#البطل_المغمور
#الجزء_الخامس_والعشرين"القسم الاخير"
#الجمان_الفريد
الصلاة أولا💓💓💓
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
يسوق في سيارته بسرعه متوجه لمركز الشرطه بعد ماجاته معلومه انهم حققوا مع جلال الوافي...
كان ملهوف وخايف..
كان باين عليه وهو خاش لداخل المركز يمشي بسرعه بش يوصل لغرفة الضابط المسؤول عن القضيه...
....في غرفة الضابط....
الضابط:للأسف إفادة جلال الوافي ادين ولدك بقضية تانيه غير قضية الشروع بالقتل..
هيثم عقد حواجبه بخوف وقال:قضية شني؟!
الضابط شبحله شويه وهو ساكت بعدين قال:تحرش..
فتح عيونه ع وسعهم من الصدمه...بعدين قعد يحرك في راسه يمين ويسار ويقول:مستحيل...لو شفت بعيني مانصدقش..نصدق كل شي كل شي...ان ممكن يقتل في لحظة غضب...يولي مدمن في لحظة ضعف..لكن انه يتعدا على اعراض ناس لو نشوفه بعيوني نكذبهم..
الضابط:انت تعرف ان ولدك مدمن..ولو كان مدمن فالمدمن غالبا غير مسؤول عن تصرفاته يادكتور..
هيثم بلع ريقه وقال بصوت مخنوق:كيف...كيف صار..شن قال!؟
الضابط:قال انه كان طالع في وقت استراحته من مكتب ولما وصل للمكان اللي صار فيه الحادث شاف ولدك يتحرش بطالبه..
غمض هيثم عيونه بشده..
الضابط:وقال...مش حيتنازل عن حقه وحيدعي ع ولدك...
فتح هيثم عيونه وهو يرمش في عيونه بسرعه وقال:يعني على هكي...ولدي ضاع خلاص...
الضابط ضم شواربه لداخل بأسف وماعلقش بكلمه...
🍁🍁🍁🍁
لما طلع من مركز الشرطه كان في حالة اشبه بحالة الغريق اللي قاعد يحاول يطلع وينجى بنفسه والميه تسحب فيه من رجليه للأسفل بكل قوة..
خلا سيارته وقعد يمشي ع رجليه وهو مش عارف وين ماشي ولاكيف ماشي اصلا..
كان يتردد على مسامعه كلام الضابط...
تحرش...تحرش!!!
يصدق كل شي في ولده ولايصدق انه ممكن يفقد اخلاقه بالمرة...
بس فعلا كلام الضابط معقول لما قال انه مدمن...والمدمن يدير كل شي...
المدمن عقله مش عليه...يدير كل شي واي شي...ولايقدر يردعه لاتربيه ولاأخلاق ولادين..
يااه...وين وصلتنا يازياد....وين!...
زياد!
زياد اللي وصلنا!؟
مازال قاعده ترمي بأخطائك ع شماعة صغارك ياهيثم!
هيثم...انت المتهم الوحيد هني...انت اللي وصلت لولدك لهالحاله...انت اللي وصلت نفسك وعيلتك لهني.....
انت....مش حد تاني....
ياما حذرت اسيمه...ياما نصحاتك...تخلي ولدك صديق واخ...
تفهمه...تقدر....تحترمه وتحترم تفكيره والحاجات اللي يحبها..
ماتقللش منه...وتحطمه...وتحسسه انه ولا شي واللي يدير فيه مايسوا شي..وان نجاحاته في نظرك كلها تفاهات....انجازات فارغه...وتردد قدامه ديما وتقول....
"مظنيش يصير منك انت...هدا وجهي كان صار منك"
🥀الكلام اللي يقولوه الوالدين لصغارهم..مؤثر لدرجة لاتوصف...سواء كان كلام ايجابي وسلبي...
في من صغار ممكن مايأثرش الكلام السلبي تأثير عميق بحيث يخليهم يتحطموا ويفشلوا طول عمرهم بس يخليهم يحسوا بالنفور من والديهم...يبني بيناتهم حاجز يخلي الأبناء مستقبلا شحيحي الحنان عليهم ومايفضلوش يكونوا قراب منهم...
وفي من ابناء...الكلام يأثر فيهم ثأثير عميق..
يخليهم يفقدوا الثقه بأنفسهم...
يتحطموا...ويحبطوا من انفسهم...
يرسخ في عقولهم كلام والديهم عنهم ويصدقوا ان هما هكي فعلا....ماينفعوا لشي ولايصلحوا شي ولايفهموا في شي..
ومش حيصير منهم....🥀
🍃وهادي هي الحالة اللي عايشتها زميلة سارة في المدرسه....
🍁في المدرسة الثانوية للبنات...
وقت الإنصراف...
قدام باب المدرسه..
رهف بإستعجال وارتباك:صحيتي سارة...لما نكمله تو نردهولك طول ماتخافيش عليه تو نحافظ عليه..
ومشت تجري بسرعه للطريق...
سارة ودانيه بصوت عالي:رهف!
هي وقفت مخلوعه لما سمعت صوت قوي لمكابح سيارة..
اللي يسوق فيها قعد يهزب فيها..
وهي هربت ومشت لسيارة بوها لما فتحتها وركبت..
كانت ميته خوف من ردة فعل بوها اللي اول ماخشت بدي يهزب فيها ويقول..
=وين عقلك وين يامسبوهه يامسكسكه...وين ..
وخبطها على كتفها خبطه قويه وهو يقول:ضنوة ناتله...
وهي منزله راسه وتبكي بصمت ومش قادرة حتى اطلع صوتها...
هلبه طالبات شافوا الموقف ومن بينهم سارة ودانيه..
تبعوا بعيونهم السيارة وهي تمشي...
تلقائيا نزلوا من عيون سارة الدموع..
ودانيه خطر عليها بوها ابتسمت بتهكم وقالت:خزي على ابهات اللي هكي...
غيرت عيونها وهي ادور على باصها مالقتاش بس شافت صاحب الموطو...
رفع الغطا اللي يغطي عيونه في الخوذة اللي لابسها وقعد يشبحلها..
دانيه غيرت عيونها طول وقالت:شن يبي مني هالمخلوق..
