီးသူများအနေဖြင့်လဲ နေအိမ်ပြင်ပသို့ မထွက်ကြပါရန် စ​သည်ဖြင့် ကြေညာမှုများ ရှိလာ၏။

သို့သော်ငြား ယနေ့သည် ချစ်သူများနေ့ဖြစ်သည်မဟုတ်ပါလား?

များစွာသောလူတို့သည် မနက်ခင်းအချိန်အခါ စတင်လာကတည်းက ၄င်းတို့၏ ချစ်သူများနေ့ အမှတ်တရအစီအစဥ်တို့အား အကောင်အထည်ဖော်ရန် လမ်းမပေါ် ထွက်လာကြသည်ဖြစ်ရာ ကပ်ဘေးကြီးစတင်ချိန်၌ မြို့ရှိ လူဦးရေ၏ ထက်ဝက်ကျော်ရာခိုင်နှုန်းသည် လမ်းမတို့ထက် ရောက်နှင့်နေပြီးသားပင်ဖြစ်လေသည်။

ထို့ကြောင့် ဤဝရုန်းသုန်းကားအခြေအနေအတွင်း များစွာသောလူတို့သည် zombieတို့၏ တစ်စစီကိုက်ဖြဲစားသောက်ခြင်းကို ခံကြရပြီး ၊ နောက်ထပ်များစွာသောလူတို့ကမူ အကုိက်ခံရမှုကြောင့် zombieအဖြစ်သို့ ကူးပြောင်းသွားကြရသည်။

ထို့အပြင် ပွဲလန့်တုန်း ဖျာခင်းတတ်သူတို့သည် ဗရမ်းဗတာအခြေအနေတို့ကြား ပေါ်ထွက်လာတတ်သည်မှာ ထုံးစံပင်ဖြစ်သည့်အလျောက် လက်ရှိဖြစ်ပေါ်နေသည့်ကပ်ဘေးဆီမှ အမြတ်ထုတ်လိုသည့် Vloggerအချို့ ရှိလာကြပြီး ၊ အကျိုးဆက်အနေဖြင့် လူငယ်အချို့သည် ကပ်ဘေးအပေါ် အနည်းငယ်ပေါ့ပျက်စွာ တွေးတောလာကြတော့သည်။