#خلف_الجدران 🖇️
#صفية_نݣات ✨
#الجزء_02
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
حاطة يديها على خدها و ساهية ، عقلها مشا بعيد كايفصل و يخيط و الخوف متملكها حتى النخاع ، كيفاش عرفها ؟ عنداك يكون شي حد شافهم ؟ ايلا ساق باها الخبار خلات عليها ...
وقفات عليها ميرا كاتاخد رأيها فأشمن لبسة تلبس و هي ما كايناش فهاد العالم ، حتى فرقعات صباعها قدام عينيها ..
ميرا : هيهو .. فينك !
اينايا : همم ؟ م معاك معاك ..
ميرا : قولي لي شنو نلبس !
اينايا : لي على ليمن
ميرا : تمام ، و نوضي وجدي راسك حتى نتي دغيا
اينايا : لا غير خليوني نرتاح ، و نراجع غذا عندي فرض
ميرا : و شوفي مع ماما
اينايا : اه هاني غادة نهضر معاها ..
وقفات و رجليها ما هازينهاش ، تمشات ناحية بيت النعاس فين كانت اشراق كاتلبس و جلسات مقابلة معاها ...
اشراق : مزال نتي ما وجدتي
اينايا : انا ما فيا لي يخرج .. غير خليني اماماتي فالدار نغمض واحد الغميضة و نوض نكمل مراجعتي
اشراق : و بغيناك زعما تمشي تفوجي معانا ، نتي النهار و ما طال حاطة وجهك وسط الكتوب
اينايا : خيرها فغيرها ، سيرو نتوما نشطو و ضحكو بصحتكم ..
اشراق : على خاطرك ..
اينايا : سلمي على ميما ايلا كانت تماك
اشراق : مبلغ ..
تبسمات ليها اينايا و خرجات من عندها نيشان لبيتها تخشات فبلاصتها ، كاتشوف فالحيط ، زعما راهي ناعسة ...
خرجات اشراق و ميرا يحضرو لعشية عند عائلتهم بمناسبة الختانة ... و هي ناضت جلسات و الرعدة شاداها .. حلات فايسبوك لقاتو راسل ليها ..
خليفة : كانتسناك .. تجي و لا نجي ؟
تنهدات شادة على قلبها و ناضت واقفة ، ما خمماتش مزال فشنو ممكن يوقع المهم تسوي الموضوع اليوم قبل من غذا ..
حلات الباب و خرجات .. وقفات قدام باب دارو لي حداها و هي كاتشوف فجنابها ، مهنية من ناحية الجيران لي ساكنين معاهم ، الطبقة ديالهم ما فيها حد من غيرهم بجوج و لكن ايلا كان طالع شي حد جاي لعندهم و قشعها مشات فيها ...
حلات باب دارو و هي كاترعد و دخلات بالزربة ، سدات وراها و قلبها كاتحس بيه واصل لركابيها ، هادشي لي كادير بالنسبة ليها مغامرة ، حبها ليه من الاول كان مغامرة ، ما عرفتهاش باش غادي تكمل ... وحدة فعمرها ، فوضعتها ، فالتزييرة لي عايشة وسط منها ، ما كان عليها تسمح لقلبها يدق لشي حد ، خصوصا ليه هو .. و مشكيل فارق السن لي بيناتهم ث و لا حرج !
وقف وراها و حط يديه على كتفها .. حتى قفزات ..
اينايا : اععع (قفزات و كحزات عليه)
خليفة : شش تهدني !
اينايا : ي يمكن ليك تخلي مسافة بيناتنا !
خليفة : (هز يديه بجوج قدامها و بعد عليها بضع خطوات) هانا ..
اينايا : ش ششوف عفاك ! هاد الحركات و هاد التهديدات ما عندهم فاش ينفعوك
خليفة : (نفا براسو مقاطعها ) ابدا واش كانهددك ..
اينايا : و شنو هادشي لي انا فيه ..
خليفة : الله يسامح .. (تبسم ليها) انا ما قصدتش ، غير مالقيتش شي طريقة لي تخليني نقرب ليك من غير هادي ...
اينايا : خ ختاريتي الطريقة الغلط
خليفة : و لكن مع الشخص الصحيح .. جلسي نهضرو
اينايا : لا انا هاكا مرتاحة شكرا
أنت تقرأ
خلف الجدران (بالدارجة المغربية)
القصة القصيرة2021/12/02 📍#ممنوع_النشر 🔐 ماذا أقولُ له لو جاء يسألُنـــــي إنْ كنتُ أكرهُهُ ... أو كنتُ أهواهُ ؟ ماذا أقولُ , إذا رَاحَتْ أصابعـــهُ تُلَمْلِمُ الليلَ عن شَعْرِي و تَرْعَاهُ ؟ و كيفَ أسمحُ أن يدنُو بمقعـدِهِ؟ و أن تنامَ على خَصْري ذ...