سارة مسحت دمعتها وشبحت للجهة التانيه شافاته وقالت:لما يروح خوك قوليله..
دانيه:لالا مانبيش نشغله بحاجه تافهه زي هادي نمشي بالباص ونروح بالباص ماعنده مايديرلي..
سارة:انتي مش قلتي انك تشوفي فيه في شارعكم الصبح قبل يجيك الباص يخوف الوقت هدا دانيه راهو مرات يخطفك وماحد يندري عليك..
دانيه بخوف:لالا...مش لهالدرجه...
سارة:منظره مش مريح يادانيه واضح عليه واحد مش كويس...توقعي منه كل شي...
دانيه قعدت تفكر بقلق وهي ساكته..
سارة: دنون باصك جي..
استاقظت دانيه وشبحتله وقالت لسارة:سلام سارونه..
سارة:سلام...وفكري في كلامي...
دانيه هزت راسها وركبت للباص...
تحرك الباص...وبعده مباشرة تحرك راجح..
وسارة معاه بعيونه وهي تقول:استودعتك دانيه ياربي...والمسكينه رهف...
.....من جهة تانيه.....
كان جمعه ملاحظ صاحب الموطو...
واليوم استغل غياب جيهان وقرر يلحقهم....
.....في الباص.....
كانت دانيه تهدرز هي وهبه ويضحكوا..
ولإنهم جايين في اخر الباص كانوا يبانوا من الزجاج الخلفي للباص..
وراجح وهو وراهم كان مركز ع دانيه وضحكتها وحركاتها..
ولااردايا يبتسم...
ووراه جمعه بالسيارة مركز معاه....
جمعه:ان شاء الله يطلع يلحق في بنت تانيه مش هي..
لين وصل الباص لبداية شارع العمارة اللي تسكن فيها دانيه..
سلمت ع هبه ومشت نزلت...
مشي الباص وهي كملت طريقها تمشي وتسمع في صوت الموطو....
دانيه بخوف"ياحليلي هيه كان مايطلع كلام سارة صح..."
تنهدت بخوف...وبدت تقول ...
"اعوذ بكلمات الله التامات من شر ماخلق وذرأ وبرأ ومن شر ماينزل من السماء ومن شر مايعرج فيها ومش شر ماذرأ في الأرض ومن شر مايخرج منها ومن شر فتن الليل والنهار ومن شر كل طارق الا طارقا يطرق بخير يارحمن"
وماكملت الدعاء الا ولقت روحها قدام العمارة..
قبل لتخشلها التفتت شافت صاحب الموطو مدرس بعيد شويه ويشبحلها..
خشت تجري وهي تقول...ياربي اكفنيه بماشئت وكيفما شئت...
....وهو بعد وصلها...
جاه اتصال....
ولأنه كان حاط السماعات في وذانه فتح الخط ورد طول..
راجح:ايوه..
=تعالى للمديرية فورا في عمليه عاجله حتطلعلها وحده انت على راسهم..
راجح:جاي فورا...
سكر ...وتحرك بسرعه....
وعيون جمعه عليه...بعد ماادرق من قدامهم خبط بيده ع الدومان بقوة....ولف بالسيارة وطلع من الشارع....
وهدا كله كان علي عيون قياد الأحوال...
حسام"بنات مجيد بيديروله خارقة هكي كبرها على راسه...ان شاء الله تصير وتتقربع على روسهم"
ولف وخش لمحله....
••••••°°°°°°°••••••••°°°°°°•••••••
فتح عيونه شويه شويه...
والرؤية قعدت تتوضحله شويه شويه..
شاف واحد واقف عليه ويقول:دكتور هيثم!
عقد حواجبه وبدي يمرر في عيونه ع المكان..بعدين حاول ينوض يقعمز..
ساعده الدكتور وقال:لاباس عليك دكتور..
هيثم شبحله وقال:شن جابني هني؟
الدكتور:في ناس شافوك طايح في الطريق جابوك هني..
حط يده ع جبهته وقعد يفرك فيها ويحاول يذكر اللي صار..
مش مذكر اكثر من انه بعد طلع من مركز الشرطه قعد يمشي وحس بشي من التعب بعدين معاش اذكر شي..
نزل يده وقال:نبي نطلع..
الدكتور:راجي ساعه تانيه دكتور..
هيثم:ولادقيقة زياده..وحاول ينزل
الدكتور :دكتور تتحمل مسؤولية نفسك..
هيثم ماباش يرد عليه...
نزل من السرير...وخدي جاكيته اللي كان محطوط عليه..
وقعد يلبس في كندرته..
الدكتور:دكتور ارجوك اسمع الكلام..
هيثم بعد لبس كندرته مشي طلع ....
طلع تليفونه من جيبه..وقعد يمشي بشي من التعب..
حط ع رقم خليل واتصل بيه...
.....في الورشه.....
خليل كان واقف ع زبون يقوله:غيرتلها المحرك وغيرتلها الطرف اللي قتلك عليه..امورها تمام توا...ولت عروسه..
ابتسم الزبون وقال:يعطيك الصحه..ومدله حق التصليح...
خداهم خليل وقال..يعوضك الله..
الزبون:تسلم...
ومشي الرجل ركب سيارته وتحرك...
خليل شبح للورشه...شاف رفيق يخدم ع وحده من السيارات وملامح وجهه متجهمه...
خشله وهو يقول:ريفو..
شبحله...
وقف عنده خليل ومدله الفلوس...
رفيق شبح للفلوس وقال:هدا شنو؟
خليل:برا خود حوايج للعيل سمعت امي قالت عرفتوا جنسه..
رفيق :صحيت مانبي شي...ورجع لهي بخدمته..
خليل قربله وحطله الفلوس في جيب القامجو..
ومشي من حداه...ورفيق يشبحله بطرف عينه..
فجأة رن تليفون خليل..
طلعه من جيب القامجو..
شاف المتصل رد طول..
خليل:السلام عليكم دكتور..
رفيق قام راسه وشبحله..
....هيثم وهو مقعمز قدام المصحه اللي كان فيها.....
هيثم:وعليكم السلام..خليل نبي منك خدمه لوسمحت نبيك تطلع ورا نسيبه اختي وهي ماشيه للمدرسه..
ارتبك خليل وقال:اها...
هيثم:غير اني انشغلت شويه..
