زهور : و بلاك تبتسمي شوية .. لي يشوف يقول حاضرة عرس راجلها ..
خديجة : بنتي زهور خليها فراحتها ماتضغطيش عليها
شافت فامها و بدلت وجهها مبعد دورت ليها
سوار : ياخي وش من عشيرة هادي ؟
زهور : واد صفوان
بلعت ريقها و بدلت وجهها .. هادي عشيرة امها لي تبرات منها . مي مش زعمة ممنوعة تجي هنا مرة خلاف ، كيفاش مالا راهم قاعدين هنا و كي شغل ماصرا والو .. عليها كانت تمرج فيها بش تحضر .. زعمة كلشي تريڨل ؟؟ اما شبيها ماقالتلهاش
بقات لعشية كامل و هي تتفرج فالمرا لي تحرقسلهم للبنات .. دورت وجهها تحس بفوارة تخرج منها و هي تشوف فالغاشي يخزر فيها و على الروب لي لابساتها .. حطوا غناية شاوية و بداو النسا يزغرتو و هي وذنيها طراشو حتى لقات وحدة واقفة قدامها
فاتن : وش جابها هادي درك
سوار : شكون هادي !
منال : تشطحي !
هزت راسها ليها و بدلت وجهها
سوار : مش ريقي ميرسي
قرصتها امها من خصرها خلاتها تنوض رمات البرنوس و قدمت للصالة و هي تنفخ
النسا بقات تخزر فقدها المنحوت و الروب لي تتحرك مع كل خطوة تمدها و الطالون لي زاد واتاها و لا السلسلة لي متدلية من شعرها تتمايل مع الغنية و كلش فيها يتحرك .. خديجة و زهور يتبسمو فرحانين بيها مانساتش العادات تاعهم و رقصهم .. دوب كملت الغناية ..مشات رفدت پوشات تاعها و دخلت للحمام تحب تهرب من العينين تع النسا لي بقاو غير يشوفوا فيها .. خدات نفس و عدلت روحها و خرجت كان وقت يدخل العريس و عروسته بقات تتفرج فيهم وقت هزها و البارود يضرب .. لين دخلها للشومبرة
جات تمشي جات عينها عليه بقات تشوف معاه و بدلت عينيها للبنات لي بداو يوقفوا يحطوا فالبرانيس عليهم بش يشوف معاهم بقات حالة عينيها مافاهمة شي .. و هو واقف دايرين بيه الرجال .. حتى لقات رقية تجبد فيها بش تقربها لمنين هو
سوار : يا طفلة شبيك فكي يدك
رقية : شوفي هدا امير العشائر .. الآغا رح يرمي المنديل لوحدة من لبنات
سوار : شكون الآغا !!
رقية : تبانلي بالخزرة و الهيبة برك تعرفوا
هزت راسها ليه عينيها رح يثقبوه .. شافت فأمها و جداتها يتبسموا عضت شفايفها بغش و دورت لرقية
أنت تقرأ
لجام الفرس
Romanceعنوان : #لجام_الفرس 🖤 الكرو #قيد الكتابة 👌 الكاتبة : randa_lk# 👑 ممنوع النقل بدون اذني ❌ _________________ لست مخضرمة في فن الغرور و الكبرياء . و لكني املك ما يكفي لانقادي من تحت غطرستك البالية . 💪 حتى لو آلمني عشقك و احمرت عيناي حد البكاء . فلن...
