البطل المغمور

تابع

#البطل_المغمور"شمس الغروب"
#الجزء_العاشر_القسم_الثاني
#Goman_Fared💕
💐..
◇الحب..
فطرة..شعور مقدس محله اهم مايحوي الإنسان داخله..المضغه اللي ان صلحت صلح سائر الجسد وحتى النفس..القلب..
الحب..عنوان لمجلد كبير يشرح معناه وانواعه..
اني هني طبعا نبي نحكي ع النوع المعروف بمصاحبة العذاب ليه..
حب الرجل للمراة والعكس..
الحب هدا اللي غالبا ماينوصم بالعيب والحرام..هو في اصله طاهر ونظيف..ربي هو اللي يحطه في القلوب..
لكن حني البشر للأسف البسناه لباس الخبث بعد نزعنا عنه ثوب العفه والطهارة...
اممم..ممكن قصة بنتي رتاج وجهاد ولد خالد توضح مقصدي من كلامي السابق..
▪▪▪▪▪
طلعت رتاج من محاضرتها وكانت بروحها..البنات اللي معاها مشوا يصوروا في شيتات المحاضرة وهي لأن ماعندهاش باش انجبرت تنسحب وتهرب هروب بش ماتنحطش في موقف محرج..
قعدت تمشي وهي في قمة الحزن..
من تحت خمارها كانت دموعها تنزل بقهر...
شافت رشاده تحت شجرة مشتلها طول وقفت عليها رفعت شويه من عبايتها وقعمزت...
حطت شنطتها ع ركابها واتكت عليها وقعدت تمرر فنظرها القدام..
توسعوا عيونها فجأة لما شافاته واقف من بعيد شوي يشبحلها وع وجهه ملامح ابتسامه حلوة بالمرة..
هي تلقائيا ابتسمت ابتسامه حلوه الخمار اخفاها..
رفعت بيدها طرف الخمار اللي يدرق عيونها..
شافهم والضحكه باينه فيهم..
ابتسم من قلبه..وتشجع وقدملها..
هي انتابها شعور كبير بالتوتر لما كان يقربلها لعند ماوصل فيها..
وقف حداها وحط يده فجيبه وقعد يشوفلها وهو يقول:شن جو..
هي نزلت عيونها وقالت بصوت يدوب طالع:الحمد لله.
عقد حواجبه وقال:لاباس عليك اختك قالت كنتي مريضه
ضحكت بدون صوت وقالت:لايوريك باس..
هو تنهد من وسط قلبه وقال:ربي بس اللي يعلم بحالي الأيام اللي فاتوا..
هي زادت توترت لما ركزت ع نبرة صوته..ناضت طول من مكانها وقالت بتوتر واضح:عندي محاضرة..
ومشت طول..
هو اتفاجئ ولحقها وهو يقول:غير راجي شويه..شويه بس.
مش مطول !
وهي زادت سرعت فخطواتها من خوفها وتوترها وهو وقف في مكانه وقعد يشوفلها..
ابتسم بأسف..بعدين مسح بإيديه ع لحيته..
ورجع حطهم في جيوبه ولف ومشي بخطوات فيها شي من الثقل..
•••••°°°°°••••••°°°°°°•••••
الساعه الحادية عشرة صباحا...
في مكان تاني..
تحديدا مدرسة اختها..
كانت مقعمزة بروحها في الساحه وشاده فيدها كتاب النصوص وتقرا
او زعميتها تقرا...المهم ماتقعدش مقعمزة بروحها هكي في الإستراحه..مرة مرة عيونها يهربوا لصاحباتها اللي كانوا دايرات دورة ع الخليطه متاعهم وياكلوا ويشربوا ويهدرزوا ويضحكوا..
وهي حابسه دمعتها بالسيف..وكل ماتحس روحها بتبكي ترجع تحط راسها فالكتاب ودير روحها تقرا..
من جهة تانيه..
تحديدا في واحد من رواشن مبنى المدرسة المطل ع الساحه..
كان واقف يشوفلها بنظرة حاده..مليانه فضول اتجاهها ومش عارف شن سببه...
"استاذ جمعه"..
التفت ورفع حواجبه..
زميله:الإجتماع بيبدا توا..
هز راسه..ولف ومشاله...
•••••°°°°°°•••••
في مدرسة ثانويه تانيه للبنين..
وكذلك في الإستراحه..
خش للمدرسه على انه ولي امر طالب لما قدم القدام شويه سمع صوت دوشه..
عقد حواجبه بتساؤل وزاد قدم لين وصل للساحه..
شاف تجمهر كبير ع عركة بين زوز طلبه وكل واحد فيهم شاد "بوخوصه" ويهددوا في بعض..
والمدرسات يعيطوا..اما الاساتذة يحاولوا يحزوا من بعيد لبعيد كل واحد خايف ع روحه..
وكانوا الطلبه يتبادلوا في التهديدات والشتائم بأقبح الألفاظ
لااحترموا مراة ولاكبير في الموجودين..
هو بحكم عمله كان لازم يدخل صح مفروض يخفي هويته بش توا مش مجال تخفي لازم يتصرف قبل لتصير كارثه
ولما عقد العزم ع التدخل وكان خلاص بيمشي.
يفوت من جنبه اعصار سريع الحركه خلاه ينخلع خلعه ماقلبها خلعه..
وقعد بعيونه الجاحظات مع الإعصار يراقب شن بيدير وهو مصدوم..
وحده من الأبلات قالت:الحمدلله جانا الفرج..
"هيييي انت وياه..ايهم..خالد!"
بمجرد ماتكلمت بصوتها العالي المزمجر المرعب المتوعد..
هما الزوز شبحولها بخوف..وكل واحد فيهم دس البوخوصه متاعه بسرعه..
جتهم طول وقفت في نصهم ومدت ايديها الزوز ع ايمينها ويسارها وهي تقول:جيبوا جاي جيبوا..
هما شبحولها شويه والكل انظارهم عليهم..
بعدين اللي هدا طلع سلاحه الأبيض وحطه فيدها..
هي لما خدتهم فتحتهم وقالت بتهديد وهي توزع في نظرها عليهم :ورب العزة...ورب الكون..مازااال نشوف المنظر مرة تانيه..حركت ايديها الزوز وهي تقول بتضييقة عيون..تعرفوا شن يصير فيكم..
ايهم:باهي انتي اعرفي شن صار قبل.
خالد:ماديرش الجو متاعك واطلع روحك بريء قدامها..
هي قالت:خلاااص انت وياه..تحركوا قدامي برو غادي..
ووزعت نظرهاع الطلبه قالت:هي كل واحد يولي وين ماكان..
وتوزعوا الطلبه..
المدير:تي غير وين كنتي ياابله نسيبه..
نسيبه بعصبيه:طلعت بناخد سمسام..لكن مع هالمصايب حتى السم مانتهنوا بيه..عن اذنك استاذ خل نمشي نشوف خيرهم..
ومشت للطلبه اللي كانوا يتعاركوا..
وانتشروا الابلات والأساتذة وهما يتهامسوا ع نسيبه وع قوة شخصيتها وسيطرتها ع الطلبه..
والمدير يسمع فيهم وحس روحه بلاهيبه حداها..
تنحنح بعدين مشي نص الساحه وقف وزع نظراته الواعره ع الطلبه يعني اهو ينقذ مايمكن انقاده..
لعند ماجو عيونه فعيون زياد اللي كان يشوفله وهو شاد ضحكته..
تنحنح..بعدين لف ومشي بيخش..
صديق زياد:ههههههه..كان يخليها لعمتك ارجله..
ضحك زياد والتفت لوين ماموجوده عمته مع الشباب وهي تهزب فيهم وهما روسهم تحت خجلا منها..