خليل مسح ع لحيته وقال:مش مشكله عادي...غير المهم انت بخير لأن صوتك حسيته مش مزبوط .
هيثم تنهد وقال:مافي شي..مافي شي..ع العموم اني تو نكلم اختي ونبلغها..
خليل:تمام...
هيثم:السلام عليكم....
خليل:وعليكم السلام....وسكر...
رفيق:خيره شن يبي؟
مشي خليل بيطلع وهو يقول:يبيني نطلع ورا اخته وهي ماشيه للمدرسه..
وطلع من الورشه..
رفيق مط شواربه للأسفل بإستغراب...ورجع لهي بخدمته...
🍁🍁🍁🍁
"مش لازم ياهيثم نمشي بروحي عادي"
هيثم بحزم:نسيبه...اسمعي الكلام..
هي بضيق قالت:باهي حاضر..زي ماتبي..
هيثم نهي المكالمه طول..
وهي نزلت تليفونها وشبحت للبنات وقالت:هيا..
ومشت وهما الزوز مشوا وراها...
......وخليل في بدايه الزنقه كان واقف بسيارته يراجي.....
شاف سيارتها طلعت من الباب..
شبح القدام..
وهي شبحاته واقف يراجي بسيارته زادت اضايقت...
طلعت من الزنقه..وهو مشي وراها طول....
اول ماطلعوا من الشارع...
جو مع بعض باصات سارة وتهاني...
درسوا....ونزلوا منهم البنات..
جو لبعض وسلموا...وكملوا الطريق وهما يهدرزوا..
سارة:حلو هلبه ان شاء الله تفوزوا..
تهاني بضحكه:من قلبك هالدعوة!
سارة بإبتسامه:وعلاش ماتكونش من قلبي!
تهاني بضحكه:يعني معقوله تبي لروحك الخسارة!؟
سارة ضحكت وقالت:مااختارونيش للمسابقه..
تلاشت ضحكة تهاني وهي تشوف لسارة..
سارة وهي تشوف القدام:ربي مش كاتب..
تهاني شبحت القدام وقعدت ساكته...
وساد الصمت....
وصوت الآذان كسر هالصمت لما الزوز قالوا...
"صدق الحق..وزهق الباطل"
وكانوا حدا الورشه..
رفيق لما شاف سارة جايه مع اخته...
طلع طول ونزل سيرانتي الورشه وقعد يدعي ورا الآذان بصوت مسموع..
وعيونه يسرقوا في النظر لسارة لين خشت للزنقه..
تنهد...
بعدين مشي بطريقه للجامع....
🍁🍁🍁🍁
بعد ماكلم اخته...ناض للطريق...
وقف تاكسي...وطلب منه يرده لمركز الشرطه...
بعد ماوصل غادي...
نزل لسيارته...ركبها ومشي بطريقه للمسجد...
▪▪▪▪▪
◇تعودت خلاص..قلبي في عز وجعه يدلني ع المكان اللي يلقى فيه دواه....
صليت الظهر....وقعدت غادي نقرا في القرآن....وبعدين طلعت من الجامع...واحترت معاش عرفت وين نمشي ولاشن ندير..ولاكيف نتصرف...
ماكانش في قدامي من بعد الله...غير خليل لو يعرف مكان زياد ونوصلوا فيه...كان عندي احساس كبير ان اللي حيقوله ولدي..عكس اللي قاله جلال هدا...وولدي حيكون صادق..
مش لإنه ولدي...بل لأني عارفه راجل...ممكن يغلط أي غلط الا التعدي على اعراض الناس...
امه الله يرحمها رباته ع ان بنات الناس زي خواته...مفروض يخاف ربي فيهم بش غيره يخاف ربي في خواته...
وزياد ولدي...حتى لما قلبه دق..مافي حد فينا كان ملاحظ عليه شي ولاحتى امه نفسها ولاعمري اصلا لاحظته يقيم في عيونه في بنت خالد حتى صدفه...
بيقولولي مدمن....اني نقوللهم اصل ولدي حيغلب عليه حتى لو كان مش بوعيه....
تنهد وكمل يقول...المهم واني واقف في مكاني نفكر خطر على بالي ندير مشوار...هالمشوار حيوقف عليه كل شي بالنسبه ليا...اولهم نظرتي في ولدي...
▪▪▪▪▪
واقفه تشوف في جهاز القلب..
وهو يتفحص فيها بنظرات عيونه الخبيثه...
الممرضه:لاتمام النبض كويس والضغط كويس كل ماله وضعك يتحسن اكثر..
جلال ابتسملها وقال:امم..حلو..يا....نقدر نعرف اسمك..
الممرضه ضايقتها نظراته لكن جاوبت ع سؤاله:مبروكه..
جلال رفع حواجبه ومرر نظره عليها وقال:هدا كله ومبروكه!
ماريتش زيك الا جيجي حديد تعرفيها؟..
الممرضه:لا...نستأذن..
جلال:لحظه ..راجي شويه قاعدين ناخدوا ونعطوا..
فتحت الباب وطلعت بسرعه..
على جية هيثم اللي وقف في مكانه وقعد يشوف للممرضة كيف كانت حالتها وهي طالعه من حجرته..
ضيق عيونه وكمل طريقه للحجرة...
وصل فيها وطق الباب..
...داخل...
جلال بضحكه: ولت....خشيي..
هيثم رفع حواجبه لما سمع الصوت اللي تكلم بيها جلال..
فتح الباب وخش..
وجلال عيونه ع الباب...
لما شاف هيثم خاش ارتسمت ع وجهه ملامح الصدمه..
هيثم:السلام عليكم...وسكر الباب..
جلال وهو يحاول يخفي توتره:شن جاي تبي!؟ ماتحلمش نتنازل ونسقط الدعوة اللي رفعتها على ولدك...
هيثم:اهدى اهدى...اني مش جايك لهالسبب..
جلال:مالا شن جابك!؟
هيثم حط ايديه في جيوبه وقال:نبيك تحكيلي اللي صار بالزبط..
جلال ضحك بتهكم وقال:شن تبيني نحكيلك...ان ولد حضرتك مش متربي ومدمن وفاشل دراسيا منحرف محترف يعني...هذا اللي تبي تعرفه!...
