خلف الجدران (بالدارجة المغربية)

(VI)

#خلف_الجدران 🖇️
#صفية_نݣات✨

#الجزء_06
🔏
   #🅂🄰🄵🄸🅈🄰_🄽🄰🄶🄰🅃
       #𝓘𝓻𝓲𝓼

و وصل النهار الموعود ، فطريقها لدارهم ،  و الغمة لي على قلبها ، نفسها كانت زارتها من عشر سنين فاش ساقت خبار رحيله و هروبو عليها بلا وداع و بلا مقدمات ، ساهية و مخها كاينسج سيناريوهات بزاف ، عازمة تقول شنو كاين و ربي كبير ...

فتحات النوط (note) فتلفونها كاتكتب و تمسح فاعتذارها لختها ، بالرغم من انها غادي تكسر قلبها و لكن لمصلاحتها تبعدو عليها ، واحد بحالو ما غاديش يتبدل .. هو كايلعب بالعافية و هي غادي تحرقو بيها ..

اينايا : اول حاجة سمحي ليا ، ما بغيتش نغص عليك فرحتك و لكن هو ما يستاهلكش ، كلشي على قبلك و لمصلحتك ، و الا ما عمري كنت غادي نهضر ..

كاتكتب و تعبر و قلبها مع كل ذكرى عاود حيات كايتزير ، صحيح هي ما نسات حتى تفصيل و لكن باش تهضر على السيرة و تكشف كل حاجة كانت مخبية صعيب الحال عليها ...

مسحات دمعة يتيمة نزلات فوق التلفون و تنهدات ... صونا تلفونها و غير شافت فالمتصل ترددات واش تقبل المكالمة و لا لا ، خصوصا من نهار رجعو يهضرو و هي كاتلمس الاعجاب فطريقة هضرتو و تعاملو معاها ، صحيح اي وحدة بعقلها ما غاديش ضيع همزة كيما بحالو و لكن اينايا حكمات على حياتها باش تسالي قبل ما تبدا ، و ما تبغيش تضيع معاها ولد الناس ... بعد تردد و قبل ما يقطع الخط قبلاتو و حنحنات ..

اينايا : السلام !
خليل : و فين الهرابة ! دقيت  ما كاين حد !
اينايا : (تبسمات) مسافرة ..
خليل : بالصحة ، و ايمتا غادي ترجعي ؟
اينايا : (قرنات حجبانها باستغراب) علاش هاد السؤال ؟
خليل : (تنهد مع ابتسامة خفيفة على شفايفو ، حط يديه على قلبو لي حس بنبضاته كايتسارعو و نطق بثثاقل)  والو غير بغيت نعرض عليك تونسيني و صافي
اينايا : ما عرفتش ، يكون خير ، (تنهدات) ما كانظنش غادي تكون عندي الݣانة ديال نونسك
خليل : (بمزاح) السلامة يا ربي ، مالك متشائمة ! ياك غادية تفوجي ..
اينايا : نظريا اه ، تقنيا لا ..
خليل : اينايا وقتما احتاجيتني غادي تلقايني بجنبك .. ما تتردديش
اينايا : شكرا ا خليل كانقدر ليك هادشي
خليل : واجهي و ما تخافيش ، كلشي غادي يمشي كيما نتي باغية ، حيت اينايا لي كانعرف حتى حاجة ما تقدر تحبطها و لا تخليها تتأزم ، اينايا لي كاديرها فبالها كاتوصل ليها .. ديري الصح و ما يهمكش شي حاجة من غير
اينايا : (دمعو عينيها و تزيرات) ثيق بيا كون عرفتي اينايا مزيان ما غاديش تقول هاد الهضرة
خليل : لا ، انا  by ur side no matter what تيقي بيا ، حتى حاجة ما غادي تأتر فهضرتي
اينايا : شكرا ، كلامك دعمني
خليل : ياله طريق السلامة ، ما نبرزطكش كثر ، حتى ترجعي و واتسابيني ..
اينايا : تمام ، ان شاء الله .

ظلام الحال و الناس جاو ، بين تعارف خفيف ظريف و كلام على الزواج و تأسيس اسرة ، جالسة اشراق مع نسابها و عينيها على الباب ، باغا اينايا تكون معاهم و تشاركهم فرحتهم ..