🌺نسيبه بالنسبة ليهم اخت كبيره..هما مايخافوش منها ع قد مايحترموها..لانها توقف معاهم وتساعد فيهم برغم اسلوبها الجلف معاهم فرضت احترامها برغم انها مراة..وهما فتيه في سن مراهقه..
وراجح اللي كان يمشي برا المدرسه ومازالت الصدمه مسيطره..زاد فضوله اتجاهها اكثر واكثر..وشك فيها بزياده لأن اللي زيها احتمال كبيره تكون منخرطه في العصابات في نظره النوعيه هادي من النساوين ماتستغناش عنهم عصابات المافيا..سلاح..او مخدرات..او تجارة بشر او غيره..
الحس الأمني يحتم عليه يفكر بهالطريقه..
🌺🌺🌺🌺
في مدرسة تانيه..
بس هالمرة مدرسه للبنات لمن هما في سن مابين الطفوله والأنوثه..
كانت سارة في ساحه وحواليها البنات ملتمات ومحور حديثهم منصب بوها الجديد..
وسارة تسمع في كلامهم وهي مبتسمه بمجامله ويدوب مرة مرة ترد بكلمه وتهاني ملاحظتها..
مش بس هي..
حتى امها اللي كانت واقفه في الروشن تتفرج عليها وع ملامح وجهها بس كانت تفكر في شي تاني بالمرة...
•••••°°°°°°°••••••°°°°°°•••••••
نهاية الدوام..
"هيا يادانيه بسرعه"
قالت هالكلام هبه وهي تجري طالعه للباص..
ودانيه اللي كانت تصكر في شنطتها طالعه تجري وراها..
ولما قربت توصل لبست الشنطه وللأسف تمزق الحزام..
هي طول مررت نظرها حواليها وانصدمت لما شافت استاذ جمعه واقف ع سيارتها يشوفلها بنظرة جرحت دانيه هلبه..
غيرت عيونها عنه وحضنت شنطتها وركبت للباص ودموعها في عيونها..
مجرد قعمزت في مكانها تحرك السواق طول..
هي اللي كانت مقعمزه جهة الروشن رجعت شافت للأستاذ لقاته مازال يشبحلها بنفس النظره..
شبحت طول القدام والعبره خانقتها..
بعدين شبحت لصاحبتها وقالت:ترا طلعي الوايبس..
هبه:باهي..
وطلعت صاحبتها المناديل المبلله وهي طلعت شاربتها والسبيدرو وبدت تغير في هيئتها..
•••••°°°°°°•••••••°°°°°°••••••
الساعه 3:00بعد الظهر..
كل اقارب ومعارف هيثم..كانوا مقعمزين قدام التلفزيون يراجو في اجتماع البرلمان اللي بيجتمع بالحكومه بعد التعديل..
كانت جلسة اسئله واستفسار لمعرفة اسباب التعديل من رئيس الحكومه..
وكذلك تأديه اليمين من قبل الوزراء الجدد قدام البرلمان والشعب اللي يتابع في الجلسه..
▪▪▪▪
◇المكان كان مهيب واللحظات هادي كانت مدخلتني في حالة التوتر اني واللي ماسك حقيبة الداخليه برغم انه يبان شخص حاد وصارم لكن التوتر كان واضح عليه وقتها عكس الزوز التانيين..
بش نخفف ع نفسي التوتر اذكرت اهلي اللي كلهم اكيد توا قاعدين يتابعوا في الجلسه..وفعلا حتى الابتسامه ع وجهي ارتسمت تلقائيا..
▪▪▪▪▪
"اهو هيثومه"
أسيمه بضحكه:ماشاء الله تبارك الرحمن..
نسيبه بإبتسامه فرح:ربي يحفظه يارب..
وحداهم سارة وزياد يتفرجوا بدون مايعلقوا بكلمه..
.............
تهاني:ياه ياماما تقول ليا اني..
عفاف بإبتسامه:بو صاحبتك..
ضحكت تهاني..
اما خالد اللي كان مقعمز حداهم قعد يراقب في التلفزيون وهو ع اعصابه بالذات لما يجيبوا ع رضوان بوكراع..
وعفاف مرة مرة تشبحله..
........
"الله يبارك ع وليد وخيتي الله يبارك.."
سدينه بإبتسامه:ديما نتبع في برنامجه ماشاء الله عليه..
رتاج:خلاص توا معاش تحز معاك انتي بعد ولى ولد اختك وزير..
فنصت سدينه فرتاج..
ماجده بضحكه:ايه والله ياسموحه اني من غير شي رافعه خشيمي بيه يابال يولي وزير مرة وحده معاش نشوف حد بكل...
رتاج رفعت حاجبها وشبحت للتلفزيون..
شبحت سدينه لماجده بنظرة اعتذار..
ماجده غمزتها بإبتسامه بمعنى"عادي مادوريش"
ابتسمت سدينه..والزوز رجعوا لهوا بالتلفزيون..
اما دانيه فكانت فدارها راقده بعد مابكت لين تعبت...
••••••°°°°°••••••
وبعد مناقشات مع رئيس الحكومه..
جي وقت أداء القسم..
اول من ناض بش يأدي القسم "رضوان بوكراع"..
مشي وقف ورا المكان المخصص..
حط يده ع المصحف وبدي يأدي في القسم..
وفي اعضاء فس البرلمان مش راضيهم ونظراتهم ليه كانت نظرات الغيظ..
بعد ماأدى القسم ولى لمكانه..
وجو الوزراء اللي بعده..
لعند ماجي الدور ع هيثم..
"بابا بابا"
هدا كان صوت جنان لما شافت بوها وهو ماشي بإتجاه الطاوله..
نسيبه علت الصوت..
واسيمه خدت كرسي وزادت قربت من التلفزيون وقعمزت وهي مبتسمه بحماس..
وزياد وسارة كانوا يتفرجوا عليه وهما حاسين بشعور حلو..
مهما كان في النهايه يقعد بوهم...
▪▪▪▪▪
◇واني ماشي بإتجاه المصحف..
كنت خايف خوف مش طبيعي مابانش عليا..كنت مرعوب ايه بدون مبالغه مرعوب بمعنى الكلمه..
تخايلت المشهد هدا بشكل اعظم في يوم مهيب اكثر من هدا..
تخايلت يوم الحساب..تخايلت واني قدام الله سبحانه وتعالى والناس شهود وهو يسأل فيا..
"شن درت في الامانه اللي اقسمت ع كتابي انك تحافظ عليها ياهيثم"
وقتها ماعنديش مهرب..
لو كنت خاين لهالامانه..
لانقدر نكذب ونقول صنتها ياربي وأديت حقها لأن اللي واقفه قدامه توا عارف كل شي بأدق تفاصيله لا مش هكي وبس مسجله عليا كله بالتاريخ واليوم الساعه والمكان بأدق ادق التفاصيل..
ماعندي وين نهرب...ولانقدر نهرب خلاص وقتها..انتهي الموضوع..
مجرد مارجعت للواقع سألت نفسي..
كل مسؤول فاسد وين جي اقسم ع حط يده ع كتاب الله..كيف جاته الجرأة يحط يده ع القرآن ويقسم بالكذب وهو عاقد العزم ع انه حيخون الأمانه!!!
هدا اقل مايقال عنه انه مش مقتنع بوجود يوم حساب..بل واكبر من ذلك مش عارف ربي نهائيا...
قلت لنفسي...ياهيثم رد بالك...اخرتها موت ومابعد الموث صعب وثقيل ياهيثم..يوم قيامتك هو يوم موتك ياهيثم ومش حترفع معاك حاجه غير اعمالك ياهيثم..وغادي تستنى فيك ايام..
اما انها صعبه وكلها عذاب...او انها راحه ونعيم ليوم القيامه انت اللي تقرر ياهيثم..
اما تخرب هادي وتعمر التانيه..