هيثم قعد يشبحله وهو يقول...منحرف محترف...مزبوط...
جلال رفع حواجبه وهو يشوفله..
هيثم:لأول مرة في حياتي نندم على عمل انساني درته..او لأول مرة ندير عمل انساني في غير محله..
جلال رفع حاجبه وقال:شن قصدك..
هيثم ابتسم بتهكم ومشي للباب فتحه وطلع..
جلال اطلق لفظ نبي وهو يشوف للباب...
اما هيثم...
فكان يمشي وداخليا مرتاح ع الآخر لأنه نظرة في ولده ماخابتش..
🍁🍁🍁🍁
لكنها تقعد نظرته هو بس...والناس نظرتها غير..
لو انتشر اللي قاله جلال الوافي في افادته لايمكن حد يصدق غير اللي سمعه...
وهني الناس مش حتكتفي بإزدارئها لزياد بس...بل كل من يعني لزياد حيصيبه مااصابه...
....الساعه السادسه مساءا.....
"هدا وين تغدى؟"
سارة:خش للحوش توا معاكم انتم..
نسيبه وهي تلم في شعرها:اشبح في شني انشغل اليوم..
سارة شبحت للتلفزيون وقالت بقلق:زعمه هدا هداكا قال افادته؟.
نسيبه قعدت تشبح لسارة وهي تفكر...
وسارة مركزة مع التلفزيون اللي كان صوته واطي..
شافت البرنامج المشهور نفسه كيف بادي...واول حاجه كان يعرضوا فيها عناوين المواضيع الرئيسية اللي حتطرح في الحلقه...
واولهم..."جريمه في الجامعه"...
وعرضوا صورة جلال الوافي...وفي جنبه فيديو الجريمه..
ناضت بسرعه خدت الريموت وعلت الصوت..
ونسيبه تشبح للتلفزيون بقلق...
ولت سارة قعمزت جنب عمتها..
والزوز عيونهم ع التلفزيون...
المذيع...
"السلام عليكم ورحمة الله وبركاته...اسعد الله مسائكم متابعينا من كل بقعه في بلادنا الحبيبه...مواضيع جديده اخبار جديده...احداث جديده..
اول حدث نتكلموا عنه اليوم مش جديد بس جد فيه جديد...
حادثه الاعتداء على الأستاذ جلال الوافي اللي حيكون معانا هاتفيا وحيحكيلنا فيها هو بنفسه ع اللي صار بالزبط...
....طلع هيثم من الكوجينه بعد ماسمع كلام المذيع...
ومشي طول للتلفزيون وقف حداه...
وسارة ونسيبه شبحوله...
المذيع...
"معانا هاتفيا عضو هيئة التدريس بكلية الطب جامعة طرابلس...الاستاذ جلال الوافي..
استاذ جلال مساء الخير....
=مساء الخير
حمد لله ع سلامتك..
=الله يسلمك..مشكور جدا ومشكورة قناتكم الموقرة اللي اهتمت باللي صار معاي وخلت الرأي العام يتحرك بش ينصفونا حني اعضاء هيئة التدريس ويحمونا من امثال المجرم زياد الكاتب..
نسيبه بحقد:حقير...
المذيع...
"استاذ جلال شن صار بالزبط..احكيلنا ليك المساحه"
جواب سؤال المذيع واللي حيحكيه جلال...
حيسمعوه ناس ياناس..في طرابلس وبرا طرابلس...
ناس اتبع في البرامج هادي وتصدق في كل شي ينقال فيها...
وفي ناس تستنى تسمع وتعرف اللي صار...وايديهم على قلوبهم...
زي عفاف وبنتها تهاني ...
وولادها اللي كانوا يتفرجوا ع الحلقه بث مباشر ع تليفون جهاد في الورشه....
وزي ماجده وضرتها سدينه وبنتها دانيه...
وحتى مجاهد...
من نص البلاد الثاني...كان هو وزملائه يتابعوا في الحلقه وهو اكثر لهفه بش يعرف اللي صار....
وبدي يحكي جلال الوافي...
"اللي صار ياسيدي الكريم...ان اني متعود يوميا في وقت دوامي ناخد فترة استراحه نطلع فيها لفيرندا قريبه ع مكتبي..كنت ندخن غادي..ونفطر احيانا يعني نرتاح شويه من دوشة خدمة ساعات طويله...المهم لما مشيت للفيرندا ووصلت غادي سمعت اصوات غريبه...".
هيثم التفت وشبح لسارة وعيونه تعبوا دموع..
وسارة تسمع في جلال بكل حواسها وهي حاطه يدها ع صدرها...
"لما قربت وطلعت...شفت قدامي واحد قاعد يتحرش بوحده..".
حطت سارة ايديها ع فمها بعد شهقت بصوت عالي..
شهقه خلت بوها ينتفض..
ونسيبه غمضت عيونها وهي عاضه ع شاربها السفلي بقوة..
ومازال فحيح الثعبان وصوت الشيطان ماسكتش...
"المنظر اللي شفته خلاني فقدت اعصابي معاش شفت شي جيته طول وفكيت البنت منه وضربته ومش عارف شن طلع من فمي وقتها...وهو قعد يضرب ويقول في الفاظ نابية وباين عليه مش مزبوط كأنه واخد حاجه"
المذيع..
"عذرا ع المقاطعه استاذ جلال بما انك يعني من اللي درسوا زياد الكاتب هل فعلا كان مدمن!؟
=اول شي مادرستاش ايه صح عنده ماده عندي بس ماشفتاش جي وحضر نهائيا...ونأكدلك موضوع انه مدمن لأن هالشي لاحظته لما تواجهت اني وياه كان مش طبيعي..ولما حاولت نقاومه تعرف شن دار...
المذيع..
البنت البنت اللي صارت معاها هالحادثه...هل هي طالبه عندك؟
=صدقا اني ماشفتهاش كويس وماركزتش عليها وحتى لو ركزت وشفتها مش حنقول من هي...مهما كان الموضوع حساس...والحكايه فيها سمعه..."
🍁نسيبه بصوت مخنوق:وين وصل ولد وين!! ياخسارتك يازياد!.
غطت سارة وجهها بإيديها وقعدت تبكي بقوة..
