بين الكاف و النون

السادس والثلاثون

بين الكاف والنون

السادس والثلاثون

بقلم........ سجى الطائي

ردني ردني
يالبگتني 
بليلة أجيتك
دورت روحي اعلئ روحي
لا شفتها ولا لگيتك

سيف الدين

ورة ما طلعت من الكوفي كبل للبيت تلكتني الحجية
امي الحجية " هلا يمة اخيك يدك عليك مشغول ومقدام
من البارحة يريد يحصلك شلعت كلبة "

سيف الدين " حفيدج ذاكرتة ذاكرت الذبانة مو منطي رقمي الجديد ذاك غالقة "

امي الحجية " دعوفك هسة يمة اتصل بي شوفة شيريد وصدك لاكي اهلك هاك هذا رقم اخيتك اتصل منه "

سحبت نفس جريت الكرسي بصفها  كعدت ضليت انقل بلرقم
كل امل ماضل عدي هاي ثلث اسنين وانة اركض من واحد الواحد مثل الجاهل وضايع امة ولكاها هيج كلبي يفرفح على خيط منهم 

درب سليمانية ودهوك سويتة مثل درب العمل رايح راجع حفظت المناطق اكثر من اهلها

دكيت على كفاء بعد السلام حولتلي رقم مقدام اتصلت بي يكول اكو ناس ستوهم راجعين من تركيا اسم الام نفس اسم خالتي ونفس اسم الاب والجد سديتة منه

دخل زياد بيدة مسواك "هاا كواهم الله"

وكفت باوستة "ليش متعب روحك عاينت لمي حجية  مخلصين مسواك"

امي الحجية "لا يمة هذا خير الثلاجة متروسة"

زياد" ثواب بوية ثواب مايصير نصرف نوب مو بيتنة  "

ضحكت "لا العفو ابو نور البيت بيتك انت عدك بيت مسؤل منه ودوام شوية نشيل عنك حمل"

تقرب بعد ماخلة العلاليك بلكاع حط ايدة على كتفي "متقصر سيوفي شووو  يمة شعجب مارحتي الفاتحة ابو رائد"

الحجية "يمة بعيدة وضهري مايحمل طول الطريق والسيارة من تجي ام الما اخذ من خلطرها"

زياد"الله يرحمة يلة يابة محتاجين شي بعد"

سيف "ابو نور هذا المدير تعرفة  عزمني وحلفني تجي وياي يابة منو انت يكلي بس كلة ثعلب وهوة يعرف منو"

ضحك زياد" ثعلب منو منهم مو سلك حديقة حيوانات "

سيف "مودة جديدة اسد ونمر وفهد وذيب يابة عي بلالقاب الدائرة كلها صيح ثعلب يابة منو هذا ثعلب جماعتي محد يغرفة الامر صعب من فات من يمنة وعرفني بلاسم وصعب كلة اخو زياد اكلني بلسلام ومسوي عزيمة جيب ابو نور وتعال

الامر خلا يروح كلي لا ثعلب ولا مطي واحد هتلي ونافخ روحة بروحة لزم واحد خبص نفسة

زياد"  ههههههه  عرفتة سويلم الكذاب حبيبي ذولة يدورون صيت منين يجي من طي.....  لا ذيب ولا جلب لازمين عمليات بكد شعر راسة وياي زلم سباع ميلحكهم بشجاعتهم خضنة معارك يابو معارك صدام حتى جلاب وكنه اجة هذا
ثعلب عوة شنو الثعلب غير المكر عدة "