او انك تعمر هادي وتخرب التانيه..
بس اني وقتها اخترت..
اني نبينهم الزوز...الأولى والثانيه...
▪▪▪▪▪
حط هيثم يده ع المصحف وبدي يقسم وهو يعني كل كلمه يقول فيها كل حرف..وبين عيونه يوم غدوة..بين عيونه الله سبحانه وتعالى..
"والله على ماأقول شهيد"
رجف قلبه بخوف لما قال هالجمله..
الله...على ماأقول..شهيد...يعني حيجيك يوم وتوقف فيه قدام هالشهيد..اللي شهدته ع قسمك وحيسألك عنه وانت من هاللحظه هادي ياهيثم حتحدد اجابتك..
بعد ماكمل لف ومشي ولى لمكانه وعيونه بوكراع معاه شبحوا لبعض..ابتسموا..بعدين قعمز هيثم في مكانه...
•••••••°°°°°°°°••••••
بعد ماانتهت جلسة البرلمان..
رئيس الحكومه طلع مع الوزراء الجدد ومشي لمقر رئاسة الحكومه..حيث كان داير عشي بمثابة عشاء العمل..
حيكون اجتماع ودي وحيهدرزوا فيه اكثر عن خططهم اللي ناويين ينفدوها...
سأل رئيس الحكومه رضوان عن هدفه اللي قال انه مش حيعلن عنه الا بعد مايستلم وظيفته بشكل رسمي..
رضوان ابتسم وقال:الأنتقام..
شبحوله يإستغراب..
رضوان تنهد وقال:اني وزي ماهلبه ناس تعرف والدي كان لواء في الداخليه واني خشيت الشرطه حبا ورغبه..والوالد زاد شجعني اكثر لهدا كنت من الضباط المشهودلهم بالكفاءة..
تنهد مرة تانيه وبلع ريقه وقال..كان عندي اخ اصغر مني..
هني هيثم ركز معاه اكثر..
رضوان ابتسم بأسف وهو يشوف للفراغ:كان يحب الموسيقى..صوته كان جميل جدا..كان مايل لأنه يخش مجال الغناء..وطبعا في عائلتنا حني ممنوع شي زي هدا..او بالأحرى عند الوالد..برغم ان خوي كانت اغانيه كلها هادفه تتكلم عن مشاكل الشباب والمجتمع وهو ماكانش ناوي يكون غير مغني هادف بس..
بس مع الأسف..الوالد كان رافض رفض قاطع..وكان يبيه يولي زي ماهو يبي..يعني زيي وزيه وكان ديما يقارن بيني وبينه..ويسخف في أي شي خوي يديره..
لدرجه ان مرة...رشف وهو شاد دموعه بقوة..خوي دار اغنيه عن الشرطه في عيد الشرطه ..وكان مقدمها هديه لبوي...وكان كله حماس ان بوي يقبل هالهديه بحب..وممكن هدا يخليه يعيد النظر شويه فحكاية الميول الفني لخوي..
لكن مع الأسف قابل بوي الهديه برفض قاسي جدا وجارح حطم خوي ماكانش رد لفظي بس..بل حتى بعتله قوة صادرت الاستديو متاعه باللي فيه وشدوا صحابه اللي معاه هدودهم بعدين طلقوهم..ومن خوفهم قطعوا علاقتهم بيه بالمرة..
هادي عقلية بوي عقليه امنيه ماتعرفش تتعامل باللين والحكمه البالغه..الشده ثم الشده ثم الشده..والحزم..
تنهد بألم وسكت..
رئيس الحكومه قاله انه مش لازم يكمل لو الحديث في الموضوع هدا يتعبه..
بس هو قال بأبتسامه الم:الموضوع هدا يتعب فيا حتى بدون مانتكلم فيه مع حد..غالبا انت وهلبه ناس تعرفوا ان عندي اخ ميت..بس السبب بالنسبه ليكم مش واضح..
هيثم بإبتسامة مجامله:كيف يعني مش واضح؟!
شبحله رضوان وقال بألم:يعني والدي اخفى سبب موت خوي حتى ع الدائرة الضيقه المحيطه بينا في العيله..خوي بعد اللي داره بوي سيبنا ومشي ومعاش عرفنا طريقه..الوالد كان بارد جدا وهو يقول مش حيضغط عليا بتصرفات الأطفال هادي سيوره مولي..
لكن اني كنت خايف لأبعد حد لأني خوي سنه صغير يعني ممكن يخش في ازمه نفسيه اضيعه..
قعدت ندور عليه ومامليتش ولايأست..لين عرفت انه سافر برا البلاد..ولما قلت لبوي مااهتمش وقالي الهى بروحك وشغلك يارضوان شغلك محتاجك اكثر..امن الناس هدا يارضوان.واني عاد سمعت كلامه كعادتي...تنهد بحرقه بعدين كمل يقول..لعند ماعرفت من صديق مقرب ليه في يوم جاني خبرني ان خوي روح وانه موجود في*****..وانه مع الاسف خالط شلة فاسده كانوا كلهم مدمنين..تعرف ع واحد منهم برا وهو جره وراه..هالشخص هدا كان ضمن شبكه لتجارة المخدرات كانت تستهدف في الشباب اللي في عمر خوي..
مجرد ماعرفت هالمعلومات بعتت وحده للمكان هداكا واني كنت ع راسهم...
سكت وغمض عيونه بقوة بعدين فتحهم وقال..لما خشينا غادي...لقيت..مجموعه من الشباب كانوا جثث هامده في الشقه مامتوش بجرعة زايده لا..ماتوا مقتولين بالرصاص..ووقتها عرفت ان في حد من افراد هالشبكه انتقم مني ومن بوي...شبح لهيثم وقال..لأن خوي كان واحد من اللي لقيتهم ميتين غادي..
تبدلت ملامح هيثم لحزن ممزوج بالخوف..
وكذلك اللي معاه تأثروا هلبه..
سأله رئيس الحكومه عن ردة فعل بوه لما عرف..
رد عليه بإبتسامة تهكم وهويقول:اول حاجه قالها بعد عرف ردبالك يطلع لحد اللي صار..خوك مات في حادث سيارة يارضوان...
هيثم قعد يشوف لرضوان لما تبدلت ملامح الحزن ع وجهه للحده وهو يقول:لكن اني خديت عهد على نفسي من وقتها اني نقعد وراهم لين ننهيهم واحد واحد..ليا سنين طويله واني نحاول ناخد بثار خوي..درت كل شي بش وصلت لهني واني عارف اني من هالمكان نقدر ندير هلبه حاجات مقدرتش نديرها قبل..
رئيس الحكومه قعد يشبحله بنظرة رضوان فهمها وابتسم طول وقال:اطمن سيادتك عمري ماكنت ظالم ولاحنكون ظالم كله بالقانون وبما يرضي الله..
ابتسم الرئيس..
ورضوان قال بضحكه :صكرت نيتكم بحكاياتي الكئيبه بس الرئيس وكان لازم نجاوبه اجابه كافيه ووافيه اطمنه..
ابتسموا مجامله..ورئيس الحكومه عزمهم من جديد بش ياكلوا ورجعوا ياكلوا وغيروا الموضوع تماما..
بس هيثم ماطلعش منه وقعد طول ماهو معاهم يفكر في القصة اللي سمعها من رضوان..
•••••••°°°°°°°••••••°°°°°°••••••
الساعه 4:30عصرا..
كانت سارة في الكوجينه ادير في "بان كيك"..
وامها حداها ادير في عصير الفراوله ومرة مرة تشبحلها..
شويه صكرت الخلاط وقالت:قريتي الكتاب اللي هديهولك..
سارة بإبتسامه:اها حلو هلبه..
اسيمه:مش صعب..
سارة:المفردات الصعبه كنت ندور ع معناها ونزيد نفهم اكثر..