هيثم مشي سكر التلفزيون وهو يقول:انتم صدقتوا اللي قاله! شبحلهم وقال...صدقتوا ان زياد ممكن يدير حاجه زي هادي!!؟
نسيبه بنبرة باكيه:مش عارفه والله ماني عارفه..يعني لو..لو حق يكون مدمن زي مايقولوا...
قاطعها وهو يقول بصوت عالي:حتى لو صح...ولدي مايديرهاش..راجل رباته اسيمه مايديريهاش...راجل امه اسيمه مايديرهاش....خبط ع صدره وقال...ولدي مايديرهاش...مايديرهاش...
ع جية البنات الزوز يجروا من دارهم بعد سمعوا صوت بوهم العالي...
ريحان بخوف:بابا!
هو شبحلهم ...
شاف في عيونهم نظرات الخوف...
توتر...توتر هلبه...وزاد غضبه...وهربا من انه يدير اي تصرف قدامهم يزيد يخوفهم..
توجه لداره طول...
وهما بعيونهم معاه...بعدين شبحوا لسارة لقوها تبكي بالعبرة..
وعمتهم حتى هي تبكي...
جوهم وهما يقولوا بخوف:خيركم؟!
ريحان:علاش تبكوا؟ علاش ديما تبكوا..
وجنان تشبحلهم كيف يبكوا وبتبكي معاهم...
هما ماقدروش يجاوبوا ريحان ولاماسمعوهاش شن تقول اساسا...
ريحان بنبرة باكيه:زياد مات!؟
سؤال ريحان خش في وذانهم زي السيف...
وقفوا بكي وشبحولها..
فجأة...سمعوا صوت حاجه تكسرت..
نسيبه بذعر:حي هيثم!
وسارة ناضت تجري لدار بوها...
البنات الزوز من الخوف قعدوا يبكوا..
عمتهم خدتهم من ايديهم لحضنها وضمتهم بقوة وهي بتموت من خوفها على خوها...
....سارة واقفه في الباب ادق عليه بقوة وهي تقول بهلع:بابا...بابا..
لما ماردش عليها فتحت الباب...
لقاته مقعمز ع السرير ويده تنزف وهو يشوفلها وع وجهه ملامح الألم..
سارة :ماتتحركش رد بالك تتحرك ولاتمس بيها شي ولاتقربلها شي...
وطلعت تجري...
وهيثم يشوف ليده والدموع من عيونه ينزلوا...
شويه وخشت عليه سارة بشنطة الإسعافات...
قعمزت ع ركابها قدامه..وفتحت الشنطه...
شافت جرح بوها وقالت ومازالت نبرتها صوتها يتخللها البكاء:الحمد لله مش عميق...
وبدت اداوي في بوها...
وهو يشوفلها ويشوف لإيديها كيف يرجفوا..
سارة:اني مستحيل نصدق ع خوي حاجه زي هادي...شبحتله وقالت..كان ديما الولد اللي يجري في جرة بنات الناس ويقعد يعاكس فيهم ويحدفه رقمه ويدير في العلاقات هدا واحد ديوث...ماهماش عرضه...لأن اللي يديره في بنات الناس حيديروه غيره في خواته ...ورجعت تشوف ليد بوها واداوي فيها وهي تقول...ممكن يدير كل شي الا الحاجه هادي..
هيثم:انتي كنتي قريبة عليه هلبه..
سارة ابتسمت من بين دموعها وهزت راسها بإيجاب..
مسح بيده التانيه على شعرها وقال:باهي...تعرفي ان خوك..في قلبه مشاعر اتجاه تهاني بنت خالد؟
قامت عيونها وشبحت لبوها بصدمه..
هيثم ضحك من بين دموعه وقال:حتى انتي مالاحظتيش وماعرفتيش وحتى المرحومه امك متأكد انها كانت ماتعرفش ولاكانت قالتلي...ولدي كان متحشم يبين هالمشاعر النظيفه قدام اي حد...قدام البنت نفسها...يبوا يقعنوني ان واحد زيه يتعدا على اعراض الناس حتى لو كان مدمن..
ابتسمت سارة بحب ودموعها ينزلوا وقالت:مستحيل...
وقعدت تلف في الشاش ع يد بوها...
ع خشة نسيبه وهي تقول:شن صارلك...وشبحت للمرايا لقتها مكسورة...شبحت ليده وقالت بقلق...ماتبيش خياطه!
سارة:لالا مش عميق...
نسيبه:متأكدة!؟.
هيثم:لالا ماتبيش..
نسيبه:انت ادرى...جاته وقعمزت جنبه وشدت يده وهي تقول...اسفه..سامحني..لكن والله اللي سمعته خلا عقلي يوقف..
شد على يدها وقال:معذورة...طبيعي تفكري هكي..لكن في النهايه انتي تعرفي ولد خوك كويس اغلب وقته معاك انتي وتعرفي اخلاقه..
نسيبه نزلت عيونها وقعدت ساكته..
هيثم:المهم..توا...الوضع حيولي اصعب من قبل..اللي حتواجهوه هالمرة اقسى بهلبه....استعينوا بالله ولاتعجزوا...
واني اولكم...في ناس مرت بإبتلاءات اقوى من هكي...
وماتنسوش يعطي الله اشد المعارك لأقوى جنوده...وهو لايكلف نفسا الا وسعها...عارفنا حنحتملوا وحنعدوا هالفترة مهما كانت صعبه..وصدقوني حنطلعوا منها بخير كبير...
اصبروا واحسنوا الظن بالله...تمام؟
شبحوله الزوز وهزو روسهم بإيجاب..
هيثم:ماتنسوش..انتم من بعد الله في ظهري...اني نقوى بيكم حتى انتم....
نسيبه قامت يده وباستها...
هو ابتسم وجبد يده وحطها ورا راسها وضمها لحضنه..
ناضت سارة وقعمزت جنبه من الجهة التانيه ورفعت ذراعه وخشت في حضنه وهو حاوطها بذراعه وقعد يضحك..
نسيبه؛نغاره..
سارة زادت خشت في حضن بوها وقالت:بابا..
نسيبه:خويا..
هيثم قعد يضحك وهو يقول:وين الصغيرات؟!
نسيبه:فتحتلهم ع الرسوم..
هز راسه وتنهد وهو يقول:يفرج الله...يفرج الله..
