لجام الفرس

الحلقة الثالثة

كبست على يديها مش عاجب فيها واش صرا ناضت من بلاصتها خرجت لقات فريد قدام الباب يهدر فالتيليفون ناداتو دور شاف معاها

فريد : ا الغالية كش ما بيها الطفلة ؟؟ نهزها للمستوصف !!

خديجة : زيد معاي وصلني للمجلس

شاف معاها عاقد حواجبو كي شغل فهمها على وش ناوية

فريد : مكانش خروج ريحي هنا .. النسا تفرقو المجلس مليان رجال

عيطت فيه بالوقت

- كلامي منعاودوش

مشات قدامو نفخ بعصب و مشا وراها دوب لحقت للمجلس لقات سليم منوض الحرب

سليم : وااحد ما يحط العرف على دمي .. كيفاش تتجرأ و تمد الحكم قدام العشاير يا آغا بلا مشورتي

مصطفى : هدا لي كان لازم يصير من بكري و انت علابالك ، قلت نبعتوها لمصلحتها و لمصلحتنا بالرغم من عرف الدم لي تقام عليها و هكك وافقت و قلت معليش .. مي مش ديما العرس

سليم : و يكون ماتحطش العرف عليها بالطريقة هادي ، كنت انا عارف كيفاش نوصلهالها بطريقتي

مصطفى : نرد نعاودلك ا سليم ، مطولة و لا مقصرة عرف الدم لي تقام لازملو حل . اضرب لحديد و هو حامي

هدرت خديجة بالوقت : ماشي حفيدتي و بنت من بناتي لي يتقام عليهم العرف كانهم كش مادارو ، عرفك غالط يا اغااا من ماشافش يقول هادي كش مادارت فالمدينة حتى تقام عليها العرف

مصطفى : هدا اخر كلام عندي و منزيدش ، البنت تخبروها عالعرف ، يزي ماطولنا لحكاية

وقف بلا مايخلي مجال لحتى واحد يزيد كلمة و خرج تابعينو رجالو ، شافت خديجة فسليم و زادت فولادها

خديجة : نادولي أمير العشاير عندي هدرة معاه

ماستناتهمش و رجعت خارجة لحقها سليم ، بقاو يشوفو مع بعضهم الصدمات لي ورا بعضهم ، مكانوش حاسبين حساب انو كبير العشاير يكون مزروب هكا على حكاية العرف ..

مراد : يخي شبيه هدا خرف ولا مش تفاهمنا على شهر ولا زوج منها توالف الدوار منها نقنعوها

معاد : و الله ماني فاهم علاش الزربة هادي كامل ، الأمير بذاتو قالي منيش حاب درك

عدنان : زيدو للدار يا درا واش حالة الطفلة

مشاو ثلاثتهم لاحقين بيهم لقاو فريد كيما ركب و ديمارا