اسيمه بإبتسامه:حلو..بعدين قالت..الكاتب هدا اسلوبه عجيب..
سارة:صح..حبيته هلبه وأثر فيا.
اسيمه:باهي كان هكي اقريله مقاله اسمها "حجاب أروى"
التفتت لأمها..
اسيمه وهي تحط في الفرواله في الخلاط:مقالة حلوة هلبه حتفتح عيونك ع هلبه حاجات..
سارة:امم..تمام تو نشوفها..
ورجعت تكمل في شغلها..
وامها شغلت وهي تشوفلها وابتسامتها ع وجهها..
••••••°°°°°°
فهالوقت..
كان زياد في الريفودجي..
وريحان وجنان في دارهم يكتبوا في واجبات الروضه..
اما عمتهم فكانت في دارها فوق..
مقعمزه ع سريرها وهي مربعه رجليها وسرحانه تفكر..
رغم عنها تفكر فيه..وحست روحها مشغوله عليه وتبي تعرف شن صار فيه بعد ماانجرح ذراعه..
نسيبه بضيق:اففف ياربي استغفر الله..خلاص اطلع من راسي الزفت اطلع.. وارتمت ع السرير وحطت المخده ع وجهها..
تحت روشن دراها...
كانت فايته سيارة خليل وهو بطريقه لحوشهم وياخد يقول ويعاود في الكذبه اللي حيكذبها ع امه لما تشوف الجرح اللي في ذراعه..
درس السيارة ونزل...
لما صكر الباب شبح جهة حوش هيثم..تحديدا روشن دارها..
ابتسم..بعدين مشي خش للحوش..
لحظات..
وكان هيثم خاش للزنقه حتى هو..
وصل في حوشه..انفتح الباب وهو خش بسيارته..
لما درسها داخل..
انفتح الباب الدخلاني وطلعتله اسيمه تجري..
وهو نزل من السيارة يضحك..
وزياد يشوف فيه من روشن الريفودجي وهو مبتسم..بس فيسع ماتلاشت ابتسامته لما غير عيونه للوحه..
داخل..
خشوا هيثم واسيمه..
اسيمه بصوت عالي..نوسه..سارة..جنونه ريحانه بابا جي..
فجأة سمعوا صوت زغروده نشاز في نشاز..
قعدوا يضحكوا الزوز وع وجوههم ملامح الانزعاج..
لين طلعت في وجههم نسيبه..
نسيبه بضحكه:ياهلا بالوزوز..
هيثم:شن هيا !!!؟
واسيمه تضحكه..
نسيبه بضحكه:هدا دلع كلمة وزير يادكترة..وجاته سلمت عليه بالخد وهي تقول..مبارك مبارك..
هيثم:قولوا ربي يعينك ويكون معاك..راهو هدا تكليف مش تشريف..
نسيبه:تي اهو هكي وهكي..خليها الزوز مع بعض ماتعقدهاش يادكترة..
ضحكت اسيمه...وهو قعد مبتسم ويحرك فراسه يمين ويسار..
ع جية بناته التلاته..
الصغار الزوز كانوا فرحانات..
ريحان:شفناك بابا شفناك وانت تحلف قالت ماما..
جنان:حقة بابا انت توا وزير ..
هو طبس وباسهم ع روسهم وهو يقول:ايه..
ريحان:باهي شن معناها وزير؟!!
هيثم وقف ع حيله وقال:هي شن تبيني نقولك توا..
نسيبه:حبيبتي ريحونه كان تبي بابا يشرحلك معناها مفروض من توا يستقيل بش يقعمز يفهمك..
ضحكوا...
بعدين جت ساره لهيثم وسلمت عليه بالخد وهي تقول:ربي يساعدك وتنجح في مهمتك هادي راهو مسؤوليه كبيرة...مش ساهله بكل..
هو حس ان سارة قاصده شي تاني بكلامها..
زي ماحسوا اسيمه ونسيبه..
اما هي ابتسمت لبوها ابتسامه بارده بعدين قالت لأمها:بتمشي معاي بعدين ماما لحوش تهاني؟!
اسيمه بربكه:اها..ايه..ان شاء الله..
هيثم:علاش!؟
اسيمه:من لما طلع راجلها من المستشفى مامشيناش عيب..
نسيبه:احمم..بنمشي معاكم..
شبحولها وهما متفاجئين..
نسيبه وجهها ولى احمر وهي تقول:خير من الكساد..
اسيمه هزت راسها بإيجاب وهي مستغربه..
وهيثم قعد يشبح لاخته بشك بعدين شبح لمرته وقال:تمام..خل بنمشي نبدل..
ومشي طول لدار النوم واسيمه وراه..
وهو ماشي شبح جهة دار زياد شويه بعدين خش للدار.
واسيمه اللي لاحظاته خشت وراه..
•••••••°°°°°°°°••••••°°°°°•••••••
بعد العصر..
في حوش خالد..
في الجنان..
"رد بالك مرة تانيه"
خليل:ان شاء الله..ايه المهم انتي قوليلي..اللي سمعته حق!؟
ملاك بإبتسامه:ايه..خلاص نبي نعيشوا بعاد عن الخوف والمشاكل..
هو ابتسم وقال:احسن مادرتوا..لكن حطي في بالك حني مازلنا خوتك وخالد بوك..
ملاك"واني نبيك راجلي ياخليل مش خوي" بلعت ريقها بإبتسامه وقالت:اكيد..
برا..
وصلوا اسيمه ونسيبه وساره لفم باب حوش خالد وتلاقوا هما واختها سماح وبنت اختها سجى..
كانت نسيبه تشوف لمنظر سجى بشي من القرف..لبسها واللي دايراته في وجهها..
اما سجى اللي كانت تمضغ في المستكه عيونها ع ساره اللي كانت تشوف لامها كيف تسلم ع سماح..
سماح:والله الحمد لله يااسيمه..مبروك ع راجلك..
اسيمه بإبتسامه:الله يبارك فيك..
سماح:عاد من زينا في شارعنا وزير..
وطقت ع الباب..
شويه وانفتح الباب واللي فتحه رفيق.
لما شاف سارة طار من الفرحه وقال:تفضلوا تفضلوا تفضي خالتي اسيمه..
اسيمه بإبتسامه:يزيد فضلك ولدي..
وخشوا كلهم وسماح تقول:خالتك اسيمه بس واني شنو ولا ع خاطر ولى راجلها وزير..وضحكت..
رفيق وهو يشوف لسارة كيف خشت وابتسامته ع وجهه وبعدها نسيبه اللي شبحتله شبحه تخوف خلت ابتسامته تموت قال في نفسه"يالطيف!": ايه حق مبارك ع عمي هيثم.
اسيمه بضحكه:الله يبارك فيك..
سماح بضحكه:زعمه مازال تقعدوا جيراننا ولا تحولوا لمكان يليق بيكم..
رفيق شبح لسارة بخوف وقلبه قريب وقف..
اسيمه:حني زي قبل زي توا ياسماح وهالمكان يليق بينا في كل حالاتنا مااخترناش نسكنوا هني لو مانعرفوش انه مكان يناسبنا..
ع طلعة عفاف وهي تمشي بسرعه بإبتسامه:مرحبتين مرحبتين..
وجت لأسيمه وسلموا ع بعض سلام حار..
فهالوقت..
نسيبه كانت ادور بعيونها في المكان..ثبتوا..
لما جو خليل وهو جاي من ورا الجنان ومعاه البنت الشقرا..
حست بنار والعه بين ضلوعها..وعيونها امتلوا دموع..
هما لما سمعوا الدوشه شبحوا جيهتهم..
انصدم خليل لما شاف نسيبه..وهي مجرد ماشبحلها غيرت عيونها..