▪▪▪▪▪
◇لما نتذكر هديكا اليوم...تلقائيا نحس بالمشاعر اللي حسيتهم وقتها...مشاعر مختلطه...حزن خوف ألم..ضحك..امل...كنت واني نحاول نقويهم من داخلي نطلب من ربي يقويني...كنت نقول تحملوا...ونسأل في نفسي هل ياترى حنقدر نتحمل...ونقول هالفترة حتعدي..ونسأل في نفسي ياترى كيف حتعدي!؟....كل التناقضات عشتها هديكا الفترة...بس كان يقيني بالله هو هو ماتغيرش....لأني كنت نجاوب في نفسي ونقول....
لاحول ولاقوة الابالله....ولاتيأس من روح الله انه لاييأس من روح الله الا القوم الكافرون...
▪▪▪▪▪
"هادوا اللي يقولوا عليهم ناس راقيه ومحترمين..ياما تحت السواهي دواهي"
عفاف وهي تشبحلها بحده:انتي تسكتي خير..
سجى ارتبكت وشبحت للتلفزيون وهي ساكته..
تهاني:اللهم لاشماته...قداش كان هازي علينا ويعامل فينا بإحتقار..كما تدين تدان..
عفاف:شن تقولي انتي!! ع الأقل راعي انه خو صاحبتك!
تهاني قعدت ساكته وهي مضايقه...
عفاف شبحت للتلفزيون وهي تقول:ربي يكون في عونهم مساكين ياما بيسمعوا ويشوفوا...
..............
"هادوا العيله اللي حضرت جنابك كنت تبي تاخد منهم!"
راجح:خلاص يام موضوع وتم وراح ع حاله علاش مازال تفتحي فيه..
بوه:عندها الحق امك..سبحان الله ربي يبيلك الخير اللي خلا الموضوع يتعرقل بش مايصيرش منه..
راجح:نصيب يابوي نصيب..
عواطف:والحمد لله اللي ماخلاهاش من نصيبك..
جيهان وهي تشرب في النسكافيه:امم مادام جيرانهم جماعة مخدرات طبيعي يطلع ولدهم هكي..
راجح قعد ساكت وهو مضايق ..
جيهان قربتله وقالت في وذنه:شن صار في هديكا البنت؟
قاوم راجح بكل قوته الإبتسامه اللي كانت بترتسم ع وجهه لما جت سيرة دانيه وهو يقول؛قاعده تحت المراقبه..وانتم في المدرسه خلو عيونكم مفتوحه..
جيهان:عيوني عليها في المدرسه عشرة على عشرة..
راجح"ياريتني مكانك"...
..................
"خو طالبه عندي...الحق البنت اخلاقها عاليه ومحترمه جدا"
عيشه:البطن تجيب صباغ ودباغ ياوليدي..
جمعه وهو شاد فنجان القهوة:تقريبا هما جيران حوش عمي خالد..
عيشه:هكي سمعت حتى اني...المهم توا خلينا منهم وقولي مازال ماتبيش تحدد موعد العرس..
رشف من قهوته ورفع حواجبه ونزلهم"بمعنى مازال"
عيشه:سلم وليدي ماطولهاش بالكثير الصيف خليها باهي؟
هز راسه بإيجاب وهو يشوف للتلفزيون..
وامه تشرب في قهوته وهي تشبحله بريبه...خايفه منه يسيب جيهان في أي لحظه...
...............
"ياناري عليك ياوليد اختي قداش بتتحمل لاتتحمل كل مصيبه احرف من التانيه..ياربي رحمتك بيه يارب"...
سدينه ودموعها في عيونها:يفرج الله ياوخيني يفرج الله..
ودانيه تشبحلها ودموعها ينزلوا .
ماجده وهي تبكي :ردوا بالكم ع الاولاد كيف البنات بالزبط..هاريتوا بعيونكم الفضيحه وحده مافيش فرق بين بنت وولد..
فجأة طق باب الحوش..
ناضت دانيه بش تفتحه...
وصلت فيه وفتحاته خش رشيد ومشي طول..
فات من قدام الصاله شافاته ماجده وبإنفعال قالت:وين كنت!؟
سدينه ودانيه شبحولها بإستغراب..
رشيد بتوتر:في الشارع مع الاولاد..
ماجده؛وشن دير لهالوقت! اللي في عمرك توا مقعمزين لكتاباتهم يقروا قرايتهم مش يدوحوا في الشوارع...
رشيد مرر نظره ع سدينه ودانيه وهو مخلوع..
سدينه:برا لدارك برا..
هو شبح لماجده بعدين مشي .
ماجده:ياسدينه رد بالك عليه ياوخيتي هالوقت يخوف افتحوا عيونهم عليه ماتغفلوش عنه دوروا وراه اعرفوا صحابه...راهو كان خليتوه هكي يضيع..
سدينه بخوف:ربي يجيرنا..
ماجده وهي تبكي:يارب...يارب يجيركم من العار والفضايح..
ودانيه تشبح لماجده وتفكر كلامه...حساته مش مجرد كلامه قالاته من الحرارة بسبب اللي صار لولد ولد اختها...وشكت تكون شايفه حاجه على رشيد مش قادره تقولها....
•••••••°°°°°°•••••••°°°°°°••••••
مقعمزة في الصالون..
تتفرج ع مسلسل وفي جنبه صفرة فيها شكلاطه وفنجان نسكافيه...
فجأة رن تليفونها بنغمة رساله..
خداته من ع الطاوله وفتحت الرساله...
(حوشك مليح لكن السور متاعه مش عالي شفت وانتي تدهوري فيه...)
وخرت شعرها للخلف وهي تشوف للشاشه بصدمه وترعش مع بعضها..
ناضت من مكانها ومشت تجري للرواشن وقعدت تسكر فيهم بقوة وهي ترجف من خوفها...
بعدين مشت تجري للكوجينه سكرت بابها الخارجي بإحكام..
ومشت خدت موس من شباك الماعين وطلعت بيه من الكوجينه وولت قعمزت ع الصالون وهي ترعش مع بعضها..
جتها رساله تانيه..
خدت التليفون وفتحها..
