زفيف الروح

" part 13"

لين الجاف
______________

رديت عليه بمسج مختصر

_ اني اصلا ما اريد انسان مثلك بحياتي

_ هسه صرنا ما نعجب

قريت وبعد مادريت وحظرته من كل مكان بس كلش تأذيت اني طلعت حتى احاول انسى ولو شويه وهو رجع خرب كل أوضاعي ضليت بس كاعده وبالي مو وياهن اصلا

_ شبيج ديان هاي عود مطلعيج نونسج شو وجهج انكلب

_ مابيه زينه ،  اكول بنات اريد شغل

_ شغل شنو

_ اي شغل أريد فلوس اهلي ميكدرون يدزولي بعد ولازم أدبر نفسي

_ والله اهل هذوله ديحو بتهم وبعد معليهم بيها

باوعتلها ومكدرت احجي لان حجيها صدك

_ حظي بعد شسوي

_ شكد بارده انت

_ شلون يعني

_ احسج بلا احساس

_اماني شسالفه

_صدك والله احسها قالب ثلج حتى ملامح مابيج

_شتردين مني اماني

_ سلامتج عيني شريد منج

سكتت واحس شويه وانفجر مصدكت خلصن حتى نرجع للبيت احس محتاجه ابجي فد ٦ ساعات متواصله واطلع كل ضيم كلبي اتمنى اروح لاهلي واعاتبهم أصيح عليهم لو اروح لمهيب الي اتمنى املخه مضايقه لا اسمه ولا صوته ولا اي شي يخصه رغم احتاجيته بس لمن تذكرت الي صار رجعت حقدت اكثر واكثر وهلمره مستحيل اعديها على خير ...

رجعنه للبيت وعكس ماكلت دمعه وحده منزلت مني اخذت تلفوني وكتبت لماما مادري اذا تقرا او لا بس المهم احجي

_ حرامات انتو أهل والله تدرين صارلي اسبوع احاول استوعب الشي السويتو بيه معقوله اهلي باعوني ومرتين

من الله حرمكم من ابنكم جان اله غايه يعرف بيكم مو اهل ومتستاهلون يكون عدكم أطفال اخذ منكم ابنكم عزيزكم وخلاني على كلبكم بلكي تحسون وتعوضون فقدان اخويه بيه بس انتو شسويتو قررتو انو تفقدون الاثنين احسن لان العاش مو احسن من المات

كسرتوني وخذلتوني وخليتوني استحي اكول عندي اهل بس يلا عادي ماعندي مشكله ابيعكم مثل مابعتوني ومن اليوم انسو جان عدكم بنيه اسمها ديان اعتبروني متت وي اخوي ولو اني ادري بروحه ميته بالنسبه الكم وما اكول غير الله ياخذني ويخلصني من هيج اهل عار مثلكم ..

حجيت كلشي بكلبي وبجيت واني اكتب لو شكد ما اوصف كمية الوجع الي اني بيها محد يصدمني ومحد يفهمني ميفهمني غير الي مر بهيج تجربه حقيره بس هلمره اني مو كدها ابد مو كدها ولا عندي قوه اليوم اكتشفت نفسي شكد ضعيفه اوف ياالله اوف ....