ملاك:حي مش هادي هي نفس البنت متاع المطعم!!؟ شبحت لخليل لقاته يشبحلها وخلاص..رفعت حاجبها ورجعت شافت لنسيبه..
بعد ماسلمت عليهم عفاف دخلتهم داخل..
خليل:بري خشي داخل..ومشي بسرعه لخوه رفيق..
ملاك شبحتله شويه بعدين مشت خشت داخل..
خليل وصل فرفيق وسأله بلهفه:علاش جو؟
رفيق تنهد وقال:مش عارف..اكيد ع خاطر بوي..بعدين ضحك وقال..بس غريبه الاندر تيكر كيف تواضعت وخشت حوشنا!!؟
خليل شبح للباب وتنهد من وسط قلبه بعدين شبح لخوه وقال:اني في المربوعه..
ومشي..
ورفيق ابتسم وقال:واني والله ماني طالعها..وجبد كرسي وقعمز عليه..
اما جهاد فكان راقد في الدار فسابع حلمه..
🌺🌺🌺🌺
عفاف:والله مفروض حني نجوا نباركوا ياأسيمه..
اسيمه بإبتسامه:تفضلوا في اي وقت ان شاء الله..
عفاف:ان شاء الله..والله الحق اني فرحت ومافرحتش..خفت تسيبونا وتحولوا..
اسيمه بضحكه:لالا نهائيا مش وارده الفكره وماعندنا علاش نحولوا الجهه هادي حلوة ومرتاحين فيها..
عفاف بإبتسامه:ريحتيني الواحد مادابيه كان كسب ناس باهي مايخسرهم..
اسيمه:وحتى حني..
ابتسمت عفاف بعدين شبحت لنسيبه وقالت بإبتسامه ليها معنى:منين زارقة الشمس اليوم نسيبه عندنا..
ضحكت نسيبه بإحراج وقالت؛خلاص وليت جارتكم..
عفاف:نوسه يانوسه ياريتك جارتي وساكنه في حارتي..
نسيبه وجهها ولى احمر وابتسمت بربكه..
واللي حواليها يضحكوا بإستغراب..
اما عفاف فكانت تضحك وتشبح لنسيبه بنظرة فيها أمل كبير..
وملاك تشبحلها بغيظ شديد....
🌸بينما الصاحبات الزوز كان في دار وحده منهم..
سارة:عادي يعني مش فرحانه هلبه..
تهاني:لاحظتك..
سارة:باهي خلينا من هالسيرة وقوليلي..تهاني انتي لما لبستي الحجاب من قالك البسيه؟
تهاني:امي لما طلعت من السادس قالت خلاص لازم تتحجبي وخوتي حتى هما واعرين حكموا عليا نلبس عبايه لما نطلع من الحوش..مش زيك انتي كل شي ديريه براحتك..
سارة:علاش انتي ماتبيش تتحجبي..
تهاني:بالعكس الحجاب ستره..بس حسيت روحي كبرت قبل وقتي..
سارة قعدت تفكر في كلامها وهي ساكته..
تهاني:تبي تتحجبي؟!
سارة شبحتلها وقالت:مش عارفه!؟عمتي ديما تعارك فيا وتقولي البسيه معاش وليتي صغيره..لكن اني حاسه روحي مازال صغيره عليه..
تهاني:لالا في الدين مادام بلغتي خلاص انفرض عليك زيه زي الصلاة والصيام..
سكتت سارة وهي تشوفلها ومازال تفكر...
ع طقة الباب..
سارة:خشي..
انفتح الباب وخشت سجى وهي تقول:وينكم!؟
وجت قعمزت حداهم...وسارة تمرر في نظرها ع لبس سجى الضيق والوشاح الشفاف والمكياج والحواجب والزينه ع وجهها وريحة العطر اللي قالبه الدنيا وهي تفكر في موضوع الحجاب..
وقعدت سجى تهدرز عليهم وكل هدرزتها فارغه وتافهه وتهاني تساير فيها بالسيف..
بينما سجى كانت مرة مرة تشبح لسارة وهي منغاظه منها لانها لاحظت نظرات رفيق ليها..
•••••••°°°°°°°•••••••°°°°°°°•••••
الساعه 7:46 مساءا..
في دار النوم
وهيثم متكي ع السرير وفي يده كتاب يشوف فيه.
ومقابلاته اسيمه مقعمزة ع كرسي وتشبحله بإبتسامه..
هيثم:اممم..حلو..لكن صعب ع سارة ..
اسيمه:بالعكس وقالت انها لما تشوف كلام صعب طول ادور ع معناه..
هيثم:لكن مقالة "ححاب اروى" صعبه وممكن تشتتها..
اسيمه :بالعكس المقاله هادي حتخليها تلبس الحجاب وهي عارفه قيمته ومعتزة بيه..تعرف انه مش مجرد غطا يغطي راسها وجسمها لا..بل هو هويه ورمز يعبر عنها كمراة مسلمة..
البنت بعد وقت حتكبر وحتخش في المجتمع اكثر حتطلع اكثر حتشوف اشكال والوان من الناس والأفكار..
حتشوف اللي لابسه الحجاب بحكم العاده اللي لابساته ع خاطر عيلتها لابساته وممكن يجيها يوم وتحوله لو تبدلت ظروفها...
وحتلقى اللي لابساته منظر وخلاص وهو ممكن يفضح اكثر مايستر...
وحتلقى اللي لبساته يش ادرق ع افعال قبيحه اديرها بالدرقه..
وحتلقى اللي لابساته ع انه مجرد واجب شرعي وخلاص مش عارفين السبب والمغزى منه..
الحجاب فرض مافيهاش نقاش..بس ربي فرضه لهلبه سباب اولها العفه ومنع الأذى..ولتحديد الهويه..
زمان بس يعرفوا الحرة من الآمة..
هيثم بإبتسامه؛وتوا بش تنعرف المسلمه من غيرها...وهلبه كلام انقال فهالمقال خلاني وين نشوف مراة متحجبه حجاب صحيح نحس بأنها قيمة هلبه..حاجه كبيره..
اسيمه بإبتسامه:ونبي سارة تحس بنفس الأحساس هكي ولاهكي هي لازم تلبسه خلاص..بس نبيها تلبسه وهي معاهده الله انها ماتحولاش بكل مهما صار معاها..
هيثم بإبتسامه:والله اني وياهم محظوظين بيك..ربي يحبنا اللي خلاك لينا..
ابتسمت اسيمه بخجل وقالت:ويحبني حتى اني اللي عطاكم ليا..
🌸🌸🌸🌸🌸
وهما يهدرزوا..
وسارة كانت لاهيه بتليفونها تقرا في المقال اللي امها حطتلها الرابط متاعه في تعليق ع صفحتها..
وقعدت سارة تقرا في المقال بالتفصيل سطر سطر بش تفهمه كويس..
••••••°°°°°°°°•••••••°°°°°••••••
"شن بنقول عليه بوك هدا بس شن بنقول"
دانيه وهي سرحانه ودموعها ينزلوا:ديما وحني دون البنات في كل شي قاهرنا في عمرنا..
رتاج بغضب من بين دموعنا:كبرنا قبل وقتنا خنقنا في العبايات والجلابيب بش مايصرفش ع دبشنا وبش ماحدش يدير فينا اللي داره هو في بنات الناس زمان..حرمنا من مية حاجه..والله لولا وخيي مجاهد رانا ميتات من زمان بقهرتنا..
دانيه تنهدت بألم وهي تقول:ربي مايغيبه وخيي..
رتاج مسحت دموعها وقالت بتحدي؛لكن والله من اليوم لما ندير مانبي ومايعجبني وطز فيه ..
دانيه شبحتلها بخوف وقالت:شن بديري!!؟
رتاج:ماتخافيش مش زي مافهمتي لكن حنعيش حياتي حتى شويه..