(راجلك مهناش شن رايك نجي نهدرز ونطير عليك الكساد لين هو يروح ياام العيون الزرق)
رتاج بنبرة مرتعشه:شن تبي مني علاش ادير فيا هكي علاش شن درتلك...حسبي الله ونعم الوكيل فيك حسبي الله ونعم الوكيل..
فجأة...
انفتح باب الحوش..
ناضت وقفت وهي تشوف لمدخل الصالون...
"رتاج"..
حطت يدها ع صدرها وزفرت براحه بعدين قالت:اني هني في الصالون..
استاقظت للموس في يدها...بسرعه دساته بين وسايد الكنبه.
هو خش عليها وقال:شن جو..
رتاج شبحتله وابتسمت بربكه وقالت:ياهلا...
عادل قرب منها وقال:خيره وجهك اصفر؟
رتاج:لاشي عادي..
عادل مسح ع شعرها وقال:باهي بري وتي روحك بنطلع نعشيك برا اليوم..
هزت راسها وقالت وهي مبتسمه بتوتر:باهي ثواني ونكون واتيه..
خدت تليفونها والصفره ومشت للكوجينه..
وهو قعد معاها بعيونه لين ادرقت عنهم بعدين مشي لدار النوم وهو مبتسم...
هي بعد طلعت من الكوجينه ولت للصالون لقاته مهناش مشت تجري خدت الموس وين وماحطاته وولت بيه للكوجينه...
•••••••°°°°°°°•••••••°°°°°°•••••••
"الواطي...الندل...الديوث...الديوث"
وضرب برجله الطاوله طيحها باللي عليها..
عبد الملك:حتى البنت اللي حاميت سكتت ورنبت..جت ع راسك انت بس..مالك بأمها انت خليت روحك في حالك..شوف وين وصلت لروحك لما جيت بدير خير..
زياد وهو يغلي من الغضب:ماتربتيش ع هكي..تربيت على ان بنات الناس هادوا خواتي وعرضي اللي مانرضاشي على عرضي مانرضاشي عليهم...هكي تربيت....
عبدالملك:وشن جنيت قولي...؟.
زياد قعمز ع الكنبه بهده وحط ايديه ع جبهته وقعد يبكي..
وعبد الملك يشبحله بأسف وهو يحرك في راسه يمين ويسار...
🍁🍁🍁🍁
"حابسه روحها فهالدار وخلاص من نهار سيبت كليتها"
=بنتك معيونه ياانتصار...جمال وعلم وفلوس وحسادها هلبه...
=قلت لبوها يجيبلها مية مرقيه من شيخ ثقة..
=ايه...ارقوها وديما شغلوا القرآن في الحوش..
=أن شاء الله....
🥀واللي يتكلموا عليها...
في دارها مقعمزة ع سريرها وهي ضامه ركابها ليها وتتكلم بالتليفون وتبكي:الواطي المنحط عديم الشرف..
"ماريتش احقر منه المريض هدا ياريتك سمعتي كلام البنات اللي حذروك منه"
رنيم ببكي:مابيتش نصدق ع قرايتي كنت نبي نصفي الماده بش نكمل ونرتاح هالكلب هدا هالكلب...الله يفضحه ياربي..
"لكن والله يوجع زياد"
رنيم:هدا اللي حارق قلبي الوليد خلصني منه...لتوا صوته في وداني وهو يقولى بري بري ماتخلي حد يشوفك...وشهقت بالبكي وحطت يدها ع فمها بش تكتم صوتها ومايسمعه حد..
🥀ومجبورة تقعد كاتمه صوتها ومايسمعه حد حني في مجتمع مايرحمش....لو طلعت وتكلمت حتتشوه سمعتها ويبدوا يألفوا عليها في القصص والروايات وحتضيع سمعة عيلتها معاها...حتى لو ماكانش ليها ذنب..
بس هدا مجتمعنا مع الأسف...يرغم الواحد احيانا يكون شيطان أخرس...بالذات البنت....المرأة...
تسكت لو تعرضت لنفس الموقف ماتتكلمش لان ما فيش من ياخد حقها بالعكس حيتهموها هي المظلومه المجني عليها..🥀
••••••°°°°°°°•••••••°°°°°°•••••••
الساعه التاسعه ليلا...
يتمشوا الزوز ع الكورنيش وهما يهدرزوا..
عادل:قوليلي مش محتاجه شي بخصوص القرايه ماتبي شي..كورسات حاجات زي هادي..
رتاج بضحكه:لالا قرايتنا ساهله ماتبيش كورسات..
عادل بإبتسامه:يعني امورك ماشيه تمام؟
رتاج بإبتسامه:ايه..الحمد لله..
عادل:اممم..باهي بنقولك من الاسبوع الجاي بنبدا نمشي لحوشي التاني...بنقسم ايام الاسبوع بينك وبينهم يوم ليك ويوم ليهم..
رتاج وقفت و وقالت:معناها في اليوم اللي بتمشيلهم فيه اني نقعد عند اهلي..
عادل:لا..حتقعدي في حوشك..
رتاج:بروحي!؟.
ابتسم وقال:طبعا لا..هما يجوك يقعدوا عندك..
هي ابتسمت وقالت:كان هكي تمام..
ضحك عادل وقال:مش عارف كيف بنتحمل غيابك عني؟..
هي ابتسمت بخجل ومشت...وهو مشي معاها وهو يضحك...
ومن بعيد بمسافه كان جهاد يمشي وراهم وعيونه تشوفلهم بحقد كبير...
كان يلقى ينهي امر عادل حالا...ويظفر برتاج اللي قاعد يعض في صوابعه ندم لأنه فرط فيها...
••••••°°°°°°•••••••°°°°°°••••••
الساعه الحادية عشر ليلا..
مقعمز برا في الجنان...
وهو يشوف لسمي السودا....ويعد في نجومه بعيونه...
ويفكر....
في كل شي صاير معاه....
طلاق بوه وامه....نقمة ملاك على نسيبه وكيف يقدر يحميها منها....ومصيبة زياد يبي يدير فيها اي شي يريح بيه بال الراجل اللي يعزه ويحترمه وبدي يشوف قدوة ومثل أعلى...
نزل راسه وشاف لتليفونه وهو يتمنى تجيه المكالمه اللي ليه ايام يراجي فيها..
......وفي حوش جارهم.......
كان الكل فايق ماعدا البنات الصغار...
