بقات تمشي مدة لين شافت عشيرة سيدعلي قلبت عينيها و كملت ماشية حتى حبسها صوت خلخال و طفلة تجري عندها
سجود : سوار .. سوار
شافت معاها و تبسمت
سوار : ييي سجود وشراكي
سجود : بخير .. و بشوفتك رجعت غاية الغاية .. سمعت رجعتي من المدينة.. حبيت نحظر اما اكي تعرفي .. واش حوالك
سوار : لباس .. تعيشي .. و انت واش مدايرة فيها
سجود : نقلك حاجة ! ارواحي للدار و نهدرو .. نحطو طريف سنيوة مع شوية اتاي و كاوكاو و نهدروا مليح .. ولا وش قلتي !
سوار : ربي يخليك .. اما ني مزروبة .. خطرة الجاية نشالله ني نجي خص نص عندك
سجود : وعد !!
سوار : نشالله .. هيا سلام
سجود : في لماان
تبسمت معاها و كملت طريقها بقات تشوف معاها و رجعت جيهة دارها .. لقات منال تستنى فيها
منال : مارضاتش تجي معاك !
سجود : اصلا حسيتها تهدر و تتهرب .. كلمة و قص
منال : معليش .. المفيد خلي علاقتك بيها مليحة .. لانو كاين حاجات لازميني
سجود : مايزيتيش بالخدمة هادي ! .. هاو رح يتزوج و انت ابقاي تلايمي فلخبار
منال : خدمي خدمتك و غلقي لغبك تديري مزية كييرة فيا و فيك
دوب لحقت للواد خدات نفس و مشات جيهة الاصطبل شافت عمامها و جدها وقفين يهدروا بقات تخزرلهم من بعيد .. شحال الانسان يتبدل ! شحال يكون غامق ! علاش من برا الانسانية تغلب على كل الصفات ! كيفاش قدروا هاد البنادمين يتستروا على قتل خوهم .. لانو مستحيل تعرف من منظرهم برك .. من براتهم برك .. من واش راه ظاهر .. يعني لهاد الدرجة الانسان يتبدل ! تهون عليه العشرة و قسمة الخبز و الملح .. و مقاسمة المحان .. شخص كان يشرب من نفس الكاس معاهم و ياكل من نفس الصحن .. يجوع و يبرد و يمرض و يطيح معاهم .. كيفاش تخطاو موتو بالسهولة دي ! كيفاش عطاتهم قلوبهم ينكروا .. مي عرفوا ينكروا .. جابو الانكار تاعهم فالقمة .. دورت وجها عينيها تعمروا دموع ..
خسارة باباها كانت مجرد اسم برك .. كانت حرفيا .. جملة تعاودت و تعاودت اما حتى حد ماحس ماعرف بلي وراها بزاف كلمات تطمسوا .. بزاف حاجات تكسروا .. بموتو خسرت عايلتها .. تكسر ظهرها .. بين ليلة و نهار كبرت .. تاخدت طفولتها .. احلامها .. و تخطفت مشاعرها .. تهدم كيانها و مابقاتش ملكة على عرش قصرها .. و انما سراب فوق حطام كالرمال ..
أنت تقرأ
لجام الفرس
Romanceعنوان : #لجام_الفرس 🖤 الكرو #قيد الكتابة 👌 الكاتبة : randa_lk# 👑 ممنوع النقل بدون اذني ❌ _________________ لست مخضرمة في فن الغرور و الكبرياء . و لكني املك ما يكفي لانقادي من تحت غطرستك البالية . 💪 حتى لو آلمني عشقك و احمرت عيناي حد البكاء . فلن...