دانيه:رتاج!
رتاج:قتلك ماتخافيش مش صايعه اني..
دانيه قعدت تشبحلها بخوف وهي ساكته..
اما رتاج قعدت سرحانه تشبح في الفراغ..
•••••°°°°°°••••••
فالشقه اللي فوقهم..
ماجده:اني قتلك نبيهم غدوة بنطلع مع بنت اختي للسوق..
مجيد بضحكه:حاضر حاضر غير ماتزعليش انتي بس..
ومشي للدولاب..
وجي للخزنه ووقف بوضعيه ادرقها ع ماجده بش ماتشوفش الرقم السري..
ماجده"طيح سعدك مابنطمع غير في فلوسك ياجلدة"
شويه وصكر الدولاب وجاها بألف دينار ومادهولها وهو من داخل يبكي عليهم وقال:مايغلوش ع العبمبرة..
هي ابتسمت مجامله وخدتهم وهو مازال شاد فيهم هي فنصت بضحكه..وهو ضحك ضحكه عبيطه وطلقهم..
خدتهم ومشت بيهم طول لشنطتها وحطتها فيهم..وهو يشوفلها من تحت لتحت..
•••••°°°°°°••••••°°°°°°•••••••
تاني يوم..
الجمعه..
كان هيثم عازم عيلته على الغدي بعد ماشدوا فيه يبوا الزردة..
وكانوا ناويين الجيه بعد صلاة الجمعه..
في الدار..
هيثم بعد ماكمل تجهيز نفسه للصلاة مشي لدار زياد..
خدي نفس ورسم ع وجهه ابتسامه بس كانت جديه..
وطق الباب..
"خش"
حط يده ع مقبض الباب وفتح الباب وخش..
زياد اللي كان يتعطر لما شبح من المرايه اللي خش اتفاجئ هلبه..
هيثم:هيا كان بتمشي قريب تبدا الخطبه..
زياد حط العطر ع الزيانه..ولما تلفت قال:واتي..
هيثم:نراجي فيك برا..
ومشي طلع من حداه وخلاه مستغرب ع الآخر..
بعدين مشي طلع من الدار...ومشي لين وصل في الكوجينه وقال:ترا ميه عمتي..
نسيبه:تحت امرك ياسمح..
ضحك زياد..
جاته نسيبه بطاسة الميه عطتهاله وخشت للكوجينه..
هوشرب منها وخلا الطاسه ع طاوله برا مايبيش يخش الكوجينه بش ماتركبش فيه ريحة التطييب..
بعدها مشي بإتجاه باب الحوش..
فتحه وطلع..
لبس بلغته ومشي..لقي بوه مقعمز في السيارة يراجي..
وصل فيه فتح الباب وركب..وصكره..
وهيثم تحرك طول..والزوز في حالة صمت..
لما طلعوا من الحوش..
كانت عفاف فوق السطح تنشر في الدبش وتسمع في آذان الجمعه شافتهم وهما طالعين في السيارة..تنهدت بحسرة وقالت:الرجالة كلهم في الجامع ماعدا المغضوب عليهم والضالين اللي عندي..
وقصدها راجلها وولادها اللي راقدين لهالوقت مايندروا علي حاجه..
••••••°°°°°°°••••••°°°°°°•••••••
"ماداير عزومه كبيره وقال لازم تجوا ياسدينه تعالي حتى انتي ع الأقل"
سدينه؛وشن يقولوا عليك ياوخيتي جايبه ضرتها معاها..
ماجده؛طز فيهم اني مامدورة حد ولاانتي ادوري ومن ماسألني عليك بنقوللهم مرت راجلي الأولى كلهم عارفيني واخده راجل متزوج..
سدينه كان الوضع محرج حتى بالنسبه ليها هي شايفه ان مشيتها معاها لقطه مش حلوة..وغير هكي خافت يقارنوا بيناتهم..
ماجده:تي هيا بالله عليك ياسدينه مانتجدى فيك راهو..
وسدينه الطيبه تحشمت من ماجده وقالت:باهي..نصلي الظهر ونلبس..
ماجده:ياوخيتي سلمها..
ضحكت سدينه ومشت لدارها..
اما ماجده وهي ماشيه بطريقها للصاله بش تصلي..وقفت والتفتت ومشت الدار البنات..
طقت الباب..
شويه وفتحتلها دانيه وهي لابسه ملاية الصلاة..
ماجده:نخش ياحلوة..
دانيه وهي تشوفلها بنظرات عدم فهم:خشي..
خشت ماجده لقت رتاج تقرا في القرآن..
ابتسمت ماجده وقالت:شويه يارتوجه..
رتاج صكرت المصحف وشبحتلها برفعة حاجب..
ضحكت ماجده وقالت:امكم بتمشي معاي باهي..
حطت رتاج المصحف فوق الطاوله وناضت مشتلها وهي تقول:وعلاش بترفعيها بش تحطيها في موقف بايخ..
ماجده بضحكه:ديما عصابك راكبات انتي..لو في موقف بايخ حننحط فيه اني مش امك..وبعدين خوي هو اللي عازم واني وصلتلها وخلاص ..
رتاج:مش مستريحتلك يامراة انتي..
ماجده:ههههههههه..لكن اني استريحتلكم..وطلعت الفلوس من جيب جلابيتها وقالت..وهاكم..
فنصوا الزوز فيها وقالت دانيه:شني هدا!!؟
ماجده:ياسلم اللي يفنصوا ههههه..هادم فلوس عطهولي بوكم قال اعطيهولهم خل ياخدوا اللي يبوه..
الزوز انصدموا..
رتاج:انتي كذابه..
ماجده:ههههههههه..واك منه لسانك منشار والله عطاهولي بوكم باهي..واليوم طالعه للسوق مع بنت اختي كان تقولوا باهي والله نطلعكم معانا..
هما شبحوا لبعض وهما مصدومات ع الآخر.
ماجده:هاه شن قلتوا سقدوني بنمشي نصلي..
دانيه بحماس:باهي..
رتاج شبحتلها بلؤم وقالت:لا مش ماشيه..
ماجده:براحتك ياعسوله..شبحت لدانيا وقالت..خلاص دنون بعد العصر نخطموا عليك..
دانيه:باهي..
ماجده:خودي هاك..
خدت دانيه الفلوس وماجده طلعت من الدار وصكرتها..
رتاج:عليك درويشه تندري عليها شن ناويه اديرلنا..
دانيه بضيق:المراة باين عليها طيبه ياتوجي..
رتاج بتهكم:اني الدرويشه وماما احرف منك..وخدت المصحف ورجعت تقرا فيه..
اما دانيه مابتش تفكر في كلام اختها هلبه فكرت بس في طلعة السوق وتشوف فيها انها حلم مش عارفه كيف حيتحقق..
🌺🌺🌺🌺
بعد الصلاة..
روحوا هيثم وزياد ولما شافتهم اسيمه مع بعض فرحت ع الآخر..
وشويه وبدوا يهلوا الضيوف من العيله..
وع الزغاريد والمباركات والتهاني وهيثم كان يساير وخلاص..
اما خالته ماجده مش عارفه وين تحط فرحتها بيه غنت عليه حتى الغني..
وسدينه في البدايه كانت متحشمه لكن جو العيله الحلو خلاها تنطلق معاهم شوي شوي..
تغدوا غداهم..
بعدين الرجاله مشوا لحوازة خال هيثم  بش يستقبلوا الرجاله غادي..
اما النساوين ضموا الحوسه كلها وقعدوا يجهزوا لجية الجيران وباقي المعارف..
بعد العصر..
طلعوا نسيبه وسارة مع بعض للسوق ومشوا بطريقهم لعمارة ماجده..
اللي لما شافتها سارة اذكرت هداكا اليوم وقلبها قعد يدق بقوة..