نسيبه مقعمز في الصاله حدا الروشن وهي تتأمل في السمي وتفكر في حالهم...
وهيثم مقعمز في داره ع صلايته يقرا في القرآن...
وبنت خوها...
في دارها راقده في سريرها وهي تسبح وتذرف في الدموع في صمت...
وسط هالهدوء السائد في الحوش...
كان صوت قطرات المية اللي تصب من حنفية المطبخ ع سطح الحوض الستيل مسموع في الأرجاء...
قطرة...قطرة تنزل.....
والهدوء مازال قائم....هدوء....هدوء تام.....
....هدوء خلا ساره برغم الضجيج القائم داخلها تاخدها سنة "اول النوم".....وكانت خلاص حترقد....
بس....
صوت رنين هاتفها خلاها تنوض تقعمز مفزوعه..
مش بس هي...
حتى نسيبه سمعتاه والتفتت وشبحت جهة ممر الديار..
وهيثم وهو يقرا في القرآن..وقف قرايه شويه لما سمعه وفيسع رجع يقرا...
....هي خدت الهاتف من ع الكامدينو....
وشافت الشاشه...لقت المتصل رقم بدون اسم....
قعدت تشبحله هلبه....
مش متعوده ترد ع الأرقام الغريبه...
بس هالمرة كان في شي في داخلها يقول...
"ردي"
وسمعتله...وفتحت الخط...وحطت التليفون ع وذنها...
قعدت تسمع في صوت انفاس...
عقدت حواجبها...وقلبها بدي يدق بقوة....
حاولت تتكلم ماقدرتش....جت بتسكر....
بس الصوت اللي سمعاته خلاها تتراجع..
"سارة"
سارة بصدمه:زياد!
"سارة..."
سارة نزلت من السرير وجت للباب وهي تقول:زياد وينك..
فتحت الباب وهي تقول...وينك ياخوي وينك..
نسيبه سمعتها شن قالت ناضت تجري..
وهيثم سكر المصحف وناض حطه ع الطاوله ومشي طلع من الدار وهو يرعش بكل مافيه..
بنبرة باكيه رد زياد
"اني متصل بيك بش نقولك حاجه وحده...اقسم بربي ياسارة اقسم بربي ياأختي مادرتها ورب العزة ورب الكون ياسارة.."
سارة وهي تبكي:عارفه عارفاتك والله عارفه ياوخيي والله..
نسيبه وصلت فيها وهي حاطه ايديها ع فمها بصدمه ودموعها ينزلوا..
"سارة..قوليلهم...خوي مايديرهاش...قوليلهم خوي اللي مايرضاشي عليا مايرضاه لغيري".
كيف جت سارة بترد..
ماحستش الا والتليفون اختفي من يدها..
شافت جنبها لقت بوها حاط التليفون ع وذنه ويتكلم وهو بنبرة مرتجفه..
"زياد...بابا"
....ارتسمت ع وجه زياد ملامح الصدمه....
"زياد بابا تسمع فيا...يابابا ارجوك رد عليا"
زياد تصلب في مكانه مش قادر يدير اي حركه مش قادر يرمش حتى الرمش..
...هيثم:باهي يابابا ماتردش اسمعني بس وماتردش..اني عارفك واثق فيك ومتأكد من تربيه امك ليك..عارفك ولدي راجل...حتى لو ضيعت طريقك تقعد راجل..معدنك ذهب يابابا...اسمعني بابا...سلم نفسك..برا سلم نفسك ووعد مني ليك يابابا نقعد وراك في ظهرك لين تثبت برائتك..اني اني بيدي نجيبها يابابا...مستعد نعطي روحها ع خاطرها...غير انت يابابا تعال وواجه واثبت للكل ان راجل يواجه ومايهربش ويتحمل مسؤولية اخطائه....واني نتحمل معاك كل شي يابابا...
🍁زياد قلبه قريب يطلع من صدره...حس بالبروده تسللت من اطرافه الي اعمق شي فيه...
كان يبي يرد...خاطره يرد...بس مش قادر..
لين سمع بوه قاله بنبرة توسل باكيه..
"رد يابابا رد بالله رد وريح قلبي ياولدي ارجوك"
زياد طول حول التليفون وفكه وطلع منه الشفره..
ولوحها في الدفايه....وقعد يشبحلها وهو يعض فيده اللي شاد بيها التليفون ويبكي بقوة...
....هيثم:الو...الو...شاف للتليفون لقي المكالمه منتهيه بس مازال متأمل يسمع صوت ولده ..
رده لوذنه مرة تانيه وقال..زياد الو...زياد..
سارة بنبرة باكيه:صكر..
هيثم شبحلها ونزل التليفون من ع وذنه بعدين شبحله وهو يفكر قال ....اكيد الشرطه حيعرفوا مكانه من الرقم اللي كلمنا بيه..
ومشي بسرعه لداره..
نسيبه ببكي:شن قالك؟!
سارة شبحت لعمتها وقالت وهي تبكي:قالي وهويحلف يااختي ورب العزة مادرتها..
حطت نسيبه يدها على فمها وغمضت عيونها بشده وهي تبكي..
ع طلعت هيثم وفيده كبوطه..
سارة:وين ماشي بابا؟.
هيثم وهو يمشي بسرعه:للمركز...
هما لحقوه...لقوه يلبس في كندرته..
بعدين فتح الباب وطلع...
🍁🍁🍁🍁
واقف فم باب الدار يشبحله وهو مقعمز وحاط راسه ع الكنبه وهو يبكي بصمت...
لأول مرة في حياته يتعاطف مع حد لهالدرجه...
ولهالسبب خدي قراره...
ولف ومشي للدروج نزل لوطا..
وصل للدور الأول في الحوش الخشبي اللي هما قاعدين فيه في وحده من مزارع مدينة ورشفانه..
ومشي طلع برا الحوش..
وهو يتصل برقم يعرف صاحبه..
حط هاتفه "البيلا" ع وذنه وقعد يراجي في الرد..
لعند ماانفتح الخط...
"ايوه حمامه"
عبدالملك:هاه كناري...اسمع عطيه القش وقوله لافي من يطلع ولافي من يخش..
"تم تم..."
عبدالملك:منور كناري...تصبح...وسكر طول...
يتبع°°••
