ستائر وهميه

الجزء 9

- مصيبه تعالي بسرعه

متت من خوفي لبست و طلعت ركض
ادك ع اركان مايجاوب
وصلت للسنتر طبيت ركض فتحت الباب

السكرتاريه مابيها احد بس المراجعات كاعدات استغربو دخلتي السريعه

طبيت جوه لا اركان ولا دكتور غيث

البنات بغرف اجهزه الليزر هم ماكو بس ثنين يشتغلن ابتسمت وحده منهم كالتلي : بالكافتيريا

طلعت للكافتيريا فتحت الباب جفصت ع حاجه بالكاع

و طكت هاي الطكاكه الي تطلع منها شرايط بالهوا

باوعت اركان و غيث و باقي العمال صارو يصفكون والمكان مليان نفاخات احمر و ابيض و ميز بالنص عليه كيكه مستطيله ملونه

مسويلي ميلادي مسحت ايدي بشعري كتلهم رعبتوني والله

اركان عايدني رسميات وياهم بس نظراته تحجي

رغم الكل جان حاس بينا شي بس مغلسين و فهمو هالشي من سوالي ميلادي من نظراتهم فهمتهم

كصينا الكيك سولفنا شويه و ضحكنا بس ماطولنا علمود المراجعين بره

بس رحت وره اركان لغرفته ابتسمت : وحافظ ميلادي الملعون

تقرب باس راسي : اني ما انسه تفصيله متعلقه بيج .. كل عام وانتي بخير

- كل عام واحنه سوه حبيبي

مسح خشمه وكال : بعد شغله