شويه ونزلت دانيه..
نسيبه؛زعما هادي؟!.
سارة وهي تشوفلها بإبتسامه:ايه هي...تشبهه..
نسيبه برفعة حاجب:تشبه منو!؟
سارة اطمست مرة وحده ولون وجهها قريب ولى بنفسجي من الخجل والخوف..
ونسيبه ضيقت عيونها بشك وهي تشوفلها...
ع وصلة دانيه..
سارة بإرتباك:جت البنيه..وفتحتلها الباب من الخلف..
دانيه بشي من الإحراج:السلام عليكم..وركبت..
سارة ونسيبه:وعليكم السلام..
صكرت دانيه الباب ونسيبه تحركت..
وهدا كله تحت عيون نور الدين اللي كان جاي لخوه للمحل وشاف هالشوفه...
🌺🌺🌺🌺
طول الطريق كان يتعارفوا..
ونسيبه بهدرزتها خلت الجو حلو واريحي..
لعند ماوصلوا لوحده من الأسواق..
وبدوا بجولتهم في المحلات...
ماخدوا شي من اول محلين..
بعدين عيون سارة جو ع محل معين قالت:خل نخشوا غادي..
تفاجئت نسيبه وقالت:باهي..
ومشوا طول للمحل وخشوا..
عجب المحل دانيه حتى هي وقعدت ادور وتشوف..
كان المحل فيه لبس للمحجبات وكله حلو جدا وانيق..
نسيبه بإبتسامه:شن خلاص قررتي واخيرا..
سارة شبحت لعمتها وضحكت هي تهز في راسها بإيجاب..
ضمتها نسيبه وهي فرحانه وقالت:الحمد لله..
وسارة تضحك بفرح..
ركزت عليهم دانيه وفهمت خيرهم بعد مالاحظت ان سارة مش متحجبه..
بعدين التفتت وكملت دورتها وهي مش مركزة..
ع الراجل اللي واقفه ع صاحب السنتر..
صاحب السنتر:هادو فلوسك كاملات..
جمعه:شن هدا ياراجل قتلك ردهم اني!؟
صاحب السنتر:جمعه ياتاخدهم يامن اليوم تقطع علاقتك بيا..
جمعه تنهد بضيق وقال:ربي يهديك شن بنقول بس..ماتقولش ولاد عم..
ابتسم صاحب السنتر وقال:مفروض نجيبلك هديه بمناسبة الخطوبه..
جمعه بإبتسامه جانبيه:لاهديه لادلاع..فكني من الدوة الفاضيه..
برا المحل..
خليل:ماتشبحش فيها كيف قالبه وجهها عليا ماصدقتش اللي قلته..
جهاد:ولما تجيبلها هديه بتصدق!
خليل بأنزعاج:مانعرفش..هيا خش..
جهاد:لالا خليني برا خير..
خليل:احسن...وخش لممحل..
وهو خاش وجمعه طالع وينخبطوا في بعض..
والزوز لما شافوا بعض تفاجئوا..
جمعه بإبتسامه:اوووو..خليل..
نسيبه لما سمعت الاسم طول التفتت..
ودانيه لما سمعت الصوت التفتت..والزوز انصدموا..
خشوا داخل وجمعه يسلم ع خليل..
وخليل يسلم بالسيف..
وولد عمهم صاحب السنتر جي لخليل وقعد يسلم عليه..
ودانيه تشبح وخلاص..
سارة:خلاص عمتو..خديت..
نسيبه شبحتلها ووجهها احمر وقالت بعد بلعت ريقها:وانتي دانيه..
دانيه التفتت وكذلك كان وجهها بنفس اللون وقالت:شنو؟!
سارة:خديتي؟!
دانيه هزت راسها وقالت بربكه:ايه..
سارة:هي تعالوا نخلصوا..
ومشوا التلاته للكاصه..
خليل:ماشيه الأمور الحمد لله..
جمعه:الحمد لله..اني خلال الايام الجاية ان شاء الله جايكم..
ولد عمه التاني قعد ساكت..
خليل مجاملة:مرحبتين..
"لو سمحت"
التفتت خليل طول وعيونه توسعوا ع الآخر لما شافها..
نسيبه وهي عاقده حواجبها ووجهها احمر:تفضل وعطاته الحاجات اللي خدتهم سارة..
ودانيه واقفه بحاجاتها وهي هاربه بعيونها عن جمعه..
هو لما شافها ضيق عيونه بإستغراب وقعد مركز عليها..
والراجل يحسب في حق الحاجات..قاله خليل:ع حسابي يامعلم..
نسيبه وسارة فنصوا..وجمعه استغرب..
خليل:كله اللي خدوه ع حسابي..
نسيبه رفعت حاجبها وقالت:خلاص معاش نبوا طالعين..
سارة:اهدي عمتي بالله عليك..شبحت سارة لخليل وقالت برجاء..لوسمحت.
خليل تحشم من سارة وقال وهو يشوف لنسيبه:حاضر كيف ماتبوا..
نسيبه بعصيبه:سقدنا بالله..
صاحب السنتر وع راسه الف علامة استفهام قال:550..
طلعت نسيبه الفلوس من شنطتها وخلصت..
بعدين قالت:نراجي فيكم فالسيارة..
ومشت طلعت..
وخليل معاها بعيونه وهو مضايق..
قدمت دانيه حطت الحاجات وهي محرجه..
الراجل مدة الاكياس لسارة..
وخدي حاجات دانيه..
سارة:عندكم حجرة قياس!؟
صاحب السنتر:ايه قدامك غادي..
سارة:شكرا...ومشتلها طول..
وقعدت دانيه بروحها..
وهي قريب تغوص في الأرض من الخجل..
هني طول جمعه قاله عقله ان في شي بين خليل ودانيه وشكلها اللي كانت معاهم منزعجه منه ع خاطرها ع اساس انها قريبتها او حاجه زي هادي..لان خليل ماتحركش من مكانه بكل بعد طلعت..
واستبعد سارة لأنها لما كلماته كان واضح ان مافي بيناتهم شي يعني تفسيره للي شافه منطقي..
صاحب السنتر:250..
دانيه طلعت من جيبها الفلوس..كانوا بس 500 قعدت تعد وهي مرتبكه..
خليل:معليشي نعد عنك..
دانيه شبحتله وعطاته الفلوس طول زي العبيطه..
هو خداهم وقعد يعد عطي المبلغ المطلوب والباقي ردهولها..
هي خداته وكانت مرتبكه ع الآخر..
وجمعه زاد تأكد من ظنه..
ع طلعة سارة من حجرة القياس وهي لابسه وشاح مناسب للفستان اللي لابساته قبل لتحط الحجاب..
سارة بإبتسامة راحه:هيا دانيه..
دانيه بإبتسامه:هيا..
ومشوا طلعوا مع بعض وخليل معاهم بعيونه وهو مبتسم..
وجمعه يشبحله..
برا..
دانيه:مبارك سارة..
سارة بإبتسامه:الله يبارك فيك..
ومشوا الزوز مع بعض لسيارة نسيبه..
ولما وصلوا ودانيه جت بتفتح الباب..
عيونه جو ع جهاد واقف يدخن انصدمت..
هو كذلك شبحها وتفاجأ..
ركبت فيسع للسيارة وهي تقول في نفسها"يوم عالمي للصدمات"..
بعد ركبوا البنات تحركت نسيبه..
وجهاد معاهم بعيونه وهو مصدوم بعدين قال:شن لمها ع عيلة الدكتور هيثم!!
فكر شويه بعدين قال..ماغباك ياجهاد تي بوهم واخد خالتي ماجده...ضحك..بعدين تلاشت ضحكته وين خطرت عليه نسيبه...يعني تعرف حقيقتهم وحتما حيعرفوها حتى بنات مجيد بعدين..وخصوصا رتاج..
