#خلف_الجدران 🖇️
#صفية_نݣات✨
#الجزء_07
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
بزقات على وجههو مغددة و ما عندها جهد ليه من غير ! هز كلينيكس مسح الرشاش و خنزر فيها .. هي بنفسها شافت فيه بتحدي ... مشاعرها مخربقة مرة منهارة ، مرة كاتحاول تبرد و مرة كاتغزل معصبة . ما عارفاش اشمن موقف تشد و خصوصا هي لي دارت هادشي لراسها ...
اينايا : (بتحدي ، تبسمات جنب) غادي نهضر و لي بغا يوقع يوقع !
خليفة : (قرب ليها حتى تخالطو انفاسهم و حس بدقات قلبها كاينبضو بعنف ، مشا ببطئ ناحية وذنها و همس) لي غادي يوقع هو نتي غادي تخسري كلشي .. ماشي انا لي كايتحداوني الناس و كايربحو .
اينايا : (قربات لوذنيه بنفس طريقتو و تنفسات مجهد ، همسات مزيرة على سنانها) ما غاديش نخليك تحرق قلب ختي ، نموت و ما نخليكش تآذيها . غادي نخسر بزاف و لكن ما غاديش نكون بوحدي ، بدينا بجوج ، غادي نكملو بجوج ...
تبسمات فوجهو و هي كاترعد ... هزهزات راسها و خرجات من الدرب و عينيها كاينزلو دموع حارة ، متحصرة على حياتها لي ضيعات و على ثقتها لي عطات .
وقفات طاكسي و دارت شافت فيه داير يديه فجيبو و مخنزر فيها ... ركبات و قلبها كايضرب فوذنيها ...
زادت و نزلو دموعها كثر و كثر ، كاتشهق و تبكي حتى خلعات مولاها ... حبس على ليمن بقات فيه و نزل لعندها ، فتح الباب و مد ليها قرعة ديال الما ...
.... : الله يفاجيها عليك ا بنتي
اينايا : عييت ا عمي ، عييت ، ضقت ، دارت بيا الدنيا ، انا غلطت و على غلطتي وذيت .. شنو باقي مزال .. علاش ما بغاتش تضحك ليا الدنيا خلاص ؟
... : (طبطب على يديها) صبري ربي مخبي ليك غير الخير ، صبري و عضي فالصبر و من ربي قربي ... ما تبقايش مبعدة على لي خلقك !
اينايا : (مسحات دموعها و قلبها مزير) لا الاه الا الله ..
.... : نتوكلو على الله ؟
اينايا : (هزات راسها بالايجاب) للاكار عفاك ..
.... : واخا ا بنتي ..
تبسم ليها و كلامو كان فيه حنية بوحدها ، بادلاتو الابتسامة واخا ما عندهاش جهد ليها ... ركب فبلاصتو ثاني و مشا باتحاه المحطة الطرقية ...
خلصات و نزلات من الطاكسي و الراجل مغرقها دعاوي حيت ديال بالصح عزات عليه ...
قطعات و جلسات كاتسنى التران يوصل ... هزات تلفونها كان مطرطق باتصالات اشراق ، بلعات ريقها و عيطات ليها . مع جاوباتها اشراق طارت عليها
اشراق : هادي هي عليك غادي نجاوبكم !
اينايا : (بصوت منغنغ) كنت ناعسة (شهقات) عاد فقت
اشراق : ب باكية ؟
اينايا : لاااا ! عادي ، غير ياله نضت و صافي
اشراق : همم من الخير ! كي وصلتي ؟
اينايا : بيخير مزيان !
اشراق : و رتاحي ..
اينايا : اش كاديري ؟
اشراق : والو نصبت غذاتنا و جلست حدا ختك كانشوفو شنو كاين هاد العام فكسواي العرس
اينايا : هممم .. مزيان !
اشراق : (قلبها ما مهنيها عليها) اينايا بنتي ياك لاباس !
اينايا : (ترعدو شفايفها و نطقات) موجوعة ا ميمتي .. قلبي محروق و ماليه دوا .
اشراق : ويل الشيطان !
أنت تقرأ
خلف الجدران (بالدارجة المغربية)
Short Story2021/12/02 📍#ممنوع_النشر 🔐 ماذا أقولُ له لو جاء يسألُنـــــي إنْ كنتُ أكرهُهُ ... أو كنتُ أهواهُ ؟ ماذا أقولُ , إذا رَاحَتْ أصابعـــهُ تُلَمْلِمُ الليلَ عن شَعْرِي و تَرْعَاهُ ؟ و كيفَ أسمحُ أن يدنُو بمقعـدِهِ؟ و أن تنامَ على خَصْري ذ...
