زفيف الروح

"part 18"

لين الجاف ♥️
__________

_ كومي يمه اكليلج فد لكمه مو راحت روحج

_ ماريد شي والله

_الى متى تضلين هيج

_ لمن يوديني للموصل يعني صارله اسبوع يخدر بيه وماكو

_ غير عنده شغل يا يمه اصبريله ويوديج وهسه اكلي لخاطري مو صفيتي جلد وعظم

_ ما اشتهي

_ والله تاكلين هسه ترا اكسر العوده على ظهرج

جبرتني اكل اكلت شويه ومكدرت احس اللكمه ماتمر من بلعومي تبقى واكفه بسبب الغصه كلش متأذيه وبس الله يعلم بالنار الي بداخلي ،، نيمتني بحظنها وضلت تقرا على راسي

_ لا تكولين امي راحت انه اصيرلج ام والله احسج بمعزة مهيب واعز منه بعد

_ بيبي راحت بدون ما اشوفها بدون ما اودعها اكون وياها بمرضها اساعدها جنت كلش انانيه واختاريت نفسي ودراستي وقصرت بحقها

_ ولج لا تفكرين هيج وتضلين تاكلين بروحج كلشي صار وياكم بسبب ابوج لو ما ضلمه وجشعه ما صار الصار جان هم اجو وياج هنا وماخلوج دقيقه وحدج بس هذا حظج وقسمتج

_ روحي توجعني بيبي شسوي شلون تطفى ناري

_ الوكت دوا لكل وجع راح تنسين وراح تتعودين بس طبعا تضلين تشتاقين بس كلما تشتاقيلها اقري قرآن بثوابها سويلج اكله ووزعيها بثوابها هيج ترتاحين وهي ترتاح بكبرها

ضليت نايمه بحظنها وصافنه كلمره هيج يصير وياي انسى كلشي لمدة ثواني وارجع لمن جنت ببيتنا من نكعد ونسولف وفجأة اتذكر احس بهدوء رهيب واحاول استوعب الموضوع ، مهيب التحق بشغله واني ضليت يم بيبي ، اجاني اتصال من مهيب

_ ها كلبي شلونج

_ مو زينه يمتى تجي

_ كم يوم واجي شبيج مو زينه

_ تعبت احجي بنفس الموضوع

_ صبري عليه

_ ادري بيك ما تاخذني

_ جاي اشوف الوضع ومن عيوني اخذج

_ والله

_والله بس خل تأكد إذا اكو شي او لا

_ يعني شكو

_حصبة وجدري ننتظر ونشوف

_ دير بالك على نفسك ماريد اخسرك انت هم

_ الله كريم ، جاي تاكلين

_اكلت شويه مساع

_شوفي اذا اجيت ولكيتج ضعفانه ووجهج اصفر تحلمين اوديج للموصل