هو حط الدخان في فمه بعصبيه وجبد نفس قريب حرقله صدره..
••••••••°°°°°°°°••••••••°°°°°°•••••
"لاااااااااا...ياريتني مشييت"
دانيه:ههههههه..تستاهلي..
قرصت رتاج ذراع دانيه بقوة..
دانيه:آااي ياحمااارة لااا..جبتلك معاي لبسه ياقردة والله..
طلقتها وقالت بعصبيه:مانبي شي...
ودانيه تتحسس فيدها وتضحك..
🌸🌸🌸🌸🌸
في هالوقت..
مع المغرب..
خشوا نسيبه وساره للحوش..
كانوا الاقارب والجيران مروحين ماقاعد حد غير ماجده..
في الصاله..
كانوا مقعمزين كلهم هيثم..واسيمه وزياد وماجده وسدينه ومعاهم مجيد يهدرزوا..
كانت سدينه متحشمه ع الآخر في وجود هيثم..
بس قعدت تقارن بينه وبين مجيد وتتنهد في داخلها بحسرة..
"السلام عليكم"..
التفتوا بيردوا السلام..
ناضت اسيمه بفزة وهي فرحانه وجت لبنتها وقالت:مبارك ياماما..
وحضنوا بعض..
سارة:الله يبارك فيك ماما..
والكل يشوفولهم بإبتسامه..
ماعدا هيثم اللي كان متفاجئ ع الآخر..
▪▪▪▪▪
◇كلمناها هلبه ع الحجاب بكل الطرق ماكانتش ترفض بس مع هذا ماتنفدش..ولما قرت مقالة زي مقالة حجاب أروى الصعبه ع اللي في سنها طول لبساته...من فرحتي وقتها درت تصرف تلقائي غير متوقع...
▪▪▪▪▪
كلهم كانوا جوا سلموا ع سارة وباركولها..
ماجده وزياد اللي كان فرحان ع الآخر..
بعدين شبحت سارة لبوها..
هو ناض طول وجاها..
لما وصل فيها ضمها لحضنه وهو يقول:احسنتي يابابا احسنتي..
سارة ماكانتش مصدقه اللي هي فيه..
حضن بوها كان دافي هلبه..حضن غمرها بشعور حلو بالمرة..
في فرق كبير بينه وبين حضن الأم..
كانت قبل تحساب حنان امها عليها عوضها عن حنان بوها..
بس توا تأكدت ان امها ماقدرتش تعوض شي..هي بس عطتها حنان الامومه لااكثر وماقدرتش تخليها تحس بالشعور اللي حساته فهاللحظه..
كان زياد يشبحلهم وفي قلبه متحرك شعور غيره رهيب..
كان متمني لو يقدر يدير شي يخليه يحضى بهالحضن اللي ياما تمناه في هلبه مواقف...
واسيمه تشوفلهم بإبتسامة حب و عيونها مدمعات..
وماجده ونسيبه كذلك..بس سدينه كان تشبح لمجيد اللي كان لاهي بتليفونه ونظراتها نظرات اسف..
••••••°°°°°°••••••
الساعه الحادية عشرة ليلا..
في دار النوم..
هيثم:ابدا ماتوقعتش انها في عمرها هدا تقدر تفهم كلام عميق هلبه..
اسيمه بضحكه:راك تنسى بنتك فازت في مسابقة ادبيه وعندها حب اطلاع ياهيثم...
▪▪▪▪▪
◇اذكرت وقتها القصة القصيرة...
بعد مارقدوا كلهم والحوش هدي..دورت عليها في حساب اسيمه ع الفيس ولقيت الرابط فتحتها وقريتها..
وياريتني ماقريتها..
خشيت في حالة صدمه من اللي نقرا فيه..بنت توصف نفسها تحكي ع روحها..والرجل اللي تحكي عنه هدا منو!!؟ لامستحيل...اني!!!؟؟؟
الرجل المغمور....اني ياسارة..اني يابنتي هالراجل القاسي بارد المشاعر المتغطرس هدا...اني!!!!...وقعدت  نعاود ونقرا بش نتأكد فعلا هدا اني...
كانت القصه تبان في اطار خيالي..
زي محابر اللي تعيش في جزيرة الأحلام وحيده واصدقائها الحروف..والكتب والقلم ...ومافيش معاها حد فهالجزيرة غير هالراجل اللي كان مصدر ازعاج والم دائم بالنسبه ليها..
اقسى المشاهد فهالقصه..
ان كل مامحابر بطلع اجنحه بش اطير بيهم من جزيرة  الأحلام لجزيرة الحقيقه..يجيها الراجل هدا يقص اجنحتها ويمنعها اطير..
معقوله اني هكي في نظر بنتي!!؟
وفي عز صدمتي...
صارت حاجه فيقتني منها...
▪▪▪▪▪▪
كانت اصوات سيارات الشرطه اللي فيقت الزنقه كامله..
مشي هيثم طول طلع من الدار متوجه لباب الحوش..
واسيمه فاقت ومشت طلعت وركبت لدار نسيبه فوق..
ولحقوها سارة وزياد..
طلع هيثم..
زي ماطلعوا اغلب رجالة الجيران..
لقوا سيارات الشرطه واقفه قدام حوش خالد..
خشوا للحوش اقتحاما..
من فوق..
اسيمه بخوف:يالطيف ياربي يالطيف!!
سمعوا اصوات عياط..
سارة:حيي ياماما!!!؟
اسيمه حضنت بنتها وقالت:ياربي!..
زياد:هدا حالهم هما..
نسيبه شبحتله وملامح الخوف والحزن ع وجهها..
بعدين شبحت لوطا..
شافتهم مطلعين خالد..
ووراه رفيق وجهاد..
واخر من طلعوه كان خليل..
اللي طول شبح جهة حوش هيثم فوق..
لقي نسيبه تشبحله بحزن وطول دمعتها طاحت..
هما نزلوله راسه ودخلوه..
واصوات عياط عفاف وتهاني قالبه الدنيا..
لوطا..
راجح:تحركوا بسرعه..
وتحركت السيارات..
اما هو شبح لحوش هيثم تحديدا فوق..
جو عيونه فعيون نسيبه..
رفع حاجبه اليسار..بعدين ركب السيارة وتحركت طول...
عفاف ببكي وعياط:اااه ياربي اااه امتى تاخدني وتريحني ياربي..
طول اسيمه مشت طلعت من الدار..
نزلت تجري ووراها نسيبه..
لين مشت طلعت من الحوش هي وياها..
هيثم خش صكر الباب الخارجي..
لما شافهم طالعات قال:وين وين..
اسيمه بدموع:ماتسمعش في المراة!!؟
هيثم بحزم:خشي داخل اسيمه..
اسيمه بصدمه:هيثم!
هيثم:قلت خشي داخل..
نسيبه فاتاته وجت بتطلع شدها من دراعها وقال بغضب:شن قلت اني!!؟
نفضت نسيبه يده وقالت بحده:حكمك ع مرتك مش عليا.
ومشت فتحت الباب وطلعت تجري..
لين وصلت في عفاف وبنتها اللي كانوا يبكوا ويندبوا وماحد مادورهم ولاعدل عليهم..
نسيبه بألم:ابله عفاف خلاص اذكري الله بالله عليك..
طول عفاف حضنتها وقالت ببكي:تعبت والله تعبت..
نسيبه ودموعها ينزلوا:تعالي معاي تعالي..
وحطت يدها ع ظهر تهاني وقالت:هيا خشي حبيبتي..
وخشت هي وياهم والزوز وصكرت الباب..
وهيثم واسيمه اللي كانوا واقفين فم الباب يشبحوله.
هو بنظرات ضيق..
وهي بنظرات حزن مخلطه بالدموع...

يتبع••°°